ବ୍ରହ୍ମପୁରବାସୀଙ୍କ ଚିନ୍ତା ବଢ଼ାଇଛି ଖୋଳା ଯାଇଥିବା ରାସ୍ତା ଓ ମୁକୁଳା ଡ୍ରେନ

ବ୍ରହ୍ମପୁର, ଅକ୍ଟୋବର ୩ (ଲୋକାଲୱେର): ବର୍ଷାଦିନେ ରାସ୍ତାର ଖାଲଖମା, ଅସମ୍ପୂର୍ଣ୍ଣ ଡ୍ରେନ ଦକ୍ଷିଣ ଓଡିଶାର ବାଣିଜି୍ୟକ ପେଣ୍ଠ ବ୍ରହ୍ମପୁରବାସୀଙ୍କ ଚିନ୍ତା ବଢାଇଛି ।

ଜାନିବିଲି ଜଳ ଯୋଗାଣ ପ୍ରକଳ୍ପ ପାଇଁ ପାଇପ ବିଛା ଯାଉଥିବା ଯୋଗୁଁ ଅଧିକାଂଶ ଅଞ୍ଚଳରେ ରାସ୍ତାର ଅବସ୍ଥା କହିଲେ ନସରେ ।

ବିଶ୍ୱ ବ୍ୟାଙ୍କ ସହାୟତାରେ ଓଡିଆରପି ଅନ୍ତର୍ଗତ ପ୍ରେମ ନଗର ଓ ଅନ୍ଧପସରା ରୋଡରେ ୨.୬ କିଲୋମିଟରର ଡ୍ରେନ ନିର୍ମାଣ ପ୍ରକଳ୍ପ ତିନି ବର୍ଷ ହେଲା ଆରମ୍ଭ ହୋଇଥିଲେ ବି ଏଯାଏଁ ସମ୍ପୂର୍ଣ୍ଣ ହୋଇନାହିଁ ।

ସହରରେ ରାସ୍ତା ଓ ଡ୍ରେନ ନିର୍ମାଣ କାମ ଅନୁଧ୍ୟାନ କରୁଥିବା ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ, ବିଧାୟକ ବିକ୍ରମ ପଣ୍ଡା ଓ ମହାନଗର ନିଗମ କମିଶନରଙ୍କୁ ବିଭିନ୍ନ ଅଞ୍ଚଳର ବାସିନ୍ଦା ସେମାନଙ୍କ ଦୁଃଖ ଜଣାଇଛନ୍ତି ।

ପୂର୍ବରୁ ମଧ୍ୟ ବିଇଏମସି କର୍ତ୍ତୃପକ୍ଷଙ୍କୁ ମନ୍ଥର ନିର୍ମାଣ କାମ ସମ୍ପର୍କରେ ଅବଗତ କରାଇଥିଲୁ । ଶୀଘ୍ର କାମ ସାରିବା ପାଇଁ ଆମେ ସାଂସଦ ଓ ବିଧାୟକଙ୍କ ଅଂଚଳ ଗସ୍ତ ବେଳେ ଜଣାଇଛୁ ବୋଲି ଦୁର୍ଗାପ୍ରସାଦ ପଣ୍ଡା କହିଛନ୍ତି ।

ସହରର ସମସ୍ୟା ଥିବା ଅଞ୍ଚଳ ପରିଦର୍ଶନ କରି ସ୍ଥାନୀୟ ଲୋକଙ୍କ ସହ ଆଲୋଚନା କରିଛୁ । ବିଇଏମସି କର୍ତୃପକ୍ଷଙ୍କୁ ଜଳବନ୍ଦୀ ସମସ୍ୟା ଓ ଡ୍ରେନ ସଫା କରିବାକୁ ପ୍ରାଥମିକତା ଦେବାକୁ କହିଛୁ ।

ସେହିପରି ପାଇପ ବିଛା ଯାଇଥିବା ରାସ୍ତା ମରାମତି ଓ ପ୍ରଶସ୍ତ କରିବା ପାଇଁ କଂଟ୍ରାକ୍ଟରଙ୍କୁ ନିଦେ୍ର୍ଦଶ ଦେବାକୁ କହିଛୁ ବୋଲି ବ୍ରହ୍ମପୁର ସାଂସଦ କହିଛନ୍ତି ।

ମହାନଗର ନିଗମ କର୍ତୃପକ୍ଷ ଓ ଜିଲ୍ଲାପାଳଙ୍କ ସହ ବୈଠକ କରି ଉନ୍ନତିମୂଳକ କାମର ସମୀକ୍ଷା ହେବ । ଆଗୁଳା ବନ୍ଧ, ଗୋଷାଣୀନୂଆଗାଁ ଓ ଫାଷ୍ଟ ଗେଟରେ ଥିବା ଶ୍ମଶାନର ବିକାଶ ପାଇଁ ଆମେ ବିଇଏମସି କର୍ତୃପକ୍ଷଙ୍କୁ କହିଛୁ ।

ଖୁବ ଶୀଘ୍ର ରାସ୍ତା ଓ ଡ୍ରେନ ମରାମତି କରାଯିବ । ଡ୍ରେନ ସମସ୍ୟାର ଦୀର୍ଘସ୍ଥାୟୀ ସମାଧାନ ପାଇଁ ପଦକ୍ଷେପ ନିଆଯିବ ବୋଲି ବିଇଏମସି କମିଶନର କହିଛନ୍ତି ।

ସ୍ଥାନୀୟ ପ୍ରତିନିଧି ଓ ନଗର ନିଗମ ଅଧିକାରୀମାନେ ବିଜିପୁର, ଡାଇମଣ୍ଡ ଟ୍ୟାଙ୍କ ରୋଡ, ଶାସ୍ତ୍ରୀ ନଗର, ଖୋଡାସିଙ୍ଗି, ବିଦୁ୍ୟତପୁରୀ କଲୋନୀ, ଅନ୍ଧପସରା ରୋଡ, ପ୍ରେମନଗର, ଗେଟବଜାର, ଲୋଚାପଡା ରାସ୍ତା, ଆସ୍କା ରୋଡ ଆଦି ଅଞ୍ଚଳ ପରିଦର୍ଶନ କରିଥିଲେ ।

ଲୋକାଲ ୱାୟାର