ପୁରୀରୁ ଯୋଧପୁର ଓ ଆଜମେରକୁ ଚଳାଚଳ କରିବ ସ୍ୱତନ୍ତ୍ର ଟ୍ରେନ

ଭୁବନେଶ୍ୱର, ଜାନୁଆରୀ ୪ (ଲୋକାଲ ୱାୟାର) :ପୁରୀରୁ ଯୋଧପୁର ଏବଂ ପୁରୀରୁ ଆଜମେର୍ ମଧ୍ୟରେ ଦୁଇଟି ସ୍ୱତନ୍ତ୍ର ରେଳ ଚଳାଚଳ ପାଇଁ ନିଷ୍ପତ୍ତି ନେଇ ନିଆଯାଇଥିବା ଗୁରୁବାର ରେଳବାଇ ପକ୍ଷରୁ କୁହାଯାଇଛି ।

ଜାନୁଆରୀ ୨୦ ତାରିଖ ଠାରୁ ପ୍ରତି ବୁଧବାର ଅପରାହ୍ଣ ୪.୦୫ରୁ ୦୨୦୯୩/୦୨୦୯୪ ନମ୍ବରବିଶିଷ୍ଟ ‘ପୁରୀ-ଯୋଧପୁର-ପୁରୀ’ ସ୍ୱତନ୍ତ୍ର ରେଳ ପୁରୀରୁ ଯାତ୍ରା ଆରମ୍ଭ କରିବ।

ସେହିଭଳି ଜାନୁଆରୀ ୨୩ ତାରିଖ ଅପରାହ୍ଣ ୨ଟା ୧୫ରୁ ପ୍ରତି ଶନିବାର ଦିନ ଏହି ସ୍ୱତନ୍ତ୍ର ରେଳ ଯୋଧପୁରରୁ ପୁରୀ ଅଭିମୁଖେ ଆସିବ।

ଯାତାୟାତ ସମୟରେ ଏହି ଟ୍ରେନ୍ ପୂର୍ବ ତଟ ରେଳ ଅନ୍ତର୍ଗତ ଖୋର୍ଦ୍ଧା ରୋଡ୍, ଭୁବନେଶ୍ୱର, କଟକ, ଢେଙ୍କାନାଳ, ତାଳଚେର ରୋଡ୍, ଅନଗୁଳ, ରେଢ଼ାଖୋଲ, ସମ୍ବଲପୁର, ଝାରସୁଗୁଡ଼ା ରୋଡ୍ ସମେତ ରାୟଗଡ଼, ବିଳାସପୁର, ରାୟପୁର, ଦୁର୍ଗ, ରାଜନନ୍ଦଗାଁଓ, ଗୋନ୍ଦିଆ, ନାଗପୁର, ହବିବଗଞ୍ଜ, ଭୋପାଳ, ଉଜ୍ଜୟିନୀ, ଜୟପୁରରେ ଆଦି ଷ୍ଟେସନରେ ରହିବ ।

ସେହିଭଳି ୦୨୦୩୭/୦୨୦୩୮ ନମ୍ବରବିଶିଷ୍ଟ ‘ପୁରୀ-ଆଜମେର-ପୁରୀ’ ସ୍ୱତନ୍ତ୍ର ଟ୍ରେନ ଜାନୁଆରୀ ୨୧ ତାରିଖ ଠାରୁ ପ୍ରତି ସୋମବାର ଓ ଗୁରୁବାର ରାତି ୧୧.୦୫ରୁ ପୁରୀରୁ ଯାତ୍ରା ଆରମ୍ଭ କରିବ।

ଜାନୁଆରୀ ୨୬ ତାରିଖ ସନ୍ଧ୍ୟା ୬ଟା ୫୦ରୁ ପ୍ରତି ମଙ୍ଗଳବାର ଓ ଗୁରୁବାର ଦିନ ଏହି ସ୍ୱତନ୍ତ୍ର ରେଳ ଆଜମେରରୁ ପୁରୀ ଅଭିମୁଖେ ଆସିବ।

ଯାତାୟାତ ସମୟରେ ଏହି ଟ୍ରେନ୍ ପୂର୍ବ ତଟ ରେଳ ଅନ୍ତର୍ଗତ ଖୋର୍ଦ୍ଧା ରୋଡ୍, ଭୁବନେଶ୍ୱର, ଢେଙ୍କାନାଳ, ଅନଗୁଳ, ରେଢ଼ାଖୋଲ, ସମ୍ବଲପୁର, ବରଗଡ଼ ରୋଡ୍, ବଲାଙ୍ଗୀର, ଟିଟିଲାଗଡ଼, କଣ୍ଟାବଞ୍ଜି, ଖରିଆର୍ ରୋଡ୍ ମହାସମୁନ୍ଦ ସମେତ ରାୟପୁର, ଦୁର୍ଗ, ଗୋନ୍ଦିଆ, ନାଗପୁର, ଓ୍ଵାର୍ଦ୍ଧା, ଭୁସାବଲ, ଜଲଗାଁଓ, ସୁରତ, ବଡ଼ୋଦରା, ଅହମଦାବାଦ, ସାବରମତୀ, ଅବୁ ରୋଡ୍ରେ ଅଟକିବ।

ଲୋକାଲ ୱାୟାର