ମହାନଦୀକୁ ଡେଇଁ ଗର୍ଭବତୀ ନାବାଳିକାଙ୍କ ଆତ୍ମହତ୍ୟା ଉଦ୍ୟମ

ଜଗତସିଂହପୁର, ଡିସେମ୍ବର ୨୨ (ଲୋକାଲ ୱାୟାର): ପ୍ରେମିକ ବାହା ହେବାକୁ ମନା କରିବାରୁ ଜଗତସିଂହପୁର ଜିଲ୍ଲା କୁଜଙ୍ଗ ଥାନା ଅନ୍ତର୍ଗତ ଜିଲ୍ଲାନାସୀ ପଂଚାୟତର ଜଣେ ଗର୍ଭବତୀ ନାବାଳିକା ମହାନଦୀକୁ ଡେଇଁ ଆତ୍ମହତ୍ୟା ଉଦ୍ୟମ କରିଛନ୍ତି ।

ଗ୍ରାମବାସୀ ତାଙ୍କୁ ଉଦ୍ଧାର କରିବା ପରେ ସେ କୁଜଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଏକ କନ୍ୟା ସନ୍ତାନକୁ ଜନ୍ମ ଦେଇଛନ୍ତି ।

ନବମ ଶ୍ରେଣୀରେ ପଢୁଥିବା ନାବାଳିକା ଜଣକ ପଡୋଶୀ ଘରକୁ ଟ୍ୟୁସନ ଯାଉଥିଲେ ।

ବିବାହର ପ୍ରଲୋଭନ ଦେଖାଇ ଟ୍ୟୁସନ ଶିକ୍ଷକ ରଞ୍ଜନ ରାଉତ ନାବାଳିକା ସହ ଅବୈଧ ସମ୍ପର୍କ ରଖିଥିଲେ ।

ତେବେ ନାବାଳିକା ଜଣକ ଗର୍ଭବତୀ ହେବା ପରେ ରଞ୍ଜନ ତାଙ୍କୁ ଗର୍ଭପାତ ପାଇଁ ପ୍ରବର୍ତାଉ ଥିଲେ ।

ଏହାକୁ ନେଇ ଉଭୟଙ୍କ ମଧ୍ୟରେ ମତାନ୍ତର ହୋଇଥିଲା ।

ଲୋକଲଜ୍ଜା ଭୟରେ ନାବାଳିକା ଗର୍ଭବତୀ ହେବା କଥା ଜଣାଇ ନଥିଲେ ।

ଗର୍ଭ ଯନ୍ତ୍ରଣା ହେବାରୁ ନାବାଳିକା ମହାନଦୀର ବଡଶଙ୍ଖ ଘାଟକୁ ଯାଇ ନଦୀକୁ ଡେଇଁ ଆତ୍ମହତ୍ୟା ଉଦ୍ୟମ କରିଥିଲେ ।

ଜଣେ ଗ୍ରାମବାସୀ ତାଙ୍କୁ ଉଦ୍ଧାର କରି ପୁଲିସକୁ ଖବର ଦେଇଥିଲେ ।

ପୁଲିସ ଘଟଣାସ୍ଥଳରେ ପହଁଚି ଆମ୍ବୁଲାନ୍ସ ଯୋଗେ ନାବାଳିକାଙ୍କୁ କୁଜଙ୍ଗ ସିଏଚସି ସ୍ଥାନାନ୍ତର କରିଥିଲା ।

ପଚରାଉଚୁରା ବେଳେ ନାବାଳିକା ସମସ୍ତ ଘଟଣା କହିଥିଲେ । ପୁଲିସ ଟ୍ୟୁସନ ଶିକ୍ଷକଙ୍କୁ ଅଟକ ରଖିଛି ।

ଏଫଆଇଆର ଦେବା ପରେ ଅଭିଯୁକ୍ତ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁଜଙ୍ଗ ଥାନା ଆଇଆଇସି ପାରୋ ଟୁଡୁ କହିଛନ୍ତି ।

ଲୋକାଲ ୱାୟାର