ମହିଳା ଅସଦାଚରଣ ମାମଲାରେ ବଲାଙ୍ଗୀର ଉପଜିଲ୍ଲାପାଳ ନିଲମ୍ବିତ

ବଲାଙ୍ଗୀର, ସେପ୍ଟେମ୍ବର ୪(ଲୋକାଲ ୱାୟାର): ଜନୈକା ମହିଳା କର୍ମଚାରୀଙ୍କୁ ଅସଦାଚରଣ କରିଥିବା ଅଭିଯୋଗ ଆସିବାରୁ ଏହାର ତଦନ୍ତ ପରେ ରାଜ୍ୟ ସରକାର ବଲାଙ୍ଗିର ଉପଜିଲ୍ଲାପାଳ ସଞ୍ଜୟ ମିଶ୍ରଙ୍କୁ କାର୍ଯ୍ୟରୁ ନିଲମ୍ବିତ କରିଥିବା ଶନିବାର ବରିଷ୍ଠ ଅଧିକାରୀ କହିଛନ୍ତିି ।

ବଲାଙ୍ଗୀର ଜିଲ୍ଲାପାଳଙ୍କ କାର୍ଯ୍ୟାଳୟରେ କାର୍ଯ୍ୟରତ ଜଣେ ମହିଳା କର୍ମଚାରୀ ଜିଲ୍ଲାପାଳଙ୍କ ନିକଟରେ ଲିଖିତ ଅଭିଯୋଗ ଆଣିଥିଲେ ଯେ ଉପଜିଲ୍ଲାପାଳ ନିଜ କ୍ୟାବିନରେ ତାଙ୍କ ପ୍ରତି ଅସଦାଚରଣ କରିଛନ୍ତି ।

ଏହି ଅଭିଯୋଗ ମିଳିବା ପରେ ଜିଲ୍ଲାପାଳ ଘଟଣାର ତଦନ୍ତ ପାଇଁ ଏକ ୩ ଜଣିଆ କମିଟି ଗଠନ କରିଥିଲେ ।

ଜଣେ ମହିଳା ଅଧିକାରୀଙ୍କ ନେତୃତ୍ୱରେ ହୋଇଥିବା ଏହି କମିଟି ସମ୍ମୁଖରେ ସଂପୃକ୍ତ ମହିଳା କର୍ମଚାରୀ ତାଙ୍କ ଅଭିଯୋଗ ନେଇ ବୟାନ ରଖିଥିଲେ ।

ତୁରନ୍ତ ଉପଜିଲ୍ଲାପାଳଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ସହ ବଦଳି କରିବାକୁ ମହିଳା ଜଣଙ୍କ ଦାବି କରିଥିଲେ ।

ଅପରପକ୍ଷରେ ଏହି ଅଭିଯୋଗ ସମ୍ପର୍କରେ ଉପଜିଲ୍ଲାପାଳ ଗଣମାଧ୍ୟମକୁ କିଛି ପ୍ରତିକ୍ରିୟା ଦେଇନାହାନ୍ତି ।

ଲୋକାଲ ୱାୟାର