‘ହୌସଲା’ରେ ହୌସଲା ଦେଖାଇଲେ କ୍ରୀଡ଼ାବିତ (ଅପଡେଟ୍)

ଭୁବନେଶ୍ୱର, ଡିସେମ୍ବର ୨(ଲୋକାଲ ୱାୟାର): ଶିଶୁ ଯତ୍ନ ଅନୁଷ୍ଠାନର ଅନ୍ତେବାସୀମାନେ ମଧ୍ୟ କିଛି କମ୍ ନୁହନ୍ତି । ସରକାରଙ୍କ ଦ୍ୱାରା ନିଆଯାଇଥିବା ବିବିଧ ପଦକ୍ଷେପର ଫଳ ସ୍ୱରୂପ ସେମାନେ ଆଜି କ୍ରୀଡ଼ା କ୍ଷେତ୍ରରେ ମଧ୍ୟ ଦକ୍ଷତା ପ୍ରତିପାଦିତ କରିଛନ୍ତି ।

‘ହୌସଲା-୨୦୧୯’ରେ ହୌସଲା ଦେଖାଇଛନ୍ତି କ୍ରୀଡ଼ାବିତ । ଭୁବନେଶ୍ୱର ୟୁନିଟ-୬ ବାଳକ ଉଚ୍ଚ ବିଦ୍ୟାଳୟ କ୍ରୀଡ଼ାଙ୍ଗନରେ ୨ ଦିନ ଧରି ଓଡ଼ିଶା ରାଜ୍ୟ ଶିଶୁ ସୁରକ୍ଷା ସମିତି ଦ୍ୱାରା ଏହି ଖେଳକୁଦ କାର୍ଯ୍ୟକ୍ରମ ଆୟୋଜନ ହୋଇଥିଲା ।

ଯେଉଁଠି ରାଜ୍ୟର କୋଣ ଅନୁକୋଣରୁ ୩୦ ଟି ଜିଲ୍ଲାରେ ଥିବା ଶିଶୁଯତ୍ନ ଅନୁଷ୍ଠାନର ୧୧୦୮ ଜଣ ଅନ୍ତେବାସୀ କ୍ରୀଡ଼ା ନୈପୁଣ୍ୟ ପ୍ରଦର୍ଶନ କରିଥିଲେ ।

ଯେଉଁଠି ରାଜ୍ୟର ଉପାନ୍ତ ଅଞ୍ଚଳ ଜିଲ୍ଲା ଯଥା, ମାଲକାନଗିରି, କେନ୍ଦୁଝର, କୋରାପୁଟ ପରି ଜିଲ୍ଲାର ଶିଶୁମାନେ ମଧ୍ୟ ଉଲ୍ଲେଖନୀୟ ପ୍ରଦର୍ଶନ କରିଥିଲେ ।

ସଭାଶେଷରେ ୨୭ ଟି ବିଭାଗରେ ୮୬ ଜଣ ଶିଶୁ ଓ ଦଳଙ୍କୁ ପୁରସ୍କୃତ କରାଯାଇଥିଲା ।

ଫୁଟ୍ବଲ୍ ବାଳିକା ବର୍ଗରେ ଖୋର୍ଦ୍ଧା ଦଳ ରନର୍ସ ଅପ୍ ହୋଇଥିବାବେଳେ ମୟୂରଭଞ୍ଜ ଚମ୍ପିୟାନ ହୋଇଥିଲା । ଫୁଟବଲ୍ ବାଳକ ବର୍ଗରେ ଭଦ୍ରକ ରନର୍ସ ଅପ୍ ଏବଂ କେନ୍ଦୁଝର ଚମ୍ପିୟାନ ହୋଇଥିଲା ।

ପ୍ରାଥମିକ ପର୍ଯ୍ୟାୟରେ ରାଜ୍ୟର ୩୦ଟି ଜିଲ୍ଲାରେ ଆୟୋଜିତ ହୌସଲା ଉତ୍ସବରେ ଶିଶୁମାନେ ଲମ୍ବ ଡିଆଁ, ଉଚ୍ଚ ଡିଆଁ, ଫୁଟବଲ୍, ଚେସ୍, ବକ୍ତୃତା, ଚିତ୍ରାଙ୍କନ ଓ ଦୌଡ଼ ପ୍ରତିଯୋଗିତାରେ ଭାଗ ନେଇଥିଲେ ।

ଜିଲ୍ଲାସ୍ତରୀୟ ଉତ୍ସବର ବିଜେତାମାନେ ରାଜ୍ୟସ୍ତରୀୟ ଉତ୍ସବରେ ଭାଗ ନେଇଥିବାବେଳେ ରାଜ୍ୟସ୍ତରୀୟ ବିଜେତାମାନେ ଦିଲ୍ଲୀ ଠାରେ ହେବାକୁ ଥିବା ଜାତୀୟ ପ୍ରତିଯୋଗିତାରେ ଭାଗ ନେବା ପାଇଁ ଯୋଗ୍ୟ ବିବେଚିତ ହେବେ ।

ବିଗତ ଦୁଇ ବର୍ଷ ଧରି ସର୍ବଭାରତୀୟ ହୌସଲାରେ ଉଲ୍ଲେଖନୀୟ ପ୍ରଦର୍ଶନ ପାଇଁ ଓଡ଼ିଶା ଚମ୍ପିୟନ ହୋଇଆସିଛି ।

ଲୋକାଲ ୱାୟାର