Prativa Ghosh

ଭୁବନେଶ୍ୱର, ଅକ୍ଟୋବର ୧୬(ଲୋକାଲ ୱାୟାର): କୋଣାର୍କ ପରେ ଏବେ ରାଜ୍ୟର ଆଉ ୫ଟି ସ୍ଥାନରେ ହେବ ଇକୋ ରିଟ୍ରିଟ୍ । ଏନେଇ ପର୍ଯ୍ୟଟନ କମିଶନର ବିଶାଲ୍ କୁମାର ଦେବ ଶୁକ୍ରବାର ସୂଚନା ଦେଇଛନ୍ତି ।

ରାଜ୍ୟର ଭିତରକନିକା, ରାମଚଣ୍ଡୀ, ସାତକୋଶିଆ, ଦାରିଙ୍ଗବାଡ଼ି, ହୀରାକୁଦରେ ଏହି ଇକୋ ରିଟ୍ରିଟ୍ କରାଯିବ ।

‘ଓଡ଼ଶା ବାଏ ରୋଡ୍’ କ୍ୟାମ୍ପେନ୍ ଅଧୀନରେ ଓଡ଼ିଶାର ଗ୍ରାମାଞ୍ଚଳ ପର୍ଯ୍ୟଟନର ପ୍ରଚାର ପ୍ରସାର ସହ ଆସନ୍ତା ଦିନରେ କିପରି ଏସବୁ ସ୍ଥାନରେ ଇକୋ ରିଟ୍ରିଟ୍ ଆୟୋଜନ କରାଯିବ ସେ ଉପରେ ପର୍ଯ୍ୟଟନ ସଚିବ ବିଶାଲ କୁମାର ଦେବ ଗୁରୁତ୍ୱ ବାଢ଼ିଥିଲେ ।

ଏହି ଅବସରରେ ଓଡ଼ିଶା ବାଏ ରୋଡ୍ ରେ ଆସି ଓଡ଼ିଶାର ନୈସର୍ଗିକ ଶୋଭାରାଜିକୁ ଉପଭୋଗ କରିଥିବା କିଛି ବିଶିଷ୍ଟ ବ୍ୟକ୍ତିଙ୍କୁ ସମ୍ବର୍ଦ୍ଧିତ କରାଯାଇଥିଲା ।

ଏ ବାବଦରେ ମୁମ୍ବାଇରୁ ଆସିଥିବା ରୋଡି ପବନ କୁମାର ଦୁବେ କହିଛନ୍ତି, ମୁଁ ଓ ମୋ ସାଙ୍ଗ ରାଜିବ ଶାହା ମିଶି ଇଣ୍ଡିଆ ଏକ୍ସପେଡିସନରେ ବାହାରିଛୁ ।

ଆଜି ଆମର ୨୮ତମ ଦିନ । ଯେଉଁଥିରେ ଆମେ ଓଡ଼ିଶାରେ ପାଦ ଥାପିଛୁ । ଏହା ଆମ ଯାତ୍ରାର ୨୩ତମ ରାଜ୍ୟ ।

ଓଡ଼ିଶା ଆସି ମୋତେ ଖୁବ୍ ଖୁସି ଲାଗୁଛି । ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଆରମ୍ଭ ହୋଇଥିବା ଓଡ଼ିଶା ବାଏ ରୋଡ୍ ନିଶ୍ଚିତ ଭାବେ ଆଗାମୀ ଦିନରେ ଗ୍ରାମାଞ୍ଚଳ ପର୍ଯ୍ୟଟନକୁ ସହାୟକ ହେବ ।

ଏତିକି କହିବି ଏବେ ଭ୍ରମଣ କରିବାରେ କୌଣସି ଅସୁବିଧା ନାହିଁ । ତେବେ ସତର୍କ ହୋଇ ଭ୍ରମଣ କରିବା ଦରକାର ।

ସଡ଼କ ପଥରେ ଗଲେ ଆମେ ପର୍ଯ୍ୟଟନ ସ୍ଥାନ ବୁଲିବା ସହ ସ୍ଥାନର ଖାଦ୍ୟପେୟ, ହସ୍ତତନ୍ତ, ହସ୍ତଶିଳ୍ପକୁ ଦେଖିପାରିବା, ନିଜ ପାଇଁ ଏଥିରୁ କିଛି କିଣି ପାରିବା ।

ଏହାଦ୍ୱାରା ଆମେ କେନ୍ଦ୍ର ସରକାରଙ୍କ ‘ଭୋକାଲ୍ ଫର୍ ଲୋକାଲ୍’ର ପ୍ରଚାର ବି କରି ପାରିବା । ଯାହାକି ପରବର୍ତ୍ତୀ ସମୟରେ ସ୍ଥାନୀୟ ଲୋକଙ୍କ ପାଇଁ ସହାୟକ ହୋଇ ପାରିବ ।

ମିଳିଥିବା ସୂଚନା ଅନୁସାରେ କରୋନା ପରବର୍ତ୍ତୀ ସମୟରେ ଦେଶର ପର୍ଯ୍ୟଟନ ବୈଭବକୁ ପୁଣିଥରେ ଟ୍ରାକକୁ ଫେରାଇ ଆଣିବା ସହ ଏନେଇ ଲୋକଙ୍କ ମନରେ ସଚେତନତା ସୃଷ୍ଟି କରିବା ପାଇଁ ଗୁଜରାଟରୁ ୬ ଜଣ ଯୁବକ ଆସି ଓଡ଼ିଶା ପହଞ୍ଚିଛନ୍ତି ।

୩୬ ଦିନରେ ୩୪ ରାଜ୍ୟ ବୁଲିବାର ଏହି ମିଶନ୍ ମୋଡ୍ ଆରମ୍ଭ ହୋଇଛି କାର୍ ରେ । ସେପ୍ଟେମ୍ବର ୧୮ରେ ଗାନ୍ଧୀ ନଗରରୁ ଆରମ୍ଭ ହୋଇଥବା ଏହି ଯାତ୍ରାରେ ଅଛନ୍ତି ରାଜୀବ ଶାହା(୫୬), ଥୋମାସ୍ କୋଶେ(୪୮), ନୀତିନ୍ ଗୁପ୍ତା (୩୭), ସଞ୍ଜୟ ପଟେଲ(୪୫), ପୱନ୍ ଦୁବେ (୪୫) ଓ ରୀତେଶ ପାରେଖ (୪୫) ।

