ସ୍ପର ନିର୍ମାଣ ଦାବିରେ ଜଗତସିଂହପୁର ପାନୀୟ ଜଳ ପ୍ରକଳ୍ପ ନିର୍ମାଣକୁ ବିରୋଧ

ଜଗତସିଂହପୁର, ଡିସେମ୍ବର ୧୧ (ଲୋକାଲ ୱାୟାର): ସ୍ପର ନିର୍ମାଣ ଦାବିରେ ଡିସେମ୍ବର ୧୭ରୁ ଆନ୍ଦୋଳନ ତୀବ୍ର କରିବାକୁ ଧମକ ଦେଇଛି ଦେବୀ ନଦୀ ବନ୍ଧ ସୁରକ୍ଷା ସମିତି ।

ସମିତିର ବିରୋଧ ଯୋଗୁଁ ୧୦ ଦିନ ହେଲା ନିର୍ମାଣାଧୀନ ପାନୀୟ ଜଳ ପ୍ରକଳ୍ପ କାମ ମଧ୍ୟ ବନ୍ଦ ରହିଛି ।

ଗତ ଫେବୃୟାରୀ, ୨୦୧୮ରେ ଦେବୀ ନଦୀରେ ପାନୀୟ ଜଳ ପ୍ରକଳ୍ପ ପାଇଁ ରାଜ୍ୟ ସରକାର ୧୭୩ କୋଟି ଟଙ୍କା ମଞ୍ଜୁର କରିଥିଲେ ।

ପ୍ରକଳ୍ପ କାର୍ଯ୍ୟକ୍ଷମ ହେଲେ ବାଲିକୁଦା ବ୍ଲକର ୬୪ଟି ଗାଁ ଓ ଏରସମା ବ୍ଲକର ୫୭ଟି ଗାଁର ପ୍ରାୟ ୧ ଲକ୍ଷ ଲୋକ ଉପକୃତ ହେବେ ।

ଏଲ ଆଣ୍ଡ ଟି କମ୍ପାନୀ ନାଉଗାଁ ବ୍ଲକର ତୁମ୍ବେଶ୍ୱର ଠାରେ ପ୍ରକଳ୍ପ ନିର୍ମାଣ କରୁଛି ।

ନିର୍ମାଣରେ ବ୍ୟବହୃତ ଯନ୍ତ୍ରପାତି ଯୋଗୁଁ ଭୌଗୋଳିକ ସ୍ଥିତି ବିପନ୍ନ ହେଉଥିବାରୁ ଗଜରାଜପୁର, ରୋହିଆ, ବାଂଶୋ, ନାଉଗାଁ, ଘୋଡ଼ାଂଶ, ଜାମୁଗାଁ, ଓଷକଣା, ଶିଖର, ତିରୁଣା, ନୂଆଗାଁ, ଅଲଣା ଆଦି ଗାଁର ଗ୍ରାମବାସୀମାନେ ସ୍ପର ନିର୍ମାଣ ପାଇଁ ଦାବି କରୁଛନ୍ତି ।

ଦେବୀ ନଦୀ ବନ୍ଧର ସୁରକ୍ଷା ପାଇଁ ସ୍ଥାନୀୟ ଲୋକେ ଦେବୀ ନଦୀ ବନ୍ଧ ସୁରକ୍ଷା ସମିତି ନାମରେ ଏକ କମିଟି ଗଠନ କରିଛନ୍ତି ।

ପ୍ରକଳ୍ପ ନିର୍ମାଣକୁ ବିରୋଧ କରାଯାଉନାହିଁ । ତେବେ ବନ୍ଧ ସୁରକ୍ଷା ପାଇଁ ସ୍ପର ନିର୍ମାଣକୁ ପ୍ରାଥମିକତା ପ୍ରଦାନ ଦାବିରେ ଡିସେମ୍ବର ୧ରୁ ପ୍ରକଳ୍ପ କାମ ବନ୍ଦ ରଖାଯାଇଛି ବୋଲି ସମିତି ପକ୍ଷରୁ କୁହାଯାଇଛି ।

ସ୍ଥାନୀୟ ବିଧାୟକ ପ୍ରଶାନ୍ତ ମୁଦୁଲି, ଜିଲ୍ଲାପାଳ ସରୋଜ କୁମାର ମିଶ୍ର, ଜଳସମ୍ପଦ ବିଭାଗର ଇଞ୍ଜିନିୟରମାନେ ପ୍ରକଳ୍ପ ନିର୍ମାଣ ସ୍ଥଳ ପରିଦର୍ଶନ କରି ଗ୍ରାମବାସୀଙ୍କ ସହ ବନ୍ଧ ସମସ୍ୟା ସମ୍ପର୍କରେ ଆଲୋଚନା କରିଥିଲେ ।

ପାନୀୟ ଜଳ ପ୍ରକଳ୍ପ ନିର୍ମାଣ ଯୋଗୁଁ ବନ୍ଧରେ ଫାଟ ସୃଷ୍ଟି ହୋଇଛି । ଏହାକୁ ମରାମତି କରାଯାଉଛି । ବର୍ଷାଦିନେ ବନ୍ୟାର କୌଣସି ଆଶଙ୍କା ନାହିଁ ।

ତେଣୁ ପ୍ରକଳ୍ପ କାମ ଜାରି ରହିବ ବୋଲି ଜଳସମ୍ପଦ ବିଭାଗର ନିର୍ବାହୀ ଯନ୍ତ୍ରୀ ପ୍ରତାପ କୁମାର ଶତପଥି କହିଛନ୍ତି ।

ଲୋକଙ୍କ ଦାବି ଏଡାଇ ପ୍ରଶାସନ ମନମୁଖୀ ନିର୍ମାଣ କାମ ଆରମ୍ଭ କଲେ ଡିସେମ୍ବର ୧୭ରୁ ଆନ୍ଦୋଳନ ତୀବ୍ର ହେବ ବୋଲି କର୍ମକର୍ତ୍ତାମାନେ ଚେତାବନୀ ଦେଇଛନ୍ତି ।

ଲୋକାଲ ୱାୟାର