ରାଜ୍ୟର ଦୁର୍ବଳ ସ୍ୱାସ୍ଥ୍ୟ ସେବାକୁ ପିସିସି ସଭାପତିଙ୍କ ସମାଲୋଚନା

କେନ୍ଦ୍ରାପଡା, ଫେବ୍ରୁଆରୀ ୧୧ (ଲୋକାଲ ୱାୟାର): ରାଜ୍ୟରେ ଅଧାରୁ ଅଧିକ ମଞ୍ଜୁରୀପ୍ରାପ୍ତ ଡାକ୍ତର ପଦବୀ ଫାଙ୍କା ପଡିଛି ।

ଚିକିତ୍ସା ଉପକରଣ ଓ ଔଷଧ କିଣାରେ ବଡ ଧରଣର ଦୁର୍ନୀତି ହୋଇଛି । ଏସବୁ ପ୍ରତି ସରକାର ଆଖିବୁଜି ଦେଇଥିବାରୁ ରାଜ୍ୟର ସ୍ୱାସ୍ଥ୍ୟ ସେବା ଭୁଷୁଡି ପଡିଲାଣି ବୋଲି ପିସିସି ସଭାପତି ନିରଞ୍ଜନ ପଟ୍ଟନାୟକ ଅଭିଯୋଗ କରିଛନ୍ତି ।

କେନ୍ଦ୍ରାପଡାରେ ମେଡିକାଲ କଲେଜ ସ୍ଥାପନ ଦାବିରେ କଂଗ୍ରେସ ପକ୍ଷରୁ ଆୟୋଜିତ ସମ୍ମିଳନୀରେ ଯୋଗ ଦେଇ ପିସିସି ସଭାପତି ଏହା କହିଛନ୍ତି ।

ସେହିପରି ଗ୍ରାମାଚଂଳ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରଗୁଡିକରେ ଡାକ୍ତର ନିଯୁକ୍ତ ହେଉନଥିବାରୁ ଲୋକେ ହନ୍ତସନ୍ତ ହେଉଛନ୍ତି ।

ଲୋକେ ନକଲି ଡାକ୍ତରଙ୍କ ପାଖକୁ ଯାଉଛନ୍ତି । ସଦ୍ୟଜନ୍ମିତ ଶିଶୁକୁ ଡାକ୍ତରଖାନା ନେବା ବାଟରେ ମୁତ୍ୟୁ ହେଉଛି ।

ଏସବୁ ସମସ୍ୟାକୁ ଦୃଷ୍ଟିରେ ରଖି ତଥା ଲୋକଙ୍କୁ ଉନ୍ନତ ସ୍ୱାସ୍ଥ୍ୟ ସେବା ଯୋଗାଇବାକୁ କେନ୍ଦ୍ରାପଡା ଜିଲ୍ଲାରେ ମେଡିକାଲ କଲେଜ ସ୍ଥାପନ ପାଇଁ ସରକାର ଆଗେଇ ଆସିବା ଉଚିତ ବୋଲି ପିସିସି ସଭାପତି ଆହ୍ୱାନ ଦେଇଛନ୍ତି ।

ସେହିପରି ମହାନଦୀ ପ୍ରସଙ୍ଗରେ ମୁଖ୍ୟମନ୍ତ୍ରୀଙ୍କ ବେପରୱା ମନୋଭାବକୁ ନିରଞ୍ଜନ ସମାଲୋଚନା କରିଛନ୍ତି ।

ମୁଖ୍ୟମନ୍ତ୍ରୀ ନିଜ ଶାସନ କାଳରେ ରାଜ୍ୟ ଅର୍ଥନୀତିକୁ ଧ୍ୱଂସ କରି ଚାଲିଛନ୍ତି ବୋଲି ପିସିସି ସଭାପତି କହିଛନ୍ତି ।

ଆଦିବାସୀ, ଚାଷୀ, ଦରିଦ୍ର ନିଷ୍ପେଷିତଙ୍କ ସମସ୍ୟା ଦୂର କରିବାରେ ରାଜ୍ୟ ସରକାର ବିଫଳ ହୋଇଛନ୍ତି ।

ସେହିପରି ବିଜେପି ସାମ୍ପ୍ରଦାୟିକତାକୁ ପ୍ରୋତ୍ସାହନ ଦେଉଛି । ଜାତି, ଧର୍ମକୁ ନେଇ ଲୋକଙ୍କ ମନରେ ବିଷର ମଞ୍ଜି ବୁଣୁଥିବା ରାଜନୈତିକ ଦଳଗୁଡିକ ପ୍ରତି ସତର୍କ ରହିବାକୁ ନିରଞ୍ଜନ ଲୋକଙ୍କୁ ପରାମର୍ଶ ଦେଇଛନ୍ତି ।

ରାଜ୍ୟର ଆଇନଶୃଙ୍ଖଳା ପରିସ୍ଥିତି ବିପନ୍ନ ହୋଇପଡିଛି । ମହିଳା ଓ ଝିଅମାନେ ସୁରକ୍ଷିତ ନାହାନ୍ତି ।

ରାଜ୍ୟର କିଛି ବୁ୍ୟରୋକ୍ରାଟ ଦଳୀୟ ବ୍ୟାପାରରେ ମୁଣ୍ଡ ଖେଳାଉଛନ୍ତି । ଦୁର୍ନୀତିଗ୍ରସ୍ତ ଅଧିକାରୀମାନେ ଲକ୍ଷ୍ଣଣରେଖା ଅତିକ୍ରମ କରୁଛନ୍ତି ।

ସରକାର କିଛି ଅଧିକାରୀଙ୍କ ଇସାରାରେ ପରିଚାଳିତ ହେଉଛି ବୋଲି ଏହି ସମ୍ମିଳନୀରେ ଯୋଗ ଦେଇଥିବା ବରିଷ୍ଠ କଂଗ୍ରେସ ନେତା ଓ ବିଧାୟକ ସୁରେଶ ରାଉତରାୟ କହିଛନ୍ତି ।

ବରିଷ୍ଠ ନେତାମାନଙ୍କୁ ମୋଟର ସାଇକେଲ ର‌୍ୟାଲି କରି ସମ୍ମିଳନୀ ସ୍ଥଳକୁ ନିଆଯାଇଥିଲା ।

ପୂର୍ବତନ ମନ୍ତ୍ରୀ ଗଣେଶ୍ୱର ବେହେରା, ପୂର୍ବତନ ରାଜନଗର ବିଧାୟକ ଅଂଶୁମାନ ମହାନ୍ତି, କେନ୍ଦ୍ରାପଡା ମ୍ୟୁନିସିପାଲଟିର ପୂର୍ବତନ ଅଧ୍ୟକ୍ଷ ଆକବର ଅଲ୍ଲୀ ପ୍ରମୁଖ ସମ୍ମିଳନୀରେ ଭାଷଣ ଦେଇଥିଲେ ।

ଲୋକାଲ ୱାୟାର