ଭିତରକନିକା ଇକୋ-ରିଟ୍ରିକ କ୍ୟାମ୍ପକୁ ପରିବେଶବିତଙ୍କ ବିରୋଧ

କେନ୍ଦ୍ରାପଡ଼ା, ଡିସେମ୍ବର ୮ (ଲୋକାଲ ୱାୟାର): ଭିତରକନିକା ଜାତୀୟ ଉଦ୍ୟାନ ଭିତରେ ପର୍ଯ୍ୟଟନ ବିଭାଗର ଇକୋ-ରିଟ୍ରିଟ କ୍ୟାମ୍ପକୁ ବିରୋଧ କରିଛନ୍ତି ପରିବେଶବିତ ।

ନଳିତାପଟିଆ ନଦୀ କୂଳରେ କ୍ୟାମ୍ପ ହେବା ଯୋଗୁଁ ଲୁଣିପାଣି କୁମ୍ଭୀର ଓ ଅନ୍ୟ ପ୍ରାଣୀଙ୍କ ବସତି ବିପନ୍ନ ହେବ ବୋଲି ଅଭିଯୋଗ ହୋଇଛି ।

ରାଜ୍ୟ ପର୍ଯ୍ୟଟନ ବିଭାଗ ଭିତରକନିକା ଜାତୀୟ ଉଦ୍ୟାନରେ ଡିସେମ୍ବର ୯ରୁ ଫେବ୍ରୁଆରୀ ୨୮ ଯାଏଁ ୧୧ ସପ୍ତାହ ବ୍ୟାପି ଇକୋ-ରିଟ୍ରିଟ ଉତ୍ସବ ଆୟୋଜନ କରିବେ ।

ଭିତରକନିକା ଏକ ରାମସାର ସାଇଟ ହୋଇଥିବାରୁ ଏଠାରେ ବିଭିନ୍ନ ପ୍ରଜାତିର ବନ୍ୟପ୍ରାଣୀ ବାସ କରନ୍ତି । ଶୀତଦିନେ ବହୁ ବିଦେଶୀ ପକ୍ଷୀ ଏଠାକୁ ଆସିଥାନ୍ତି ।

କ୍ୟାମ୍ପ ହେବା ଦ୍ୱାରା ଜଙ୍ଗଲ ଓ ଆର୍ଦ୍ରଭୂମି ସଙ୍କୁଚିତ ହେବା ସହ ବନ୍ୟପ୍ରାଣୀଙ୍କ ଉପରେ ଏହାର ପ୍ରଭାବ ପଡିବ ବୋଲି ୱାଇଲଡ ଲାଇଫ ସୋସାଇଟି ଅଫ ଓଡ଼ିଶାର ସମ୍ପାଦକ ବିଶ୍ୱଜିତ ମହାନ୍ତି କହିଛନ୍ତି ।

ବେସରକାରୀ ଟୁର୍ ଅପରେଟରମାନଙ୍କ ଦ୍ୱାରା ପରିଚାଳିତ ୨୦ରୁ ଅଧିକ ଟେଣ୍ଟ ଜାତୀୟ ଉଦ୍ୟାନ ନିକଟରେ ରହିଛି ।

ସେଠାରେ ରାତ୍ର ରହଣୀ ଓ ବୋଟ ଭ୍ରମଣ ପାଇଁ ୨ରୁ ୪ ହଜାର ଟଙ୍କା ଦେବାକୁ ପଡୁଥିବା ବେଳେ ପର୍ଯ୍ୟଟନ ବିଭାଗର ଇକୋ-ରିଟ୍ରିଟ କ୍ୟାମ୍ପରେ ରାତ୍ର ରହଣୀ ପାଇଁ ପର୍ଯ୍ୟଟକଙ୍କୁ ୯ ହଜାର ଟଙ୍କା ଦେବାକୁ ପଡ଼ିବ ।

ପରିବେଶ ପର୍ଯ୍ୟଟନ ଦ୍ୱାରା ସ୍ଥାନୀୟ ଅଞ୍ଚଳରେ ନିଯୁକ୍ତି ସୁଯୋଗ ସୃଷ୍ଟି ହେବା ସହ ଅର୍ଥନୀତି ସୁଦୃଢ଼ ହେଉଛି ।

ହେଲେ ଇକୋ-ରିଟ୍ରିଟ କ୍ୟାମ୍ପରେ ବଡ଼ ବ୍ୟବସାୟୀ ଓ ଇଭେଣ୍ଟ ଅର୍ଗାନାଇଜରଙ୍କୁ ସୁଯୋଗ ଦିଆ ଯାଉଥିବାରୁ ସ୍ଥାନୀୟ ଲୋକେ କୌଣସି ସୁଫଳ ପାଉନାହାନ୍ତି ବୋଲି ଭିତରକନିକାର ଟୁର ଅପରେଟର ପ୍ରଦୀପ ଦାସ କହିଛନ୍ତି ।

ଅଭୟାରଣ୍ୟରେ ସ୍ଥାପିତ ହୋଇଥିବା ଇକୋ-ରିଟ୍ରିଟ କ୍ୟାମ୍ପ ଭିତରକନିକାରେ ପରିବେଶ ପର୍ଯ୍ୟଟନକୁ ପ୍ରୋତ୍ସାହିତ କରିବ ।

ଆଖପାଖ ଗ୍ରାମବାସୀ ହେନ୍ତାଳ ବଣ ପ୍ରଦର୍ଶିତ କରିବା ସହ ବିଦେଶୀ ପର୍ଯ୍ୟଟକଙ୍କୁ ଆତିଥେୟତା ପ୍ରଦାନ କରି ରୋଜଗାର କରିପାରିବେ ।

ପର୍ଯ୍ୟଟକମାନଙ୍କୁ କବାଟ ନଥିବା ଗାଁ ଶିଆଳିଆ, ହୁକିତୋଲା ଦ୍ୱୀପରେ ଥିବା ହୁକିତୋଲା ପୋଠା, ୧୫୦ ବର୍ଷ ହେଲା ବୁଡି ରହିଥିବା ଜାହାଜ, ପେଣ୍ଠ ବେଳାଭୂମି, ସାତଭାୟା ଓ ମଦାଲି ବୁଲି ପାରିବେ ବୋଲି ଭିତରକନିକା ଡିଏଫଓ ବିକାଶ ରଞ୍ଜନ ଦାଶ କହିଛନ୍ତି ।

ଲୋକାଲ ୱାୟାର