ସରକାରୀ ସ୍କୁଲ ଛାତ୍ରଛାତ୍ରୀଙ୍କୁ ମିଳିବ ଜୀବନ କୌଶଳ ତାଲିମ

ଭୁବନେଶ୍ୱର, ଜାନୁଆରୀ ୧୨(ଲୋକାଲ ୱାୟାର): ଏଣିକି ସରକାରୀ ସ୍କୁଲରେ ପଢ଼ୁଥିବା ଛାତ୍ରଛାତ୍ରୀଙ୍କୁ ଜୀବନ କୌଶଳ ତାଲିମ ପ୍ରଦାନ କରାଯିବ ।

ପ୍ରାଥମିକ ପର୍ଯ୍ୟାୟରେ ୧୦ଟି ଜିଲ୍ଲାକୁ ଏଥିରେ ସାମିଲ କରାଯାଇଛି । ଏଥିପାଇଁ ବର୍ତ୍ତମାନ ସୁଦ୍ଧା ୮୫୦୦ ପ୍ରଧାନ ଶିକ୍ଷକଙ୍କୁ ତାଲିମ ଦିଆସରିଛି ।

ଖୁବ୍ ଶୀଘ୍ର ୮୪୫୬ ସ୍କୁଲର ୨ ଜଣ ଲେଖାଏଁ ଶିକ୍ଷକଙ୍କୁ ୫ ଦିନ ଲେଖାଏଁ ତାଲିମ ଦିଆଯିବ ।

ଏହାସହ ପ୍ରତି କ୍ଲଷ୍ଟରରେ ୨ ଜଣ ଲେଖାଏଁ ସିଆରସିସିଙ୍କୁ ତାଲିମ ଦିଆଯିବ ।

ଏକବିଂଶ ଶତାବ୍ଦୀ ସହ ତାଳ ମିଶାଇ କିପରି ପିଲାମାନେ ଚାଲି ପାରିବେ ସେଥିପାଇଁ ରାଜ୍ୟ ସରକାର ମାନସିକ ସ୍ୱାସ୍ଥ୍ୟ କାର୍ଯ୍ୟକ୍ରମ ଆରମ୍ଭ କରୁଛନ୍ତି ।

ବଲାଙ୍ଗିର, ଢେଙ୍କାନାଳ, ଗଜପତି, କଳାହାଣ୍ଡି, କନ୍ଧମାଳ, କୋରାପୁଟ, ମାଲକାନଗିରି, ନବରଙ୍ଗପୁର, ନୂଆପଡ଼ା ଓ ରାୟଗଡ଼ା ଜିଲ୍ଲାରେ ଏହି କାର୍ଯ୍ୟକ୍ରମ ଚାଲିବ । ଏଥିପାଇଁ ୧୫୨୮ ଜଣ ଏସଆରସିସି ନିୟୋଜିତ ହେବେ ।

ସ୍କୁଲ ଓ ଗଣଶିକ୍ଷା ବିଭାଗ, ସ୍ୱାସ୍ଥ୍ୟ ବିଭାଗର ମିଳିତ ପ୍ରୟାସରେ ଆରମ୍ଭ ହେବାକୁ ଥିବା ଏହି କାର୍ଯ୍ୟକ୍ରମରେ ୧୦ରୁ ୧୯ ବର୍ଷ ବୟସର ସବୁ ଛାତ୍ରଛାତ୍ରୀ ସାମିଲ ହେବେ ।

ପିଲାମାନଙ୍କ ମଧ୍ୟରେ ସକରାତ୍ମକ ବ୍ୟାବହାରିକ ପରିବର୍ତ୍ତନ ଆଣିବା ସହ ସେମାନଙ୍କୁ ଜୀବନ କୌଶଳ ଶିକ୍ଷା ଦେବା, ସେମାନଙ୍କ ଭିତରେ ସକାରାତ୍ମକ ଭାବନା ତିଆରି କରିବା, ସେମାନଙ୍କୁ ଦାୟିତ୍ୱ ସମ୍ପନ୍ନ କରାଇବା ଏହି କାର୍ଯ୍ୟକ୍ରମର ମୂଳ ଆଭିମୁଖ୍ୟ ।

ଏହି କାର୍ଯ୍ୟକ୍ରମ ଅଧୀନରେ ସବୁ ସ୍କୁଲରେ ଜଣେ ଶିକ୍ଷକ ଓ ଜଣେ ଶିକ୍ଷୟିତ୍ରୀଙ୍କୁ ‘ସ୍ୱାସ୍ଥ୍ୟ ଓ ସୁସ୍ଥତା ଆମ୍ବାସଡର’ ଭାବେ ଚୟନ କରାଯିବ ।

ଯେଉଁମାନେ କି ଛାତ୍ରଛାତ୍ରୀଙ୍କୁ କିଶୋର ସ୍ୱାସ୍ଥ୍ୟ ସମ୍ପର୍କିତ ବିଭିନ୍ନ ତଥ୍ୟ ପ୍ରଦାନ କରିବା ସହ ସେମାନଙ୍କୁ ରୋଗ ପ୍ରତିଷେଧକ ବିଷୟରେ ଜଣାଇବେ । ଏନେଇ ପ୍ରତି ସପ୍ତାହରେ କୌତୁହଳପୂର୍ଣ୍ଣ କାର୍ଯ୍ୟକ୍ରମ ଆୟୋଜିତ ହେବ ।

ପିଲାମାନେ ନିଜ ସ୍ୱାସ୍ଥ୍ୟ ବାବଦରେ ଅବଗତ ହେବେ । କାର୍ଯ୍ୟକ୍ରମ ମାଧ୍ୟମରେ ସେମାନେ ସ୍ୱାସ୍ଥ୍ୟକର ପିଇବା ପାଣି, ଋତୁସ୍ରାବ ସମୟରେ ନିଆଯାଉଥିବା ଯତ୍ନ, ଯୋଗ ଓ ଧ୍ୟାନର ଆବଶ୍ୟକତା ବାବଦରେ ସଚେତନ କରାଯିବ ।

ଏହି କାର୍ଯ୍ୟକ୍ରମ ମାଧ୍ୟମରେ ପିଲାମାନଙ୍କୁ ୧୧ଟି ବିଷୟରେ ପାଠପଢ଼ା ଯିବ ।

ଲୋକାଲ ୱାୟାର