ନିର୍ବାଚନ ଅନିୟମିତତା ମାମଲାରେ ୩ ଶିକ୍ଷକ ନିଲମ୍ବିତ, ୩ ଜଣଙ୍କୁ କାରଣ ଦର୍ଶାଅ ନୋଟିସ୍

ବାଲେଶ୍ବର, ଡିସେମ୍ବର ୭(ଲୋକାଲ ୱାୟାର): ସଦ୍ୟସମାପ୍ତ ଶ୍ରଦ୍ଧାପୁର ପଞ୍ଚାୟତ ଉପନିର୍ବାଚନରେ ଦୁଇଟି ବୁଥ ଜବରଦଖଲ ଓ ପରିଚାଳନାଗତ ତ୍ରୁଟି ଅଭିଯୋଗରେ ଦାୟିତ୍ବରେ ଥିବା ତିନି ଜଣ ଶିକ୍ଷକଙ୍କୁ ନିଲମ୍ବିତ କରାଯାଇଥିବାବେଳେ ଆଉ ତିନି ଜଣଙ୍କୁ କାରଣଦର୍ଶାଅ ନୋଟିସ୍ ଜାରି କରାଯାଇଛି।

ଗତ ୨୭ ତାରିଖ କନ୍ୟାନଗରୀ ଓ ଖଦିବିଲରେ ପୋଲିଂ ପ୍ରକ୍ରିୟାରେ ସାମିଲ ଥିବା ଏହି ଛଅ ଜଣ ଶିକ୍ଷକଙ୍କ ବିରୋଧରେ ବାଲେଶ୍ବର ଜିଲ୍ଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି।

ଉପନିର୍ବାଚନ ଶାନ୍ତିପୂର୍ଣ୍ଣ ଭାବେ ସରିଥିଲେ ମଧ୍ୟ ବ୍ଲକ୍ କାର୍ଯ୍ୟାଳୟରେ ବ୍ୟାଲଟ୍ ବକ୍ସ ପହଞ୍ଚିବା ପରେ ଉତ୍ତେଜନା ଦେଖାଦେଇଥିଲା।

କିଛି ଲୋକ ବ୍ଲକ୍ କାର୍ଯ୍ୟାଳୟକୁ ଯାଇ ଦୁଇ ବୁଥରେ ଅନିୟମିତତା ଅଭିଯୋଗ କରିଥିଲେ।

ଉପଜିଲ୍ଲାପାଳ ନିଲୁ ମହାପାତ୍ରଙ୍କ ରିପୋର୍ଟକୁ ଭିତ୍ତିକରି ଜିଲ୍ଲାପାଳ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଥିବାବେଳେ ସଂପୃକ୍ତ ବୁଥଗୁଡ଼ିକରେ ନଭେମ୍ବର ୨୯ରେ ପୁଣି ଥରେ ଭୋଟ୍ ହୋଇଥିଲା।

ସୂଚନା ଅନୁସାରେ, ଶ୍ରୀଦୁର୍ଗା ପଲ୍ଲୀଭୂମି ହାଇସ୍କୁଲ ଶିକ୍ଷକ କମଳଲୋଚନ ପାତ୍ର, ଦଇନନିଧିବନ୍ଧୁ ଉଚ୍ଚ ପ୍ରଥମିକ ବିଦ୍ୟାଳୟର ଶିକ୍ଷକ ସୁକୁମାର ମହାନ୍ତି ଓ କଲ୍ୟାଣପୁର ଉଚ୍ଚ ପ୍ରାଥମିକ ବିଦ୍ୟାଳୟର ଶିକ୍ଷକ ତାପସ ସିଂଙ୍କୁ ଜିଲ୍ଲାପାଳ ନିଲମ୍ବିତ କରିଛନ୍ତି।

ସେହିପରି ଅଣାଲିଆ ସ୍କୁଲର ଶିକ୍ଷକ ଚିତ୍ତରଂଜନ ସାହୁ, ବାଗାରୁଖି ସ୍କୁଲର ଶିକ୍ଷକ ତପନ ପ୍ରଧାନ ଓ ରାସଲପୁର କ୍ଲଷ୍ଟର ସେଣ୍ଟର୍ ସଂଯୋଜକ ଅବନ୍ତୀ ଜେନାଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି।

ଲୋକାଲ ୱାୟାର