ନାଗରିକତା ସଂଶୋଧନ ବିଲ୍ କୁ ଲୋକସଭାରେ ବିଜେଡିର ସମର୍ଥନ

ନୂଆଦିଲ୍ଲୀ,ଡିସେମ୍ବର ୯(ଲୋକାଲ ୱାୟାର): ଲୋକସଭାରେ ସୋମବାର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଆଗତ କରିଥିବା ନାଗରିକତା (ସଂଶୋଧନ) ବିଲ୍ କୁ ବିଜୁ ଜନତା ଦଳ (ବିଜେଡି) ସମର୍ଥନ ଜଣାଇଥିବା ବିଜେଡି ସଂସଦୀୟ ଦଳ ନେତା ଭର୍ତ୍ତୃହରି ମହତାବ କହିଛନ୍ତି ।

ସେ କହିଛନ୍ତି, ବିଲ ସଂସଦୀୟ କମିଟିକୁ ଯିବା ପୂର୍ବରୁ ଏଥିରେ ତିନୋଟି ସଂଶୋଧନ ପାଇଁ ଦଳ ପକ୍ଷରୁ ପ୍ରସ୍ତାବ ଦିଆଯାଇଥିଲା ।

ଦୁଇଟିକୁ ଗ୍ରହଣ କରାଯାଇଛି । ବିଶେଷ କରି ଉତ୍ତର-ପୂର୍ବାଞ୍ଚଳରେ ଆଦିବାସୀଙ୍କ ସ୍ୱାର୍ଥରକ୍ଷା ନେଇ ବିଲରେ ବ୍ୟବସ୍ଥା କରିବାକୁ ଦଳ ପକ୍ଷରୁ ଦାବି ହୋଇଥିବା ସେ କହିଛନ୍ତି ।

ଲୋକସଭାରେ ଏହି ବିଲ୍ ନେଇ ଅନୁଷ୍ଠିତ ହୋଇଥିବା ଆଲୋଚନାରେ ଭାଗନେଇ ବିଜେଡି ଯାଜପୁର ସାଂସଦ ସର୍ମିଷ୍ଠା ସେଠୀ ଓଡ଼ିଆରେ ଭାଷଣ ଦେଇ କହିଥିଲେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସରକାରଙ୍କ ଧର୍ମନିରପେକ୍ଷତା ଉପରେ ଦୃଢ଼ ବିଶ୍ୱାସ ରହିଛି ।

ଓଡ଼ିଶା ହେଉଛି ମହାପ୍ରଭୁ ଜଗନ୍ନାଥଙ୍କ ଓ ଭକ୍ତ ସାଲବେଗଙ୍କ ପ୍ରଦେଶ । ସବୁ ଧର୍ମଙ୍କ ମଧ୍ୟରେ ସବୁବେଳେ ସଦ୍ଭାବ ଓ ସୌହାର୍ଦ୍ଦ୍ୟ ରହିଆସିଛି । ନାଗରିକତା ସଂଶୋଧନ ବିଲ୍ ପ୍ରତି ବିଜେଡିର ସମର୍ଥନ ରହିଛି ।

ଯେଉଁ ସଂଖ୍ୟାଲଘୁ ଶ୍ରେଣୀର ଲୋକମାନେ ନିର୍ଯ୍ୟାତନାର ଶିକାର ହୋଇ ପାକିସ୍ତାନ, ବାଂଲାଦେଶ ଓ ଆଫ୍‌ଗାନିସ୍ତାନରୁ ଭାରତକୁ ଆସୁଛନ୍ତି ସେମାନଙ୍କୁ ନାଗରିକତା ପ୍ରଦାନ କରିବାର ଏହି ବିଲ୍‌ରେ ବ୍ୟବସ୍ଥା ରହିଛି ।

ବିଜେଡି ର ଏନେଇ କୌଣସି ଆପତ୍ତି ନାହିଁ । ତେବେ ଶ୍ରୀଲଙ୍କାକୁ ଏହି ଶ୍ରେଣୀରେ ସାମିଲ କରିବା ପାଇଁ ଉଲ୍ଲେଖ କରିଥିଲେ ।

ଏହି ପରିପ୍ରେକ୍ଷୀରେ ସେ ମଧ୍ୟ ଏନଆରସି ସମ୍ବନ୍ଧରେ ଉଲ୍ଲେଖ କରିଥିଲେ ।

ଏନଆରସି ନେଇ ସମଗ୍ର ଦେଶରେ ଅନେକ ଆଶଙ୍କା ରହିଛି । ତେଣୁ ଏନଆରସି କାର୍ଯ୍ୟକାରୀ କରିବା ପୂର୍ବରୁ ସମଗ୍ର ଦେଶରେ ବ୍ୟାପକ ଆଲୋଚନା ହେବା ଦରକାର ।

କେନ୍ଦ୍ର ସରକାର ତରବରିଆ ଭାବେ ଏହାକୁ ଲାଗୁ କରିବା ପାଇଁ ପଦକ୍ଷେପ ଗ୍ରହଣ କରିବା ଠିକ୍ ହେବ ନାହିଁ ବୋଲି ସେ ଉଲ୍ଲେଖ କରିଥିଲେ ।

ଲୋକାଲ ୱାୟାର