ରିଜର୍ଭ ବ୍ୟାଙ୍କ ଡେପୁଟି ଗଭର୍ଣ୍ଣର ପଦରେ ଓଡ଼ିଶାର ମାଇକେଲ ଦେବବ୍ରତ ପାତ୍ର

ନୂଆଦିଲ୍ଲୀ, ଜାନୁଆରୀ ୧୪(ଲୋକାଲ ୱାୟାର): ଓଡ଼ିଶାର ମାଇକେଲ ଦେବବ୍ରତ ପାତ୍ରଙ୍କୁ ମଙ୍ଗଳବାର କେନ୍ଦ୍ର ସରକାର ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆରବିଆଇ)ର ଡେପୁଟି ଗଭର୍ଣ୍ଣର ପଦରେ ନିଯୁକ୍ତି ଦେଇଛନ୍ତି । ସେ ଏବେ ଆରବିଆଇ ମନିଟାରୀ ପଲିସି କମିଟିର ସଚିବ ଅଛନ୍ତି । ନୂତନ ପଦବିରେ ସେ ୩ ବର୍ଷ ପାଇଁ ରହିବେ ।

କଟକରେ ଜନ୍ମିତ ଶ୍ରୀ ପାତ୍ର ଆରବିଆଇର ଚତୁର୍ଥ ଡେପୁଟି ଗଭର୍ଣ୍ଣର ଭାବେ ଭିରାଲ ଆଚାର୍ଯ୍ୟଙ୍କ ସ୍ଥାନ ନେବେ । ପୂର୍ବରୁ ଉର୍ଜିତ ପଟେଲ ମଧ୍ୟ ଏହି ପଦରେ ଥିଲେ । ଶ୍ରୀ ପାତ୍ର ରେଭେନ୍ସା ମହାବିଦ୍ୟାଳୟରୁ ସ୍ନାତକ ଓ ସ୍ନାତକୋତ୍ତର ଡିଗ୍ରୀ ହାସଲ କରିଥିଲେ ।

ଉଲ୍ଲେଖଯୋଗ୍ୟ, ଓଡ଼ିଶାର ବିଭୁ ପ୍ରସାଦ କାନୁନଗୋ ମଧ୍ୟ ୨୦୧୭ ଏପ୍ରିଲରୁ ଆରବିଆଇର ଡେପୁଟି ଗଭର୍ଣ୍ଣର ଭାବେ କାର୍ଯ୍ୟରତ ଅଛନ୍ତି । ସେ ଉତ୍କଳ ବିଶ୍ୱବିଦ୍ୟାଳୟର ପୂର୍ବତନ ଛାତ୍ର ।

ଉଲ୍ଲେଖଯୋଗ୍ୟ, ଭୁବନେଶ୍ୱର ଡିଏମ ସ୍କୁଲର ପୂର୍ବତନ ଛାତ୍ର ତଥା ଅନ୍ୟ ଜଣେ ଓଡ଼ିଆ ଶକ୍ତିକାନ୍ତ ଦାସ ଏବେ ଆରବିଆଇ ଗଭର୍ଣ୍ଣର ଭାବେ କାର୍ଯ୍ୟରତ ଅଛନ୍ତି । ତାମିଲନାଡ଼ୁ କ୍ୟାଡରର ୧୯୮୦ ବ୍ୟାଚର ଏହି ଆଇଏଏସ୍ ଅଫିସର ୨୦୧୮ ଡିସେମ୍ବରରୁ ଏହି ପଦରେ ଅଛନ୍ତି ।

ଲୋକାଲ ୱାୟାର