ଭିତରକନିକାରେ ବାର୍ଡ ଫ୍ଲୁ ସତର୍କତା

କେନ୍ଦ୍ରାପଡ଼ା, ଜାନୁଆରୀ ୩ (ଲୋକାଲ ୱାୟାର): ବାର୍ଡ ଫ୍ଲୁ ସତର୍କତା ପଦକ୍ଷେପ ସ୍ୱରୂପ ଭିତରକନିକା ଓ ଆଖପାଖ ଅଞ୍ଚଳରେ ବିଦେଶାଗତ ପକ୍ଷୀ ଓ ପୋଲଟ୍ରି ଫାର୍ମଗୁଡ଼ିକରୁ ନମୁନା ସଂଗ୍ରହ ଆରମ୍ଭ ହୋଇଛି ।

ସତର୍କ ରହିବାକୁ ରାଜ୍ୟ ସରକାର ପରାମର୍ଶ ଦେବା ପରେ ପଶୁ ଡାକ୍ତରଙ୍କ ଏକ ଟିମ୍ ଭିତରକନିକା ଜାତୀୟ ଉଦ୍ୟାନ ଓ ଆଖପାଖ ଅଞ୍ଚଳରେ ଥିବା ପୋଲଟ୍ରି ଫାର୍ମରୁ ନମୁନା ସଂଗ୍ରହ କରିଛି ।

ଏହି ନମୁନାଗୁଡିକୁ ପଶୁରୋଗ ଗବେଷଣା ପ୍ରତିଷ୍ଠାନ (ଏଡିଆରଆଇ), କଟକକୁ ପଠାଯାଇଛି । ସେଠାରୁ ଏହା ଭୋପାଳ ସ୍ଥିତି ଜାତୀୟ ଉଚ୍ଚ ସୁରକ୍ଷା ପଶୁ ରୋଗ ଗବେଷଣାଗାରକୁ ପଠାଯିବ ।

ଜଙ୍ଗଲ ଓ ପଶୁଚିକିତ୍ସା ବିଭାଗର ଅଧିକାରୀମାନେ ଜାତୀୟ ଉଦ୍ୟାନ ଆଖପାଖ ଗାଁଗୁଡ଼ିକରେ ସଚେତନତା ସୃଷ୍ଟି ପାଇଁ ପ୍ରଚାରପତ୍ର ବାଣ୍ଟିଛନ୍ତି ।

ଭିତରକନିକା, ସାତଭାୟା, ହୁକିଟୋଲା ଆଦି ଅଞ୍ଚଳରେ ବିଦେଶାଗତ ପକ୍ଷୀଙ୍କ ଉପରେ ନଜର ରଖାଯାଇଛି ।

ଜିଲ୍ଲାର ସମସ୍ତ ବ୍ଲକରେ ତ୍ୱରିତ ପ୍ରତିକ୍ରିୟା ଦଳ ଗଠିତ ହୋଇଛି ବୋଲି ଅତିରିକ୍ତ ଜିଲ୍ଲା ପଶୁଚିକିତ୍ସା ଅଧିକାରୀ (ରୋଗ ନିୟନ୍ତ୍ରଣ), କେନ୍ଦ୍ରାପଡ଼ା ଡଃ ସୁରେଶ ଚନ୍ଦ୍ର ମିଶ୍ର କହିଛନ୍ତି ।

ଲୋକାଲ ୱାୟାର