ମାତ୍ର ୫ ହଜାର ଟଙ୍କାରେ ସାଇକେଲ୍ ବାଇକ୍; ଚର୍ଚ୍ଚାରେ ପ୍ରଦୀପ ପରିଜା

ଜଗତସିଂହପୁର, ଅକ୍ଟୋବର ୧୭(ଲୋକାଲ ୱାୟାର): କରୋନା ଯୋଗୁଁ ଚାକିରି ପଳାଇବା ପରେ ଜଗତସିଂହପର ଜିଲ୍ଲା ରଘୁନାଥପୁର ବ୍ଲକ୍ ଶିବପୁର ଗାଁର ଜଣେ ଯୁବକ ନିଜ ସାଇକେଲକୁ ବାଇକରେ ପରିଣତ କରିବାର ନୂତନ ରାସ୍ତା ଖୋଜି ବାହାର କରିଛନ୍ତି ।

ଏହି ସାଇକେଲ ବାଇକ୍ ପ୍ରଦୂଷଣ ମୁକ୍ତ ହୋଇଥିବା ବେଳେ କମ୍ ମୂଲ୍ୟରେ ପ୍ରସ୍ତୁତ ହୋଇ ପାରୁଥିବାରୁ ଲୋକଙ୍କ ଭିତରେ ଏହାକୁ ନେଇ କୌତୁହଳ ସୃଷ୍ଟି ହୋଇଛି ।

ମିଳିଥିବା ସୂଚନା ଅନୁସାରେ ରଘୁନାଥପୁର ବ୍ଲକ୍ ଶିବପୁର ଗାଁର ପ୍ରଦୀପ କୁମାର ପରିଜା ଯୁକ୍ତ ଦୁଇ ବିଜ୍ଞାନ ପଢ଼ା ଶେଷ ହେବା ପରେ ସରକାରୀ ଚାକିରି ପାଇଁ ଚେଷ୍ଟା କରି ସେଥିରେ ବିଫଳ ହାଇଥିଲେ ।

ପରେ ସେ କଟକ ସହରର ଏକ ଘରୋଇ କମ୍ପାନୀରେ ଅତିରିକ୍ତ ଆକାଉଣ୍ଟାଣ୍ଟ ଭାବେ ଯୋଗ ଦେଇଥିଲେ । ଏଥିରେ ଯାହା ଦୁଇ ପଇସା ମିଳୁଥିଲା; ସେଥିରେ ତାଙ୍କର ଗୁଜୁରାଣ ମେଣ୍ଟି ଯାଉଥିଲା ।

କରୋନା ଯୋଗୁଁ ଗତ ଲକଡାଉନରେ ସେ ଚାକିରି କରୁଥିବା କମ୍ପାନୀ ବନ୍ଦ ହୋଇଯିବାରୁ ସେ ନିଜର ଗାଁ ଶିବପୁର ଫେରି ଆସିଥିଲେ ।

କମ୍ପାନୀ ବନ୍ଦ ହୋଇଯିବାରୁ ୫ ପ୍ରାଣୀ କୁଟୁମ୍ବଙ୍କ ପାଇଁ ଚଳିବା କଷ୍ଟକର ହୋଇପଡ଼ିଲା ।

ପରବର୍ତ୍ତୀ ସମୟରେ ସେ ନିଜ ଗୋଡ଼ରେ ଛିଡ଼ା ହୋଇ ଆତ୍ମନିର୍ଭରଶୀଳ ହେବାକୁ ପ୍ରୟାସ ଆରମ୍ଭ କଲେ । ମାତ୍ର ଏହି ସମୟ ଭିତରେ ସେ ଏକ ଦୁର୍ଘଟଣାର ଶିକାର ହେଲେ ।

ଏଥିରେ ତାଙ୍କର ବାମ ଗୋଡ଼ ଭାଙ୍ଗିଯିବାରୁ ସେ ସାଇକେଲ ଚଳାଇବାରେ ଅସମର୍ଥ ହେଲେ । ଅପରପକ୍ଷେ ପଇସା ଅଭାବରୁ ସେ ମୋଟର ସାଇକେଲ କିଣିବା ପାଇଁ ଦେଖୁଥିବା ସ୍ୱପ୍ନ ବି ପୂରଣ ହୋଇ ପାରିଲା ନାହିଁ ।