ଏ ବାବଦରେ ଦଳର ସବୁଠାରୁ ବୟସ୍କ ରାଜୀବ କହନ୍ତି କରୋନା ଯୋଗୁଁ ପର୍ଯ୍ୟଟନ ଶିଳ୍ପ ସମ୍ପୂର୍ଣ୍ଣ ଭୁଶୁଡ଼ି ଯାଇଛି । ଏହି ଶିଳ୍ପକୁ ପୁଣିଥରେ ଉତ୍ସାହିତ କରିବା ପାଇଁ ଓ ଲୋକମାନଙ୍କୁ ଏଥିପାଇଁ ସଚେତନ କରିବା ପାଇଁ ଆମେ ଏଭଳି ଏକ ମିଶନ୍ ମୋଡରେ ବାହାରିବାକୁ ଚିନ୍ତା କଲୁ ।

ସେ ଆହୁରି କହିଛନ୍ତି ଯେତେଯାଏଁ ଟିକା ଆସିନି ସେତେପର୍ଯ୍ୟନ୍ତ ଆମକୁ କରୋନା ସହ ବଞ୍ଚିବାକୁ ହେବ । ଆମେ ଏହି ଯାତ୍ରା ଦ୍ୱାରା ଲୋକଙ୍କୁ କହିବାକୁ ଚାହୁଁଛୁ ସମସ୍ତ ପ୍ରତିଷେଧକ ଗ୍ରହଣ କରି ତୁମେମାନେ ମଧ୍ୟ ଆମ ପରି ବୁଲିପାରିବ ।

ଅପରପକ୍ଷେ କରୋନା ପରବର୍ତ୍ତୀ ସମୟରେ କୋଣାର୍କ ବ୍ୟତୀତ ଅନ୍ୟ ୫ଟି ସ୍ଥାନରେ ଇକୋ ରିଟ୍ରିଟ୍ ପାଇଁ ରାଜ୍ୟ ପର୍ଯ୍ୟଟନ ବିଭାଗ ଅଣ୍ଟା ଭିଡ଼ିଛି ।

ଏସବୁ ସ୍ଥାନରେ ଇକୋ ରିଟ୍ରିଟ୍ କରାଯାଇ ପର୍ଯ୍ୟଟକଙ୍କୁ ଓଡ଼ିଶା ପ୍ରତି ଆକର୍ଷିତ କରାଯିବ । ସାତକୋଶିଆର ବଡ଼ମୂଳରେ ଏହା କରାଯିବାକୁ ସ୍ଥିର କରାଯାଇଥିବା ବେଳେ ଭିତରକନିକାର ନଳିତାପଟିଆରେ ଏହା କରାଯିବ ।

ଡିସେମ୍ବର ୧ରୁ ଫେବ୍ରୁଆରୀ ୨୮ ଭିତରେ ଏସବୁ ସ୍ଥାନରେ ଇକୋ ରିଟ୍ରିଟ୍ ଆୟୋଜିତ ହେବ । ଯେଉଁଠାରେ ପର୍ଯ୍ୟଟକଙ୍କ ରହଣି ପାଇଁ ବିଳାସପୂର୍ଣ୍ଣ ଟେଣ୍ଟ ସାଙ୍ଗକୁ କଟେଜ୍, ରେସ୍ତୋରାଁ, କ୍ରୀଡ଼ା କାର୍ଯ୍ୟକ୍ରମ ଆଦି କରାଯିବ ।

ଷ୍ଟାର୍ ହୋଟେଲ ର ସମସ୍ତ ସୁବିଧା ପର୍ଯ୍ୟଟକଙ୍କୁ ଏଠାରେ ମିଳିବ । ବିଶେଷ କରି ପର୍ଯ୍ୟଟକଙ୍କୁ ବିଳାସପୂର୍ଣ୍ଣ ଟେଣ୍ଟ ରେ ରହିବା ସହ ପ୍ରକୃତି କୋଳରେ ବିଭିନ୍ନ ରକମର ଖାଦ୍ୟ, ସ୍ପା, ଦୁଃସାହାସିକ କ୍ରୀଡ଼ା, ନେଚର ଟ୍ରେଲ୍ ଆଦିର ଅନୁଭୂତି ମିଳିବ ।

ଏହାସାଙ୍ଗକୁ ରାତିରେ ସାଂସ୍କୃତିକ କାର୍ଯ୍ୟକ୍ରମ ସହ ମୁ୍ୟଜିକାଲ୍ ନାଇଟ୍ ର ସୁବିଧା ମିଳିବ ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୧୫(ଲୋକାଲ ୱାୟାର): ଯେତେବେଳେ କାମ ହିଁ ତା’ର ପରିଚୟ ତିଆରି କରେ ସେତେବେଳେ ଜଣେ କଳାକାର ଲୋକପ୍ରିୟ ହୁଏ ।

ଏମିତି ଜଣେ କଳାକାର ହେଲେ ଓଡ଼ିଶାର ସୁଦର୍ଶନ ସାହୁ । ଯାହାଙ୍କ ସୃଜନଶୀଳତାରେ ରୂପ ପାଇଛି ଓଡ଼ିଶା ବନ୍ୟଜନ୍ତୁ ମାନଚିତ୍ର ।

ପଟ୍ଟଚିତ୍ରର ଧାରାରେ ଓଡ଼ିଶାର ବନ୍ୟଜନ୍ତୁଙ୍କ ସ୍ଥାନିତ କରିଥିବା ଭିଜୁଆଲ୍ ଆର୍ଟିଷ୍ଟ ସୁଦର୍ଶନ ନିଜର ଇନଷ୍ଟାଗ୍ରାମ୍ ପେଜରେ ଏ ସମ୍ପର୍କିତ ଚିତ୍ର ପୋଷ୍ଟ କରିଥିଲେ ।

ଯାହାକି ରାତାରାତି ଭାଇରାଲ୍ ହେବା ସହ ଅନେକ ବନ୍ୟଜନ୍ତୁପ୍ରେମୀ, ଗବେଷକ, ଫଟୋଗ୍ରାଫର, ବନ୍ୟଜନ୍ତୁ ସଂରକ୍ଷକ ଓ ବିଭିନ୍ନ ଅନୁଷ୍ଠାନ ଦ୍ୱାରା ଉଚ୍ଚ ପ୍ରଶଂସିତ ହୋଇଛି ।

