ନଦୀ ମାନଙ୍କରେ ଜଳ ସ୍ତର ବିପଦ ସଂକେତ ତଳେ, ପର୍ଯ୍ୟାୟ କ୍ରମେ ବନ୍ଦ ହେବ ହୀରାକୁଦର ୧୦ଟି ଗେଟ

ଭୁବନେଶ୍ଵର ,ଅଗଷ୍ଟ ୧୬ (ଲୋକାଲ ୱାୟାର ) ଶୁକ୍ରବାର ସବୁ ନଦୀରେ ଜଳ ସ୍ତର ବିପଦ ସଂକେତ ତଳେ ଥିବା ତଥା ଅଧିକ ବର୍ଷାର ସମ୍ଭାବନା ନ ଥିବାରୁ ବନ୍ୟା ଜଳ ନିଷ୍କାସନ ପାଇଁ ଖୋଲା ଯାଇଥିବା ହୀରାକୁଦ ଡ୍ୟାମର ୨୦ ଟି ଗେଟରୁ ଦଶଟି ବନ୍ଦ କରିବାକୁ କର୍ତ୍ତୃପକ୍ଷ ନିଷ୍ପତ୍ତି ନେଇଛନ୍ତି।

ଏବେ କୋଡିଏଟି ଗେଟ ଜରିଆରେ ଜଳ ନିଷ୍କାସନ ଜାରି ରହିଛି । ତେବେ ଦଶଟି ଗେଟ ପର୍ଯ୍ୟାୟ କ୍ରମେ ଆଜି ବନ୍ଦ କରାଯିବ ବୋଲି ବୁର୍ଲା ଠାରେ ଥିବା ଡେମ କଣ୍ଟ୍ରୋଲ ରୁମର ଜଣେ ଅଧିକାରୀ କହିଛନ୍ତି ।

ଗତ ଦୁଇ ସପ୍ତାହ ଧରି ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ମହାନଦୀ ସମେତ ବିଭିନ୍ନ ନଦୀର ଜଳ ସ୍ତର ବୃଦ୍ଧି ପାଇଥିଲା।

ଫଳରେ ବୁଧବାର ହୀରାକୁଦ ନଦୀବନ୍ଧର ଗୋଟିଏ ଗେଟ ଖୋଲାଯାଇଥିଲା। ଗୁରୁବାର ଖୋଲାଯାଇଥିବା ଗେଟ ସଂଖ୍ୟା ୨୦ରେ ପହଞ୍ଚିଥିଲା ।

ରାଜ୍ୟର ଏହି ସର୍ବବୃହତ ଜଳଭଣ୍ଡାରର ସର୍ବାଧିକ ଜଳ ଧାରଣ କ୍ଷମତା ୬୩୦ ଫୁଟ ରହିଥିବା ବେଳେ ଗୁରୁବାର ଜଳସ୍ତର ୬୨୧ ଫୁଟ ଅତିକ୍ରମ କରିବାରୁ ନିଷ୍କାସନ ପାଇଁ ଏହି ଗେଟ ଗୁଡିକ ଖୋଲାଯାଇଥିଲା।

ଲୋକାଲ ୱାୟାର