ଶ୍ରୀଜଗନ୍ନାଥ ଐତିହ୍ୟ କରିଡର ଡିଜାଇନକୁ ମିଳିଲା ଅନୁମୋଦନ

ପୁରୀ, ଫେବ୍ରୁଆରୀ ୧୬(ଲୋକାଲ ୱାୟାର): ଗଜପତି ମହାରାଜା ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ସୋମବାର ଅନୁଷ୍ଠିତ ବୈଠକରେ ମୁଖ୍ୟ ଶାସନ ସଚିବ ସୁରେଶ ମହାପାତ୍ରଙ୍କ ଉପସ୍ଥିତିରେ ଶ୍ରୀଜଗନ୍ନାଥ ଐତିହ୍ୟ କରିଡର ଡିଜାଇନକୁ ଅନୁମୋଦନ ମିଳିଛି ।

ପରିକଳ୍ପନା ଅନୁଯାୟୀ, ୨୦ ଏକର ଜମି ମଧ୍ୟରୁ ୧୮ ଏକରର ବିକାଶ କରାଯିବ । ମେଘନାଦ ପାଚେରିର ୭୫ ମିଟର ଇଲାକାରେ ବିଭିନ୍ନ ପରିଯୋଜନା ରହିବ ।

କରିଡରର ଅଭ୍ୟର୍ଥନା କେନ୍ଦ୍ରରୁ ଭକ୍ତଙ୍କୁ ସବୁ ସୁବିଧା ମିଳିବ । ଶ୍ରୀମନ୍ଦିର ଚାରି ପାଖରେ ସବୁଜିମା ସୃଷ୍ଟି, ଅନ୍ତପରିକ୍ରମା ପଥ, ଲ୍ୟାଣ୍ଡସ୍କେପ୍ ଜୋନ, ବର୍ହି ପ୍ରଦକ୍ଷଣ ପଥ, ସର୍ବସାଧାରଣ ଜୋନ, ଭକ୍ତଙ୍କ ସେବା ଲେନ, ଜରୁରିକାଳୀନ ଲେନ, ମିଳିତ ଯାନବାହନ ଟ୍ରାଫିକ୍ ଲେନ, ଫୁଟପାଥ୍ ଜୋନ ରହିବ ।

ମେଘନାଦ ପାଚେରିକୁ ଲାଗି ୭ମିଟର ପରିଧି ଅଞ୍ଚଳରେ ସବୁଜ ଜୋନ, ଦଶ ମିଟର ପରିଧିରେ ଠାକୁର ଠାକୁରାଣୀଙ୍କ ପ୍ରଦକ୍ଷଣ ପରିକ୍ରମା ଏବଂ ଶ୍ରୀମନ୍ଦିର ପରିକ୍ରମା ଜୋନ୍ ରହିବ ।

ଶ୍ରୀଜଗନ୍ନାଥ ଅଭ୍ୟର୍ଥନା ଜୋନରେ ଦ୍ରବ୍ୟ ଘର, ସୂଚନା ଓ ଡୋନେସନ କିଓସ୍କୋ, ବିଶ୍ରାମ ପାଭିଲିୟନ, ଶୌଚାଳୟ, ପୁଲିସ ସେବା କେନ୍ଦ୍ର, ଏଟିଏମ କିଓସ୍କୋ, ଭଜନ ମଣ୍ଡପ, ସଂସ୍କୃତି ମଣ୍ଡପ ରହବି ଏବଂ ମଠ ଓ ମନ୍ଦିର ବିକାଶ ଯୋଜନା ରହିବ ।

ଲୋକାଲ ୱାୟାର