ସୁଦର୍ଶନଙ୍କ ଏହି ସୃଜନ ସୃଷ୍ଟିରେ ଏସୀୟ ହାତୀ, ଭାରତୀୟ ପଙ୍ଗୋଲିନ୍, ବେଙ୍ଗଲ ଟାଇଗର, ଇରାୱାଡି ଡଲଫିନ୍, ସ୍ପଟେଡ ଡିୟର୍, ଫିସିଂ କ୍ୟାଟ୍ ଆଦି ସ୍ଥାନ ପାଇଥିବା ବେଳେ ଏହାର ଅନ୍ୟ ଦିଗରେ ଓଡ଼ିଶାର ଆଦିବାସୀ ତଥା ବନ୍ୟଜନ୍ତୁ ହଟସ୍ପଟ୍ ସ୍ଥାନ ମାନଙ୍କ ବାବଦରେ ସୂଚନା ଦିଆଯାଇଛି ।

ଏ ବାବଦରେ ସୁଦର୍ଶନ କହନ୍ତି ଯେତେବେଳେ କୌଣସି ଜିନିଷକୁ ମୁଁ ଚିନ୍ତାକରେ ଓ ଏହାକୁ ରୂପ ଦେବାକୁ ଚେଷ୍ଟା କରେ ସେତେବେଳେ ମୁଁ ଘଣ୍ଟା ଘଣ୍ଟା ଧରି ମାନସ ମନ୍ଥନ କରେ ।

ମୁଁ ବାସ୍ତବିକ ଏଥିରେ ନିଜକୁ ଓ ନିଜର ଆବେଗକୁ ଭରିବାକୁ ଚେଷ୍ଟା କରେ । ଏମିତି କିଛି ଭାବେ ଯେଉଁଥିରେ ମୋର ଜନ୍ମ ମାଟି, ମୋ ମାଟିର ମହକ, ମୁଁ ବଞ୍ଚୁଥିବା ଜୀବନ ରହିଥିବ । ଆଙ୍କିଲାବେଳେ ଭାବେ ଯେ ଏମିତି କିଛି କରିବି ଯାହାକି ମୋତେ ମୋ ଘରକୁ ଫେରିଯିବାକୁ ବାଧ୍ୟ କରିବ, ମୋ ମାଟିକୁ ଦେଖିବାକୁ ଆକୁଳ କରାଇବ ।

ସେ କହନ୍ତି ମୁଁ ପୁରୁଣା ଭୁବନେଶ୍ୱର ଅଞ୍ଚଳର । ପିଲାବେଳୁ ମନ୍ଦିର ମାଳିନୀ ସହରରେ ବଢ଼ିଛି ।

ଯେତେବେଳେ ଆଖି ଖୋଲି ଦେଖିଛି ସେତେବେଳୁ କାରୁକାର୍ଯ୍ୟ, ପଥର ଖୋଦିତ ମୂର୍ତ୍ତି ସବୁ ମୋତେ ଆମୋଦିତ କରିଛି ।

ଆଉ ମୁଁ ଅଧିକାଂଶ ସମୟରେ ବୁଲିବା ପାଇଁ ପଶ୍ଚିମବଙ୍ଗର କୋଲକାତା ସହର ଯାଇଛି ।

ସେଠାକାର ଉତ୍ସବ ମୁଖରିତ ରାସ୍ତା ଓ ଅଧାଗଢ଼ା ମା’ଙ୍କ ମୂର୍ତ୍ତି ସବୁବେଳେ ମୋତେ ଅନ୍ୟମନସ୍କ କରାଏ ।

ମୋ ଜନ୍ମ ମାଟି ଓଡିଶା ଓ ମୁଁ ଦେଖିଥିବା କଲିକତା ସହରର ଛାପ ମୋ ଚିତ୍ରରେ ସ୍ପଷ୍ଟ ବାରିହୋଇ ପଡେ ।

ଜଣେ କଳାକାର ଭାବେ ମୁଁ ଏହି ଦୁଇ ସହରର ଭିଜୁଆଲ ଆର୍ଟ ବା ଭିଜୁଆଲ ଭାଷାକୁ ମୋ ଚିତ୍ରରେ ପରିସ୍ପୁଟ କରିବାର ପ୍ରୟାସ କରିିଛି ।

କଲିକତାର ସୌନ୍ଦର୍ଯ୍ୟ ଓ ମୋ ସହର ଓ ମୋ ମାଟିର ପାରମ୍ପରିକତା ଓ ମୂଳତା ମୋ ଚିତ୍ରରେ ଅତି ସ୍ପଷ୍ଟ ଭାବେ ଜୀବନ୍ତ ବୋଲି ଜଣେ କହିପାରିବ ।

ଦିଲ୍ଲୀ ସ୍ଥିତ ଏନଆଇଏଫଟିରୁ କମୁ୍ୟନିକେସନ୍ ଡିଜାଇନରେ ଶିକ୍ଷା ଗ୍ରହଣ କରିବା ପରେ ନିଜର ଶେଷବର୍ଷ ସ୍ନାତକୋତ୍ତର ପରୀକ୍ଷା ପାଇଁ ଆବଶ୍ୟକ ପ୍ରେଜେକ୍ଟ ତାଙ୍କ ଜୀବନର ମୋଡ଼ ବଦଳାଇଦେଲା ।

ସୁଦର୍ଶନ କହନ୍ତି ଏହି ପ୍ରୋଜେକ୍ଟରେ ମୋର ବିଷୟ ଥିଲା ୱାଇଲ୍ଡ ଲାଇଫ୍ କଞ୍ଜରଭେସନ୍ ଥ୍ରୋ ଦ ମିଡିୟମ୍ ଅଫ ଆର୍ଟ ଅର୍ଥାତ କଳା ମାଧ୍ୟମରେ ବନ୍ୟଜନ୍ତୁ ସଂରକ୍ଷଣ ।

ସେବେଠାରୁ ମୁଁ ନିୟମିତ ବ୍ୟବଧାନରେ ଓଡ଼ିଶାର ବିଭିନ୍ନ ଅଞ୍ଚଳ ଓ ଓଡ଼ିଶା ବାହାରର ବିଭିନ୍ନ ସ୍ଥାନ ବୁଲିବାରେ ଲାଗିଲି ।

