ଅବିନାଶ ମହାପାତ୍ର

ଭୁବନେଶ୍ଵର, ନଭେମ୍ବର ୩ (ଲୋକାଲ ୱାୟର) ସୋମବାର ସଚିବାଳୟଠାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିଲ୍ଲୀରେ ଅନୁଷ୍ଠିତ ହୋଇଥିବା ହୋସଲା-୨୦୧୮ରେ ଓଡିଶାରୁ ଭାଗନେଇଥିବା ପିଲାମାନଙ୍କ ଉଚ୍ଚକୋଟିର ପ୍ରଦର୍ଶନ ପାଇଁ ସେମାନଙ୍କୁ ସମ୍ବର୍ଦ୍ଧିତ କରିବା ସହ ଏହି ପ୍ରତିଯୋଗିତାରେ ବିଜେତା ମାନଙ୍କୁ ପୁରସ୍କୃତ କରିଛନ୍ତି।

ଏହାସହ ମୁଖ୍ୟମନ୍ତ୍ରୀ ପିଲାମାନଙ୍କ ପ୍ରଦର୍ଶନର ପ୍ରଶଂସା କରି କଳିଙ୍ଗ ଷ୍ଟାଡିୟମରେ ଚାଲିଥିବା ହକି ବିଶ୍ଵକପ ଦେଖିବା ପାଇଁ ଆମନ୍ତ୍ରଣ କରିଥିଲେ।

ନଭେମ୍ବର ୨୬ ରୁ ୨୯ ପର୍ଯ୍ୟନ୍ତ ଦିଲ୍ଲୀ ଠାରେ ଏକ ରାଜ୍ୟସ୍ତରୀୟ ଆନ୍ତଃ ଶିଶୁସେବା ଅନୁଷ୍ଠାନ ପ୍ରତିଯୋଗିତା ଉତ୍ସବ(ହୋସଲା-୨୦୧୮) ଅନୁଷ୍ଠିତ ହୋଇଥିଲା।

ଏଥିରେ ଓଡିଶାର ୩୭ ଜଣ ୧୮ ବର୍ଷରୁ କମ ପିଲା ବିଭିନ୍ନ ପ୍ରତିଯୋଗିତାରେ ଭାଗ ନେଇ ୧୪ ଟି ସ୍ଵର୍ଣ୍ଣ, ୪ଟି ରୌପ୍ୟ, ଓ ଦୁଇଟି କାଂସ୍ୟ ପଦକ ଜିତିଥିଲେ।

ପ୍ରତିଯୋଗିତାରେ ବିଜେତା ପ୍ରଥମ, ଦ୍ବିତୀୟ ଏବଂ ତୃତୀୟ ପିଲାମାନଙ୍କୁ ଯଥାକ୍ରମେ ୫୦୦୦୦ , ୩୦୦୦୦ ଏବଂ ୨୦୦୦୦ ଟଙ୍କା ରାଶିରେ ମୁଖ୍ୟମନ୍ତ୍ରୀ ପୁରସ୍କୃତ କରିଥିଲେ।

ଏହି ସମ୍ବର୍ଦ୍ଧନା କାର୍ଯ୍ୟକ୍ରମରେ ଶିଶୁ ବିକାଶ ମନ୍ତ୍ରୀ ପ୍ରଫୁଲ ସାମଲ, ମୁଖ୍ୟ ସାଶନ ସଚିବ, ଉନ୍ନୟନ କମିଶନର ଏବଂ ବିଭାଗୀୟ ପ୍ରମୁଖ ସଚିବ ଉପସ୍ଥିତ ଥିଲେ।

(ଲୋକାଲ ୱାୟର)

ଭବାନୀପାଟଣା , ନଭେମ୍ବର ୧୪ (ଲୋକାଲ ଓ୍ବାୟାର) କଳାହାଣ୍ଡି ଜିଲ୍ଲା ଧର୍ମଗଡ ବ୍ଲକ ଅନ୍ତର୍ଗତ ଫନଟ ଗ୍ରାମରେ ବୁଧବାର ଗ୍ୟାସ ସିଲିଣ୍ଡର ବିସ୍ଫୋରଣରେ ଗୋଟିଏ ପରିବାରର ତିନିଜଣଙ୍କ ମୃତ୍ୟୁ ହୋଇଥିବା ସ୍ଥାନୀୟ ଥାନା ଅଧିକାରୀ ବି. ପରିଜା ଲୋକାଲ ଓ୍ବାୟାରକୁ ସୂଚନା ଦେଇଛନ୍ତି।