ଏଭଳି ସି୍ଥତିରେ ସେ ନିଜର ଉପସ୍ଥିତ ବୁଦ୍ଧି ଓ ଜ୍ଞାନକୁ ଉପଯୋଗ କରି ନିଜ ସାଇକେଲକୁ ବାଇକରେ ରୂପାନ୍ତରିତ କରିବା ପାଇଁ ଚିନ୍ତା କଲେ ।

ବ୍ୟାଟେରୀ, ଜେନେରେଟର ଓ କିଛି ଗାଡ଼ିର ପୁରୁଣା ଅଂଶକୁ କିଣି ସେ ଏହି କାମରେ ଲାଗି ପଡ଼ିଲେ । ଏଥିପାଇଁ ଅତି କମ୍ରେ ୫୦୦୦ ଟଙ୍କାର ଆବଶ୍ୟକତା ପଡ଼ିଲା ।

ତେବେ ସାଇକେଲକୁ ଅତି ଆକର୍ଷଣୀୟ ଢଙ୍ଗରେ ଗାଡ଼ିର ରୂପ ଦେବା ପାଇଁ ଅତି ବେଶୀରେ ୭୦୦୦ ଟଙ୍କାର ଆବଶ୍ୟକତା ପଡିଲା ।

ଏ ବାବଦରେ ଉଦ୍ଭାବକ ଶ୍ରୀ ପରିଜା କହନ୍ତି ତାଙ୍କ ରୂପାନ୍ତରିତ ବାଇକର ଦକ୍ଷତା ସ୍ଥାନୀୟ ଲୋକଙ୍କଠାରୁ ଆରମ୍ଭ କରି ବିଶେଷଜ୍ଞ ଓ ଇଞ୍ଜିନିୟରମାନେ ମାପି ସାରିଲେଣି ।

ଏହା ସାଧାରଣତଃ ଏକ ବାଇକ୍ ଯେଉଁଥିରେ ବିଭିନ୍ନ ପ୍ରକାର ସୁବିଧା ରହିଛି । ଏହା ପ୍ୟାଡେଲିଂ ଦ୍ୱାରା ମଧ୍ୟ ଚାଲି ପାରିବ । ନିଜେ ପ୍ୟାଡେଲିଂ କଲେ ଏହା ଆପେ ଆପେ ଚାର୍ଜ ମଧ୍ୟ ହୋଇ ପାରିବ ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ଏହା ସୋଲାର ଦ୍ୱାରା ଚାର୍ଜ ହୋଇ ପାରିବ । ତେଣୁ ଏଥିରେ ପ୍ରଦୂଷଣ ହେବନି ।

ସେ ଆହୁରି କହିଛନ୍ତି ସାଇକେଲକୁ ବାଇକରେ ପରିଣତ କରିବା ପାଇଁ ଆବଶ୍ୟକ ଅତ୍ୟାଧୁନିକ ଜ୍ଞାନ କୌଶଳ ମୋ ପାଖେ ନାହିଁ ।

ବ୍ୟାଟେରୀ ଓ ଅନ୍ୟାନ ସମଗ୍ରୀ ବ୍ୟବହାର କରି ୟୁ-ଟୁ୍ୟବର ସହାଯ୍ୟରେ ମୁଁ ଏହାକୁ ତିଆରି କରି ପାରିଛି ।

ୟୁଟୁ୍ୟବ୍ରୁ ନେଇଥିବା ଶିକ୍ଷା ଅନୁସାରେ ମୁଁ ପୁରୁଣ ଡିସି ବ୍ୟାଟେରୀ, ଏକ୍ସଲେଟର, ପାୱାର ବ୍ରେକ୍, ପ୍ୟାଡେଲ ଆସିଷ୍ଟ ସେନ୍ସର, ବ୍ୟାଟେରୀ ବାକ୍ସ, ପୁରୁଣା ଲିଥିୟମ ବ୍ୟାଟେରୀ, ଏଲ୍ଇଡି ଲାଇଟ୍, ହର୍ଣ୍ଣ, ପର୍ଟେବଲ୍ ସୋଲାର ପ୍ୟାନେଲ୍, ଚାର୍ଜର ଆଦି ସଂଗ୍ରହ କଲି ।