ମୋ ଭିତରେ ଲୁଚି ରହିଥିବା ଅନୁସନ୍ଧିତ୍ସୁ ପିଲାଟିକୁ ମୁଁ ନିଜେ ଆବିଷ୍କାର କଲି ଓ ସବୁ ସ୍ଥାନରେ ମୁଁ ମୋ ଚିତ୍ର ବା ମୋ ସୃଜନଶୀଳତା ପାଇଁ ଉପାଦାନମାନ ଖୋଜିବାରେ ଲାଗିଲି ।

ମୋ ଚିତ୍ର ପାଇଁ ଉପାଦାନ ସବୁକୁ ବେଳେ ବେଳେ ମୁଁ ଜଙ୍ଗଲ ରାସ୍ତାର ଚଟାଣରେ ପାଇଛି ତ ଆଉ କେତେବେଳେ ଆଦିବାସୀ ଘରର କାନ୍ଥରେ ଅଙ୍କାଯାଇଥିବା ଚିତ୍ର ଭିତରେ ପାଇଛି ।

ବାଡ଼ି ବଗିଚା, କାଦୁଅ, ଚଟାଣ, ପଶୁ, ପକ୍ଷୀ, ବାଲି ସବୁଥିରେ ମୁଁ ମୋ ସୃଜନଶୀଳତା ପାଇଁ ଉପାଦାନ ଖୋଜିଛି ଆଉ ପାଇଛି ମଧ୍ୟ ।

ଯେତେବେଳେ ଧୀରେ ଧୀରେ ମୋ ଭିତରେ ଏସବୁ ପ୍ରବୃତ୍ତି ବଢ଼ିବାରେ ଲାଗିଲା ସେତେବେଳେ ମୁଁ ଗୁଡଗାଓଁରେ ପାଇଥିବା ଚାକିରି ଛାଡିଦେଲି ।

ଆଉ ଏବେ ଓଡ଼ିଶା, ଆନ୍ଧ୍ରପ୍ରଦେଶ ସରକାରଙ୍କ ଜଙ୍ଗଲ ବିଭାଗ ସହ ମିଶି ଫ୍ରି-ଲାନ୍ସର ଭାବେ ବିଭିନ୍ନ ପ୍ରକଳ୍ପରେ କାମ କରୁଛି ।

ସୁଦର୍ଶନ କହନ୍ତି ନିକଟରେ ମୁଁ ଏକ କାଦୁଅ ଚିତ୍ରକଳା ଉପରେ କାମ କରୁଛି । ମୁଁ ବିଭିନ୍ନ କାଦୁଅକୁ ନେଇ ରଙ୍ଗ ସହ ଏହାକୁ ବୋଲି ଏକ ଫିସିକ୍ୟାଟ୍ ର ପୋର୍ଟରେଟ ତିଆରି କରିଛି ।

ଏହି ଚିତ୍ରକଳାର କୌଶଳ ମୁଁ ରନ୍ଥାମ୍ଭୋରର ଆଦିବାସୀମାନଙ୍କ ପାଖରୁ ଶିଖିଛି । ସେ କହନ୍ତି ବନ୍ୟଜନ୍ତୁ ସଂରକ୍ଷଣ ହେଉଛି ଏକ କଳା । ବାସ୍ତବିକ ସଂରକ୍ଷଣ ବୋଲି କୌଣସି ଶବ୍ଦ ମୋ ଶବ୍ଦ କୋଷରେ ନାହିଁ ।

ମୋ ମତରେ ଯେତେବେଳେ ବନ୍ୟଜନ୍ତୁ ଓ ପ୍ରକୃତିକୁ ତୁମେ ଭଲ ପାଇବା ଆରମ୍ଭ କରିବ ସେତେବେଳେ ତୁମେ ତାକୁ ବୁଝିବା ଆରମ୍ଭ କରିବ ।

ଆଉ ଯେତେବେଳେ ତୁମେ ତାକୁ ବୁଝିବା ଆରମ୍ଭ କରିବ ତୁମେ ତାକୁ ସମ୍ମାନ ଦେବା ଆରମ୍ଭ କରିବ । ଆଉ ଏହା ଧୀରେ ଧୀରେ ସଂରକ୍ଷଣ ଆଡ଼କୁ ଗତି କରିବ ।

ନିକଟରେ ସୁଦର୍ଶନ ମାଇଁ ପିକଚର୍ ଅଫ୍ ଡିଭାଇନିଟି ନାମରେ ଏକ ସିରିଜ୍ ଚିତ୍ର କରିବା ଆରମ୍ଭ କରିଛନ୍ତି ।

ଏ ବାବଦରେ ସେ କହନ୍ତି ପୂର୍ବ ସମୟରେ ଆଦିବାସୀ ଦେବତାମାନଙ୍କୁ ପ୍ରକୃତିର ଉପାସକ ଭାବେ ପୂଜା କରାଯାଉଥିଲା ।

ବର୍ତ୍ତମାନ ସେସବୁର ସଂଜ୍ଞା ବଦଳି ଯାଇଛି । ମାଇଁ ପିକଚର୍ ଅଫ୍ ଡିଭାଇନିଟି ଦ୍ୱାରା ମୁଁ ସେହିସବୁକୁ ପୁନରୁତ୍ଥାନ କରିବାକୁ ଚେଷ୍ଟା କରିଛି ।

ସେସବୁ ଚିତ୍ର ବନ୍ୟପ୍ରାଣୀରୁ ଅନୁପ୍ରାଣୀତ ହୋଇଛି । ଏଥିରେ ବାଘ-ଜଙ୍ଗଲ, ବେଙ୍ଗ-ବର୍ଷା, ସାପ-ପୃଥିବୀ ଭଳି ସାତୋଟି ବନ୍ୟପ୍ରାଣୀକୁ ସାତଟି ଉପାଦାନ ସହ ଯୋଡ଼ାଯାଇ ପ୍ରସ୍ତୁତ କରାଯାଇଛି । ଯାହାକି ୧ ଓ ୨ ଭାଗରେ ଦର୍ଶକଙ୍କ ଆଗକୁ ଆସିବ ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୧୫(ଲୋକାଲ ୱାୟାର): କରୋନା ଯୋଗୁଁ ବନ୍ଦ ରହିଥିବା ରାଜ୍ୟ ପର୍ଯ୍ୟଟନ ବିଭବଗୁଡ଼ିକ ନିକଟରେ ଖୋଲିଛି ।

