ପଥର କାରିଗରଙ୍କ ପାଇଁ ଆସିବ ସ୍ୱତନ୍ତ୍ର ଆଇନ୍

ଭୁବନେଶ୍ୱର, ଡିସେମ୍ବର ୨୫(ଲୋକାଲ ୱାୟାର): କାରିଗରମାନେ ସହଜ ଓ ସୁରୁଖୁରୁରେ କିପରି ପଥର ପାଇପାରିବେ ସେଥିପାଇଁ ରାଜ୍ୟ ସରକାରଙ୍କ ପକ୍ଷରୁ ମାସକ ମଧ୍ୟରେ ଏକ ସ୍ୱତନ୍ତ୍ର ନିୟମ ପ୍ରଣୟନ କରାଯିବ ।

ଏଭଳି ସୂଚନା ଦେଇଛନ୍ତି ଓଡ଼ଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ ।

ଏ ନେଇ ସେ ଓଡ଼ିଶା ଶିଳ୍ପୀ ମହାସଂଘର ସହଯୋଗ ଲୋଡ଼ିଛନ୍ତି । ଏଥିପାଇଁ ସଂସ୍କୃତି ଭବନରେ ତାଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ ବୈଠକ ବସିଥିଲା ।

ଏହି ଆଲୋଚନା ପରେ ସମସ୍ତଙ୍କୁ ସୁହାଇବା ଭଳି ଏକ ଚିଠା ପ୍ରସ୍ତାବ ଖୁବଶୀଘ୍ର ସଂସ୍କୃତି ବିଭାଗକୁ ପ୍ରଦାନ କରାଯିବ ବୋଲି ଓଡ଼ିଶା ଶିଳ୍ପୀ ମହାସଂଘର ସଭାପତି ଉଦୟ ମହାନ୍ତି କହିଛନ୍ତି ।

ଏହି ବୈଠକରେ ସଂଘର ମୁଖ୍ୟ ଉପଦେଷ୍ଟା ତଥା ବିଶିଷ୍ଟ ଶିଳ୍ପୀ ପଦ୍ମଶ୍ରୀ ସୁଦର୍ଶନ ସାହୁ, ସଂସ୍କୃତି ନିର୍ଦେଶକ ରଞ୍ଜନ କୁମାର ଦାସ, ରାଜ୍ୟ ହସ୍ତ ଓ କୁଟୀରଶିଳ୍ପ ନିର୍ଦେଶକ ବସନ୍ତ କୁମାର ଦାସ, ଜିଓଲୋଜି ଡେପୁଟି ଡିରେକ୍ଟର ପିକେ ଚାନ୍ଦ, ମାଇନର ମିନେରାଲ୍ସ ନିର୍ଦେଶକ ବିଭୂତି ଭୂଷଣ ଦାସ, ମାଇନ୍ସ ନିର୍ଦେଶକ ୟୁସି ଜେନା, ରାଜ୍ୟ ପ୍ରତ୍ନତତ୍ତ୍ୱ ବିଭାଗ ମୁଖ୍ୟ ଅଶ୍ୱିନୀ ଶତପଥୀ, ରାଜ୍ୟ ସଂଗ୍ରହାଳୟ ଅଧୀକ୍ଷକ ଡ. ଭାଗ୍ୟଲିପି ମଲ୍ଲ, ସଂସ୍କୃତି ବିଭାଗ ଉପ-ନିର୍ଦେଶକ ସୁବୋଧ ଆଚାର୍ଯ୍ୟ, ଶିଳ୍ପୀ ମହାସଂଘର ସମ୍ପାଦକ ପ୍ରିୟରଞ୍ଜନ କର, ଶିଳ୍ପୀ କଳ୍ପତରୁ ମହାରଣା ପ୍ରମୁଖ ଉପସ୍ଥିତ ରହି ଆଲୋଚନା କରିଥିଲେ ।

ସୂଚନାଯୋଗ୍ୟ, ୨୦୧୨ ମସିହାରୁ ମହାସଂଘ ପଥର କାରିଗରଙ୍କ କଞ୍ଚାମାଲ ସମସ୍ୟାର ସମାଧାନ ପାଇଁ ପତ୍ରାଳାପ, ଧାରଣା ଓ ଆନ୍ଦୋଳନ ମାଧ୍ୟମରେ ଉଦ୍ୟମ କରି ଆସୁଛି ।

ଲୋକାଲ ୱାୟାର