ବିନିମୟ କାର୍ଯ୍ୟକ୍ରମ: ମୁମ୍ବାଇରେ ଆଇଏଚଏମ ଓଡିଶା

ମୁମ୍ବାଇ, ଜାନୁଆରୀ ୨୮(ଲୋକାଲ ୱାୟାର): ଇନଷ୍ଟିଚ୍ୟୁଟ ଅଫ ହୋଟେଲ ମ୍ୟାନେଜମେଣ୍ଟ କ୍ୟାଟରିଂ ଟେକ୍ନୋଲଜି ଆଣ୍ଡ ଆପ୍ଲାଏଡ ନ୍ୟୁଟ୍ରିସନ, ଭୁବନେଶ୍ୱରର ୧୦ ଛାତ୍ରଛାତ୍ରୀଙ୍କ ସହ ୨ ଫାକଲ୍ଟି ସଦସ୍ୟ ପାଞ୍ଚ ଦିନିଆ ମୁମ୍ବାଇ ଗସ୍ତରେ ଯାଇଛନ୍ତି ।

ଏହି ଗସ୍ତରେ ଆଇଏଚଏମ (ସିଟିଏଏନ), ମୁମ୍ବାଇ ସେମାନଙ୍କୁ ମହାରାଷ୍ଟ୍ରର ସଂସ୍କୃତି, ଖାଦ୍ୟପେୟ ଓ ଲୋକଙ୍କ ସମ୍ପର୍କରେ ଅଧିକ ଜାଣିବାର ସୁଯୋଗ ପ୍ରଦାନ କରିବେ ।

ଏକ ଭାରତ ଶ୍ରେଷ୍ଠ ଭାରତ କାର୍ଯ୍ୟକ୍ରମର ଅଂଶ ଭାବେ ଆୟୋଜିତ ଏହି ବିନିମୟ କାର୍ଯ୍ୟକ୍ରମରେ ଓଡ଼ିଶାର ଛାତ୍ରଛାତ୍ରୀମାନେ ନିଜ ରାଜ୍ୟ ସମ୍ପର୍କରେ ମୁମ୍ବାଇର ହୋଟେଲ ମ୍ୟାନେଜମେଣ୍ଟ ଛାତ୍ରଛାତ୍ରୀଙ୍କୁ ଅବଗତ କରାଇବେ ।

ଉଲ୍ଲେଖଯୋଗ୍ୟ, ମହାରାଷ୍ଟ୍ର ଓ ଓଡ଼ିଶା ସାଂସ୍କୃତିକ ସମ୍ପର୍କ ଉପକ୍ରମରେ ଯୁଗ୍ମ ରାଜ୍ୟ ।

ଏକ ଭାରତ ଶ୍ରେଷ୍ଠ ଭାରତ ଫ୍ଲାଗସିପ କାର୍ଯ୍ୟକ୍ରମ ପର୍ଯ୍ୟଟନ ମନ୍ତ୍ରାଳୟର ଏକ ଉପକ୍ରମ ହୋଇଥିବା ବେଳେ ଏଥିରେ ଆଉ ୧୦ଟି କେନ୍ଦ୍ରୀୟ ମନ୍ତ୍ରାଳୟ ଓ ବିଭାଗ ଅଂଶୀଦାର ଅଛନ୍ତି ।

ଏଭଳି ବିନିମୟ କାର୍ଯ୍ୟକ୍ରମ ଭାରତୀୟ ସଂସ୍କୃତିର ମୂଳ ମନ୍ତ୍ର ଏକତା ବୃଦ୍ଧି କରିବା ସହ ଦେଶର ପର୍ଯ୍ୟଟନକୁ ମଧ୍ୟ ପ୍ରୋତ୍ସାହିତ କରିବ ବୋଲି ଆଇଏଚଏମ ମୁମ୍ବାଇର ପ୍ରିନ୍ସିପାଲ, ଏ.କେ. ସିଂହ ମତ ଦେଇଛନ୍ତି ।

ଓଡିଶା ହୋଟେଲ ମ୍ୟାନେଜମେଣ୍ଟ ଦଳ ଆୟୋଜକ ମୁମ୍ବାଇ ପାଇଁ ମଙ୍ଗଳବାର ପାରମ୍ପରିକ ଓଡ଼ିଆ ଖାଦ୍ୟର ସମ୍ଭାର ପ୍ରସ୍ତୁତ କରିଛନ୍ତି ।

ଓଡ଼ିଶାର ବିଭିନ୍ନ ନୃତ୍ୟ ଶୈଳୀ ଓ ସଂଗୀତ ମଧ୍ୟ ସାଂସ୍କୃତିକ କାର୍ଯ୍ୟକ୍ରମ ମାଧ୍ୟମରେ ପ୍ରଦର୍ଶିତ ହୋଇଥିଲା ।

ଆଗାମୀ ଦୁଇ ଦିନରେ ଓଡ଼ିଶା ଦଳକୁ ମହାରାଷ୍ଟ୍ରର ଗ୍ରାମୀଣ ଜୀବନ ସହିତ ପରିଚିତ କରାଇବା ପାଇଁ ଗୋବର୍ଦ୍ଧନ ଗାଁକୁ ନିଆଯିବା ସହିତ ଏଲିଫ୍ୟାଣ୍ଟା ଗୁମ୍ଫା ଓ ମୁମ୍ବାଇର ଅନ୍ୟ ପର୍ଯ୍ୟଟନ ସ୍ଥଳୀ ଭ୍ରମଣରେ ନିଆଯିବ ।

ଆସନ୍ତା ମାସରେ ଏହି ବିନିମୟ କାର୍ଯ୍ୟକ୍ରମରେ ଆଇଏଚଏମ ମୁମ୍ବାଇରର ଏକ ଦଳ ଓଡ଼ିଶା ଆସିବ ।

ଲୋକାଲ ୱାୟାର