ଅକ୍ଟୋବର ୧ରୁ ଏସବୁ ସାଧାରଣ ଲୋକଙ୍କ ପାଇଁ ଖୋଲିଥିବା ବେଳେ ସମସ୍ତ କରୋନା କଟକଣା ଓ ନିୟମର କଡ଼ାକଡ଼ି ପାଳନ କରାଯାଉଛି ।

ପର୍ଯ୍ୟଟକଙ୍କୁ ସୁରକ୍ଷା ଦେବା ପାଇଁ ଆଗରୁ ଆଇଆଇଟିଟିଏମ୍, ବନ ବିଭାଗର ୱାଇଲ୍ଡ ଲାଇଫ୍ ୱିଙ୍ଗ ମିଶି ତାଲିମ ନେଇଥିଲେ ।

ଏବେ ରାଜ୍ୟ ପର୍ଯ୍ୟଟନ ବିଭାଗ ଗ୍ରାମୀଣ ପର୍ଯ୍ୟଟନ ସ୍ଥଳଗୁଡ଼ିକର ପ୍ରଚାର କରିବା ପାଇଁ ଓଡ଼ିଶା ବାଏ ରୋଡ୍ ଶୀର୍ଷକ ଏକ କ୍ୟାମ୍ପେନ୍ ଆରମ୍ଭ କରିଛି ।

ଗତ କିଛି ଦିନ ହେବ ଏନେଇ ବିଭିନ୍ନ ପରିବେଶ ପର୍ଯ୍ୟଟନ ସ୍ଥଳଗୁଡିକ, ସେଠାକୁ ସଂଲଗ୍ନ ରାସ୍ତା, ସ୍ଥାନୀୟ ଖାଦ୍ୟ ଓ ଜାତୀୟ ରାଜପଥ ଗୁଡ଼ିକର ପ୍ରଚାର କରାଯାଉଛି ।

ମହାନଦୀରେ କାଏକିଂ: ନୈସର୍ଗିକ ଶୋଭାରାଜିରେ ଭରପୁର ଓଡ଼ିଶାର ସବୁଠାରୁ ଆକର୍ଷଣୀୟ ନଦୀ ଶଯ୍ୟା ହେଉଛି ମହାନଦୀ ।

ଯିଏ ଦେଖିଛି ସିଏ ଜାଣିଛି । ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଆରମ୍ଭ ହୋଇଥିବା ‘ଓଡ଼ିଶା ବାଏ ରୋଡ’ରେ ଏନେଇ ଅନେକ ପ୍ରଚାର କରାଯାଉଛି ।

ସାଧାରଣତଃ ସ୍ଥାନୀୟ ଖାଦ୍ୟକୁ ଭଲ କରି ଚାଖିବା, ରାସ୍ତାରେ ଗଲାବେଳେ ଗ୍ରାମୀଣ ପର୍ଯ୍ୟଟନକୁ ମନଭରି ଉପଭୋଗ କରିବା, ଅନୁସନ୍ଧିତ୍ସୁ ମନରେ ତାହାର ଭାବାବେଗକୁ ରୋମନ୍ଥନ କରିବା, ତା’ର ଇତିହାସକୁ ବଖାଣିବା ସହ ମହାନଦୀ ପଠାରେ ଶୋଇ ପ୍ରକୃତିକୁ ଅନୁଭବ କରିବାର ରୋମାଞ୍ଚକର ଅନୁଭୂତି କେବଳ ଜଣେ ରାଜ୍ୟର ରାଜପଥ ଦେଇ ଗଲେ ହିଁ ପାଇ ପାରିବ ।

ବିଶେଷ କରି ମହାନଦୀ ଦେଇ ଆଠଗଡ଼ରୁ କଟକ ଜଣେ କାୟକିଂ କରି ଏହାର ମଜା ନେଇ ପାରିବ ।

ଡେରାସ୍ ସମେତ ୨୦ ସ୍ଥାନରେ ବୋଟିଂ: ପୋଷ୍ଟ ଲକଡାଉନ୍ ସମୟରେ ପର୍ଯ୍ୟଟକଙ୍କୁ ଓଡ଼ିଶା ପ୍ରତି ଆକୃଷ୍ଟ କରିବା ପାଇଁ ବିଭିନ୍ନ ପରିବେଶ ପର୍ଯ୍ୟଟନ ସ୍ଥଳୀଗୁଡିକରେ ବୋଟିଂ ସୁବିଧା ଆରମ୍ଭ କରାଯାଇଛି ।

୨୦୧୬ରୁ ୨୦୧୦ ଭିତରେ ରାଜ୍ୟର ୨୦ଟି ସ୍ଥାନରେ ପର୍ଯ୍ୟଟକଙ୍କ ପାଇଁ ଏହି ସୁବିଧା କରାଯାଇଥିବା ବେଳେ ନିକଟ ଭବିଷ୍ୟତରେ ଏହାହିଁ ହେବ ଆକର୍ଷଣର କେନ୍ଦ୍ରବିନ୍ଦୁ ।

ଡେବ୍ରିଗଡ, ହୀରାକୁଦ ଜଳଭଣ୍ଡାର, ଭିତରକନିକା, ସାତକୋଶିଆ, ବାଲେଶ୍ୱରର ଋଷିଆ, ବିଚିତ୍ରପୁର, ଚିଲିକା ହ୍ରଦ, ସରାଫଗଡ, ମାଲକାନଗିରିର ଚିତ୍ରକୋଣ୍ଡା, ସୀତାଗୁଡ଼ା ଜଳଭଣ୍ଡାର ଆଦିରେ ଏହି ସୁବିଧା କରାଯାଇଛି ।

ଏହାଛଡ଼ା ପର୍ଯ୍ୟଟକଙ୍କ ସୁବିଧା ପାଇଁ ସେଠାରେ ଲାଇଫଜ୍ୟାକେଟ୍ ଓ ସମସ୍ତ ଆନୁସଙ୍ଗିକ ସୁବିଧା କରାଯାଇଛି । ସେହିପରି ଗତବର୍ଷଠାରୁ ଚନ୍ଦକାର ଡେରାସଠାରେ ପର୍ଯ୍ୟଟକଙ୍କ ପାଇଁ ବୋଟିଂ ସୁବିଧା କରାଯାଇଛି ।

