ରେଭେନ୍ସା ପଡ଼ିଆରେ ସୂର୍ଯ୍ୟୋପରାଗ ଦୃଶ୍ୟ ଦେଖିପାରିବେ କଟକବାସୀ

କଟକ,ଡିସେମ୍ବର ୨୫ (ଲୋକାଲ ୱାୟାର): ଗୁରୁବାର ରେଭେନ୍ସା ପଡ଼ିଆରେ ଟେଲିସ୍କୋପ ଓ ଫିଲଟର୍ ମାଧ୍ୟମରେ ସୂର୍ଯ୍ୟୋପରାଗର ଦୃଶ୍ୟ ଦେଖିବା ପାଇଁ ବିଜ୍ଞାନ ଚେତନା ମଞ୍ଚ ସ୍ବତନ୍ତ୍ର ବ୍ୟବସ୍ଥା କରିଥିବା ମଞ୍ଚର ସାଧାରଣ ସଂପାଦକ ଡକ୍ଟର ସିଦ୍ଧାର୍ଥ ଭରଦ୍ୱାଜ ସୂଚନା ଦେଇଛନ୍ତି।

ଆସନ୍ତାକାଲି ସକାଳ ପ୍ରାୟ ୮.୨୦ରୁ ଦିନ ୧୧ଟା ୩୦ ମିନିଟ ପର୍ଯ୍ୟନ୍ତ ଓଡିଶାରେ ଆଂଶିକ ସୂର୍ଯ୍ୟୋପରାଗ ଦେଖାଯିବ ଏବଂ ଦିନ ୯ଟା ୪୫ରେ ସୂର୍ଯ୍ୟର ସର୍ବାଧିକ ୬୦ ଭାଗ ଚନ୍ଦ୍ର ଦ୍ୱାରା ଆଚ୍ଛାଦିତ ହେବ।

ଏହି ସମୟରେ କଟକର ଛାତ୍ରଛାତ୍ରୀ ଓ ଅନ୍ୟ ବର୍ଗର ଲୋକ ଏହି ମହାଜାଗତିକ ଦୃଶ୍ୟ ଦେଖିପାରିବେ ବୋଲି କୁହାଯାଇଛି।

ଏହା ପୂର୍ବରୁ ସୂର୍ଯ୍ୟୋପରାଗ ସଂପର୍କରେ ବିଭିନ୍ନ ବୈଜ୍ଞାନିକ ତଥ୍ୟ ତଥା ଏହି ସମୟରେ ଦେଶ ବିଦେଶରେ ପୂର୍ବରୁ ସଂଗଠିତ ବିଭିନ୍ନ ବୈଜ୍ଞାନିକ ଗବେଷଣା ସଂପର୍କରେ ଛାତ୍ରଛାତ୍ରୀଙ୍କୁ ଅବଗତ କରିବା ଲାଗି ବିଜ୍ଞାନ ଚେତନା ମଞ୍ଚ ପକ୍ଷରୁ ଆଲୋଚନାଚକ୍ର ଓ କର୍ମଶାଳାର ଆୟୋଜନ କରାଯାଇଛି ।

ସୂର୍ଯ୍ୟକୁ କିପରି ସନଫିଲଟର୍ ବା ପିନହୋଲ୍ କ୍ୟାମେରା ବା ଟେଲିସ୍କୋପ୍ ଦେଇ ନିରାପଦରେ ଦେଖିହେବ, କର୍ମଶାଳାରେ ତାର ପ୍ରଶିକ୍ଷଣ ଦିଆଯାଇଛି ।

ସଂଗଠନ ପକ୍ଷରୁ ସମସ୍ତେ ସୂର୍ଯ୍ୟୋପରାଗ ଦେଖିବା ପାଇଁ ସୁଲଭ ମୂଲ୍ୟରେ ଚଷମା ବ୍ୟବସ୍ଥା କରାଯାଇଛି।

ସେହିପରି ସୂର୍ଯ୍ୟୋପରାଗ ସଂପର୍କିତ ଜ୍ଞାନକୁ ସାର୍ବଜନୀନ କରିବା ପାଇଁ ମଂଚର ନିର୍ଦ୍ଦେଶକ ମନୋଜ ସିହ୍ନାଙ୍କ ନିର୍ଦ୍ଦେଶନାରେ ଏକ ଭିଡିଓ ପ୍ରସ୍ତୁତ କରାଯାଇ ୟୁ-ଟ୍ୟୁବରେ ସଂଯୋଗ କରାଯାଇଥିବା ସୂଚନା ମିଳିଛି।

ଲୋକାଲ ୱାୟାର