ବ୍ରହ୍ମପୁରର ନୀଳକଣ୍ଠେଶ୍ୱର ଶ୍ମଶାନରେ କରୋନା ମୃତକଙ୍କ ଶବଦାହ

ବ୍ରହ୍ମପୁର, ଅଗଷ୍ଟ ୨୮(ଲୋକାଲ ୱାୟାର): ବ୍ରହ୍ମପୁର ମୁ୍ୟନିସିପାଲ୍ କର୍ପୋରେସନ୍ ଦ୍ୱାରା ଗତ ଦୁଇମାସ ତଳେ ସ୍ଥାପିତ ହୋଇଥିବା ନୀଳକଣ୍ଠେଶ୍ୱର ଶ୍ମଶାନ ଏବେ କରୋନା ମୃତକଙ୍କ ଶବଦାହ ପାଇଁ ଏକ ଉପଯୁକ୍ତ ସ୍ଥାନ ପାଲଟି ପାରିଛି ।

କରୋନାରେ ମୃତ ହୋଇଥିବା ବ୍ୟକ୍ତିମାନଙ୍କୁ ବିଭିନ୍ନ ଖୋଲା ସ୍ଥାନରେ ଶବଦାହ ପାଇଁ ସ୍ଥାନୀୟ ଲୋକମାନେ ଆପତ୍ତି ଉଠାଇଥିବା ବେଳେ ନୀଳକଣ୍ଠେଶ୍ୱର ଶ୍ମଶାନ ଜିଲ୍ଲା ପ୍ରଶାସନ ପାଇଁ କାମରେ ଆସିଥିଲ ।

ନୂଆ କରି ବ୍ରହ୍ମପୁର ପୌରପାଳିକା ଦ୍ୱାରା ସ୍ଥାପିତ ହୋଇଥିବା ଏହି ଶ୍ମଶାନରେ ବର୍ତ୍ତମାନ ସୁଦ୍ଧା ୯୬ଟି ଶବଦାହ ହୋଇଥିବା ବେଳେ ସେମାନଙ୍କ ଭିତରୁ ୭୧ ଜଣ କରୋନା ପଜିଟିଭ୍ ହୋଇ ପ୍ରାଣ ହରାଇଥିଲେ ।

ମିଳିଥିବା ସୂଚନା ଅନୁସାରେ ଅଶ୍ୱିନୀ, ଏମକେସିଜି ମେଡିକାଲ୍ କଲେଜ୍ ଓ ସିଟି ହସ୍ପିଟାଲରେ କରୋନରେ ପ୍ରାଣ ହରାଇଥିବା ଲୋକଙ୍କ ମରଶରୀରକୁ ନୂତନ ଭାବେ ତିଆରି କରାଯାଇଥିବା ନୂତନ କାଠ ଶବଦାହ ଚୂଲାରେ ଶେଷକୃତ୍ୟ କରାଯାଇଛି ।

ଏ ବାବଦରେ ବ୍ରହ୍ମପୁର ପୌରପାଳିକା କମିଶନର ଚକ୍ରବର୍ତ୍ତୀ ସିଂ ରାଠୋର କହିଛନ୍ତି ନୂଆ କରି କରାଯାଇଥିବା କାଠ ତିଆରି ଶବଦାହ ସ୍ଥାନ ଇକୋ ଫ୍ରେଣ୍ଡଲି । ଏହା ପରିବେଶ ଅନୁକୂଳ ହେବା ସହ ଏଥିରେ କମ୍ ଜାଳେଣି ଖର୍ଚ୍ଚ ହେଉଛି ।

ତା ଛଡ଼ା ଏଥିରେ ଅନ୍ତ୍ୟେଷ୍ଟି କ୍ରିୟା କଲେ ଖର୍ଚ୍ଚ ବି କମ୍ ଆସୁଛି । କମିଶନର ଚକ୍ରବର୍ତ୍ତୀ ସିଂ ରାଠୋର ଆହୁରି କହିଛନ୍ତି ଯେ; ନୂଆ କରି କରାଯାଇଥିବା ଏହି ଶବଦାହ ସ୍ଥଳ ୪୨ ଲକ୍ଷ ଟଙ୍କା ବ୍ୟୟ ଅଟକଳରେ ତିଆରି କରାଯାଇଛି ।

ଏହା କୋଭିଡ ଆରମ୍ଭ ହେବା ପୂର୍ବରୁ ହିଁ ଏହା ତିଆରି ହୋଇଥିଲା । ମାତ୍ର କରୋନା ସଂକ୍ରମିତଙ୍କ ସଂଖ୍ୟା ବଢ଼ିବା ପରେ ଓ କରୋନା ସାରା ରାଜ୍ୟକୁ ଆତଙ୍କିତ କଲା ପରେ ହିଁ ଏହା କାର୍ଯ୍ୟକ୍ଷମ ହେବା ଆରମ୍ଭ ହୋଇଛି ।