ସ୍ଥାନୀୟ ଲୋକଙ୍କୁ କର୍ମନିଯୁକ୍ତି: ବର୍ତ୍ତମାନ ରାଜ୍ୟରେ ୪୭ଟି ପରିବେଶ ପର୍ଯ୍ୟଟନ ସ୍ଥଳୀ ଥିବା ବେଳେ ଏସବୁରେ ୩୩୩ଟି ରୁମ୍ ରହିଛି ।

ଯେଉଁଠାରେ ୧୦୧୦ ଜଣଙ୍କ ପାଇଁ ରହିବା ସବୁଧା ରହିଛି । ବିଚିତ୍ରପୁର, କୁମାରୀ, ଶିମିଳିପାଳର ଗୁଡ଼ଗୁଡ଼ିଆ, କନ୍ଧମାଳର ମଣ୍ଡାଶୂର ଆଦି ପରିବେଶ ପର୍ଯ୍ୟଟନ ସ୍ଥଳୀରେ ୧୯ଟି ନୂଆ ରୁମ୍ ଯୋଡ଼ାଯାଇଛି ।

ଏସବୁ ପରିବେଶ ପର୍ଯ୍ୟଟନ ସ୍ଥଳୀଗୁଡ଼ିକ ଗ୍ରାମୀଣ ଅର୍ଥନୀତିକୁ ବିକାଶ କରିବା ଦିଗରେ ବେଶ ସହାୟକ ହେବା ସହ ସ୍ଥାନୀୟ ଲୋକଙ୍କୁ କର୍ମନିଯୁକ୍ତି ମିଳୁଛି ।

କାରଣ ଏଠାରେ ସ୍ୱୟଂ ସେବକ ଗୋଷ୍ଠୀଗୁଡ଼ିକର ମହିଳା ଓ ପୁରୁଷ କର୍ମକର୍ତ୍ତାମନେ କାମ କରିବାର ସୁଯୋଗ ପାଉଛନ୍ତି । ରାଜ୍ୟର ପ୍ରାୟ ୬୦୦ରୁ ଅଧିକ ଗୋଷ୍ଠୀ ସଦସ୍ୟ ଏବେ ଏସବୁ ପରିବେଶ ପର୍ଯ୍ୟଟନ ସ୍ଥଳୀରେ କାମ କରୁଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୧୪(ଲୋକାଲ ୱାୟାର): କିଛି ଦିନ ହେବ ରାଜଧାନୀର ରାଜରାସ୍ତାରେ ଗଡୁଛି ଏମିତି ଏକ ଅଟୋ, ଯାହାକି ସମ୍ପୂର୍ଣ୍ଣ ପରିବେଶ ଅନୁକୂଳ ଏବଂ ଏକ ଚଳନ୍ତା ଚିଡ଼ିଆଖାନା କହିଲେ ଚଳିବ ।

ଯେଉଁ ଚିଡ଼ିଆଖାନାରେ ବାଘ କି ଭାଲୁ ନାହାନ୍ତି । ବରଂ ଅଛନ୍ତି ବିଭିନ୍ନ ରଙ୍ଗବେରଙ୍ଗର ଚଢ଼େଇ ଓ ମାଛ । ତା’ ସାଙ୍ଗକୁ ରଙ୍ଗବେରଙ୍ଗର ଗଛ ଲତା ।

ଯାହା ଭିତରେ ବସି ଜଣେ ପ୍ରକୃତିର ଅନୁଭବ ପାଇ ପାରିବ । ସବୁଠାରୁ ଖୁସିର କଥା ଜଣେ ଏହି ଚିଡ଼ିଆଖାନା ଭିତରେ ବସି ରାଜଧାନୀର ଗଳି କନ୍ଦି ବୁଲିପାରିବ ଆଉ ମଜାନେଇ ପାରିବ ସ୍ମାର୍ଟ ସହରର ।

ଚନ୍ଦ୍ରଶେଖରପୁର ଅଞ୍ଚଳର ସୁଜିତ୍ ଦିଗଲ ତିଆରି କରିଛନ୍ତି ଏମିତି ଏକ ଚଳନ୍ତା ଚିଡ଼ିଆଖାନା । ନିଜର ସଉକକୁ ପୂରା କରିବାକୁ ଯାଇ ସେ ନିଜ ଅଟୋକୁ ଏମିତି ଭିନ୍ନ ରୂପ ଦେଇଛନ୍ତି ଆଉ ଚର୍ଚ୍ଚାକୁ ବି ଆସିଛନ୍ତି ।

ସୁଜିତଙ୍କ ଘର ଫୁଲବାଣୀର ଟିକାବାଲିରେ । ଘରର ଆର୍ଥିକ ଅବସ୍ଥା ଭଲ ନଥିବାରୁ ଆଜିକୁ ୬ ବର୍ଷ ତଳେ ପେଟ ପାଟଣା ପାଇଁ ପଳାଇ ଆସିଥିଲେ ରାଜଧାନୀ ।

ଏଠାରେ ଆସି ସେ ଜଣଙ୍କର ଡ୍ରାଇଭର ହୋଇ କିଛିଦିନ ପରିବାର ଚଳାଇଲେ । ହେଲେ ତାଙ୍କୁ ଏଥିରେ କୌଣସି ପ୍ରକାରର ସ୍ୱାଧୀନତା ମିଳିଲାନି । ତେଣୁ ସେ କାର୍ ଛାଡ଼ି ନିଜର ଏକ ଅଟୋ କିଣିଲେ ।

ଅଟୋରୁ ବେଶ ଦି’ ପଇସା ଆୟ ବି କଲେ । ଘର ଖର୍ଚ୍ଚ ପାଇଁ ପ୍ରତି ମାସରେ ସୁଜିତ୍ କିଛି ଟଙ୍କା ଗାଁକୁ ପଠାଇ ଦିଅନ୍ତି । ଆଉ ବାକି ଟଙ୍କାରେ ନିଜେ ଚଳନ୍ତି ।

ଏମିତି କିଛିଦିନ ଗଲାପରେ ସୁଜିତ୍ ନିଜର ସଉକ୍ ପୂରା କରିବାକୁ ଚିନ୍ତା କଲେ ଓ ନିଜ ସଉକ୍ ମାଧ୍ୟମରେ ତାଙ୍କ ଅଟୋରେ ବସୁଥିବା ଯାତ୍ରୀଙ୍କୁ ନିରବ ଭାବେ ସଚେତନ କରିବାକୁ ଯୋଜନା କଲେ ।