ପରବର୍ତ୍ତୀ ସମୟରେ ଏହାକୁ ରୂପାନ୍ତରଣ କରିବାକୁ ଚେଷ୍ଟା କଲି । ରୂପାନ୍ତରିତ ଏହି ସାଇକେଲ୍ ବାଇକ୍ ଚାର୍ଜ ହେବା ପାଇଁ ୫ରୁ ୬ ଘଣ୍ଟା ସମୟ ଲାଗୁଛି । ଯାହାକି ୭୦ରୁ ୮୦ କିଲୋମିଟର ଚାଲି ପାରୁଛି ।

ସେ ଆହୁରି କହନ୍ତି ଯେ ମୁଁ ମୋର ସାଇକେଲକୁ ବାଇକରେ ରୂପାନ୍ତରିତ କରିବା ପରେ ଅନେକ ଲୋକ ନିଜ ସାଇକେଲକୁ ବାଇକରେ ପରିଣତ କରିବା ଦିଗରେ ଆଗ୍ରହ ଦେଖାଉଛନ୍ତି ।

ଏଥିରେ ଖୁବ୍ କମ୍ ଖର୍ଚ୍ଚ ହେଉଥିବାରୁ ସ୍ଥାନୀୟ ଲୋକେ ଏହା କରିଦେବାକୁ ମୋତେ ଅନୁରୋଧ କରୁଛନ୍ତି ।

ବର୍ତ୍ତମାନ ସୁଦ୍ଧା ମୁଁ ୧୨ଟି ସାଇକେଲକୁ ଏପରି ବାଇକରେ ପରିଣତ କରି ସାରିଛି । ଅନ୍ୟ ୨୫ ଜଣ ଏବେଏହି ଟେକ୍ନୋଲୋଜିକୁ ଆପଣେଇବା ଅପେକ୍ଷାରେ ଅଛନ୍ତି ।

ଏ ବାବଦରେ କାର୍ତ୍ତିକ ମଲ୍ଲିକ କହନ୍ତି ବର୍ତ୍ତମାନ ସମୟରେ ୪୦ରୁ ୬୦ ହଜାର ଟଙ୍କା ଖର୍ଚ୍ଚ କରି ବାଇକ୍ କିଣିବା ସମ୍ଭବ ନୁହେଁ ।

ତେବେ ମାତ୍ର ୪୦୦୦ ଟଙ୍କା ଖର୍ଚ୍ଚ କରି ମୁଁ ମୋ ସାଇକେଲକୁ ବାଇକରେ ପରିଣତ କରି ପାରିଛି । ଯାହାକି ମୋତେ ଏହା କରିବାକୁ ଉତ୍ସାହିତ କଲା ।

ରଘୁନାଥପୁର ଅଞ୍ଚଳର ମନୋଜ କୁମାର ପଣ୍ଡା ଶ୍ରୀ ପରିଜାଙ୍କ ଏଭଳି ପ୍ରୟାସକୁ ପ୍ରଶଂସା କରିଛନ୍ତି । ରଘୁନାଥପୁର ଅଞ୍ଚଳର ଅତିରିକ୍ତ ଇଞ୍ଜିନିୟର ବିଶ୍ୱରଞ୍ଜନ ଦେହୁରି ମଧ୍ୟ ଏହି ନୂତନ ଉଦ୍ଭାବନର ପ୍ରଶଂସା କରିଛନ୍ତି ।

ସେ କହିଛନ୍ତି ଏହି ସାଇକେଲ୍ ବାଇକ୍ ପାଇଁ ଖର୍ଚ୍ଚ ମାତ୍ର ୪ ରୁ ୭ ହଜାର ପଡୁଥିବା ବେଳେ ଏଥିରେ ମାତ୍ର ୨ କିଲୋଗ୍ରାମର ଅତିରିକ୍ତ ଓଜନ ରହିଛି । ତେଣୁ ଏହା ଚଳାଇବାରେ କୌଣସି ଅସୁବିଧା ହେଉନି ।

ଲୋକାଲ ୱାୟାର