ସ୍ମୃତି ରୋମନ୍ଥନ କଲେ ବାଲାଂଦେଶ ଯୁଦ୍ଧର ନାୟକ

କେନ୍ଦ୍ରାପଡ଼ା, ଡିସେମ୍ବର ୧୬ (ଲୋକାଲ ୱାୟାର): ୧୯୭୧ ଡିସେମ୍ବର ୧୬ ବାଂଲାଦେଶ ମୁକ୍ତି ଯୁଦ୍ଧର ୪୯ତମ ବାର୍ଷିକୀ ଅବସରରେ ଅତୀତ ସ୍ମୃତି ରୋମନ୍ଥନ କରିଛନ୍ତି କେନ୍ଦ୍ରାପଡାର ଅବସରପ୍ରାପ୍ତ ସେନା ଅଧିକାରୀ ୭୦ ବର୍ଷୀୟ ଦୁର୍ଯ୍ୟୋଧନ ମହାନ୍ତି ।

ପାକିସ୍ତାନୀ ସେନା ସହ ଭୟଙ୍କର ଲଢେଇ କଥା ମନେ ପକାଇ ଆଜି ବି ଶିହରି ଉଠନ୍ତି ୧୯୭୧ ଯୁଦ୍ଧର ଏହି ହିରୋ ।

ଭାରତୀୟ ସେନା ଓ ମୁକ୍ତିବାହିନୀ ପାକିସ୍ତାନୀ ସେନାର ବହୁ ଟ୍ୟାଙ୍କ ଧ୍ୱଂସ କରିବା ସହ ଅନେକ ପାକିସ୍ତାନୀ ସୈନ୍ୟଙ୍କୁ ହତ୍ୟା କରିଥିଲେ ।

ଅଗରତାଲାରୁ ସୀମା ପାର ହୋଇ ୧୯୭୧ ଡିସେମ୍ବର ୧ ରେ ପୂର୍ବ ପାକିସ୍ତାନରେ ପ୍ରବେଶ କରିଥିଲୁ ।

ହାବିଗଞ୍ଜ, ଲସକରପୁର, ଆଜମିରିଗଞ୍ଜ, ଟୋଙ୍ଗି ଜଙ୍କସନ ଓ ଢାକାରେ ଚାଲିଥିବା ଲଢେଇରେ ୧୪ ବାଟାଲିୟନର ବ୍ରିଗେଡ ଅଫ ଦ ଗାର୍ଡସ ଭାବେ ଭାଗ ନେଇଥିଲୁ ବୋଲି ମନେ ପକାନ୍ତି ରାଜକନିକା ବ୍ଲକ ବରୁଣାଡିହ ଗାଁରେ ରହୁଥିବା ପୂର୍ବତନ ସେନା ଅଧିକାରୀ ଦୁର୍ଯ୍ୟୋଧନ ।

ପାକିସ୍ତାନ ସେନା ସହ ଆମେ ହବିଗଞ୍ଜ ଠାରୁ ଢାକା ପର୍ଯ୍ୟନ୍ତ ଲଢ଼ି ସେମାନଙ୍କୁ ପରାସ୍ତ କରିଥିଲୁ । ୧୭ଦିନିଆ ଯୁଦ୍ଧରେ ଉଭୟ ପକ୍ଷର ବହୁ ସୈନିକ ମୃତାହତ ହୋଇଥିଲେ ।

ଆମ ରେଜିମେଣ୍ଟର ୮ ଜଣ ସହିଦ ହୋଇଥିଲେ । ସେମାନଙ୍କ ମଧ୍ୟରେ ଥିଲେ ଓଡ଼ିଶାର କାଶୀନାଥ ସାହୁ । ଆମର ପ୍ରଚଣ୍ଡ ଆକ୍ରମଣରେ ପରାଜିତ ପାକିସ୍ତାନୀ ସୈନ୍ୟମାନେ ଢାକା ପଳାୟନ କରିଥିଲେ ।