ପ୍ରଥମେ ନିଜ ସଞ୍ଚିତ ଅର୍ଥରୁ କିଛି ଖର୍ଚ୍ଚ କରି ସେଥିରେ ଏଲଇଡି ଲାଇଟ୍ କିଣିଲେ ଓ କିଛି ଗଛ କିଣିଲେ । ଏସବୁକୁ ସେ ନିଜ ଅଟୋ ଭିତରେ ସୁନ୍ଦର କରି ସଜାଡ଼ିଲେ ।

ଧୀରେ ଧୀରେ ଏହି ସଉକ୍ ତାଙ୍କର ନିଶାରେ ପରିଣତ ହେଲା । ଗୋଟିଏ ପରେ ଗୋଟିଏ ଗଛରେ ଅଟୋବି ଭର୍ତ୍ତି ହେବାକୁ ଲାଗିଲା ।

ପରବର୍ତ୍ତୀ ସମୟରେ ସେ ୨ଟି ପଞ୍ଜୁରୀ ଓ ଗୋଟିଏ ଆକ୍ୱାରିୟମ୍ ଆଣି ଅଟୋ ଭିତରେ ରଖିଲେ । ସେଥିରେ ବିଭିନ୍ନ ରଙ୍ଗବେରଙ୍ଗର ମାଛ ଓ ପକ୍ଷୀ ବି ରଖିବାରେ ଲାଗିଲେ ।

ଏବେ ସୁଜିତଙ୍କ ଏହି ଚଳନ୍ତା ଚିଡ଼ିଆଖାନା ସବୁ ଗ୍ରାହକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି ।

ସୁଜିତ୍ କହନ୍ତି ଅଟୋ ସମେତ ଏ ପକ୍ଷୀ, ମାଛ ଓ ଗଛ ସବୁ ମୋର ପରିବାର । ମୋର ଆଉ ଏକ ପରିବାରରେ ମୋର ମା’, ସ୍ତ୍ରୀ ଓ ଦୁଇ ଝିଅ ଅଛନ୍ତି ।

ଏଠାକୁ ଆସିବା ପରେ ମୁଁ ଆଉ ଘର ଭଡ଼ା ନେଇନି । ଘର କହିଲେ ମୋର ଏହି ଅଟୋ ହିଁ ସବୁକିଛି । ଏଇଠି ଖାଏ, ଏଇଠି ଶୁଏ ।

ଦିନବେଳା ଆହର କେନ୍ଦ୍ରରୁ ଓ ରାତିରେ କୌଣସି ଏକ ହୋଟେଲରୁ ଖାଇବା ଆଣି ଖାଏ । ଖରା କି ବର୍ଷା ଅଟୋ ହିଁ ମୋର ଘର ।

ରାତିରେ ମଶାରୀ ଟାଙ୍ଗି ଶୁଏ । ସକାଳୁ ପାଖ ପେଟ୍ରୋଲ ପମ୍ପରେ ନିଜ ନିତ୍ୟକର୍ମ ସାରି ପୁଣି କାମରେ ବାହାରିଯାଏ ।

ଗ୍ରାହକଙ୍କ ସୁବିଧା ପାଇଁ ଅଟୋରେ ମୁଁ ବ୍ଲୁ-ଟୁଥ୍ ସ୍ପିକର ଓ ୱାଇଫାଇ ସେବା ଲଗାଇଛି । ଅଟୋରେ ମୁଁ ଆଲୋଭେରା, ମନିପ୍ଲାଣ୍ଟ, ମଲ୍ଲୀ ଓ କାଗଜି ଫୁଲ ଗଛ ଲଗାଇଛି ।

ଅଟୋରେ ଗଲାବେଳେ ଯାତ୍ରୀମାନେ ମୋ ସହ ବିଭିନ୍ନ ଗଛ ଓ ସେସବୁର ଯତ୍ନ କିପରି ନିଆଯିବ ସେ ବାବଦରେ ଚର୍ଚ୍ଚା କରନ୍ତି । ମୋତେ ଏହା ଖୁବ୍ ଖୁସିଦିଏ ।

ମୋର ପଞ୍ଜୁରୀ ଭିତରେ ମୁଁ ଶୁଆ ଓ କିଛି ଲଭ୍ ବାର୍ଡ ରଖିଛି । ଯାତ୍ରୀଙ୍କୁ ଦେଖିଲେ ଏମାନେ ମିଟୁ ମିଟୁ ରାବନ୍ତି । ଅଟୋରେ ବସୁଥିବା ଯାତ୍ରୀମାନେ ଏମାନଙ୍କ ସହ କଥାବାର୍ତ୍ତା କରନ୍ତି ।

ସୁଜିତ୍ କହନ୍ତି ଏବେ କରୋନା ସମୟ । ତେଣୁ ମୁଁ ଯାତ୍ରୀମାନଙ୍କ ସୁରକ୍ଷା ପାଇଁ ସମସ୍ତ ପ୍ରକାର ପ୍ରତିଷେଧକ ବ୍ୟବସ୍ଥା ଗ୍ରହଣ କରିଛି ।

ଅଟୋରେ ଦୁଇଜଣରୁ ଅଧିକ ଲୋକଙ୍କୁ ବସିବାକୁ ଅନୁମତି ଦେଉନି । ଅଟୋ ଭିତରକୁ ଆସିବା ପୂର୍ବରୁ ସେମାନଙ୍କୁ ସାନିଟାଇଜର ଦେଉଛି ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୮(ଲୋକାଲ ୱାୟାର): ଆଉ ମାତ୍ର ଦୁଇ ମାସ । ବଦଳି ଯିବ ଖଣ୍ଡଗିରି ସ୍ଥିତ କଳିଙ୍ଗ ଷ୍ଟୁଡିଓ ଚିତ୍ର ।

ଏଥିପାଇଁ ଜୋରସୋରରେ କାମ ଚାଲିଛି । ଯଦିଓ ବାତ୍ୟା ଓ କୋଭିଡ ଯୋଗୁଁ ନବୀକରଣ କାମ ସାମାନ୍ୟ ଧିମେଇ ଯାଇଥିଲା ହେଲେ ଏବେ ପୁଣିଥରେ କାମ ଆରମ୍ଭ ହୋଇଛି ।

