ନାଗରିକତା ସଂଶୋଧନ ବିଲକୁ ନେଇ ହିଂସାକାଣ୍ଡ, କେମିତି ଅଛନ୍ତି ଦିଲ୍ଲୀରେ ଓଡ଼ିଆ

ଭୁବନେଶ୍ବର, ଡିସେମ୍ବର ୧୬ (ଲୋକାଲ ୱାୟାର): ଭାରତୀୟ ନାଗରିକତା ସଂଶୋଧନ ବିଲକୁ ନେଇ ଦିଲ୍ଲୀରେ ହିଂସାକାଣ୍ଡ ଓ ଜଳାପୋଡ଼ା ଲାଗିରହିଥିବାବେଳେ ସେଠାରେ ରହୁଥିବା ଓଡ଼ିଆମାନେ ଆତଙ୍କିତ ଅବସ୍ଥାରେ ଥିବା ଜଣାପଡ଼ିଛି।

ଦିଲ୍ଲୀ ମହାନଗରୀର ଜାମିଆ ନଗର, ଓଖଲା, ମଥୁରା ରୋଡ, ଆଶ୍ରମ, ସୁଖଦେବ ବିହାର, ନ୍ୟୁ ଫ୍ରେଣ୍ଡସ୍ କଲୋନୀ, ଜସୋଲା ଓ ସରିତା ନଗର ଓ ଏହାର ଆଖପାଖ ଅଞ୍ଚଳରେ ଉତ୍ତେଜନା ଲାଗିରହିଥିବାରୁ ଏହି ଅଂଚଳରେ ରହୁଥିବା ଅନେକ ଓଡ଼ିଆ ସୋମବାର ଘରୁ ବାହାରିନାହାନ୍ତି।

ବସ୍ ଓ ଗାଡ଼ିମଟର ପୋଡ଼ି ସାଙ୍ଗକୁ ପ୍ରବଳ ହିଂସାକାଣ୍ଡକୁ ଦୃଷ୍ଟିରେ ରଖି ଦିଲ୍ଲୀ ମେଟ୍ରୋ ବିଭିନ୍ନ ଷ୍ଟେସନରେ ୧୬ଟି ଗେଟ୍ ବନ୍ଦ କରିଦେଇଛି।

ସେହିପରି ବିଭିନ୍ନ ସ୍ଥାନରେ ରାସ୍ତା ଉପରେ ପୁଲିସ ବ୍ୟାରିକେଡ କରିଦେଇଥିବାରୁ ଗମନାଗମନରେ ସମସ୍ୟା ସୃଷ୍ଟି ହୋଇଛି।

ଏଥିସହିତ ପରିସ୍ଥିତିକୁ ଦେଖି ଦିଲ୍ଲା ସରକାର ଦକ୍ଷିଣ-ପୂର୍ବ ଦିଲ୍ଲୀର ସମସ୍ତ ସ୍କୁଲ ବନ୍ଦ ରଖିଛନ୍ତି।

“ଯଦିଓ ଆଜି ସକାଳୁ ସେଭଳି କୌଣସି ବଡ଼ଧରଣର ଉତ୍ତେଜନା ସୃଷ୍ଟି ହୋଇନାହିଁ। ତଥାପି ମୁଁ ମୋର ଲଜପତନଗରରେ ଥିବା ଅଫିସ୍ ଯାଇନାହିଁ। ମେଟ୍ରୋ ସେବା ସେତେଟା ପ୍ରଭାବିତ ହୋଇନାହିଁ। ତେବେ ଗତକାଲି ଅପରାହ୍ନରେ ଆମ ଇଲାକାରେ ହିଂସାକାଣ୍ଡ ଘଟିଥିବାରୁ ପରିବାରଲୋକ ଡରିଯାଇଥିଲେ,” ବୋଲି କହିଛନ୍ତି ଦିଲ୍ଲୀ ନ୍ୟୁ ଫ୍ରେଣ୍ଡସ୍ କଲୋନୀରେ ରହୁଥିବା ଓଡ଼ିଆ ବ୍ୟାଙ୍କର୍ ଅର୍ଦ୍ଧେନ୍ଦୁ ଦୀକ୍ଷିତ।

“ଗତକାଲି ସଂଧ୍ୟାରୁ ଓଡ଼ିଶାରେ ରହୁଥିବା ମୋର ଶତାଧିକ ଅନେକ ବଂଧୁ ଓ ସଂପର୍କୀୟ ମୋତେ ଏଠାକାର ପରିସ୍ଥିତି ସଂପର୍କରେ ପଚାରିବୁଝୁଛନ୍ତି।

ଓଡ଼ିଶାରେ ରହୁଥିବା ମୋର ପରିବାରଲୋକ ଓ ସାଙ୍ଗସାଥୀ ଚିନ୍ତିତ ରହିବା ସ୍ବାଭାବିକ। ମୁଁ ଏଠାକାର ସୁଖଦେବ ବିହାରରେ ରୁହେ ଓ ନାଗରିକତା ସଂଶୋଧନ ବିଲକୁ ନେଇ ଏହି ଅଞ୍ଚଳରେ ଅସନ୍ତୋଷ ଦେଖାଦେଇଛି।

ତେଣୁ ପରିସ୍ଥିତିକୁ ଓ ଘରଲୋକଙ୍କ ବାରଣକୁ ଦେଖି ଆଜି ମୁଁ ଅଫିସ୍ ଯାଇନାହିଁ,” ବୋଲି କହିଛନ୍ତି ଆଉ ଜଣେ ଓଡ଼ିଆ ଜ୍ଞାନରଂଜନ ଆଚାର୍ଯ୍ୟ।

“ସହରରେ ଶାନ୍ତି ଶୃଙ୍ଖଳା ବଜାୟ ରଖିବାକୁ ଦିଲ୍ଲୀ ପୁଲିସ ଚବିଶ ଘଣ୍ଟା କାମ କରୁଛି। ଧୀରେ ଧୀରେ ପରିସ୍ଥିତି ଶାନ୍ତ ହେଉଛି ଓ ମୋର ଆଶା, ଆହୁରି ଚବିଶ ଘଣ୍ଟା ଭିତରେ ସବୁକିଛି ଠିକ୍ ହୋଇଯିବ”, ବୋଲି ସରିତା ବିହାର ଅଞ୍ଚଳରେ ରହୁଥିବା ଆଉ ଜଣେ ଓଡ଼ିଆ କହିଛନ୍ତି।

ଲୋକାଲ ୱାୟାର