ରାହାମା ବଜାରର ଦୁଇ ବ୍ୟବସାୟୀ ଗୋଷ୍ଠୀ ମୁହାଁମୁହିଁ

ଜଗତସିଂହପୁର, ଅଗଷ୍ଟ ୨୭(ଲୋକାଲ ୱାୟାର): ପ୍ରଶାସନ, ସରପଞ୍ଚ ଓ ବ୍ୟବସାୟୀଙ୍କ ସହମତି ନନେଇ ଜଗତସିଂହପୁର ଜିଲ୍ଲାର ବଜାର କମିଟି କୁଜଙ୍ଗ ବ୍ଲକ ତାଳପଦା ପଂଚାୟତ ଅନ୍ତର୍ଗତ ରାହାମା ବଜାରକୁ ତିନିଦିନିଆ ସଟ୍ ଡାଉନ ଘୋଷଣା କରିବାକୁ ନେଇ ଦୁଇ ବ୍ୟବସାୟୀ ଗୋଷ୍ଠୀ ମୁହାଁମୁହିଁ ହୋଇଛନ୍ତି

ଜଗତସିଂହପୁର ଜିଲ୍ଲାର ପ୍ରମୁଖ ବ୍ୟାବସାୟିକ ସ୍ଥଳୀ ଭାବେ ରାହାମା ବଜାର ଉପରେ ବ୍ୟବସାୟୀ, ଚାଷୀ ଓ ଗାଁଗୁଡ଼ିକର କ୍ଷୁଦ୍ର ବ୍ୟବସାୟୀମାନେ ନିର୍ଭର କରିଥାନ୍ତି ।

ପୂର୍ବରୁ ହୋଇଥିବା ସଟ୍ ଡାଉନ ଯୋଗୁଁ ବ୍ୟବସାୟୀମାନେ ବିପୁଳ କ୍ଷତି ସହିଥିଲେ । ତେବେ ଗତକାଲି ସେହି ଅଞ୍ଚଳରୁ ୯ କରୋନା ପଜିଟିଭ ମାମଲା ଚିହ୍ନଟ ହୋଇଥିଲା ।

ସେମାନଙ୍କ ମଧ୍ୟରେ ରାହାମାର ଜଣେ ବ୍ୟବସାୟୀ ଥିବାରୁ ସଂକ୍ରମଣ ଏଡ଼ାଇବାକୁ ବଜାର କମିଟି ସମ୍ପାଦକ ସୁନାକର ବେହେରା ତିନି ଦିନ ପାଇଁ ବଜାର ସଟଡାଉନ ଘୋଷଣା କରିଥିଲେ ।

ହେଲେ ବହୁ ବ୍ୟବସାୟୀ କମିଟିର ନିଷ୍ପତ୍ତିକୁ ବେଆଇନ ବୋଲି କହି ନିଜ ପ୍ରତିଷ୍ଠାନ ଖୋଲିଥିଲେ ।

ଅନ୍ୟ ବ୍ୟବସାୟୀଙ୍କ ଅନୁମତି ନନେଇ ତିନି ଦିନ ସଟ୍ ଡାଉନ ପାଇଁ ବଜାର କମିଟି ନେଇଥିବା ନିଷ୍ପତ୍ତିକୁ ତୀବ୍ର ସମାଲୋଚନା କରିଛନ୍ତି ପୂର୍ବତନ ବଜାର କମିଟି ସମ୍ପାଦକ ଗଜେନ୍ଦ୍ର ବିଶ୍ୱାଳ ।

ପରିସ୍ଥିତିକୁ ଦୃଷ୍ଟିରେ ରଖି କେବଳ ଜିଲ୍ଲାପାଳ ଓ ସରପଞ୍ଚ ସଟ୍ ଡାଉନ ଘୋଷଣା କରିପାରିବେ ।

ପଜିଟିଭ ଚିହ୍ନଟ ବ୍ୟବସାୟୀ ଦୋକାନ ଖୋଲିଥିବା ବେଳେ ଦୟନୀୟ ସ୍ଥିତିରେ ରହୁଥିବା କ୍ଷୁଦ୍ର ବ୍ୟବସାୟୀଙ୍କ ଦୋକାନ ବନ୍ଦ ନିଷ୍ପତ୍ତିକୁ ବିରୋଧ କରି ଅଧିକାଂଶ ଦୋକାନ ଖୋଲା ରହିଛି ବୋଲି ସେ କହିଛନ୍ତି ।

୯ଟି ପଜିଟିଭ ମାମଲା ଚିହ୍ନଟ ହୋଇଥିଲେ ବି ପଞ୍ଚାୟତ କିମ୍ବା ପ୍ରଶାସନ ପକ୍ଷରୁ ରାହାମା ବଜାର ସଟଡାଉନ ଘୋଷଣା କରିବାକୁ କୌଣସି ନିଷ୍ପତ୍ତି ହୋଇନାହିଁ ବୋଲି ତାଳପଦା ସରପଞ୍ଚ ମମତା ସାହୁ କହିଛନ୍ତି ।

ଲୋକାଲ ୱାୟାର