ଭର୍ଚୁଆଲ୍ ମ୍ୟୁଜିୟମରେ ପରିଣତ ହେବ ରାଜ୍ୟ ସଂଗ୍ରହାଳୟ

ଭୁବନେଶ୍ୱର, ଡିସେମ୍ବର ୨୯(ଲୋକାଲ ୱାୟାର): ଐତିହ୍ୟ କ୍ୟାବିନେଟର ନିଷ୍ପତ୍ତି ଅନୁସାରେ ସରକାର ରାଜ୍ୟ ସଂଗ୍ରହାଳୟକୁ ଭର୍ଚୁଆଲ୍ ସଂଗ୍ରହାଳୟରେ ପରିଣତ କରିବା କାମ ଆରମ୍ଭ କରିଛନ୍ତି ।

ମଙ୍ଗଳବାର ସଂଗ୍ରହାଳୟର ୬୩ ତମ ପ୍ରତିଷ୍ଠା ଦିବସରେ ଏହି କାର୍ଯ୍ୟର ଶୁଭାରମ୍ଭ ହୋଇଛି । ରାଜ୍ୟ ସଂଗ୍ରହାଳୟର ପ୍ରତ୍ନତତ୍ତ୍ୱ ଗ୍ୟାଲେରୀରୁ ଏହି ଭର୍ଚୁଆଲ୍ କାର୍ଯ୍ୟକ୍ରମ ଆରମ୍ଭ ହୋଇଛି ।

ପ୍ରତ୍ନତତ୍ତ୍ୱ ଗ୍ୟାଲେରୀ ସହ ବ୍ରୋଞ୍ଜ ଗ୍ୟାଲେରୀ ରହିଛି । ଏହାପରେ ବାକି ଗ୍ୟାଲେରୀ ସମେତ ଖୋଲିବାକୁ ଥିବା ୫ ଟି ନୂଆ ଗ୍ୟାଲେରୀକୁ ଭର୍ଚୁଆଲ୍ ମୋଡରେ ୨-୩ମାସ ମଧ୍ୟରେ ସାମିଲ କରାଯିବ ।

ବଡ଼ କଥା ହେଲା ଭର୍ଚୁଆଲ୍ ପରିଦର୍ଶନ କଲେ ଜଣେ ଦର୍ଶକ ପୂରା ଥ୍ରୀଡି ମଜା ପାଇବେ । ପ୍ରତ୍ନତତ୍ତ୍ୱ ଗ୍ୟାଲେରୀଟି ୩ଟି କୋଠରୀରେ ବିଭକ୍ତ । ଏହା ନାନାବିଧ କୀର୍ତ୍ତିରାଜିରେ ପରିପୁଷ୍ଟ ।

ସେହିପରି ବ୍ରୋଞ୍ଜ ଗ୍ୟାଲେରୀରେ ବହୁତ ପୁରୁଣା ମୂର୍ତ୍ତି ରହିଛି । ଆଜି ଏହାକୁ ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ଉଦଘାଟନ କରିଛନ୍ତି ।

ଆଗକୁ କଟକ ଆନନ୍ଦ ଭବନ ସମେତ ରାଜ୍ୟର ସମସ୍ତ ସଂଗ୍ରହାଳୟକୁ ଭର୍ଚୁଆଲରେ ପରିଣତ କରାଯିବ ବୋଲି ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ କହିଛନ୍ତି ।

ରାଜ୍ୟ ସଂଗ୍ରହାଳୟ ଅଧୀନରେ ୧୫ଟି ଗୁରୁତ୍ୱପୂର୍ଣ୍ଣ ଉପବିଭାଗ ସମେତ ରାଜ୍ୟର ସମସ୍ତ ଜିଲ୍ଲା ସଂଗ୍ରହାଳୟଗୁଡ଼ିକ ପରିଚାଳିତ ହେଉଛି ।

