ନକଲି ମସଲା, ଘିଅ ପରେ ଏବେ ଏକ କ୍ୱିଣ୍ଟାଲରୁ ଅଧିକ ସିନ୍ଥେଟିକ୍ ପନିର ଜବତ

କଟକ, ଡିସେମ୍ବର ୩୦(ଲୋକାଲ ୱାୟାର): କଟକ ସହରରେ ବିଗତ କେଇ ଦିନରେ ନକଲିି ତଥା ଅପମିଶ୍ରିତ ମସଲା, ଖାଇବା ତେଲ, ଘିଅ, ସିମେଣ୍ଟ, ସୋୟାବିନ୍, ହଳଦୀ ଗୁଣ୍ଡ ଇତ୍ୟାଦି ଜବତ ହୋଇ ଚାଲିଥିବା ବେଳେ ବୁଧବାର କମିଶନେରଟ ପୁଲିିସ ଓ ସିଏମସିର ମିିଳିତ ଟିମ୍ ଓଏମପି ଛକରେ ଏକ ବସ୍ ଉପରେ ଚଢ଼ାଉ କରି ଏକ କ୍ୱିଣ୍ଟାଲରୁ ଅଧିକ ପରିମାଣର ସିନ୍ଥେଟିକ୍ ପନିର ଜବତ କରିଛି ।

କୋଲକାତାରୁ ଏକ ବସରେ ସିନ୍ଥେଟିକ୍ ପନିର ଆସୁଥିବା ଖବର ପାଇଁ ଚାଉଳିଆଗଞ୍ଜ ଥାନା ପୁଲିସ ଏହି କାର୍ଯ୍ୟାନୁଷ୍ଠାନ କରିଛି ।

ଗ୍ଳିସେରିନ୍, ବିଭିନ୍ନ ରାସାୟନିକ ଦ୍ରବ୍ୟ, ଅପମିଶ୍ରିତ କ୍ଷୀର ଏବଂ ୟୁରିଆକୁ ମିଶାଇ ଏଭଳି ସିନ୍ଥେଟିକ୍ ପନିର ପ୍ରସ୍ତୁତ କରାଯାଇଛି, ଯାହାକି ମଣିଷ ପାଇଁ ଅତ୍ୟନ୍ତ ହାନିକାରକ । କ୍ରମାଗତ ଏଭଳି ପନିର କେହି ଖାଇଲେ କିଡନୀ ଓ ଯକୃତ ଉପରେ ତାହା ଖରାପ ପ୍ରଭାବ ପକାଇବା ସହ ବିଭିନ୍ନ ରୋଗରେ ମଧ୍ୟ ଆକ୍ରାନ୍ତ ହେବାର ଆଶଙ୍କା ରହିଛି ।

ପୂର୍ବରୁ ଜଗତପୁର ଥାନା ଅଞ୍ଚଳରେ ପୁଲିସ ଏକ ନକଲି ସିମେଣ୍ଟ କାରଖାନା ଠାବ କରିଥିଲା ।

ସେଠାରୁ ବିପୁଳ ପରିମାଣର ନିମ୍ନମାନର ସିମେଣ୍ଟ ଏବଂ ବିଭିନ୍ନ ଯନ୍ତ୍ରାଂଶ ଜବତ ହୋଇଥିଲା ।

ଗତ ଡିସେମ୍ବର ୨୨ ତାରିଖରେ ବାଦାମବାଡ଼ି ଥାନା ଅନ୍ତର୍ଗତ ପିଠାପୁରରେ ଏକ ଘରେ ନକଲି ଘିଅ କାରଖାନା ପୁଲିସ ଠାବ କରିଥିଲା ।

ସେଠାରୁ ପ୍ରାୟ ଏକ ଟ୍ରକ ଲୋଡ ଘିଅ ଜବତ ହୋଇଥିଲା । ଏଥିରେ ଦାଲଦା, ବନସ୍ପତି, ପାମୋଲିନ ତେଲ, ବିଭିନ୍ନ ରାସାୟନିକ ଦ୍ରବ୍ୟ, ରଙ୍ଗ, ପ୍ୟାକେଜିଂ ମେସିନ ଇତ୍ୟାଦି ମଧ୍ୟ ଜବତ ହୋଇଥିଲା ।

ସେହିପରି ଗତ ଦେଢ଼ ମାସ ମଧ୍ୟରେ କଟକର ମାଲଗୋଦାମ ଓ ଜଗତପୁର ଥାନାଞ୍ଚଳରେ ବିଭିନ୍ନ ନକଲି ଖାଦ୍ୟଦ୍ରବ୍ୟର କାରବାର ପଦାକୁ ଆସିଛି ।

ଲୋକାଲ ୱାୟାର