ବାରିପଦା ପୌରପାଳିକାରେ ପରିମଳ ବ୍ୟବସ୍ଥା ବିପର୍ଯ୍ୟସ୍ତ

ବାରିପଦା, ଅକ୍ଟୋବର ୮(ଲୋକାଲ ୱାୟାର): କରୋନା ମହାମାରୀ ବେଳେ ମୟୂରଭଞ୍ଜ ଜିଲ୍ଲା ବାରିପଦା ସହରର ପରିମଳ ବ୍ୟବସ୍ଥା ସମ୍ପୂର୍ଣ୍ଣ ନଷ୍ଟ ହୋଇଯାଇଛି ।

ବାରିପଦା ପୌରପାଳିକା ଅଧିକାରୀଙ୍କ ଖରାପ ପରିମଳ ପରିଚାଳନା ନୀତି ଯୋଗୁଁ ଏବେ ସହର ଯାକ ଚାରିଆଡେ କୁଢ଼ କୁଢ଼ ଅଳିଆ ଆବର୍ଜନା ।

ଗୋଟିଏ ପଟେ କରୋନା ସମୟରେ ଉପଯୁକ୍ତ ପରିମଳ ପରିଚାଳନା ପାଇଁ ସରକାର ପୌରପାଳିକାକୁ ପର୍ଯ୍ୟାପ୍ତ ପରିମାଣରେ ଲୋକବଳ ଦେଇଛନ୍ତି ।

ହେଲେ ପୌରପାଳିକା ଅଧିକାରୀଙ୍କ ଅବହେଳା ଯୋଗୁଁ ଏହି କାମ ଠିକ୍ ଭାବେ କରାଯାଇ ପାରୁନି । ଫଳରେ ବାରିପଦା ପୌରପାଳିକା ଅଧୀନରେ ଥିବା ଜନସାଧାରଣ ଅସନ୍ତୋଷ ବ୍ୟକ୍ତ କରିଛନ୍ତି ।

ବାରିପଦା ପୌରପାଳିକା ୨୮ଟି ୱାର୍ଡକୁ ନେଇ ଗଠିତ ହୋଇଥିବା ବେଳେ ଏଠାରେ ୧.୫ ଲକ୍ଷ ଲୋକ ବାସ କରିଥାନ୍ତି ।

ସ୍ଥାନୀୟ ବାସିନ୍ଦାଙ୍କ ଅଭିଯୋଗ ଆଜିକୁ ୮ ମାସ ହେଲା ପୌରପାଳିକା ଅଞ୍ଚଳରେ ପରିମଳ ପରିଚାଳନା ବ୍ୟବସ୍ଥା ସମ୍ପୂର୍ଣ୍ଣ ବନ୍ଦ ରହିଛି ।

କରୋନା ପୂର୍ବରୁ ସହରର ପରିମଳ ପରିଚାଳନା ବ୍ରବସ୍ଥା ଠିକ୍ ଥିଲା । ନିୟମିତ ବ୍ୟବଧାନରେ ସହରରେ ସଂକ୍ରମଣ ପ୍ରତିଷେଧକ ଔଷଧ ସିଞ୍ଚନ କରାଯିବା ସହ ଡ୍ରେନ୍ ପାଖ ଓ ସଂକ୍ରମିତ ଅଞ୍ଚଳ ନିକଟରେ ବ୍ଲିଚିଂ ପାଉଡର ସିଞ୍ଚନ କରାଯାଉଥିଲା । ମାତ୍ର କରୋନା ପରଠାରୁ ଏସବୁ ବନ୍ଦ ପଡ଼ିଛି ।

ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି ଯେ ଏନେଇ ପୌରପାଳିକା ଅଧିକାରୀଙ୍କୁ ଫୋନ୍ କରି ଅଭିଯୋଗ କଲେ ଓ ସେମାନଙ୍କୁ ଏଥିପାଇଁ ଅନୁରୋଧ କଲେଯାଇ ପଡିଥିବା ଅଳିଆ, ଆବର୍ଜନା ସଫା ହେଉଛି । ନଚେତ ତାହା ସେମିତି ମାଟିରେ ଓ ରାସ୍ତାରେ ଗଡୁଛି ।

