ରାଜ୍ୟର ୩୦ କ୍ଲଷ୍ଟରରେ ହସ୍ତତନ୍ତର ବିକାଶ

ଭୁବନେଶ୍ୱର,ଡିସେମ୍ବର ୨୩(ଲୋକାଲ ୱାୟାର): ଲୋପ ପାଇ ଯାଉଥିବା ହସ୍ତତନ୍ତକୁ ନୂଆ ରୂପ ଦେବା ପାଇଁ ରାଜ୍ୟ ହସ୍ତତନ୍ତ ବିଭାଗ ପଦକ୍ଷେପ ନେବା ଆରମ୍ଭ କରିଛି ।

ଓଡ଼ିଶା ହସ୍ତତନ୍ତର ପାରମ୍ପରିକତା ବଜାୟ ରଖି ଏହାକୁ କିପରି ନୂଆ ଢଙ୍ଗରେ ପ୍ରସ୍ତୁତ କରାଯିବ ସେଥିପାଇଁ ୩୦ ଟି କ୍ଲଷ୍ଟରରେ କାମ ହେଉଛି ।

ହେନ୍ତାଳ, ଧଳାପଥର ପରଦା, ହବସପୁରୀ ଭଳି ଡିଜାଇନକୁ ପ୍ରାଥମିକତା ଦିଆଯାଇ ନୂଆ ରୂପରେ ପ୍ରସ୍ତୁତ କରାଯାଉଛି ।

ଏଥିପାଇଁ ନ୍ୟାସନାଲ୍ ଇନଷ୍ଟିଚୁ୍ୟଟ୍ ଅଫ୍ ଫ୍ୟାଶନ୍ ଟେକ୍ନୋଲୋଜିର ଛାତ୍ରଛାତ୍ରୀ, ଅଭିଜ୍ଞ ପ୍ରଶିକ୍ଷକ ଓ କିଛି ଫ୍ରିଲାନ୍ସ ଡିଜାଇନରଙ୍କ ସହାୟତାରେ ଏସବୁ ଡିଜାଇନ୍ କରାଯାଉଛି ।

ଏ ବାବଦରେ ବୟନିକାର ସଚିବ ଦେବରାଜ ସାହୁ କହିଛନ୍ତି, ଓଡ଼ିଶା ହସ୍ତତନ୍ତ କହିଲେ ଆମେ କେବଳ ସମ୍ବଲପୁରୀ, ବ୍ରହ୍ମପୁରୀ, ବୋମକେଇ, ସୋନପୁରୀ ଭଳି ଅଳ୍ପ କିଛି ଶାଢ଼ୀକୁ ଜାଣୁ ।

ନୂଆ କରି ଏଇ କିଛି ବର୍ଷ ହେବ କୋଟପାଡ ଓ ଡଙ୍ଗରିଆ କନ୍ଧ ଡିଜାଇନ୍ ବଜାରକୁ ଆସିଛି ।

ପାରମ୍ପରିକତାକୁ ବଜାୟ ରଖି ଏସବୁ ଶାଢ଼ୀକୁ ଡିଜାଇନରମାନେ ନୂଆ ରୂପ ଦେଇଥିବା ବେଳେ ଆହୁରି ଅନେକ ଡିଜାଇନ୍ ଏବେ ବି ଅଣଦେଖା ହୋଇ ରହିଛି ।

ଏସବୁ ଡିଜାଇନ୍ର ପୁନରୁତ୍ଥାନ କରି ଏହାକୁ କିପରି ଗ୍ରାହକଙ୍କ ପାଖକୁ ଆଣିବା ପାଇଁ ରାଜ୍ୟ ହସ୍ତତନ୍ତ ଓ ବୟନ ଶିଳ୍ପ ବିଭାଗ ସହ ମିଶି ବୟନିକା ପାରମ୍ପରିକ ବୁଣାକାରମାନଙ୍କ ସହାୟତାରେ ଡିଜାଇନ୍ ପ୍ରସ୍ତୁତ କରୁଛି ।

ଧଳାପଥର ପରଦା, କଳାହାଣ୍ଡି ଜିଲ୍ଲାର ହାବାସ୍ପୁରୀ ଶାଢ଼ୀ, ଢେଙ୍କାନାଳର ତିମିଲେହିଁ ଆଦି ଡିଜାଇନକୁ ପୁଣିଥରେ ପାରମ୍ପରିକ ବୁଣାକାରମାନଙ୍କ ହାତରେ ପ୍ରସ୍ତୁତ କରିବା ସହ ସେମାନଙ୍କୁ କର୍ମ ନିୟୋଜନ ଯୋଗାଇବା ଏହି ଅଭିଯାନର ଲକ୍ଷ୍ୟ ।

