ଭୁବନେଶ୍ୱର, ଅକ୍ଟୋବର ୨୮(ଲୋକାଲ ୱାୟାର): ରାଜ୍ୟ ସମବାୟ ବ୍ୟାଙ୍କରେ ଗୋଟିଏ ପଦବିରୁ ବିଦା ହୋଇଥିବା ଜନୈକ ବ୍ୟକ୍ତିଙ୍କୁ ପୁଣି ଥରେ ନିଯୁକ୍ତି ଦିଆଯାଇଥିବାରୁ ଏଥିରେ ହସ୍ତକ୍ଷେପ କରିବାକୁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଜଣାଇଛନ୍ତି ବ୍ୟାଙ୍କର ପୂର୍ବତନ ସଭାପତି ଅକ୍ଷୟ କୁମାର ମହାନ୍ତି ।
ସେ ଦର୍ଶାଇଛନ୍ତି ଯେ, ୨୦୧୫ ଜୁଲାଇରୁ ୨୦୨୦ ଜୁଲାଇ ୨୮ ତାରିଖ ପର୍ଯ୍ୟନ୍ତ ସେ ଓଡ଼ିଶା ରାଜ୍ୟ ସମବାୟ ବ୍ୟାଙ୍କର ସଭାପତି ଭାବେ କାର୍ଯ୍ୟ କରିଥିଲେ ।
ଗତ ଜୁଲାଇ ମାସରେ ସେ ବ୍ୟାଙ୍କ ଅଧୀନରେ ଥିବା ପ୍ରାଥମିକ କୃଷି ସମବାୟ ସୋସାଇଟିର କମ୍ପୁ୍ୟଟରୀକରଣ କାର୍ଯ୍ୟକୁ ଅନୁଧ୍ୟାନ କରିବାରେ ଜାଣିବାକୁ ପାଇଥିଲେ ବ୍ୟାଙ୍କର ଆଇଟି ବିଶେଷଜ୍ଞ ଭାବେ ସେତେବେଳେ ଜନୈକ ବ୍ୟକ୍ତିଙ୍କୁ ନିଯୁକ୍ତି ଦିଆଯାଇଥିଲା ।
ତେବେ ତାଙ୍କ ପ୍ରକୃତ ବୟସ ଓ ଅଭିଜ୍ଞତା ସମ୍ପର୍କିତ ତଥ୍ୟ ତାଙ୍କ ଠାରୁ ଲୁଚାଇ ବ୍ୟାଙ୍କ ତକ୍ରାଳୀନ ପରିଚାଳନା ନିର୍ଦ୍ଦେଶକ ଡି.କେ. ଜେନା ଏବଂ କୋଅପରେଟିଭ୍ ସୋସାଇଟି ରେଜିଷ୍ଟ୍ରାର ଡ. ତ୍ରିବିକ୍ରମ ପ୍ରଧାନ ଏହି ନିଯୁକ୍ତି ଦେଇଥିଲେ ।
ବିସ୍ମୟର କଥା ଯେ ତାଙ୍କୁ ଆଇଟି ବିଶେଷଜ୍ଞ ଭାବେ ନିଯୁକ୍ତି ଦିଆଯାଇଥିଲେ ମଧ୍ୟ ତାଙ୍କର ନା ହାର୍ଡୱେର ନା ସଫ୍ଟୱେର ବାବଦରେ କିଛି ବି ଅଭିଜ୍ଞତା କି ଶିକ୍ଷାଗତ ଯୋଗ୍ୟତା ଥିଲା ।
ବୟସ ତାଙ୍କର ପାଖାପାଖି ୬୯ ହୋଇଥିବା ବେଳେ ଶିକ୍ଷାଗତ ଯୋଗ୍ୟତା ଥିଲା କେବଳ ବିଜ୍ଞାନରେ ସ୍ନାତକୋତ୍ତର ।
ଏହାସତ୍ତ୍ୱେ ତାଙ୍କୁ ମାସିକ ୩ ଲକ୍ଷ ଟଙ୍କା ଦରମା ଏବଂ ଅନ୍ୟାନ୍ୟ ଭତ୍ତା ସହ ନିଯୁକ୍ତି ଦିଆଯାଇଥିଲା । ବ୍ୟାଙ୍କର ଆଇଟି ସମ୍ପର୍କିତ କାର୍ଯ୍ୟରେ ତାଙ୍କର ଅବଦାନ ଥିଲା ନୈରାଶ୍ୟଜନକ ।
ଏହି ସ୍ଥିତି ଅନଧ୍ୟାନ କରିବା ପରେ ତାଙ୍କୁ ଆଇଟି ବିଶେଷଜ୍ଞ ପଦରୁ ସଭାପତି ଅନ୍ତର କରିଥିଲେ ଏବଂ ସରକାରୀ ନିୟମକୁ ଅଣଦେଖା କରି ତାଙ୍କୁ ନିଯୁକ୍ତି ଦେଇଥିବା ଅଫିସରମାନଙ୍କ ବିରୋଧରେ ଉଚିତ କାର୍ଯ୍ୟାନୁଷ୍ଠାନ ପାଇଁ ସୁପାରିସ କରିଥିଲେ ।
ତେବେ ଗତ ୨୬ ତାରିଖରେ ବ୍ୟାଙ୍କର ପ୍ରଶାସକଙ୍କ ସୁପାରିସରେ ବର୍ତ୍ତମାନର ପରିଚାଳନା ନିର୍ଦ୍ଦେଶକ ତାଙ୍କୁ ପୁନର୍ବାର ସେହି ପୂର୍ବୋକ୍ତ ପଦରେ ନିଯୁକ୍ତି ଦେଇଛନ୍ତି, ସମାନ ଦରମା ଏବଂ ସମାନ ସୁବିଧା ସହ ।
ଆବଶ୍ୟକ ଶିକ୍ଷାଗତ ଯୋଗ୍ୟତା ନଥିବା, ଦକ୍ଷତାର ଅଭାବ ଥିବା ଏବଂ ଅଧିକ ବୟସ ହୋଇଥିବା ଜଣେ ବ୍ୟକ୍ତିଙ୍କୁ ତାଙ୍କ ପଦରୁ ଅନ୍ତର କରାଯାଇଥିବା ବେଳେ ପୁନର୍ବାର କିପରି ସବୁକିଛି ଅନୁଧ୍ୟାନକୁ ଅଣଦେଖା କରି ସେହି ସମାନ ପଦରେ ନିଯୁକ୍ତି ଦିଆଯାଇଛି ବୋଲି ପୂର୍ବତନ ସଭାପତି ଅକ୍ଷୟ ମହାନ୍ତି ପ୍ରଶ୍ନ କରିଛନ୍ତି ।
ଏଥିରେ ତୁରନ୍ତ ହସ୍ତକ୍ଷେପ କରି ବ୍ୟାଙ୍କର ଦୁର୍ନୀତିକୁ ରୋକିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ତାଙ୍କ ଚିଠିରେ ଅନୁରୋଧ କରିିଛନ୍ତି ଶ୍ରୀ ମହାନ୍ତି । ଏ ସମ୍ପର୍କରେ ରାଜ୍ୟ ସମବାୟ ବ୍ୟାଙ୍କ କତ୍ତୃପକ୍ଷ ଅଥବା ନିଯୁକ୍ତି ପାଇଥିବା ଅଧିକାରୀଙ୍କ ପ୍ରତିକ୍ରିୟା ମିଳିପାରି ନାହିଁ।
ଲୋକାଲ ୱାୟାର
Leave a Reply