ବ୍ରହ୍ମପୁରର ପ୍ରସିଦ୍ଧ ମା’ ବୁଢୀ ଠାକୁରାଣୀ ଯାତ୍ରା ଆଜିଠୁ ଆରମ୍ଭ

ବ୍ରହ୍ମପୁର, ମାର୍ଚ୍ଚ ୨୯ (ଲୋକାଲ ୱାୟାର) ଦୀର୍ଘ ଦୁଇ ବର୍ଷ ପରେ ଆଜିଠୁ ବ୍ରହ୍ମପୁରର ପ୍ରସିଦ୍ଧ ମା’ ବୁଢୀ ଠାକୁରାଣୀ ଯାତ୍ରା ଆରମ୍ଭ ହେଉଥିବା ଆୟୋଜନ କମିଟିର ଜଣେ ଅଧିକାରୀ ସୂଚନା ଦେଇଛନ୍ତି ।

ଆଜି ମଧ୍ୟରାତ୍ରରେ ମା’ ବୁଢ଼ୀ ଠାକୁରାଣୀ ବାପ ଘରକୁ ଆସିବେ । ଏହି ପରମ୍ପରା ଅନୁଯାୟୀ ମାଆ ନିଜ ବାପ ଘରେ ଆଜିଠୁ ପ୍ରାୟ ୨୯ ଦିନ ଧରି ରହିବେ ଓ ଏକ ଅସ୍ଥାୟୀ ପୀଠରେ ପୂଜା ପାଇବେ ।

ଅସ୍ଥାୟୀ ପୀଠ ସହିତ ଅନ୍ୟ ସମସ୍ତ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି ।

ସହର ପ୍ରଶାସନ ପକ୍ଷରୁ ମଧ୍ୟ ବ୍ୟାପକ ବ୍ୟବସ୍ଥା କରାଯାଇଛି । ପାଣି, ଆଲୋକ ପ୍ରମୁଖ ସୁବିଧା କରାଯାଇଥିବା ସହ ଦମକଳ ବିଭାଗ ପକ୍ଷରୁ ସଂପୂର୍ଣ୍ଣ ସହଯୋଗ କରାଯିବ ବୋଲି ମାଆଙ୍କ ବାପା ଦେଶୀ ବେହେରାଙ୍କ କହିଛନ୍ତି।

ନିୟମ ଅନୁସାରେ ବାପା ଅର୍ଥାତ ଦେଶୀ ବେହେରା ମନ୍ଦିରକୁ ଦିନ ସମୟରେ ଆସି ମାଆଙ୍କୁ ଡାକରା ଦେବେ । ରାତିରେ ବାଜା ବାଜଣା, ଢ଼ୋଲ, ତୁରୀ, ଖତ୍ରୀ, ପିଠା, ପଣା ସହ ଭକ୍ତଗଣ ମାଆଙ୍କୁ ପୂଜା କରିବେ ।

ପୂଜା ସମୟରେ ମାଆଙ୍କ ମୁଣ୍ଡରୁ ଫୁଲ ଦେଶୀ ବେହେରାଙ୍କ ହାତରେ ଖସି ପଡିବା ପରେ ହିଁ ମାଆଙ୍କ ଆଜ୍ଞା ମିଳିଥାଏ ଏବଂ ଏହା ପରେ ମାଆଙ୍କୁ ଅସ୍ଥାୟୀ ପୀଠକୁ ଅଣାଯାଏ ।

ସେପଟେ ଦୁଇବର୍ଷରେ ଥରେ ମାଆଙ୍କ ଏଇ ଯାତ୍ରାକୁ ନେଇ ସହରବାସୀ ଉତ୍ସବମୁଖର ହୋଇଛନ୍ତି ।

ଲୋକାଲ ୱାୟାର