ନୂଆକରି ପ୍ରସ୍ତୁତ କରାଯାଇଥିବା ଏହି ଶବଦାହ ବାକ୍ସ ବାବଦରେ ସୂଚନା ଦେଇ ସେ କହିଛନ୍ତି ଶବଦାହ ବାକ୍ସ ଭିତରେ ମୃତକଙ୍କ ଶବକୁ ରଖାଯିବା ସଙ୍ଗେ ସଙ୍ଗେ ଏହା ମୃତ ଶରୀରକୁ ଗ୍ୟାସ୍ ଚାମ୍ବର ଭିତରକୁ ଟାଣି ନେବ ।

ଥରେ ଶବଦାହ ହେବା ପରେ ଏଥିରୁ ବାହାରୁଥିବା ଗ୍ୟାସ୍ ୨୦ ଫୁଟ୍ ଉପରେ ବାୟୂ ମଣ୍ଡଳରେ ମିଶିଯିବ । ସବୁଠାରୁ ବଡ଼ କଥା ଏହି ନୂତନ ଶବ ଦାହ ଚାମ୍ବର ମୃତକଙ୍କ ଶେଷକୃତ୍ୟ ପରେ ଏହାର ରୀତିନୀତି କରିବା ବେଳେ ସମସ୍ତ ପ୍ରକାର ଧାର୍ମିକ ଓ ଆଧ୍ୟାତ୍ମିକ ବିଶ୍ୱାସର ଯତ୍ନ ନେଉଛି ।

ରାଜ୍ୟରେ କରୋନା ମୃତକଙ୍କ ସଂଖ୍ୟା ବଢ଼ୁଥିବା ବେଳେ ଓ ସାଧାରଣ ଲୋକଙ୍କ ମଧ୍ୟରେ କରୋନା ସଂକ୍ରମଣର ଭୟ ଥିବା ବେଳେ ଏହି ଶବଦାହ କେନ୍ଦ୍ର ଲୋକଙ୍କ ପାଇଁ ଉପକାରୀ ସାବ୍ୟସ୍ତ ହୋଇପାରିଛି ।

କରୋନାରେ ମୃତୁ୍ୟ ହେଉଥିବା ଲୋକଙ୍କ ଶବଦାହ ପାଇଁ ସ୍ଥାନୀୟ ଲୋକେ ବିଭିନ୍ନ ସ୍ଥାନରେ ଆପତ୍ତି ଉଠାଉଥିବା ବେଳେ ବିଇଏମସିର ଏହି ନୂତନ ଶବଦାହ କେନ୍ଦ୍ର କରୋନା ମୃତକଙ୍କ ଶେଷକୃତ୍ୟ କରିବାରେ ସାହାଯ୍ୟ କରୁଛି ।

ବିଇଏମସି କମିଶନର କହିଛନ୍ତି, ସେମାନେ ଏହି ଶବଦାହ କେନ୍ଦ୍ରକୁ ଚଳାଇବାକୁ ଏକ ଏଜେନ୍ସିକୁ ଦାୟିତ୍ୱ ଦେଇଛନ୍ତି । ଶବଦାହର ଉତ୍ତମ ପରିଚାଳନା ପାଇଁ ଦୁଇଜଣ ବ୍ୟକ୍ତିଙ୍କୁ ନିୟୋଜିତ କରାଯାଇଛି ।

ଏହି ବ୍ୟକ୍ତିମାନେ କରୋନା ମୃତକଙ୍କ ଶବକୁ କିପରି ପରିଚାଳନା କରିବେ ସେ ନେଇ ତାଲିମ୍ ଦିଆଯାଇଛି । ତେବେ କରୋନା ମୃତକଙ୍କ ଶବଦାହ ପାଇଁ ଉପରୋକ୍ତ ଏଜେନ୍ସିକୁ ସରକାରୀ ସୂତ୍ରରୁ ଅର୍ଥ ଦିଆଯାଉଛି ।

ତେବେ ଅଣ କରୋନା ମୃତକଙ୍କ ଶବଦାହ ପାଇଁ ସଂପୃକ୍ତ ପରିବାରକୁ ଅର୍ଥ ଦେବାକୁ ପଡୁଛି ।

ଏ ବାବଦରେ ଶବଦାହ କାର୍ଯ୍ୟରେ ନିୟୋଜିତ ଥିବା ପ୍ରଫୁଲ୍ଲ ବେହେରା କହିଛନ୍ତି ଆମକୁ ଶବଦାହ କାମ ପାଇଁ ବିଇଏମସି ପକ୍ଷରୁ ବ୍ୟକ୍ତିଗତ ପ୍ରତିରକ୍ଷ ଉପକରଣ (ପିପିପି) କିଟ୍ ପ୍ରଦାନ କରାଯାଇଛି ।

ଏହି କାମରେ ଦୁଇଜଣ ବ୍ୟକ୍ତିଙ୍କୁ ନିୟୋଜିତ କରାଯାଇଥିବା ବେଳେ ସେମାନେ ନିୟମିତ ବ୍ୟବଧାନରେ ଉପସ୍ଥିତ ରହିବେ ।

ଲୋକାଲ ୱାୟାର