ରାଜନୈତିକ ହିଂସାରେ ପ୍ରାଣ ହରାଇଥିବା ଲୋକଙ୍କ ତାଲିକା ଡିଜିପିଙ୍କୁ ଦେଲେ ଅପରାଜିିତା

କଟକ, ଜାନୁଆରୀ ୮(ଲୋକାଲ ୱାୟାର): ରାଜ୍ୟରେ ୨୦୧୭ ପଞ୍ଚାୟତ ନିର୍ବାଚନରୁ ୨୦୧୯ ସାଧାରଣ ନିର୍ବାଚନ ମଧ୍ୟରେ ରାଜନୈତିକ ହିଂସାରେ ପ୍ରାଣ ହରାଇଥିବା ବିଜେପି କର୍ମୀ ଓ ଅନ୍ୟାନ୍ୟ ଲୋକଙ୍କ ତାଲିକା ଡିଜିପିଙ୍କୁ ଦେବା ସହ ଆସନ୍ତା ଦିନରେ ପରିସ୍ଥିତି ପଶ୍ଚିମବଙ୍ଗ ଭଳି ହୋଇଯିବ ବୋଲି ସାଂସଦ ଅପରାଜିତା ଷଡ଼ଙ୍ଗୀ ଚେତାବନୀ ଦେଇଛନ୍ତି ।

ସାଂସଦ ପ୍ରଦାନ କରିଥିବା ତାଲିକାରେ ଗଞ୍ଜାମ ଜିଲ୍ଲାରେ ସର୍ବାଧିକ ତିନି ଜଣ (ବୁଗୁଡ଼ାର ଶିଶିର ନାୟକ, ହିଞ୍ଜିଳିର ବୁଲୁ ପ୍ରଧାନ ଏବଂ ମର୍ଦ୍ଦକୋଟ ପଞ୍ଚାୟତର ପିତାମ୍ବର ସ୍ୱାଇଁ)) ହତ୍ୟାର ଶିକାର ହୋଇଥିବା ଉଲ୍ଲେଖ କରାଯାଇଛି ।

କେନ୍ଦ୍ରାପଡ଼ାରେ ଦୁଇ ଜଣ (ପାଟକୁରାର ବଳରାମ ଜେନା ଓ କନ୍ସରର ମମତାରାଣୀ ସାମଲ) ଏବଂ ଖୋର୍ଦ୍ଧାରେ ଦୁଇ ଜଣ(ଜଙ୍କିଆ ବଡ଼ପୋଖରିଆରେ ଚିତ୍ରସେନ ଜେନା ଓ ମଙ୍ଗୁଲି ଜେନା)ଙ୍କୁ ହତ୍ୟା କରାଯାଇଥିବା ଉଲ୍ଲେଖ ଅଛି ।

ସେହିପରି ଢେଙ୍କାନାଳ ଜିଲ୍ଲା ତରଭାରେ ସଲମନ ରାଉତ, ମାଲକାନଗିରି ଜିଲ୍ଲାର ତମସା ପଞ୍ଚାୟତରେ ସପନ ବାବାଲି, ମୟୂରଭଞ୍ଜ ଜିଲ୍ଲାର ଉଦଳାରେ ଉତ୍ତମ ବିଶ୍ୱାଳ, ଗଜପତି ଜିଲ୍ଲା ପାରଳାଖେମୁଣ୍ଡି କରମଡ଼ାରେ ମିନତୀ ଶବର, ଭଦ୍ରକ ଜିଲ୍ଲା ବନ୍ତରେ ସୁରେଶ ରାଉତ, କୋରାପୁଟ ଜିଲ୍ଲା ବନ୍ଧୁଗାଁରେ କାମେଶ୍ୱର ପାଇକ, ବଲାଙ୍ଗିର ଜିଲ୍ଲା ଭୁଣ୍ଡିମୁହାଁରେ ରୋହିତ ପ୍ରଧାନ, ରାୟଗଡ଼ା ଜିଲ୍ଲା ପାଲୁଗାଁରେ ଅଭିଳାଷ ବାଗ ମଧ୍ୟ ରାଜନୈତିକ ହତ୍ୟାର ଶିକାର ହୋଇଥିବା ସାଂସଦ ଦର୍ଶାଇଛନ୍ତି ।

ଶୁକ୍ରବାର ବିଜେପି ନେତାମାନଙ୍କ ନେତୃତ୍ୱରେ କର୍ମୀମାନେ କଟକରେ ଡିଜିପିଙ୍କ କାର୍ଯ୍ୟାଳୟ ଘେରାଉ କରିବା ପରେ ନେତାମାନେ ଡିଜିପିଙ୍କ ସହ ଆଲୋଚନା କରିଥିଲେ ।

ବିଜେପି ରାଜ୍ୟ ସଭାପତି ସମୀର ମହାନ୍ତି, ସାଂସଦ ଅପରାଜିତା ଷଡ଼ଙ୍ଗୀଙ୍କ ସମେତ ଦଳର ଅନ୍ୟ ନେତାମାନେ ଏହି ଆଲୋଚନାରେ ସାମିଲ ହୋଇଥିଲେ ।

ଲୋକାଲ ୱାୟାର