ଭୁବନେଶ୍ୱରରେ ବଢ଼ୁଛି ବ୍ରାଉନସୁଗର ବେପାର; ୫ ଗିରଫ, ୩୨୪ ଗ୍ରାମ ଜବତ

ଭୁବନେଶ୍ୱର,ଜାନୁଆରୀ ୨୦(ଲୋକାଲ ୱାୟାର): ରାଜଧାନୀ ଭୁବନେଶ୍ୱରରେ ବ୍ରାଉନ ସୁଗରର କାରବାର ବଢ଼ି ଚାଲିଥିବା ବେଳେ ବିଭିନ୍ନ ସ୍ଥାନରେ ଏସଟିଏଫ(ସ୍ପେଶାଲ ଟାସ୍କ ଫୋର୍ସ) ଚଢ଼ଉ କରି ଜଣେ କୁଖ୍ୟାତ ବେପାରୀକୁ ଗିରଫ କରିବା ସହ ୩୨୪ ଗ୍ରାମ ବ୍ରାଉନସୁଗର ଜବତ କରିିଥିବା ବରିଷ୍ଠ ପୁଲିସ ଅଫିସର ସୂଚନା ଦେଇଛନ୍ତି ।

ଗତକାଲି ଏସଟିଏଫକୁ ସୂଚନା ମିଳିଥିଲା ରାଜଧାନୀର କଳିଙ୍ଗ ଷ୍ଟାଡିୟମ ପାଶ୍ୱର୍ରେ କେତେକ ଯୁବକ ବ୍ରାଉନସୁଗର କାରବାର କରୁଛନ୍ତି । ଅଧିକାରୀମାନେ ସେଠାରେ ଚଢ଼ାଉ କରି ଭୁବନେଶ୍ୱର ଶିଖରଚଣ୍ଡୀର ସେକ୍ ସାଗବା ଓ ବାଲେଶ୍ୱର ଗୋପାଳ ଗାଁର ତନ୍ମୟ କୁମାର ସାହୁକୁ ଗିରଫ କରିଥିଲେ ।

ସେମାନଙ୍କଠାରୁ ୩୨୪ ଗ୍ରାମ ବ୍ରାଉନସୁଗର ଜବତ ହୋଇଥିଲା । ଜେରାରୁ ଜଣାପଡ଼ିଥିଲା ସେମାନେ ବାଲେଶ୍ୱରର ସେକ୍ ଫକୀର ନାମକ ଯୁବକଠାରୁ ନିୟମିତ ବ୍ରାଉନସୁଗର ଆଣୁଛନ୍ତି ।

ଏସଟିଏଫ ଟିମ୍ ବାଲେଶ୍ୱରରେ ଚଢ଼ାଉ କରି ବାଲେଶ୍ୱର ଗଲାଲପଲାର ସେକ୍ ଫକୀର, ଅରଡ଼ବଜାରର ମହମ୍ମଦ ସୋହେଲ ଏବଂ ସେକ୍ ହଇବୁଲକୁ ଗିରଫ କରିଥିଲା ।

ସେମାନଙ୍କଠାରୁ ଏକ ମାରୁତି କାର, ୪ଟି ବାଇକ ଏବଂ ୧ ଲକ୍ଷ ୮୪ ହଜର ଟଙ୍କା ଜବତ ହୋଇଥିଲା । ଏସଟିଏଫ ସମସ୍ତ ଅଭିଯୁକ୍ତଙ୍କୁ ଆଜି କୋର୍ଟ ଚାଲାଣ କରିଛି ।

ଉଲ୍ଲେଖଯୋଗ୍ୟ, ଗତ ୬ ତାରିଖରୁ ୧୫ ତାରିଖ ମଧ୍ୟରେ ଏସଟିଏଫ୍ ପୁରୀ, ବାଲେଶ୍ୱର, ଅନୁଗୁଳ ଖୋର୍ଦ୍ଧା, ପିପିଲି, ଢେଙ୍କାନାଳ ଏବଂ ଭୁବନେଶ୍ୱରର ବିଭିନ୍ନ ସ୍ଥାନରେ ଚଢ଼ାଉ କରି ୯୩ ଗ୍ରାମ ବ୍ରାଉନସୁଗର ଜବତ କରିଛି ।

ଏଥିସହ ୯ ଲକ୍ଷ ଟଙ୍କା, ୩ଟି ବାଇକ୍ ଏବଂ ଅନ୍ୟାନ୍ୟ କାଗଜପତ୍ର ମଧ୍ୟ ଜବତ ହୋଇଛି । ଏହି ଘଟଣାରେ ମୋଟ ୧୧ ଜଣଙ୍କୁ ଗିରଫ କରାଯାଇଛି ।

ପଶ୍ଚିମବଙ୍ଗର କୋଲକାତା, ମେଦିନୀପୁର ଏବଂ ମୁର୍ଶିଦାବାଦରୁ ବେପାରୀମାନେ ବ୍ରାଉନସୁଗର ଆଣି ବାଲେଶ୍ୱର ଓ ଭୁବନେଶ୍ୱରରେ ବିକୁଥିବା ଏସଟିଏଫ ଡିଜିପି ଜୟନାରାୟଣ ପଙ୍କଜ କହିଛନ୍ତି ।

ଲୋକାଲ ୱାୟାର