ସମ୍ପ୍ରତି କିଛି ପୂର୍ବତନ କାଉନସିଲରମାନେ ମିଶି ଏକ ପରିମଳ ପରିଚଳନା ଡ୍ରାଇଭ୍ ଆରମ୍ଭ କରିଛନ୍ତି ।

ଯାହା ଅଧୀନରେ ସେମାନେ କିଛି ଦୋକାନ ଆଗରେ ସଂକ୍ରମଣ ପ୍ରତିଷେଧକ ସିଞ୍ଚନ କରିଥିଲେ ।

ପରବର୍ତ୍ତୀ ସମୟରେ ସେମାନେ ଏହାକୁ ସୋସିଆଲ ମିଡିଆରେ ପୋଷ୍ଟ କରିଥିଲେ । ଗୋଟିଏ ସପ୍ତାହ ପର୍ଯ୍ୟନ୍ତ ଏହି କାମ ଠିକ୍ ଭାବେ ଚାଲିଥିଲା । ହେଲେ ଏବେ ସେସବୁ ସେବା ବି ବନ୍ଦ ରହିଛି ।

ୱାର୍ଡ ନମ୍ବର-୪ ର ବାସିନ୍ଦା ରୂପମ କୁମାର ସ୍ୱାଇଁ ଓ ଅନନ୍ତ ସ୍ୱାଇଁ କହିଛନ୍ତି ଆମେ ନିକଟରେ କରୋନା ପଜିଟିଭ୍ ଦ୍ୱାରା ଆକ୍ରାନ୍ତ ହୋଇଥିଲୁ ।

ଏ ବାବଦରେ ବିଭାଗୀୟ ଅଧିକାରୀମାନଙ୍କ ପାଖରେ ଖବର ଅଛି । ତଥାପି ଆମ ଘର ବା ଆମ ଘର ଚାରିପାଖ, ଏପରିକି ଘରକୁ ଲାଗି ଥିବା ଡ୍ରେନକୁ ସାନିଟାଇଜ୍ କରାଯାଇ ନାହିଁ କି କୌଣସି ପରିମଳ ବ୍ୟବସ୍ଥା ଗ୍ରହଣ କରାଯାଇନି ।

ଏନେଇ ଆମେ ପୂର୍ବତନ ଉପ-ସଭାପତି କୃଷ୍ଣ ଚନ୍ଦ୍ର ମହାନ୍ତିଙ୍କୁ ଜଣାଇଲୁ । ତାପରେ ଯାଇ ବିଭାଗୀୟ ଅଧିକାରୀମାନଙ୍କ ଦ୍ୱାରା ଆମ ଘର ଚାରିପାଖକୁ ପ୍ରତିଷେଧକ ସିଞ୍ଚନ କରାଗଲା । ହେଲେ ସେତେବେଳକୁ ଆମେ ହୋମ ଆଇସୋଲେସନରେ ୫ ଦିନ ରହି ସାରିଥିଲୁ ।

ଏ ବାବଦରେ ୨୬ ନମ୍ବର ୱାର୍ଡ କାଉନସିଲର ଲକ୍ଷ୍ମୀଧର ହାବୋଡା କହିଛନ୍ତି କିଛି ପୌରପାଳିକା ଅଧିକାରୀ ଓ ରାଜନେତା ମିଶି ପରିମଳ ପାଇଁ ଆସିଥିବା ଲକ୍ଷ ଲକ୍ଷ ଟଙ୍କାର ଅପବ୍ୟବହାର କରିଛନ୍ତି ।

ସେ କହିଛନ୍ତି ମୋ ୱାର୍ଡରେ ୪୦୦୦ ଲୋକ ରହୁଥିବା ବେଳେ ପାଖାପାଖି ୩୫୦୦ ଲୋକ ଖରାପ ପରିମଳ ବ୍ୟବସ୍ଥାକୁ ନେଇ ଅସନ୍ତାଷ ବ୍ୟକ୍ତ କରିଛନ୍ତି ।

