ଲକ୍ ଡାଉନରେ ମନକୁ ଖୁସି ଆଣୁଛି ରେଡ୍ ଶାଢ଼ୀ, ରେଡ୍ ଲିପଷ୍ଟିକ୍

ଭୁବନେଶ୍ୱର,ଅଗଷ୍ଟ ୯(ଲୋକାଲ ୱାୟାର): ଚାରିଆଡ଼େ ଏବେ ଆଲୋଚନାରେ କରୋନା । ସମ୍ବାଦପତ୍ର ପୃଷ୍ଠାରେ ଶିରୋନାମା ବି କରୋନା କବଜାରେ ।

ଶନିବାର ରବିବାର ସମ୍ପୂର୍ଣ୍ଣ ଲକଡାଉନ୍ । ସପ୍ତାହର ଅନ୍ୟ ଦିନମାନଙ୍କରେ ଯଦିବା ଘରୁ ବାହାରି ହେଉଛି, ହେଲେ ଏଥିରେ ବି ଛାତି ଧଡ଼ ଧଡ଼ ।

ସାଙ୍ଗସାଥୀ ଦେଖାଦେଖି, ବାହାରେ ବୁଲାବୁଲି ସବୁ ମନା । ଦୀର୍ଘଦିନ ହେଲାଣି ଆଲମିରାରେ ଟଙ୍କା ହୋଇ ରହିଛି ରଙ୍ଗବେରଙ୍ଗର ଶାଢ଼ୀ । ଆଉ ନାଲି ଲିପଷ୍ଟିକ୍ କଥା ତ ନ କହିବା ଭଲ ।

ଗତ ୪ ମାସ ହେଲାଣି ଲୋକେ ଯେମିତି ଜୀବନ ଜିଇଁବା ଛାଡ଼ି ଦେଇଛନ୍ତି । ବିଶେଷ କରି ମହିଳା ।

ସକାଳୁ ଉଠି ରୋଷେଇ ଘରେ ପଶୁଛନ୍ତି ଯେ ସକାଳୁ ସନ୍ଧ୍ୟା ଯାଏଁ ଭଳିକି ଭଳି ବ୍ୟଞ୍ଜନ ବନାଇବାରେ ଓ ଘର ଲୋକଙ୍କୁ ଖୁସି କରିବାରେ ସବୁ ସରି ଯାଉଛି ।

୪ ମାସର ଏହି ଲକଡାଉନରେ ସେମାନଙ୍କ ରୋଷେଇ ତାଲିକା ଲମ୍ବା ହେଉଛି ସିନା ହେଲେ ବାକି ସବୁ କମିଯାଉଛି ।

ସପ୍ତାହରେ ୩ ଦିନ ମୁଣ୍ଡ କୁଣ୍ଡାଇଲେ ବାକି ଦିନ ସେମିତି ବିତୁଛି ।

ଏସବୁ ପରିସ୍ଥିତିକୁ ଆଖି ଆଗରେ ରଖି ଓ ମହିଳାଙ୍କ ମାନସିକ ସୁସ୍ଥତାକୁ ବିଚାରକୁ ନେଇ ସ୍ୱେଚ୍ଛାସେବୀ ସବିତା ପଟ୍ଟନାୟକ ପ୍ରସ୍ତୁତ କରିଛନ୍ତି ରେଡ୍ ଶାଢ଼ୀ, ରେଡ୍ ଲିପଷ୍ଟିକ୍… ।

୧୨ ମିନିଟ୍ ୨୦ ସେକେଣ୍ଡର ଏହି ଭିଡିଓ ଏବେ ସୋସିଆଲ୍ ମିଡିଆରେ ଟ୍ରେଣ୍ଡ ସେଟର ପାଲଟିଲାଣି ।

ମ୍ୟାଜିକ୍ ଅଫ୍ ଶାଢ଼ୀ ନାମକ ଏକ ଆନ୍ତର୍ଜାତିକ ଦଳ ମଧ୍ୟ ଏହି ବିଷୟକୁ ଚଳିତ ମାସର ଥିମ୍ ରଖିଛନ୍ତି ।

ସବିତା ପଟ୍ଟନାୟକ ଏହି ଭିଡିଓର ପରିକଳ୍ପନା କରିଥିବା ବେଳେ ଏହାର ନିର୍ଦ୍ଦେଶନା ମଧ୍ୟ ଦେଇଛନ୍ତି ।

ଏଥିରେ ଅନ୍ୟମାନଙ୍କ ମଧ୍ୟରେ ସାଇ ଇଣ୍ଟରନ୍ୟାସନାଲ୍ ସ୍କୁଲର ଶିକ୍ଷୟିତ୍ରୀ ସୁନିତା ମିଶ୍ର, ଶୁଶ୍ରୁଷାର ସ୍ୱାତୀ ମହାନ୍ତି ଓ ଚିତ୍ରିକା ପଟ୍ଟନାୟକ, ଲେଖିକା ସ୍ୱାଗତିକା ସେଠୀ, ଆପୋଲୋ ଡାକ୍ତରଖାନାର ଦନ୍ତ ଚିକିତ୍ସକ ରଶ୍ମୀ ଆଚାର୍ଯ୍ୟ ଓ ହୋମମେକର୍ ପ୍ରଭା ମିଶ୍ର ପ୍ରମୁଖ ଅଭିନୟ କରିଛନ୍ତି ।

