ପୁରୀରେ ପର୍ଯ୍ୟଟକଙ୍କୁ ମିଳିବ ପାରାସେଲିଂ

ଭୁବନେଶ୍ୱର, ଡିସେମ୍ବର ୧୧(ଲୋକାଲ ୱାୟାର): ଖୁବ୍ ଶୀଘ୍ର ପୁରୀ ବେଳାଭୂମିରେ ପର୍ଯ୍ୟଟକଙ୍କୁ ମିଳିବ ପାରାସେଲିଂ ଓ ପାରା ମୋଟରିଂର ମଜା । ଏଥିପାଇଁ ସମସ୍ତ ପ୍ରକାର ଆନୁସଙ୍ଗିକ ପରୀକ୍ଷା ସରିଛି ।

କରୋନା ପରବର୍ତ୍ତୀ ସମୟରେ ଦେଶୀୟ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ରାଜ୍ୟ ପର୍ଯ୍ୟଟନ ବିଭାଗ ନୂଆ କରି ଜଳକ୍ରୀଡ଼ା ସାଙ୍ଗକୁ ଦୁଃସାହସିକ କ୍ରୀଡ଼ାକୁ ଲୋକାଭିମୁଖୀ କରିବାକୁ ଅଣ୍ଟା ଭିଡ଼ିଛି ।

ଇକୋ ରିଟ୍ରିଟ୍ ଶେଷ ହେବା ପରେ ଏହି ବ୍ୟବସ୍ଥା ଲାଗୁ ହେବ । ରାଜ୍ୟ ପର୍ଯ୍ୟଟନ ବିଭାଗ ଓ ଡୁନିମା ଇଞ୍ଜିନିୟର୍ସ ଆଣ୍ଡ ଡାଇଭିଂ ଏଣ୍ଟରପ୍ରାଇଜେସ୍ ପ୍ରାଇଭେଟ୍ ଲିମିଟେଡ ମଧ୍ୟରେ ଏନେଇ ଚୁକ୍ତି ସରିଛି ।

ସେଥିପାଇଁ ୬୦ ଲକ୍ଷ ଟଙ୍କା ବ୍ୟୟରେ ଗୋଆରୁ ଏକ ପାରାସେଲିଂ ବୋଟ୍ କିଣା ସରିଛି । ଏହାସହ ଆସନ୍ତା ଦିନରେ ପୁରୀ ବେଳାଭୂମିରେ ପାରାମୋଟରିଂ ଭଳି ଜଳକ୍ରୀଡା ପାଇଁ ମଧ୍ୟ ଯୋଜନା କରାଯାଉଛି ।

ଏ ବାବଦରେ ଡୁନିମା ଇଞ୍ଜିନିୟର୍ସ ଆଣ୍ଡ ଡାଇଭିଂ ଏଣ୍ଟରପ୍ରାଇଜେସ୍ ପ୍ରାଇଭେଟ୍ ଲିମିଟେଡର ଅପରେସନ୍ ମ୍ୟାନେଜର ସାତ୍ୟକି ବୋଷ କହିଛନ୍ତି ଓଡ଼ିଶାରେ ଜଳକ୍ରୀଡା ପାଇଁ ପର୍ଯ୍ୟାପ୍ତ ସୁଯୋଗ ରହିଛି ।

ଫେବ୍ରୁଆରୀରୁ ପୁରୀ ବେଳାଭୂମିରେ ଆରମ୍ଭ ହେବ ପାରାସେଲିଂ ଓ ପାରାମୋଟରିଂ ଭଳି କ୍ରୀଡା । ଏଥିପାଇଁ ଜଣପିଛା ୧୫୦୦ରୁ ୨୦୦୦ ଟଙ୍କା ଦାମ୍ ରଖାଯାଇଛି ।

ଜଣେ ବୋଟରୁ ଥାଇ ପାରାସେଲିଂ କରିବା ସହ ବୋଟରେ ଓହ୍ଲାଇବାର ମଜା ନେବ । ସମୁଦ୍ର ବେଳାଭୂମିରୁ ୩ କିଲୋମିଟର ଭିତରେ ଚାଲିବ ଏହି ଜଳକ୍ରୀଡା ।

