ପ୍ରବାସୀ ଓଡିଆଙ୍କ ଦ୍ଵାରା କାଲିଫର୍ଣ୍ଣିଆରେ ରଥଯାତ୍ରା, ଫ୍ରେମୋଣ୍ଟରୁ ଗଡିଲା ରଥ

ଭୁବନେଶ୍ବର,ଜୁଲାଇ ୧୧ (ଲୋକାଲ ୱାୟାର) ଯୁକ୍ତ ରାଜ୍ଯର କାଲିଫର୍ଣ୍ଣିଆଠାରେ ଜୁଲାଇ ୭ ତାରିଖରେ ପ୍ରବାସୀ ଓଡିଆଙ୍କ ଦ୍ଵାରା ରଥଯାତ୍ରା ପାଳିତ ହୋଇଥିବା ବେଳେ ଫ୍ରେମୋଣ୍ଟ ସହରରୁ ଠାକୁରଙ୍କ ରଥ ଗଡିଥିବା ସେଠାକାର ଜଣେ ଆୟୋଜକ ଗୁରୁବାର କହିଛନ୍ତି ।

ସେଠାକାର ଓଡିଶା ସୋସାଇଟି ଦ୍ଵାରା ବୈଦିକ ଧର୍ମ ସମାଜ ହିନ୍ଦୁ ମନ୍ଦିରରେ ଭକ୍ତଙ୍କ ସମାଗମ ମଧ୍ୟରେ ବହୁ ଉତ୍ସାହର ସହ ଘୋଷଯାତ୍ରା ପାଳନ ହୋଇଛି ।

ସେଠାରେ ରହୁଥିବା ଜଗନ୍ନାଥ ପ୍ରେମୀମାନେ ସ୍ଵେଚ୍ଛାକୃତ ଭାବେ ରଥ ନିର୍ମାଣରେ ସହଯୋଗ କରିବା ସହ ସଜାସଜ୍ଜି ମଧ୍ୟ କରିଥିବା ସୂଚନା ମିଳିଛି ।

ରଥଯାତ୍ରା ପାଇଁ ସକାଳୁ ଠାକୁରଙ୍କର ମଙ୍ଗଳ ଆରତୀ ଓ ପୂଜାର୍ଚ୍ଚନା ସରିବା ପରେ ଦିନ ୧୧ଟାରେ ପହଣ୍ଡି ଆରମ୍ଭ ହୋଇଥିଲା ।

ମନ୍ଦିରରୁ ଠାକୁରଙ୍କୁ ରଥ ନିର୍ମିତ ପାଲିଙ୍କିରେ ବସାଇ ଭକ୍ତଙ୍କ ଦ୍ଵାରା ଜୟ ଜଗନ୍ନାଥ ନାମ କୀର୍ତ୍ତନ କରି ରଥ ଦଉଡି ଟାଣି ନିଆଯାଇଥିଲା ।

ସେଦିନ ମନ୍ଦିରର ରୋଷେଇ ଘରେ ଭକ୍ତଙ୍କ ପ୍ରସାଦ ସେବନ ନିମନ୍ତେ ଅରୁଆ ଅନ୍ନ, ଡାଲି ,ବେସର ,ଟମାଟୋ ଖଟା ଓ କ୍ଷୀରିର ବ୍ୟବସ୍ଥା କରାଯାଇଥିବା ସେ କହିଛନ୍ତି ।

ପବିତ୍ର ଯାତ୍ରା ପରେ ସେଠାରେ ଉପସ୍ଥିତ ଭକ୍ତମାନଙ୍କ ପାଇଁ ଓଡିଶୀ ନୃତ୍ୟ ,ଭଜନ ଓ କୀର୍ତ୍ତନ ଭଳି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ମଧ୍ୟ କରାଯାଇଥାଏ ।

ସେଠାକାର ନୀତିନିୟମ ଅନୁସାରେ, ମହାପ୍ରଭୁ ଜଗନ୍ନାଥ ରବିବାର ବାହୁଡା ଯାତ୍ରା କରି ମନ୍ଦିର ଫେରି ଆସୁଥିବାରୁ ଭକ୍ତମାନେ ସୁନାବେଶ ଦେଖିବାର ସୁଯୋଗ ପାଇପାରିବେ ।

ଲୋକାଲ ୱାୟାର