ବିସ୍ଫୋରଣରେ ମୃତକ ମାନେ ହେଲେ ଚମ୍ପା ମେହେର, ତାଙ୍କର ଆଠବର୍ଷର ଝିଅ ସୁମିତ୍ରା ଓ ପାଞ୍ଚ ବର୍ଷର ପୁଅ ଅମିତ । ରୋଷେଇ ସମୟରେ ସିଲିଣ୍ଡର ବିସ୍ଫୋରଣ ଯୋଗୁଁ ତାଙ୍କ ମୃତ୍ୟୁ ହୋଇଥିବା ସେ କହିଛନ୍ତି। ସିଲିଣ୍ଡରରେ ନିଆଁ କିପରି ଲାଗିଲା ତାହା ଅସ୍ପଷ୍ଟ ଥିବା ସେ କହିଛନ୍ତି।

ଲୋକାଲ ଓୟାର

ଭୁବନେଶ୍ୱର, ନଭେମ୍ବର ୮ (ଲୋକାଲ ୱାୟର) ଆସନ୍ତା ୧୬ ତାରିଖରୁ ଯୁକ୍ତ ଦୁଇ (+୨) ପରୀକ୍ଷା ଫର୍ମ ଫିଲଅପ ପ୍ରକ୍ରିୟା ଆରମ୍ଭ ହେଉଥିବା ବେଳେ ୧୬ ରୁ ୨୬ ପର୍ଯ୍ୟନ୍ତ ବିନା ଫାଇନରେ ଫର୍ମ ଫିଲଅପ କରିହେବ ବୋଲି ଗୁରୁବାର ଉଚ୍ଚ ମାଧ୍ୟମିକ ପରିଷଦ ସୂଚନା ଦେଇଛି ।

ତେବେ ୨୭ ରୁ ୩୦ ପ୍ରର୍ଯ୍ୟନ୍ତ ୫୦ ଟଙ୍କା ଜରିମାନା ଦେଇ ଫର୍ମ ଫିଲଅପ କରିହେବ।

ସେହିପରି ଡିସେମ୍ବର ୧ ରୁ ୪ ଭିତରେ ଫର୍ମ ଫିଲଅପ କଲେ ୩୫୦ ଟଙ୍କା ଫାଇନ ଦବାକୁ ପଡିବ ବୋଲି ଉଚ୍ଚ ମାଧ୍ୟମିକ କତ୍ତୃପକ୍ଷ ଲୋକାଲ ଓ୍ବାୟରକୁ ସୂଚନା ଦେଇଛନ୍ତି। ଏହା ସହ ଫର୍ମ ଫିଲଅପ ବାବଦକୁ ଛାତ୍ର ଛାତ୍ରୀ ୫୨୦ ଟଙ୍କା ଦବାକୁ ପଡିବ ବୋଲି ସୂଚନାରେ ଦର୍ଶାଯାଇଛି।

(ଲୋକାଲ ଓୟାର)

ଭୁବନେଶ୍ୱର, ନଭେମ୍ବର ୭ (ଲୋକାଲ ୱାୟର) ଓଡ଼ିଶାର କଳାସଂସ୍କୃତି, କୋଣାର୍କ ଓ ବିଧାୟକଙ୍କ ପ୍ରତି  ଆଶାଳୀନ ମନ୍ତବ୍ୟ ଦେଇ ଗିରଫ ହୋଇଥିବା ଅଭିଜିତ୍ ଆୟର ମିତ୍ରଙ୍କ ହାଜତ ମିଆଦ ଆଉ ୧୪ଦିନ ବୃଦ୍ଧି ହୋଇଥିବା ତାଙ୍କ ଓକିଲ ନିଖିଲ ମେହେରା ଲୋକାଲ ୱାୟରକୁ କହିଛନ୍ତି।

ମଙ୍ଗଳବାର ଦିନ ଝାରପଡ଼ା ଜେଲରେ ବସିଥିବା କ୍ୟାମ୍ପ୍ କୋର୍ଟ ତାଙ୍କର ହାଜତ ମିଆଦକୁ ବୃଦ୍ଧି କରିଥିବା ସେ କହିଛନ୍ତି।

