ଶ୍ରୀମନ୍ଦିର ଟଙ୍କା ପ୍ରସଙ୍ଗରେ ଆଇନ ବିଭାଗକୁ କଂଗ୍ରେସର ସମାଲୋଚନା

ଭୁବନେଶ୍ୱର, ମାର୍ଚ୍ଚ ୧୨(ଲୋକାଲ ୱାୟାର): ୟେସ୍ ବ୍ୟାଙ୍କରେ ଶ୍ରୀମନ୍ଦିର ଓ କେନ୍ଦ୍ର ସମବାୟ ବ୍ୟାଙ୍କର ଟଙ୍କା ଜମା ରଖାଯିବା ପ୍ରସଙ୍ଗରେ ରାଜ୍ୟ ଆଇନ ବିଭାଗକୁ ସମାଲୋଚନା କରିଛନ୍ତି ପ୍ରଦେଶ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ ।

ଶ୍ରୀମନ୍ଦିର ପରିଚାଳନା, ଆର୍ଥିକ ବ୍ୟାପାର ରାଜ୍ୟ ସରକାରଙ୍କ ଆଇନ୍ ବିଭାଗ ଅଧୀନରେ ରହିଛି ।

ରାଜ୍ୟ ସରକାରଙ୍କ ଅନୁମୋଦନକ୍ରମେ ଶ୍ରୀମନ୍ଦିର ଟଙ୍କା ଘରୋଇ ବ୍ୟାଙ୍କରେ ରଖାଯାଇଛି ।

ଜାତୀୟକରଣ ବ୍ୟାଙ୍କ ପରିବର୍ତ୍ତେ ୨୦୦୪ ମସିହାରେ ଗଠନ କରାଯାଇଥିବା ୟେସ୍ ବ୍ୟାଙ୍କ ଭଳି ଘରୋଇ ବ୍ୟାଙ୍କରେ ଶ୍ରୀମନ୍ଦିର ପ୍ରଶାସନ ୫୪୫ କୋଟି ଟଙ୍କା ଜମା ରଖିବା ପଛରେ ରାଜ୍ୟ ସରକାରଙ୍କ ଘରୋଇ ବ୍ୟାଙ୍କ ପ୍ରୀତି ଜଣାପଡ଼ୁଛି ବୋଲି ପିସିସି ସଭାପତି କହିଛନ୍ତି ।

ୟେସ୍ ବ୍ୟାଙ୍କରେ ରାଜ୍ୟବାସୀଙ୍କର ପ୍ରାୟ ୩୨ଶହ କୋଟି ଟଙ୍କା ଜମା ଥିବା ବେଳେ ଏହାର ଭବିଷ୍ୟତ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।

ଅପରପକ୍ଷରେ କେନ୍ଦ୍ର ସମବାୟ ବ୍ୟାଙ୍କର କେତେ ଟଙ୍କା ୟେସ୍ ବ୍ୟାଙ୍କରେ ରହିଛି ତାହା ଜାଣିବା କଷ୍ଟକର ବୋଲି ଶ୍ରୀ ପଟ୍ଟନାୟକ କହିଛନ୍ତି ।

ୟେସ୍ ବ୍ୟାଙ୍କରେ ଶ୍ରୀମନ୍ଦିର ଟଙ୍କା ରଖାଯିବା ଘଟଣାର ସିବିଆଇ ତଦନ୍ତ ଏବଂ ଦାୟୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସେ ଦାବି କରିଛନ୍ତି ।

ଲୋକାଲ ୱାୟାର