ବର୍ତ୍ତମାନ ଯାଏଁ ଆମେ ରାଜ୍ୟର ୩୦ଟି ସ୍ଥାନରେ ଏଥିପାଇଁ କ୍ଲଷ୍ଟର ପ୍ରସ୍ତୁତ କରିଛୁ ।

ବରଗଡ଼ରେ ୧୨ଟି, କଟକରେ ୨ଟି, ଯାଜପୁରରେ ୨ଟି, ବୌଦ୍ଧରେ ଗୋଟିଏ, ସୁବର୍ଣ୍ଣପୁରରେ ୩ଟି, ବାଲେଶ୍ୱର ଓ କେନ୍ଦୁଝରରେ ଗୋଟିଏ, ବଲାଙ୍ଗୀରରେ ୩ଟି ଓ ଗଞ୍ଜାମରେ ଗୋଟିଏ ଲେଖାଏଁ କ୍ଲଷ୍ଟର କରାଯାଇଛି ।

ପ୍ରତି କ୍ଲଷ୍ଟରେ ୩୦୦ ଲେଖାଏଁ ସମୁଦାୟ ୩ ହଜାର ବୁଣାକାରଙ୍କୁ ଏହି ନୂଆ ଡିଜାଇନ୍ କାମରେ ନିୟୋଜିତ କରାଯାଇଛି ।

କେବଳ ସେତିକି ନୁହେଁ, ପାରମ୍ପରିକ ବୁଣାକାରମାନଙ୍କୁ ନ୍ୟାସନାଲ୍ ଇନଷ୍ଟିଚୁ୍ୟଟ୍ ଅଫ୍ ଫ୍ୟାଶନ୍ ଟେକ୍ନୋଲୋଜି ଓ ଫ୍ରିଲାନ୍ସ ଫ୍ୟାଶନ୍ ଡିଜାଇନରଙ୍କ ଦ୍ୱାରା ପ୍ରଶିକ୍ଷଣ ଦିଆଯିବାର ବ୍ୟବସ୍ଥା ବି କରାଯାଇଛି ।

ଭାରତ ସରକାର ଗୋଟିଏ ଲେଖାଏଁ କ୍ଲଷ୍ଟରର ଉନ୍ନତିକରଣ ପାଇଁ ୨କୋଟି ଟଙ୍କା ଖର୍ଚ୍ଚ କରୁଥିବାବେଳେ ବୁଣାକାରମାନଙ୍କୁ ସମସ୍ତ ପ୍ରକାର ଅତ୍ୟାଧୁନିକ ସୁବିଧା ଯୋଗାଇ ଦିଆଯାଉଛି ।

ଜଣେ ଲେଖାଏଁ ଡିଜାଇନର୍ ୩ବର୍ଷ ପାଇଁ ବୁଣାକାରଙ୍କ ପ୍ରଶିକ୍ଷଣ ପାଇଁ ଚୁକ୍ତିବଦ୍ଧ ହୋଇ କାର୍ଯ୍ୟ କରନ୍ତି ।

ଆଧୁନିକତାକୁ ଦୃଷ୍ଟିରେ ନ୍ୟାସ୍ନାଲ ହ୍ୟାଣ୍ଡଲୁମ୍ ଡେଭଲପମେଣ୍ଟ କାର୍ଯ୍ୟକ୍ରମ ଦ୍ୱାରା ଡିଜାଇନରମାନଙ୍କୁ ବୟନ ଉତ୍ପାଦନ ସମ୍ପର୍କରେ ପ୍ରଶିକ୍ଷଣ ଦିଆଯାଉଛି ।

ସେହିପରି ଅନେକ ଆଦିବାସୀ ସମ୍ପ୍ରଦାୟର ଡିଜାଇନକୁ ଆଣି ସିଲ୍କ, କଟନ୍, ଟସରରେ ପକାଇ ନୂଆ ଫ୍ୟାବ୍ରିକ ବାହାର କରାଯାଉଛି ।

ବିଶେଷକରି ଡଙ୍ଗରିଆ ଡିଜାଇନକୁ ଏଥିପାଇଁ ବ୍ୟବହାର କରାଯାଉଥିବାରୁ ବଜାର ଚାହିଦା ବଢ଼ିଛି ।

ତିମିଲେହିଁ ଡିଜାଇନକୁ ମଧ୍ୟ ସିଲ୍କରେ ବ୍ୟବହାର କରାଯାଇ ଏହାକୁ ନୂଆରୂପ ଦିଆଯାଉଛି ।

ଡଙ୍ଗରିଆ, ହେନ୍ତାଳ ଏବଂ କୋଟପାଡ ଆଦି ଭଳି ପୁରୁଣା ହସ୍ତତନ୍ତକୁ ବିଭିନ୍ନ ଉତ୍ପାଦରେ ବ୍ୟବହାର କରାଯାଇ ନୂଆ ଉତ୍ପାଦ ପ୍ରସ୍ତୁତ କରାଯାଉଛି ।

ବୁଣାକାରଙ୍କ ଫ୍ୟାବ୍ରିକ୍ ଓ ହସ୍ତତନ୍ତର ବଜାର ପାଇଁ ବୟନିକା ଦାୟିତ୍ୱ ନେଇଥିବା ବୟନିକାର ସଚିବ ଦେବରାଜ ସାହୁ କହିଛନ୍ତି ।

ଲୋକାଲ ୱାୟାର