ସୂଚନା ଯୋଗ୍ୟ ଯେ ଶ୍ରୀ ଆୟର ମିତ୍ର ଗତ ମାସ ୨୩ ତାରିଖରେ ଗିରଫ ହୋଇଥିଲେ। ତାଙ୍କର ଜାମିନ ଆବେଦନ ଖାରଜ ହେବାପରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିଲା।

ତାଙ୍କ ବିରୁଦ୍ଧରେ କୋଣାର୍କ ଏବଂ ଭୁବନେଶ୍ବରରେ ଥାନାରେ ମାମଲା ରୁଜୁ କରାଯାଇଥିଲା ବେଳେ ୨୩ ତାରିଖରେ ସେ ଗୃହକମିଟି ଆଗରେ ହାଜର ହୋଇଥିଲେ ପରେ ତାଙ୍କୁ କମିଶନରଟ ପୁଲିସ ଗିରଫ କରିଥିଲା।

ପରେ ସେ ଦୁଇ ଥର ଜାମିନ ପାଇଁ ଆବେଦନ କରିଥିଲେ ମଧ୍ୟ କୋର୍ଟ ତାଙ୍କ ଜାମିନକୁ ଖାରଜ କରିଥିଲେ । ଗତ ଅକ୍ଟୋବର ଚାରି ତାରିଖରେ ସେ ପୁଣି ଗୃହ କମିଟି ସାମନ୍ନାରେ ହାଜର ହୋଇ ନିଜର ବୟାନ ଲିଖିତ ଆକାରରେ ଦେଇଥିଲେ ।

(ଲୋକାଲ ଓୟାର)

କଟକ, ନଭେମ୍ବର ୭ (ଲୋକାଲ ୱାୟର) ଚଳିତ ବର୍ଷ କଟକରେ ମଙ୍ଗଳବାର କାଳୀପୂଜା ଆରମ୍ଭ ହୋଇଥିବାବେଳେ ସହରରେ ୭୨ ଟି କାଳୀ ମେଢ ତିଆରି ହୋଇଥିବାରୁ ତାକୁ ଦେଖିବାକୁ ବ୍ୟାପକ ଜନ ସମାଗମ ହୋଇଥିବା ଜଣେ ଆୟୋଜକ ବୁଧବାର କହିଛନ୍ତି ।

କାଳୀପୂଜା ନଅ ତାରଖରେ ଶେଷହେବ । ଭସାଣି ଉତ୍ସବ ୧୦ ତାରିଖ ଦିନ ଅନୁଷ୍ଠିତ ହେବ । କଟକର ଦୁର୍ଗାପୂଜାରେ ୧୬୦ଟି ମେଢ ହେଉଥିଲା ବେଳେ ସେଥିମଧ୍ୟରୁ ୮୦ଟି ମଣ୍ଡପରେ ମା ଦୁର୍ଗାଙ୍କ ପୂଜା ଆରାଧନା କରାଯାଇଥାଏ ।

ମଧ୍ୟରାତ୍ରରେ କଟକର ଶକ୍ତିପୀଠ ଗୁଡିକରେ ମଧ୍ୟ କାଳୀ ପୂଜା ଅନୁଷ୍ଠିତ ହୋଇଥିବା ବେଳେ ବିଦ୍ୟାଧରପୁରରେ ବଡକାଳୀ ଓ ସାନ କାଳୀ ପୀଠ, କାଳିଆବୁଦାରେ ଶ୍ୟାମାକାଳୀ,ଖାନନଗରରେ ଶ୍ମଶାନ କାଳୀ, କାଳୀଗଳିରେ ମା କାଳୀ, ଚହଟାରେ ଦକ୍ଷିଣକାଳୀ ଆଦି ପୀଠ ଗୁଡିକରେ କାଳୀ ପୂଜା ପାଇଁ ଶ୍ରଦ୍ଧାଳୁଙ୍କ ଭିଡ ଦେଖିବାକୁ ମିଳିଥିଲା ।

ମଧ୍ୟ ରାତ୍ରୀରେ ଚଣ୍ଡୀପାଠ ଓ ଯଜ୍ଞ ଆୟୋଜନ କରାଯାଇଥିବାର ଦେଖିବାକୁ ମିଳିଥିବା ବେଳେ ନିଶାର୍ଦ୍ଧରେ ମା କାଳୀଙ୍କର ନିକଟରେ ବଳି ଦିଆଯାଇଥିଲା । ଦୁର୍ଗାପୂଜା ଭସାଣି ପରି କାଳୀପୂଜା ସମୟରେ ନିଶାମୁକ୍ତ ଭସାଣି ଶୋଭାଯାତ୍ରା ଅନୁଷ୍ଠିତ ହେବ।

