ଧାନ ଅଭାବୀ ବିକ୍ରି ଯୋଗୁଁ ଚାଷୀ ଚିନ୍ତିତ

କେନ୍ଦ୍ରାପଡ଼ା, ଡିସେମ୍ବର ୯(ଲୋକାଲ ୱାୟାର): ସରକାର ଧାନ କିଣିବାରେ ବିଳମ୍ବ କରୁଥିବାରୁ କିଛି ମିଲର ଓ ଏଜେଂଟ କମ୍ ଦରରେ ଚାଷୀଙ୍କ ଠାରୁ ଧାନ କିଣି ନେଉଛନ୍ତି । ଫଳରେ କେନ୍ଦ୍ରାପଡ଼ା ଜିଲ୍ଲାର ଚାଷୀମାନେ କ୍ଷତି ସହୁଛନ୍ତି ।

ଓଡିଶା ରାଜ୍ୟ ଯୋଗାଣ ନିଗମ (ଓଏସସିଏସପି) ପ୍ରଥମ ପର୍ଯ୍ୟାୟରେ କେନ୍ଦ୍ରାପଡ଼ା ଜିଲ୍ଲାର ଚାଷୀଙ୍କ ଠାରୁ ୮୦ ହଜାର ମେଟ୍ରିକ ଟନ ଧାନ କିଣିବେ ।

୧୧୮ଟି ପ୍ରାଥମିକ କୃଷି ସମବାୟ ସମିତି ଡିସେମ୍ବର ୨୮ରୁ ଧାନ କିଣି ଜିଲ୍ଲାର ୨୭ ମିଲରଙ୍କୁ ହସ୍ତାନ୍ତର କରିବେ । ମିଲର ଆମକୁ ଚାଉଳ ଦେବେ ।

ଏପର୍ଯ୍ୟନ୍ତ ମାତ୍ର ୪୧,୫୬୮ ଚାଷୀ ଧାନ ବିକିବା ପାଇଁ ପଞ୍ଜିକରଣ କରାଇଛନ୍ତି । ଅଭାବୀ ବିକ୍ରି ରୋକିବାକୁ ଉଦ୍ୟମ ହେଉଛି ବୋଲି ଜିଲ୍ଲା ଯୋଗାଣ ଅଧିକାରୀ ପ୍ରଶାନ୍ତ କୁମାର ଗନ୍ତାୟତ କହିଛନ୍ତି ।

ନଭେମ୍ବର ଶେଷ ସପ୍ତାହରୁ ଅମଳ ସରିଥିବା ବେଳେ ଡିସେମ୍ବର ୨୮ରୁ ଧାନ କିଣିବା ପାଇଁ ସରକାର ନେଇଥିବା ନିଷ୍ପତିକୁ ବହୁ ଚାଷୀ ସମାଲୋଚନା କରିଛନ୍ତି ।

ଧାନ ବିକ୍ରି ପାଇଁ ଡିସେମ୍ବର ୨୮ ଯାଏଁ ଅପେକ୍ଷା କରିବା ସମ୍ଭବପର ନୁହେଁ । ଗତ ସପ୍ତାହରେ ୪୫ ଶହ ଟଙ୍କାରେ ତିନି କ୍ୱିଂଟାଲ ଧାନ ବିକିଛି ।

ବ୍ୟବସାୟୀମାନେ ଗାଁରୁ ଧାନ କିଣି ନେଉଛନ୍ତି ବୋଲି କହିଛନ୍ତି ଜମ୍ବୁ ଗାଁର ଚାଷୀ ଅଶୋକ ମଣ୍ଡଳ ।

ଏ ବର୍ଷ ପ୍ରାୟ ୨୦ କ୍ୱିଣ୍ଟାଲ ଧାନ ଅମଳ କରିଥିଲି । ୧୦ କ୍ୱିଣ୍ଟାଲ ଧାନ ବିକ୍ରି ପାଇଁ ଖଳାରେ ରଖିଛି ବୋଲି ଗୋପାଇ ଗାଁର ନଗେନ୍ଦ୍ର ମଲ୍ଲିକ କହିଛନ୍ତି ।

କଜଳପାତିଆ, ଜମ୍ବୁ, ସୁନୀତି, କଂସାରବଡ଼ଦାଣ୍ଡୁଆ, ବତୀଘର, ବଡଟୁବି, ସାନଟୁବି ଓ ଅନ୍ୟ ନଦୀକୂଳିଆ ଗାଁକୁ ପୋଲ ନଥିବାରୁ ଡଙ୍ଗା ହିଁ ଭରସା ।

ବେଣକନ୍ଧ, ରାମନଗର ଓ ମହାକାଳପଡା ମଣ୍ଡିକୁ ଭଙ୍ଗାରୁଜା ଡଙ୍ଗାରେ ଓଜନିଆ ଧାନ ବସ୍ତା ଆଣିବା ଅପେକ୍ଷା ଗାଁକୁ ଆସୁଥିବା ବ୍ୟବସାୟୀଙ୍କୁ ବିକ୍ରି କରୁଛୁ ବୋଲି ବତୀଘର ଗାଁର ଚାଷୀ ହରିପଦ ଦାସ କହିଛନ୍ତି ।

ଲୋକାଲ ୱାୟାର