ରଙ୍ଗଭରିଲା ଜାତୀୟ ନାଟ୍ୟ ଉତ୍ସବ ‘ପୂର୍ବରଙ୍ଗ

ଭୁବନେଶ୍ୱର, ମାର୍ଚ୍ଚ ୧୧(ଲୋକାଲ ୱାୟାର): ମାର୍ଚ୍ଚ ୧ରୁ ୫ ତାରିଖ ପର୍ଯ୍ୟନ୍ତ ପାଞ୍ଚଦିନବ୍ୟାପୀ ରବୀନ୍ଦ୍ର ମଣ୍ଡପରେ ପ୍ରତି ସନ୍ଧ୍ୟା ପରିବେଷିତ ହୋଇଥିଲା ଭଳିକି ଭଳି ନାଟକ ।

ଦେଶର କୋଣ ଅନୁକୋଣର ୪ଟି ହିନ୍ଦୀ ଏବଂ ଗୋଟିଏ ଓଡ଼ିଆ ନାଟକ ଦେଖିବାର ଅବସର ମିଳିଥିଲା ଏହି ଜାତୀୟ ନାଟ୍ୟ ଉତ୍ସବ ‘ପୂର୍ବରଙ୍ଗ-୨୦୨୧’ ।

ପ୍ରଥମ ସନ୍ଧ୍ୟାରେ ଓଡ଼ିଶାର ଜୀବନରେଖା ଥିଏଟର ଗ୍ରୁପ୍ ରତି ମିଶ୍ରଙ୍କ ରଚନା ଓ ଅଭିନ୍ନ ରାଉତରାୟଙ୍କ ନିର୍ଦେଶନାରେ ଓଡ଼ିଆ ନାଟକ ‘ସୀତା’ ପରିବେଷଣ କରିଥିଲେ ।

ଦ୍ୱିତୀୟ ସନ୍ଧ୍ୟାରେ ଭୋପାଳ ବିହାନ ଡ୍ରାମା ୱାର୍କସ୍ ସ୍ୱପ୍ନନିଲ୍ ଜୈନଙ୍କ ରଚନା ଓ ସୌରଭ ଅନନ୍ତଙ୍କ ନିର୍ଦେଶନାରେ ହିନ୍ଦୀ ନାଟକ ‘ରୋମିଓ-ଜୁଲିଏଟ୍ ଇନ୍ ସ୍ମାର୍ଟ ସିଟି ଅଫ୍ କଣ୍ଟେମ୍ପୋରାରୀ ଇଣ୍ଡିଆ’, ତୃତୀୟ ସନ୍ଧ୍ୟାରେ ଆସାମ ସିଗୁଲ୍ ଥିଏଟର ଭାଗିରଥୀ ବାଇଙ୍କ ନିର୍ଦେଶନାରେ ହିନ୍ଦୀ ନାଟକ ‘କମଳାଦେବୀ’, ଚତୁର୍ଥ ସନ୍ଧ୍ୟାରେ ନୂଆଦିଲ୍ଲୀ ଆକ୍ଟର୍ସ ରେପେରଟୋରୀ ଥିଏଟର(ଆର୍ଟ) ବିଜୟ ଦାନ ଦେଠାଙ୍କ ରଚନା ଓ ଅବତାର ସାହାଣୀଙ୍କ ନିର୍ଦେଶନାରେ ହିନ୍ଦୀ ନାଟକ ‘ନାଗିନ ତେରା ବଂଶ ବଢ଼େ’, ପଞ୍ଚମ ତଥା ଅନ୍ତିମ ସନ୍ଧ୍ୟାରେ ନୂଆଦିଲ୍ଲୀ ୟୁନିକର୍ଣ୍ଣ ଆକ୍ଟର୍ସ ଷ୍ଟୁଡିଓ ଧର୍ମବୀର ଭାର୍ତ୍ତୀଙ୍କ ରଚନା ଓ ହାପି ରଣଜିତଙ୍କ ନିର୍ଦେଶନାରେ ହିନ୍ଦୀ ନାଟକ ‘ସୁରଜ କା ସାତୱାଁ ଘୋଡ଼ା’ ପରିବେଷିତ ହୋଇଥିଲା ।

ପ୍ରତି ନାଟକ ଶେଷରେ ରାଜ୍ୟର ୧୨ଜଣ ଓ ଭୁବନେଶ୍ୱରର ୨୦ଜଣ ମୋଟ୍ ୩୨ ଜଣ ପର୍ଯ୍ୟବେକ୍ଷକଙ୍କୁ ନେଇ ‘ଡିନର୍ସ ୱିଥ୍ ଡାଇରେକ୍ଟର’ କାର୍ଯ୍ୟକ୍ରମ ଅନୁଷ୍ଠିତ ହେଉଥିଲା ।

ଯେଉଁଥିରେ କେବଳ ନିଜ ନାଟକ ସମ୍ପର୍କରେ ନିର୍ଦେଶକ ମତ ରଖୁଥିଲେ । ନାଟକ ନେଇ ପର୍ଯ୍ୟବେକ୍ଷକଙ୍କ ପ୍ରଶ୍ନର ଉତ୍ତର ଦେଉଥିଲେ । ପ୍ରତିଟି ନାଟକ ଅତି ଚମତ୍କାର ଓ ଚିତ୍ତାକର୍ଷକ ହୋଇଥିଲା ।

କଳାକାରଙ୍କ ଅଭିନୟ, ମଞ୍ଚସଜ୍ଜା, ଆଲୋକ ପରିଚାଳନା ସବୁକିଛି ଦେଖିଲା ପରି ଥିଲା ।

ଯେଉଁଥିରୁ କିଛି ଶିକ୍ଷା ମିଳିଛି, ତାକୁ ଆଗାମୀ ନାଟକରେ ପ୍ରୟୋଗ କରି ଭଲ ନାଟକ ଭେଟି ଦେବାକୁ ପରିକଳ୍ପନା କରୁଛନ୍ତି କିଛି ନାଟ୍ୟବିତ୍ ବୋଲି କହିଛନ୍ତି ।

କୋଭିଡ୍ କଟକଣା ପାଳନ ପୂର୍ବରୁ ଇତିମଧ୍ୟରେ ନାଟକ ଉତ୍ସବ ଶେଷ ହୋଇଛି ।

ରାଜ୍ୟ ସଂସ୍କୃତି ବିଭାଗ ଦ୍ୱାରା ଓଡ଼ିଶା ସଙ୍ଗୀତ ନାଟକ ଏକାଡେମୀ ଓ ପୂର୍ବାଞ୍ଚଳ ସାଂସ୍କୃତିକ କେନ୍ଦ୍ର, କୋଲକାତା ପକ୍ଷରୁ ଓଡ଼ିଶା ନାଟ୍ୟ ସଂଘ ମିଳିତ ସହଯୋଗରେ ଏହି ଉତ୍ସବ ଆୟୋଜିତ ହୋଇଥିଲା ।

ଲୋକାଲ ୱାୟାର