ହାଇଡ୍ରୋଲିକ୍ ୱିଙ୍ଗ ମାଧ୍ୟମରେ ଜଣେ ଆକାଶରେ ପାରାସେଲିଂ କରିବା ସହ ଅଳ୍ପ କିଛି ସମୟ ପାଇଁ ସମୁଦ୍ର ପାଣିରେ ଭିଜିବାର ମଜା ବି ନେଇ ପାରିବ ।

 

ସେହିପରି ପ୍ରସ୍ତାବିତ ପାରାମୋଟରିଂରେ ଜଣେ ଗଭୀର ସମୁଦ୍ର ଭିତରେ ପାରାକ୍ଲାଇଡିଂ କରିବାର ସୁଯୋଗ ପାଇ ପାରିବ ।

ବେଳାଭୂମିରେ ପର୍ଯ୍ୟଟକଙ୍କ ପାଇଁ ପାରାସେଲିଂ ଓ ପାରା ମୋଟରିଂ ଭଳି ଜଳକ୍ରୀଡ଼ାର ବ୍ୟବସ୍ଥା କରାଯିବାକୁ ଯୋଜନା କରାଯାଇଥିବା ବେଳେ ସମସ୍ତ ପ୍ରକାର ସୁରକ୍ଷା ବ୍ୟବସ୍ଥା ମଧ୍ୟ ଗ୍ରହଣ କରାଯାଉଛି ।

ପର୍ଯ୍ୟଟକଙ୍କ ପାଇଁ ଲାଇଭ୍ ଜ୍ୟାକେଟ୍, ସାର୍ଟିଫାଏଡ ରୋପ୍, ପାରାଚୁଟ୍, ହାର୍ନେଷ୍ଟ ସହ ନ୍ୟାସନାଲ୍ ଇନଷ୍ଟିଚୁ୍ୟଟ୍ ଅଫ୍ ସ୍ପୋର୍ଟସ୍ ଦ୍ୱାରା ସ୍ୱୀକୃତିପ୍ରାପ୍ତ ଅପରେଟରମାନଙ୍କୁ ଏହି କାମରେ ନିୟୋଜିତ କରାଯାଉଛି ।

ମିଳିଥିବା ସୂଚନା ଅନୁସାରେ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ବର୍ତ୍ତମାନ ଗୋପାଳପୁର ଓ ବରକୁଳରେ ଜଳକ୍ରୀଡ଼ାର ସୁବିଧା ମିଳୁଛି ।

ବର୍ତ୍ତମାନ ପର୍ଯ୍ୟଟକଙ୍କୁ ଜେଟ୍ ସ୍କି, ବାନାନା ରାଇଡ, ସ୍ପିଡ ବୋଟ, ବମ୍ପୋର ରାଇଡ ଆଦିର ବ୍ୟବସ୍ଥା କରାଯାଇଛି ।

ବାନାନା ରାଇଡ ଓ ବମ୍ପର ରାଇଡ ପାଇଁ ପର୍ଯ୍ୟଟକଙ୍କୁ ୨୦୦ ଟଙ୍କା ଦେବାକୁ ପଡ଼ୁଥିବା ବେଳେ ସ୍ପିଡ୍ ବୋଟ ପାଇଁ ୩୦୦ ଓ ଜେଟ୍ ସ୍କି ପାଇଁ ୫୦୦ ଟଙ୍କା ଦେବାକୁ ପଡ଼ୁଛି ।

ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଆଗକୁ ବୋଟ ପାରାସେଲିଂ ଓ ପାରା ମୋଟରିଂ ବୋଟର ବ୍ୟବସ୍ଥା କରାଯିବା ଜଳକ୍ରୀଡ଼ା ପର୍ଯ୍ୟଟନ ଦିଗରେ ନୂଆ ସମ୍ଭାବନା ସୃଷ୍ଟି କରିବ ବୋଲି ପର୍ଯ୍ୟଟନ ବିଭାଗର ବରିଷ୍ଠ ଟୁର୍ ଅପରେଟର ରତିକାନ୍ତ ପଟ୍ଟନାୟକ କହିଛନ୍ତି ।

ଲୋକାଲ ୱାୟାର