ମହିଳା କିରାଣିଙ୍କ ସମ୍ପତ୍ତି କୋଟିଏରୁ ଅଧିକ

ଜଗତସିଂହପୁର, ଡିସେମ୍ବର ୨(ଲୋକାଲ ୱାୟାର): ଜଗତସିଂହପୁର ଜିଲ୍ଲା ପଞ୍ଚାୟତ ଅଧିକାରୀଙ୍କ କାର୍ଯ୍ୟାଳୟରେ କିରାଣି ଭାବେ କାର୍ଯ୍ୟରତ ସଂଯୁକ୍ତା ଦାସଙ୍କ ଘରେ ବୁଧବାର ଭିଜିଲାନ୍ସ ଚଢ଼ାଉ କରିଥିବା ବେଳେ ତାଙ୍କର ସମ୍ପତ୍ତି ଏକ କୋଟି ଟଙ୍କାରୁ ଅଧିକ ବୋଲି ବିଭାଗ ପକ୍ଷରୁ କୁହାଯାଇଛି ।

ଜଗତସିଂହପୁର ସାତପୁରାସ୍ଥିତ ତିନି ମହଲା ବାସଭବନ, ପାଣିଶାଳିଆରେ ଥିବା ଦୁଇ ମହଲା କୋଠା, କଟକ ମହାନଦୀ ବିହାରରେ ଥିବା ଥ୍ରୀ ବିଏଚକେ ଫ୍ଲାଟ୍‌, ଜଗତସିଂହପୁରସ୍ଥିତ ସରକାରୀ କାର୍ଯ୍ୟାଳୟରେ ଏକକାଳୀନ ଚଢ଼ାଉ କରାଯାଇଥିଲା ।

ଚଢ଼ାଉରେ ଠାବ ହୋଇଥିବା ସ୍ଥାବର/ଅସ୍ଥାବର ସମ୍ପତ୍ତି ମଧ୍ୟରେ ଅଛି ଜଗତସିଂହପୁର ସାତପୁରାସ୍ଥିତ ତିନି ମହଲା କୋଠା (୩୭ ଲକ୍ଷ ୬୪ ହଜାର ୭୮୭ ଟଙ୍କା), ଜଗତସିଂହପୁର ପାଣିଶାଳିଆରେ ଏକ ଦୁଇ ମହଲା କୋଠା (୧୫ ଲକ୍ଷ ୭୪ ହଜାର ୪୮୫ ଟଙ୍କା), କଟକ ମହାନଦୀ ବିହାରରେ ଏକ ଥ୍ରୀ ବିଏଚକେ ଫ୍ଲାଟ (୨ ଲକ୍ଷ ୭୨ ହଜାର ୩୪୮ ଟଙ୍କା), ଏକ ଚାରି ଚକିଆ (୬ ଲକ୍ଷ ୨୨ ହଜାର ୩୭୭ ଟଙ୍କା), ଦୁଇଟି ଦୁଇ ଚକିଆ (୯୫ ହଜାର ୭୩୧ ଟଙ୍କା), ବିଭିନ୍ନ ବ୍ୟାଙ୍କ ଓ ଡାକ ଘରେ ଜମାରାଶି (୨୧ ଲକ୍ଷ ୧୩ ହଜାର ୬୫୨ ଟଙ୍କା), ଏଲଆଇସି ଏବଂ ଅନ୍ୟାନ୍ୟ ବୀମା (୧ ଲକ୍ଷ ୮୮ ହଜାର ୮୪୮ଟଙ୍କା), ସୁନା ଗହଣା (୯ ଲକ୍ଷ ଟଙ୍କା), ଘରକରଣା ସାମଗ୍ରୀ (୨ ଲକ୍ଷ ୭ ହଜାର ଟଙ୍କା) ।

ଲୋକାଲ ୱାୟାର