ବେଆଇନ ଇଟାଭାଟି ଉପରେ କାର୍ଯ୍ୟାନୁଷ୍ଠାନ ପାଇଁ ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ନିର୍ଦ୍ଦେଶ

ଭୁବନେଶ୍ୱର, ଫେବ୍ରୁଆରୀ ୨୫(ଲୋକାଲ ୱାୟାର): ଗଞ୍ଜାମ ଜିଲ୍ଲାରେ ଗଢ଼ି ଉଠିଥିବା ବେଆଇନ ଇଟାଭାଟି ଗୁଡ଼ିକ ଉପରେ ନିର୍ଦ୍ଦିଷ୍ଟ ସମୟ ମଧ୍ୟ କାର୍ଯ୍ୟାନଷ୍ଠାନ ଶେଷ କରିବାକୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ଜାତୀୟ ପରିବେଶ ଟ୍ରିବ୍ୟୁନାଲ (ଏନଜିଟଇ) ନିର୍ଦ୍ଦେଶ ଦେଇଛି ।

ଗଞ୍ଜାମ ଜିଲ୍ଲାରେ ୬୪୦ଟି ବେଆଇନ ଇଟାଭାଟି ଗଢ଼ି ଉଠିଥିବା ନେଇ ବିଷ୍ଣୁ ପ୍ରସାଦ ମିଶ୍ରଙ୍କ ପକ୍ଷରୁ ହୋଇଥିବା ଏକ ମାମଲାର ଶୁଣାଣି ଅବସରରେ ଏନଜିଟି ଏହି ନିର୍ଦ୍ଦେଶ ଦେଇଛନ୍ତି ।

ଗତ ଫେବ୍ରୁଆରୀ ୪ ତାରିଖରେ ଏନଜିଟିକୁ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ସୂଚନା ଦିଆଯାଇଥିଲା କି, ଜିଲ୍ଲାରେ ୬୪୦ଟି ବେଆଇନ ଇଟାଭାଟି ଚିହ୍ନଟ ହୋଇଛି ଏବଂ ସେଗୁଡ଼ିକ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ଆରମ୍ଭ ହୋଇଛି ।

ତେବେ କୌଣସି କାର୍ଯ୍ୟାନୁଷ୍ଠାନ ହେଉ ନଥିବା ସୂଚନା ପାଇ ଏନଜିଟି ତୁରନ୍ତ ଏ ନେଇ ରିପୋର୍ଟ ଦାଖଲ ସକାଶେ ବୋର୍ଡକୁ ନିର୍ଦ୍ଦେଶ ଦେଇଛନ୍ତି ।

ପୂର୍ବରୁ ମଧ୍ୟ ଇଟାଭାଟି ବାବଦରେ ଠିକ୍ ତଥ୍ୟ ଦାଖ କରିବାରେ ବୋର୍ଡ ବିଫଳ ହୋଇଥିବାରୁ ଅସନ୍ତୋଷ ପ୍ରକାଶ କରି ଏନଜିଟି ବୋର୍ଡ ଚେୟାରମ୍ୟାନ ଏବଂ ସଦସ୍ୟ ସଚିବଙ୍କୁ ବ୍ୟକ୍ତିଗତ ଭାବେ ହାଜର ହେବାକୁ କହିଥିଲେ ।

ଇଟାଭାଟି ଗୁଡ଼ିକର କୌଣସି ପରିବେଶ ଅନୁୁମତି ନଥିବା ଏବଂ ସେଗୁଡ଼ିକ ନଦୀ ପାଣି ବ୍ୟବହାର କରିବା ସହ ପରିବେଶ ଓ ବାୟୁ ପ୍ରଦୂଷଣ କରୁଥିବା ନେଇ ଏନଜିଟିରେ ମାମଲା ହୋଇଥିଲା ।

ଲୋକାଲ ୱାୟାର