ନିୟନ୍ ସେଡର ରାଣୀ ମନିଷା, ଡିଜେ ଧୂନରେ କରୁଛନ୍ତି ମତୁଆଲା

ଭୁବନେଶ୍ୱର, ଜୁଲାଇ ୪(ଲୋକାଲ ୱାୟାର): ଯାହାଙ୍କ ଡିଜେ ଧୂନରେ ମତୁଆଲା ହୁଅନ୍ତି ଯୁବପିଢ଼ି ।

ପାଦରେ ପାଦ ମିଶାଇ ନିଚନ୍ତି ବଳମ୍ବିତ ରାତି ଯାଏଁ । ସେ ରଙ୍ଗବତୀ ହେଉ କି …ସାଥୀ ଆଜି ମିଳିଗଲା…ଅଥବା ଏ ଫୁଲ କହଥରେ… ହେଉ କି ଦୋ ବୋତଲ୍ ଭୋଡକା… ।

ସବୁଥିରେ ଥାଏ କିଛି ନା କିଛି ସ୍ୱାତନ୍ତ୍ର‌୍ୟ ପୁରୁଣା ଗୀତରେ ରିମିକ୍ସର ଏହି ଛିଟା ସଙ୍ଗୀତ ପ୍ରେମୀଙ୍କୁ ଆଲୋଡ଼ିତ କରେ । ଆଉ ନେଇ ଯାଏ ଏକ ଅଜଣା ଦୁନିଆକୁ । ଶନିବାର ଓ ରବିବାର ହେଲେ ମନେ ପଡ଼ନ୍ତି ଏହି ସୁନ୍ଦରୀ ।

ଆଉ ମନେ ପଡ଼େ ତାଙ୍କ ଗୀତର ଧୂନ୍ । ସେ ହେଲେ ମନିଷା ମଲ୍ଲିକ ।

ଡିସ୍କ ଜକି ଦୁନିଆରେ ଏକ ଜଣାଶୁଣା ନାଁ ।

୨୭ ବର୍ଷୀୟ ମନିଷା ହେଉଛନ୍ତି ଓଡ଼ିଶାର ଏକମାତ୍ର ମହିଳା ଡିସ୍କ ଜକି ।

ପୁରା ନା ମନିଷା ମଲ୍ଲିକ୍ । ବୟସ ପାଖାପାଖି ୨୭ ହେବ । ଘର କଲିକତାରେ । ଆଉ ପାଠପଢ଼ା ବି ସେଇଠି ।

ବାପା ପ୍ରଦୀପ କୁମାର ବ୍ୟବସାୟୀ ହୋଇଥିବାରୁ ମନିଷା ଅନେକ ସମୟରେ ଓଡ଼ିଶା ଆସନ୍ତି ।

୨୦୦୯ ମସିହା କଥା । ଭୁବନେଶ୍ୱରରେ ଥିବା ନିଜ ସମ୍ପର୍କୀୟଙ୍କ ଘରକୁ ବୁଲି ଆସିଥାନ୍ତି ମନିଷା ।

ଜଣେ ବନ୍ଧୁଙ୍କ ସହଯୋଗରେ ଅଚାନକ ଭେଟ ହୁଏ ଡିଜେ ତୁଷାରଙ୍କ ସହ । ଅଳ୍ପ ସମୟର ଦେଖା କିନ୍ତୁ ଦୀର୍ଘ ଦିନର ବନ୍ଧୁତାକୁ ଡାକିଆଣେ । ଉଭୟେ ମିଶନ୍ତି ।

ଆଉ ଶେଷରେ ସଙ୍ଗୀତ ପ୍ରତି ଥିବା ଦୁର୍ବଳତା ପରସ୍ପରକୁ ଦିଏ ଏକ ନୂଆ ସମ୍ପର୍କ । ଉଭୟେ ୨୦୦୯ ସେପ୍ଟମ୍ବର ମାସରେ ବିହାହ କରନ୍ତି ।

ତା’ପରେ ବଦଳିଯାଏ ମନିଷାଙ୍କ ଜୀବନ । ବଦଳିଯାଏ ତାଙ୍କ ପରିବେଶ ।

ବସାଉଠା ହୁଏ ସ୍ୱାମୀ ଡିଜେ ତୁଷାରଙ୍କ ସହ ।

ବିଳମ୍ବିତ ରାତି ଯାଏଁ ସେ ସମୟ କଟାନ୍ତି ନାଇଟ୍ କ୍ଲବର ଗହଳି ଭିତରେ ।

ଧୀରେ ଧୀରେ ଭଲ ଲାରେ ଝାପସା ଆଲୁଅ ଭିତରେ ନାଲି, ନୀଳ, ନେଳିର ସେ ନିଅନ୍ ସେଡ । ଭଲ ଲାଗେ ଲାଉଡ ମ୍ୟୁଜିକ୍ ।