ୱାର୍ଡର କିଛି ଆର୍ଥିକ ସ୍ୱଚ୍ଛଳ ବ୍ୟକ୍ତି ନିଜସ୍ୱ ଉଦ୍ୟମରେ ନିଜ ଘର ଓ ଆଖପାଖ ଅଞ୍ଚଳରେ ପରିମଳ ବ୍ୟବସ୍ଥାକୁ ସଜାଡ଼ିବା ପାଇଁ ପ୍ରତିଷେଧକ ବ୍ୟବସ୍ଥା ଗ୍ରହଣ କରୁଛନ୍ତି ।

ସେ କହିଛନ୍ତି ୱାର୍ଡରେ ପରିମଳ ବ୍ୟବସ୍ଥା ଦେଖିବା ପାଇଁ ପୌରପାଳିକା ପକ୍ଷରୁ ଦୁଇ ଜଣ ସ୍ୱଚ୍ଛ ସାଥୀ ଓ ଜଣେ ସ୍ୱଚ୍ଛ ସୁପରଭାଇଜରଙ୍କୁ ନିଯୁକ୍ତି ଦେଇଛି ।

ସ୍ୱଚ୍ଛସାଥୀ ପିଛା ୪୦୦୦ ଯଙ୍କା ଓ ସ୍ୱଚ୍ଛ ସୁପରଭାଇଜର ପିଛା ୮୦୦୦ ଟଙ୍କା ବି ଖର୍ଚ୍ଚ କରାଯାଉଛି । ହେଲେ ବିଡ଼ମ୍ବନାର ବିଷୟ କାମ ହେଉନି ।

ଏନେଇ ମୁଁ ଦାୟିତ୍ୱରେ ଥିବା ଉପଜିଲ୍ଲାପାଳଙ୍କୁ ଭେଟିଥିଲି । ହେଲେ ସମସ୍ୟାର ସମାଧାନ ନ ହେବାରୁ ମୋତେ ଆଉ କହିବାକୁ ଇଚ୍ଛା ହେଉନି ।

ଏ ବାବଦରେ ପୌରପାଳିକାର ସ୍ୱାସ୍ଥ୍ୟ ଇନ୍ସପେକ୍ଟର ସନ୍ତୋଷ କୁମାର ମହାନ୍ତିଙ୍କୁ ଯୋଗାଯୋଗ କରାଯିବାରେ ସେ କହିଛନ୍ତି ସ୍ୱଚ୍ଛ ସାଥୀ ଓ ସ୍ୱଚ୍ଛ ଇନ୍ସପେକ୍ଟରଙ୍କୁ ଏନେଇ ଦାୟିତ୍ୱ ଦିଆଯାଇଛି ।

ହେଲେ ସେମାନେ ଠିକରେ କାମ କରୁନଥିବାରୁ ଅଭିଯୋଗ ମୋ ପାଖକୁ ଆସିଛି । ତେବେ ସହରର କିଛି ସ୍ଥାନରେ ସେମାନେ ବ୍ଲିଚିଂ ଓ ପ୍ରତିଷେଧକ ସିଞ୍ଚନ କରୁଛନ୍ତି ।

ମୋତେ କରୋନା ମୃତକଙ୍କ ଶବଦାହ ଦାୟିତ୍ୱ ଅତିରିକ୍ତ ଭାବେ ଦିଆଯାଇଥିବାରୁ ମୁଁ ସେହି କାମ ପରିଚାଳନା କରୁଛି ।

ତେଣୁ ମୁଁ ଅଧିକାଂଶ ସମୟରେ ବ୍ୟସ୍ତ ରହୁଛି । ତଥାପି ମୁଁ ଏହି କାମର ତଦାରଖ କରିବାକୁ ଚେଷ୍ଟା କରୁଛି ।

ଲୋକାଲ ୱାୟାର