ଏ ବାବଦରେ ସବିତା ପଟ୍ଟନାୟକ କହନ୍ତି କିଛିଦିନ ହେଲାଣି କିଛି ବି ଭଲ ଲାଗୁନି । ଘରୁ ବାହାରି ହେଉନି । ସାଙ୍ଗସାଥୀଙ୍କ ସହ ମିଶି ହେଉନି । ଆଗରୁ ଭାବୁଥିଲି କରୋନା ଯିବ ।

ହେଲେ ଏବେ ଲାଗୁଛି କରୋନା ଆଉ ଯିବନି । ଆମକୁ କରୋନା ସହ ବଞ୍ଚିବାକୁ ହେବ । ଆଉ ବଞ୍ଚିବାକୁ ହେଲେ ଆମକୁ ନିଜକୁ ଖୁସି କରିବାକୁ ହେବ ନିଜକୁ ଉତ୍ସାହିତ କରିବାକୁ ହେବ ।

ସେଥିପାଇଁ ଏମିତି ଏକ ପରିକଳ୍ପନା ମନକୁ ଆସିଲା । ମୁଁ ଏହି ଭିଡିଓ ମାଧ୍ୟମରେ ଆମ ମହିଳାମାନଙ୍କୁ ପୁଣିଥରେ ସେମାନେ ଜିଉଁଥିିବା ଜୀବନକୁ ଫେରାଇ ଆଣିବାକୁ ଚେଷ୍ଟା କଲି ।

ସାଇ ଇଣ୍ଟରନ୍ୟାସନାଲ୍ ସ୍କୁଲର ଶିକ୍ଷୟିତ୍ରୀ ସୁନିତା ମିଶ୍ର କହନ୍ତି ଯେବେ ମୁଁ ସବିତା ପଟ୍ଟନାୟକଙ୍କୁ ଫୋନ୍ ପାଇଲି ଆଉ ସେ ମୋତେ କିଛି ନୂଆ କରିବାକୁ ପ୍ରସ୍ତାବ ଦେଲେ ମୁଁ ଉତ୍ସାହିତ ହୋଇ ପଡ଼ିଲି ।

ଦୀର୍ଘ ଦିନ ଧରି ଆଲମିରାରେ ପଶି ଅଣନିଶ୍ୱାସୀ ହୋଇଥିବା ମୋ ନାଲି ଶାଢ଼ୀକୁ ବାହାର କଲି ଆଉ ରେଡ ଲିପଷ୍ଟିକ୍ ପିନ୍ଧିଲି ।

ଏଇ ୫ ମାସରେ ମୁଁ କରୋନା ପାଇଁ ଦୁଃଖିତ ଅଛି ସତ ହେଲେ ଏ ସମୟକୁ କିପରି ସୃଜନାତ୍ମକ ଢଙ୍ଗରେ ବ୍ୟବହାର କରିବି ସେଥିପାଇଁ ଅନେକ କିଛି କରିଛି । ମୁଁ ଜଣେ ଶିକ୍ଷୟିତ୍ରୀ ।

ତେଣୁ ଲକଡାଉନରେ ପିଲାଙ୍କ ପାଖରେ ରସାୟନବିଜ୍ଞାନ ଭଳି ଏକ ବିଷୟକୁ କିପରି ସହଜରେ ଓ ସୃଜନ ଢଙ୍ଗରେ ପହଞ୍ଚାଇବି ସେଥିପାଇଁ ଅନେକ ପ୍ରକାର ନୂଆ ନୂଆ ଆଇଡିଆ ଆପଣେଇଛି ।

ଏହି ଭିଡିଓରେ ସମସ୍ତେ ଲକଡାଉନ୍ ସମୟର ଅନୁଭୂତି ବଖାଣିବା ସହ ଲକଡାଉନ୍ ସମୟତକକୁ କିପରି ଭଲ ଭାବେ ବ୍ୟବହାର କରୁଛନ୍ତି ସେ ବାବଦରେ କହିଛନ୍ତି ।

ତେବେ ଭିଡିଓ ଶେଷରେ ସାମାଜିକ ଦୂରତା ଓ ଜରୁରି ପରିସ୍ଥିତିରେ ଘରୁ ବାହାରିଲେ ମାସ୍କ ପିନ୍ଧିବା ଭଳି ବାର୍ତ୍ତା ବି ଦିଆଯାଇଛି ।

ଲୋକାଲ ୱାୟାର