(ଲୋକାଲ ଓୟାର)

କଟକ, ନଭେମ୍ବର ୭ (ଲୋକାଲ ୱାୟର) ବାଲିଯାତ୍ରାରେ ରାଜ୍ୟ ବାହାରରୁ ଆସିଥିବା ବ୍ୟବସାୟୀ ନିଜ ଫଳକରେ ଓଡିଆ ଭାଷାର ବ୍ୟବହାର କରିବା ପ୍ରଶାସନ ବାଧ୍ୟତାମୂଳକ କରିଥିଲେ ମଧ୍ୟ କେତେକ ବ୍ୟବସାୟୀ ତାହା କରୁନଥିବାରୁ ଉକ୍ତ ନିୟମକୁ ପ୍ରଶାସନ କଡାକଡି ଭାବେ ପାଳନ କରିବାକୁ ଉତ୍କଳ ସମ୍ମିଳନୀ ବୁଧବାର ଦାବି କରିଛି।

ବାଲିଯାତ୍ରାରେ ପ୍ରତିବର୍ଷ ରାଜ୍ୟ ଏବଂ ରାଜ୍ୟ ବାହାରୁ ଶତାଧିକ ବ୍ୟବସାୟୀ ନିଜ ଫଳକରେ ନିଜ ନିଜ ରାଜ୍ୟର ଭାଷାରେ ଲେଖୁଛନ୍ତି ।

ତେଣୁ ସଂସ୍କୃତି, ବାଣିଜ୍ୟକର, ନଗରପାଳିକା, ପ୍ରଶାସନ, ସୂଚନା ଓ ଶ୍ରମ ବିଭାଗର ବରିଷ୍ଠ ଅଧିକାରୀଙ୍କୁ ନେଇ ଏକ ଉଚ୍ଚସ୍ତରୀୟ କମିଟି ଦ୍ୱାରା ଏହା ଯାଞ୍ଚ କରାଯାଇ ଖିଲାପକାରୀଙ୍କୁ ଆର୍ଥିକ ଦଣ୍ଡ ଏବଂ ଓଡ଼ିଆ ନାମଫଳକ ଲେଖିବାକୁ ବାଧ୍ୟ କଲେ ଓଡିଆ ଭାଷା ଓ ସଂସ୍କୃତିର ରକ୍ଷା ହୋଇପାରିବ ବୋଲି ଜିଲ୍ଲା ଉତ୍କଳ ସମ୍ମିଳନୀର ସଭାପତି ଡାକ୍ତର ରବି ରଞ୍ଜନ ସାହୁ ଲୋକାଲ ୱାୟରକୁ କହିଛନ୍ତି ।

ଲୋକାଲ ୱାୟର

କଟକ, ନଭେମ୍ବର ୬ (ଲୋକାଲ ୱାୟର) ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜ ଓ ହସ୍ପିଟାଲ(ଏସସିବି)ରେ ମାଲଗୋଦାମ ଥାନା ଅନ୍ତର୍ଗତ ଯୋବ୍ରାର ଜଣଙ୍କର ମଙ୍ଗଳବାର ମୃତ୍ୟୁ ଘଟିଥିବା ବେଳେ ଏହାକୁ ମିଶାଇ ଏସସିବିରେ ଚଳିତ ବର୍ଷ ଡେଙ୍ଗୁ ଜନିତ ରୋଗୀଙ୍କ ମୃତ୍ୟୁ ସଂଖ୍ୟା ୭ରେ ପହଞ୍ଚିଥିବା କତ୍ତୃପକ୍ଷ କହିଛନ୍ତି।