ଲୋକଙ୍କ ଗହଳି ଭିତରେ ଭୁଲି ହୋଇଯାଏ ଦୁଃଖ… ଅବସାଦ… ।

ଏହି ସମୟ ଟିକକୁ ବାନ୍ଧି ରଖିବାକୁ ଚାହୁଁଥିବା ମନିଷା ଦିନେ ନିଷ୍ପତ୍ତି ନେଲେ ଡିଜେ ହେବେ । ପରିଶ୍ରମ କଲେ । ୟୁ-ଟ୍ୟୁବର ସାହାଯ୍ୟ ନେଲେ ।

ନୟାପଲ୍ଲୀ ସ୍ଥିତ ଆରଡିଜେ ଶିକ୍ଷାନୁଷ୍ଠାନରେ ବିଧିବଦ୍ଧ ଭାବେ ନାଁ ଲେଖାଇଲେ ।

ଆଉ ଶିଖିଲେ ଡିସ୍କ ଜକି ହେବାର ସମସ୍ତ କଳା କୌଶଳ । ଏମିତି ନୁହେଁ ଯେ ମୂଳରୁ ସେ ସବୁ ଶିଖିଯାଇଥିଲେ, କି ତାଙ୍କ ମୁଣ୍ଡରେ ଲବ୍ଧ ପ୍ରତିଷ୍ଠିତ ବ୍ୟକ୍ତିମାନଙ୍କ ହାତ ଥିଲା । ଅନେକ ଝୁଣ୍ଟିଛନ୍ତି ।

ପୁଣି ଛିଡ଼ା ହୋଇ ଚାଲିବା ଶିଖିଛନ୍ତି ମନିଷା ।

ଡିସ୍କ ଜକି ଦୁନିଆରେ ନିଜକୁ ପରିଚିତ କରାଇବା ପାଇଁ ସ୍ୱାମୀ ତୁଷାରଙ୍କ ସହାୟତା ନେଇଛନ୍ତି ସତ ହେଲେ ଆଜି ଯେଉଁ ଟିକକ ନାଁ କମାଇଛନ୍ତି ତାହା ନିଜସ୍ୱ ଉଦ୍ୟମ ଓ ପରିବାର ଲୋକଙ୍କ ସହଯୋଗରେ ବୋଲି କହନ୍ତି ମନିଷା ।

୨୦୦୯ ମସିହାରୁ ହିଁ ମନିଷା ନିଜକୁ ଏହି ଏଣ୍ଟରଟେନମେଣ୍ଟ ବ୍ୟବସାୟ ସହ ଯୋଡ଼ି ରଖିପାରିଛନ୍ତି ।

ପ୍ରଥମେ ହୋଟେଲ ମେ ଫେୟାରରୁ କ୍ୟାରିୟର ଆରମ୍ଭ କରିଥିବା ମନିଷା ପରବର୍ତ୍ତୀ ସମୟରେ ହୋଟେଲ ଏଚଏଚଆଇରେ କାମ କରିବାର ସୁଯୋଗ ପାଇଥିଲେ ।

ଇତି ମଧ୍ୟରେ ସେ ୩୦୦ରୁ ଅଧିକ ସୋ’ କରି ନିଜ ପାଇଁ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରି ପାରିଛନ୍ତି ।

ଭୁବନେଶ୍ୱର ବ୍ୟତୀତ ସେ କୋଲକାତା, ମୁମ୍ବାଇ, ହାଇଦ୍ରାବାଦ, ଦିଲ୍ଲୀ, ଭାଇଜାଗ୍ ଭଳି ବଡ଼ ବଡ଼ ସହରରେ ନିଜର କାର୍ଯ୍ୟକ୍ରମ କରି ସାରିଛନ୍ତି ।

ଏହାଛଡ଼ା ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟ, ପ୍ରାଇଭେଟ୍ ପାର୍ଟି ଓ କର୍ପୋରେଟ ହାଉସ୍ ଉତ୍ସବରେ ନିଜର କାର୍ଯ୍ୟକ୍ରମ କରିଛନ୍ତି ।

ବିଜ୍ଞାନରେ ସ୍ନାତକ ଡିଗ୍ରୀ ଧାରିଥିଲେ ମଧ୍ୟ ମନିଷା ସଙ୍ଗୀତ ପ୍ରତି ଦୁର୍ବଳ । ଏହି ଦୁର୍ବଳତା ତାଙ୍କର ପିଲାଟି ବେଳୁ ।