କଟକ ଆନନ୍ଦ ଭବନ ସଂଗ୍ରହାଳୟ, କେନ୍ଦୁବିଲ୍ୱ ଜୟଦେବ ସଂଗ୍ରହାଳୟ ଏହା ମଧ୍ୟରେ ରହିଛି ।

ଏହାବାଦ୍ ମ୍ୟୁଜିୟମ ଲୋଗୋରେ ସ୍ଥାନିତ ଅଶୋକସ୍ତମ୍ଭ ଭଗ୍ନାବଶେଷର ଲୋକାର୍ପିତ ହେବ ।

ଖ୍ରୀଷ୍ଟାବ୍ଦ ପ୍ରଥମ/ଦ୍ୱିତୀୟରୁ ଷୋଡ଼ଶ ଶତାବ୍ଦୀ ପର୍ଯ୍ୟନ୍ତ ପ୍ରାଚୀନ ସ୍ୱର୍ଣ୍ଣମୁଦ୍ରାର ପ୍ରଦର୍ଶନୀ, ସଂଗ୍ରହାଳୟ ସମ୍ମୁଖ ଓ ଆଭ୍ୟନ୍ତରୀଣ ଫାଉଣ୍ଟେନର ଭର୍ଚୁଆଲ୍ ଉଦଘାଟନ ହେବ ।

ସଂଗ୍ରହାଳୟ କୋଠା ଏବଂ ଏହାର ପରିସର ଆଲୋକୀକରଣର ଉଦଘାଟନ କରାଯିବ । ଓଡ଼ିଶା ହିଷ୍ଟୋରିକାଲ୍ ରିସର୍ଚ୍ଚ ଜର୍ଣ୍ଣାଲ୍ ଏବଂ ‘ଇନସ୍କ୍ରିପସନ୍ସ ଅଫ୍ ଗଙ୍ଗସ୍ ଅଫ୍ ସ୍ୱେତକ’ ପୁସ୍ତକ ଉନ୍ମୋଚିତ ହେବ ।

ସଂଗ୍ରହାଳୟ ସୁପରିଚାଳନା ପାଇଁ ବି ଏକ ସ୍ୱତନ୍ତ୍ର ନିଦେ୍ର୍ଦଶାଳୟ ଓ ଏକ ସ୍ୱତନ୍ତ୍ର ନିଦେ୍ର୍ଦଶକ ପଦବି ସୃଷ୍ଟି ନିମନ୍ତେ ଅନୁମୋଦିତ ପ୍ରସ୍ତାବକୁ କାର୍ଯ୍ୟକାରୀ କରାଯିବ ।

ଆଗକୁ ପ୍ରତି ସଂଗ୍ରହାଳୟର ଆୟ କିପରି ବୃଦ୍ଧି ପାଇବ ସେଥିପାଇଁ ପ୍ରୟାସ ଜାରି ରହିବ ବୋଲି ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ କହିଛନ୍ତି ।

ଏହି ଅବସରରେ ବୌଦ୍ଧଧର୍ମ ସମ୍ପର୍କିତ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । ଔରଙ୍ଗାବାଦ ସର୍କଲର ଏଏସଆଇ ସୁପରିଣ୍ଟେଣ୍ଡିଙ୍ଗ ଆର୍କୋଲୋଜିଷ୍ଟ ଡ. ମିଲନ୍ ଚାୱଲା ବୌଦ୍ଧଧର୍ମ ସମ୍ପର୍କରେ ବକ୍ତବ୍ୟ ରଖିଥଲେ ।

ଆୟୋଜିତ କାର୍ଯ୍ୟକ୍ରମରେ ବିଭାଗୀୟ ନିଦେ୍ର୍ଦଶକ ରଞ୍ଜନ କୁମାର ଦାସ ପୌରୋହିତ୍ୟ କରିଥିଲେ । ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ।

ସଂଗ୍ରହାଳୟ ଅଧୀକ୍ଷକ ଡ. ଭାଗ୍ୟଲିପି ମଲ୍ଲ ଅତିଥିମାନଙ୍କୁ ସ୍ୱାଗତ କରିଥିଲେ । ଶେଷରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।

ସମ୍ପୂର୍ଣ୍ଣ କାର୍ଯ୍ୟକ୍ରମ ସଂଗ୍ରହାଳୟ ତରଫରୁ ଫେସବୁକ୍ ଏବଂ ୟୁଟୁ୍ୟବରେ ସିଧା ପ୍ରସାରଣ ହୋଇଥିଲା ।

ଲୋକାଲ ୱାୟାର