ମୃତ ସୁକାନ୍ତ ଅକ୍ଟୋବର ୩୦ ତାରିଖରେ ଏସସିବି ଡେଙ୍ଗୁ ୱାର୍ଡରେ ଚିକତ୍ସା ପାଇଁ ଭର୍ତ୍ତି ହୋଇଥିଲେ । ସେ ଡେଙ୍ଗୁ ସହ ଅନ୍ୟାନ୍ୟ ରୋଗରେ ମଧ୍ୟ ପୀଡ଼ିତ ଥିଲେ । ସୂଚନାଯୋଗ୍ୟ ଯେ, ଚଳିତ ବର୍ଷ କଟକ ଏସସିବିରେ ଗତ ଜୁନ ୨୬ତାରିଖରେ କେନ୍ଦୁଝର ଜିଲ୍ଲାର ତ୍ରୈଲୋକ୍ୟ ନାଥ ବାରିକଙ୍କର ଡେଙ୍ଗୁ ରୋଗରେ ପ୍ରଥମେ ମୃତ୍ୟୁ ହୋଇଥିଲା।

ଲୋକାଲ ୱାୟର

ମାଲକାନଗିରି, ନଭେମ୍ବର ୫(ଲୋକାଲ ୱାୟର) ସୋମବାର ମାଲକାନଗିରି ଜିଲ୍ଲା କାଲିମେଳା ପପଲୁର ଜଙ୍ଗଲରେ ଏସଓଜି ଯବାନ ଏବଂ ମାଓବାଦୀଙ୍କ ମଧ୍ୟରେ ଗୁଳିବିନିମୟରେ ପାଞ୍ଚ ଜଣ ମାଓବାଦୀ ନିହତ ହୋଇଥିବା ପୋଲିସ କହିଛି।

ପୋଲିସର ସର୍ଚ୍ଚ ଅପରେଶନ ବେଳେ ମାଓବାଦୀମାନେ ପୋଲିସ ଉପରକୁ ଗୁଳି ଚଳାଇବାରୁ ପୋଲିସ ପାଲଟା ଜବାବ ଦେଇଥିବା ଅତିରିକ୍ତ ଡିଜି ଅପରେସନ ଆର.ପି କୋଚେ ସୂଚନା ଦେଇଛନ୍ତି।

ଫଳରେ ପୁଲିସ ଗୁଳିରେ ପାଞ୍ଚ ମାଓବାଦୀଙ୍କ ମୃତ୍ୟୁ ହୋଇଥିବା ସେ କହିଛନ୍ତି।

ଘଟଣାସ୍ଥଳରୁ ମାଓବାଦୀଙ୍କ ଶବ, ଦୁଇଟି ଇନସାସ ବନ୍ଧୁକ, ଗୋଟିଏ ୩୦୩ ବନ୍ଧୁକ, ଗୋଟିଏ ଏସଏଲଆର ବନ୍ଧୁକ ପୋଲିସ ଜବତ କରିଛି ।

ଲୋକାଲ ଓ୍ବାୟାର

ଭୁବନେଶ୍ୱର, ନଭେମ୍ବର ୪(ଲୋକାଲ ୱାୟର) ଉତ୍ତରାଖଣ୍ଡର ବଦ୍ରିନାଥକୁ ଗଞ୍ଜାମ ଜିଲ୍ଲାରୁ ତୀର୍ଥରେ ଯାଇଥିବା ସମସ୍ତ ୪୨ ଜଣ ତୀର୍ଥଯାତ୍ରୀ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ଓ ସେମାନେ ରହୁଥିବା ହୋଟେଲକୁ ଫେରିଥିବା ଅତିରିକ୍ତ ରିଲିଫ କମିଶନର ପ୍ରଭାତ ମହାପାତ୍ର ଲୋକାଲ ଓ୍ବାୟାରକୁ ରବିବାର କହିଛନ୍ତି।

ସେଠାରେ ରାଜ୍ୟର ଅନ୍ୟ ଜିଲ୍ଲାରୁ କେହି ଯାଇଛନ୍ତି କି ନାହିଁ ସେ ସମ୍ପର୍କରେ ତଥ୍ୟ ସଂଗ୍ରହ କରାଯାଉଛି ବୋଲି ସେ କହିଛନ୍ତି । ଏ ସମ୍ପର୍କରେ ସୂଚନା ସଂଗ୍ରହ ପାଇଁ ସ୍ଵତନ୍ତ୍ର ରିଲିଫ କମିଶନରଙ୍କ କାର୍ଯ୍ଯ।ଳୟରେ ଦୁଇଟି ହେଲ୍ପଲାଇନ ନମ୍ବର ୦୬୭୪-୨୫୩୪୧୭୭ ଓ ୧୦୭୦ ଖୋଲା ଯାଇଥିବା ସେ ସୂଚନା ଦେଇଛନ୍ତି।

ଲୋକାଲ ୱାୟର