ଡିସେମ୍ବର ୧୬ରେ ପାକିସ୍ତାନ ସେନା ମୁଖ୍ୟ ଆମିର ଅବଦୁଲ ଖାନ ନିଆଜି ୯୩ ହଜାର ସୈନିକଙ୍କ ସହ ଭାରତୀୟ ସେନାର ଜେନେରାଲ ଜଗଜିତ ସିଂହ ଅରୋରାଙ୍କ ନିକଟରେ ଆତ୍ମସମର୍ପଣ କରିଥିଲେ ।

ଏହା ବେଶ ଗର୍ବର ମୁହୂର୍ତ୍ତ ଥିଲା । ମୁକ୍ତିବାହିନୀ ଯୋଦ୍ଧାମାନଙ୍କ ସହ ଆମେ ବିଜୟ ଦିବସ ପାଳିଥିଲୁ ।

ବାଂଲାଦେଶ ମୁକ୍ତି ଯୁଦ୍ଧର ସୁବର୍ଣ୍ଣ ଜୟନ୍ତୀ ଅବସରରେ ୨୦୨୧ରେ ଢାକା ଯିବାକୁ ମୋର ସ୍ୱପ୍ନ ରହିଛି ବୋଲି କହିଛନ୍ତି ଦୁର୍ଯ୍ୟୋଧନ ।

୧୯୭୦ରେ ମାତ୍ର ୨୦ ବର୍ଷ ବୟସରେ ଭାରତୀୟ ସେନାରେ ଯୋଗ ଦେଇଥିଲି ।

ଭାରତୀୟ ସେନାରେ ୩୨ ବର୍ଷର ଚାକିରି ମଧ୍ୟରେ ମିଜୋରମ, ଆସାମ, ତ୍ରିପୁରା, କାନପୁର, କାଶ୍ମୀର, ପୁନେ ଆଦି ସ୍ଥାନରେ କାମ କରିଛି ।

୧୯୮୪ରେ ସିଆଚେନ ଅକ୍ତିଆର ପାଇଁ ଅପରେସନ ମେଘଦୂତରେ ଭାଗ ନେଇଥିଲି ।

୨୦୦୨ରେ ଅବସର ନେବା ପରେ ଗାଁରେ ରହିଛି । ଦୁଇ ଥର ସରପଞ୍ଚ ଭାବେ ଦାୟିତ୍ୱ ତୁଲାଇ ଅନେକ ଉନ୍ନତିମୂଳକ କାମ କରିଛି ବୋଲି ଦୁର୍ଯେ୍ୟାଧନ କହିଛନ୍ତି ।

ଗାଁରେ ସ୍ତ୍ରୀ ଓ ଅନ୍ୟ ପରିବାର ସଦସ୍ୟଙ୍କ ରହୁଥିବା ଦୁର୍ଯେ୍ୟାଧନଙ୍କ ବଡ଼ ପୁଅ ଭାରତୀୟ ସେନାରେ କାମ କରୁଥିବା ବେଳେ ସାନ ପୁଅ ଓଡ଼ିଶା ପୁଲିସରେ କାର୍ଯ୍ୟରତ ।

ବାଂଲାଦେଶ ଯୁଦ୍ଧ ଲଢ଼ିଥିବା ହାତଗଣତି କିଛି ଯୋଦ୍ଧା ଜୀବିତ ଅଛନ୍ତି । ବିଦେଶ ମାଟିରେ ଲଢ଼ା ଯାଇଥିବା ଏହି ଯୁଦ୍ଧରେ ହଜାର ହଜାର ସୈନ୍ୟଙ୍କ ମୃତୁ୍ୟ ହୋଇଥିଲା ।

ଦୁଃଖର କଥା ସେମାନଙ୍କ ନାମକୁ କେହି ମନେ ରଖୁନାହାନ୍ତି ବୋଲି ପୂର୍ବତନ ସୈନିକ ସଙ୍ଘର ଜିଲ୍ଲା ୟୁନିଟ ସଭାପତି ମହେଶ କର କହିଛନ୍ତି ।

ଲୋକାଲ ୱାୟାର