ଭୁବନେଶ୍ୱର, ଜାନୁଆରୀ ୨୧(ଲୋକାଲ ୱାୟାର): ସାଧାରଣତନ୍ତ୍ର ଦିବସ ପୂର୍ବରୁ ନୂଆଦିଲ୍ଲୀ ରାଷ୍ଟ୍ରୀୟ ରଙ୍ଗଶାଳା ଶିବିରରେ ସାଂସ୍କୃତିକ ସମାରୋହରେ ଓଡ଼ିଶା ପ୍ରଥମ ସ୍ଥାନ ଅଧିକାର କରିଛି ।
ମଙ୍ଗଳବାର ସନ୍ଧ୍ୟାରେ ଆୟୋଜିତ ଏହି ସମାରୋହରେ ୧୬ଟି ରାଜ୍ୟର ଶିଳ୍ପୀଙ୍କୁ ପଛରେ ପକାଇ ଓଡ଼ିଶାର ଶିଳ୍ପୀବୃନ୍ଦ ବାଜି ମାରିଛନ୍ତି ।
ଓଡ଼ିଶୀ ଓ ସମ୍ବଲପୁରୀ ନୃତ୍ୟ ପରିବେଷଣ କରି କେବଳ ଉପସ୍ଥିତ ଦର୍ଶକଙ୍କ ମନ ଜିଣିନାହାନ୍ତି ବରଂ ପ୍ରଥମ ହେବାର ଗୌରବ ଅର୍ଜନ କରିଛନ୍ତି ।
ସେମାନଙ୍କ ନୃତ୍ୟ ପରେ ମଞ୍ଚ ସମ୍ମୁଖରେ ଉପସ୍ଥିତ ପ୍ରତିରକ୍ଷା ବିଭାଗର ସମସ୍ତ କର୍ମଚାରୀ ଓ ପରିବାରବର୍ଗ କଳାକାରଙ୍କ ପ୍ରଶଂସା ନକରି ରହିପାରିନଥିଲେ । ଏହି ଅବସରରେ ଶିଳ୍ପୀବୃନ୍ଦଙ୍କୁ ଟ୍ରଫି ଦେଇ ପୁରସ୍କୃତ କରାଯାଇଥିଲା ।
(ଏୟାର/ ସେରିମୋନିଆଲ୍ ଆଣ୍ଡ୍ ପ୍ଲାନିଂ) ଯୁଗ୍ମ ସଚିବ ଆଇଏଏସ୍ ଭରତ ଏଚ୍ ଖେରା ଏବଂ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ଯୁଗ୍ମ ସଚିବ ସଂଯୁକ୍ତା ମୁଦଗଲ୍ ଉପସ୍ଥିତ ରହି ଶିଳ୍ପୀମାନଙ୍କୁ ସମ୍ବର୍ଦ୍ଧିତ କରିଥିଲେ ।
ଏହି ଉତ୍ସବରେ ବିଶିଷ୍ଟ ଚିତ୍ରଶିଳ୍ପୀ ଗଜେନ୍ଦ୍ର ପ୍ରସାଦ ସାହୁ ଏବଂ ନୃତ୍ୟ ଦଳ ତରଫରୁ ସୁନୀଲ କୁମାର ବଳ ଉପସ୍ଥିତ ରହି ପୁରସ୍କାର ଗ୍ରହଣ କରିଥିଲେ ।
ଓଡ଼ିଶୀରେ ‘ଓଁ ନମଃ ଶିବାୟ’ରୁ ନୃତ୍ୟ ଆରମ୍ଭ କରି ଶିଳ୍ପୀମାନେ ସମ୍ବଲପୁରୀ ଡାଲଖାଇରେ କାର୍ଯ୍ୟକ୍ରମ ଶେଷ କରିଥିଲେ । ୮ମିନିଟରେ ୩୦ଜଣ ଶିଳ୍ପୀ ଅତି ସୁନ୍ଦର, ଚିତ୍ତାକର୍ଷକ ନୃତ୍ୟ କରିଥିଲେ ।
ସାଧାରଣତନ୍ତ୍ର ଦିବସରେ ନୂଆଦିଲ୍ଲୀ ରାଜପଥରେ ଗଡ଼ିବାକୁ ଥିବା ଓଡ଼ିଶାର ପ୍ରଜ୍ଞାପନ ମେଢ଼ ପାଇଁ ସଂଯୋଜିତ ହୋଇଥିବା ‘ଓଁ ନମଃ ଶିବାୟ’ ଗୀତରେ ନୃତ୍ୟ କରିଥିଲେ ।
ଏଥିରେ କଣ୍ଠଦାନ କରିଛନ୍ତି ପ୍ରଜ୍ଞାପନ ମେଢ଼ର ରୂପକାର ତଥା ପ୍ରସିଦ୍ଧ ଶିଳ୍ପୀ ଗଜେନ୍ଦ୍ର ପ୍ରସାଦ ସାହୁ । ଗୀତର ସଂଯୋଜନା କରିଛନ୍ତି ଗୁରୁ ଧନେଶ୍ୱର ସ୍ୱାଇଁ ଏବଂ ଅଜୟ ଚୌଧରୀ ।
ଲୋକାଲ ୱାୟାର