ସେ କହନ୍ତି ଯେତେବେଳେ ମୋତେ ୧୯ ବର୍ଷ ସେବେଠାରୁ ସଙ୍ଗୀତ ପ୍ରତି ମୋର ଏ ଦୁର୍ବଳତା ।

କଲିକତାରେ ୬ ବର୍ଷର ରହଣି ସମୟରେ ମୁଁ ଅନେକ ସଙ୍ଗୀତ କାର୍ଯ୍ୟକ୍ରମରେ ଯୋଗ ଦେଇଛି ।

ସେଠାରେ ସଙ୍ଗୀତ ପ୍ରତି ଲୋକଙ୍କ ପାଗଳାମୀକୁ ଅନୁଭବ କରିଛି । ସେଠାରେ ଥିବା ବ୍ୟାଣ୍ଡ ଗ୍ରୁପ୍ ପ୍ରତି ଲୋକଙ୍କ ଭଲପାଇବାକୁ ଦେଖିଛି ।

ସଙ୍ଗୀତ ପ୍ରତି ସବୁ ବର୍ଗର ଲୋକଙ୍କ ମନରେ ଥିବା ଭଲ ପାଇବା ହିଁ ମୋତେ ଜଣେ ଡିଜେ ହେବାକୁ ବାଟ କଢ଼ାଇଛି ବୋଲି କହି ହେବ ।

ଯଦିଓ ରାଜଧାନୀରେ ନାଇଟ କ୍ଲବର ମାର୍କେଟ ନାହିଁ ତଥାପି ଏହି ବୃତ୍ତିକୁ ଛାଡ଼ିନାହାନ୍ତି ମନିଷା ।

ସେ କହନ୍ତି ଭୁବନେଶ୍ୱରରେ ଲୋକେ ନାଇଟ ଲାଇଫ୍ ସହ ଏତେ ପରିଚିତ ନୁହନ୍ତି । ଏମାନେ ମଧ୍ୟ ଆମ ଟାର୍ଗେଟ ଦର୍ଶକ ନୁହନ୍ତି ।

ଜଣେ ମହିଳା ଜକି ଭାବେ ମୁମ୍ବାଇ, ପୁନେ ହେଉଛି ମୋର ମାର୍କେଟ ।

ତେବେ ରାଜଧାନୀ ମୁଁ ଛାଡ଼ିନି । କୌଣସି ପ୍ରାଇଭେଟ ପାଟି ଓ କର୍ପୋରେଟ ପାର୍ଟି ପାଇଁ ଡାକରା ଆସିଲେ ମୁଁ ଯାଏ ।

ଯଦିଓ ଏହା ଏକ ପୁରୁଷ କୈନ୍ଦ୍ରିକ ପେସା ତଥାପି ମୋ ଶ୍ୱଶୁର ଓ ଶାଶୂ ମୋତେ ଏଥିପାଇଁ କେବେ ବାରଣ କରିନାହାନ୍ତି ।

ଶ୍ୱଶୁର ହରେକୃଷ୍ଣ ମଲ୍ଲିକ ପୂର୍ବତନ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆର ଜେନେରାଲ ମ୍ୟାନେଜର ଥିବା ବେଳେ ଶାଶୂ ସୌଦାମିନୀ ମଲ୍ଲିକ ଜଣେ ସୁଗୃହିଣୀ ।

ଉଭୟେ ପୁରୁଣା କାଳିଆ ଲୋକ ସତ, ତେବେ ସେମାନଙ୍କର ମାନସିକତା ଆଧୁନିକ ସମାଜର ମାନସିକତାଠାରୁ ଢେର ଉର୍ଦ୍ଧ୍ୱରେ ।

ମନିଷାଙ୍କ ନାଁ ଆଗରେ ‘ଡିସ୍କ ଡିଜେ’ର ଏହି ଟ୍ୟାଗ୍ ଲାଇନ୍ ଆଜି ତାଙ୍କୁ ସୋସିଆଲ୍ ମିଡିଆରେ ନୂଆ ପରିଚୟ ଦେଇ ପାରିଛି ।

ଏବେ ସୋସିଆଲ୍ ମିଡିଆରେ ମନିଷାଙ୍କ୧୦ ହଜାରରୁ ଅଧିକ ଫଲୋଅର ।

ଡିସ୍କ ଡିଜେକୁ ନେଇ କ୍ୟାରିୟର କରିଥିବା ମନିଷା ନୟାପଲ୍ଲୀ ସ୍ଥିତ ଆରଡିଜେର କାର୍ଯ୍ୟନିର୍ବାହୀ ଅଧିକାରୀ ଭାବେ ତାଙ୍କ ଭଳି ଶହ ଶହ ଡିସ୍କ ଡିଜେ ସୃଷ୍ଟି କରୁଛନ୍ତି ।

ଆଉ ତାଙ୍କ ଭଳି ଯୁବ ମହିଳାଙ୍କ ପାଇଁ ପ୍ରେରଣାର ଉତ୍ସ ପାଲଟି ପାରିଛନ୍ତି ।

ଲୋକାଲ ୱାୟାର