ଏନେଇ ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ ସଭାପତି କୁନା ତ୍ରିପାଠୀ ଟ୍ୱିଟ୍ କରି ଜଣାଇଛନ୍ତି ।

ଏ ବାବଦରେ କୁନା ତ୍ରିପାଠୀ କହିଛନ୍ତି କରୋନା ଯୋଗୁଁ ଆଜିକୁ ୮ ମାସ ହେଲାଣି ବନ୍ଦ ପଡ଼ିଥିବା ପର୍ଯ୍ୟଟନ ଶିଳ୍ପ ପୁଣିଥରେ ଧୀରେ ଧୀରେ ଚଳଚ ଳ ହେବାରେ ଲାଗିଛି ।

ପୁଣିଥରେ ସୁଟିଂ ଆରମ୍ଭ ହୋଇଛି । ମୁଖ୍ୟ ଫାଟକ ଓ ଭିତର ସାଜସଜ୍ଜା, ଅଟ୍ଟାଳିକା, ସୁଟିଂ ସେଡ ଆଦି ନବୀକରଣ ହେଲାଣି ।

ଆଉ ମାତ୍ର କିଛିଦିନର ଅପେକ୍ଷା । କଳିଙ୍ଗ ଷ୍ଟୁଡିଓ ନିଶ୍ଚିତ ଭାବେ ନୂଆ ରୂପରେ ଦେଖଣାହାରୀଙ୍କୁ ଆକର୍ଷିତ କରିବ ।

ସେ ଆହୁରି କହିଛନ୍ତି ଯେ ଧୀରେ ଧୀରେ ଷ୍ଟୁଡିଓ ପ୍ରତି ଓଡ଼ିଶା ନିଦେ୍ର୍ଦଶକ, ପ୍ରଯୋଜକମାନେ ଆଗ୍ରହ ଦେଖାଇବା ଆରମ୍ଭ କଲେଣି ।

କରୋନା ପୂର୍ବ ଯାଏଁ ପାଖାପାଖି ୫୦ରୁ ଅଧିକ ଛୋଟ ବଡ଼ ଚଳଚ୍ଚିତ୍ର ସୁଟିଂ ହୋଇ ସାରିଥିଲା ।

ଉଭୟ କ୍ଷୁଦ୍ର ଓ ବଡ଼ ବଜେଟ ନିଦେ୍ର୍ଦଶକମାନେ ଏଠାରେ ସୁଟିଂ କରିବାକୁ ମନ ବଳାଉଛନ୍ତି ।

ଏଠାକାର ଷ୍ଟୁଡିଓ ଗୋଟିଏ ସମୟରେ ପୂର୍ବ ଭାରତର ସବୁଠାରୁ ବଡ଼ ଓ ଭଲ ଷ୍ଟୁଡିଓ ଥିଲା । ଯାହାକୁକି ଆମେ ପୁଣିଥରେ ନବୀକରଣ କରିବାକୁ ଅଣ୍ଟା ଭିଡ଼ିଛୁ ।

କୁନାଙ୍କ ଏହି ଟ୍ୱିଟ୍ ପରେ ବିଭିନ୍ନ ମହଲରୁ ଶୁଭେଚ୍ଛୁଙ୍କ ଶୁଭକାମନା ଛୁଟିଛି । ବରିଷ୍ଠ ପ୍ରଯୋଜକ ଅକ୍ଷୟ ପରିଜା କହିଛନ୍ତି ଚଳଚ୍ଚିତ୍ର ବ୍ୟବସାୟକୁ ବଢ଼ାଇବା ଦିଗରେ ଷ୍ଟୁଡିଓର ଭୂମିକା ଗୁରୁତ୍ୱପୂର୍ଣ୍ଣ ।

୧୯୯୯ ମହାବାତ୍ୟା ପରେ ଷ୍ଟୁଡିଓ ସମ୍ପୂର୍ଣ୍ଣ ଭାବେ ଭାଙ୍ଗିଯାଇଥିଲା ।

ସେବେଠାରୁ ଅଣ୍ଟା ସଳଖି ନଥିବା ବେଳେ ପୁଣି ଫନିରେ କରାଳ କାୟା ଷ୍ଟୁଡିଓର ଅବସ୍ଥା ଆହୁରି ଶୋଚନୀୟ କରି ଦେଇଥିଲା ।

କୁନା ତ୍ରିପାଠୀ ଓଡ଼ିଶା ଚଳଚ୍ଚିତ୍ର ନିଗମକୁ ନୂଆକରି ଆସିବା ପରେ ଏହାର ରୂପ ବଦଳାଇବାକୁ ପ୍ରୟାସ ଆରମ୍ଭ କରିଥିଲେ ।

ଯାହାକି ଧୀରେ ଧୀରେ ବାସ୍ତବ ରୂପ ନେଉଛି । ଏବେ ମୁଁ ଓ ମୋ ପରି ପ୍ରଯୋଜକ ମାନେ ଓଡ଼ିଶାରେ ଚଳଚ୍ଚିତ୍ର ସୁଟିଂ କରିବା ଦିଗରେ ଆଗ୍ରହ ଦେଖାଇବେ ନିଶ୍ଚିତ ।

ମିଳିଥିବା ସୂଚନା ଅନୁସାରେ କଳିଙ୍ଗ ଷ୍ଟୁଡିଓ ଭିତର କ୍ୟାମ୍ପସରେ ଚଳଚ୍ଚିତ୍ର ଡବିଂ ପାଇଁ ଏକ ଡବିଂ ଲାବୋରେଟୋରୀ ନିର୍ମାଣ କରାଯାଉଛି ।

ଏହାବାଦ୍ ଷ୍ଟୁଡିଓ ଭିତରେ ଏକ ଗ୍ରାମ୍ୟ ପରିବେଶ ଓ ସହରୀ ପରିବେଶ ସୃଷ୍ଟି କରାଯାଉଛି । ସୁଇମିଂ ପୁଲ୍, ରେଳଷ୍ଟେସନ୍ ଓ ମୁଖ୍ୟ ପ୍ରବେଶ ଦ୍ୱାର ଆଦି କରାଯାଉଛି ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୭(ଲୋକାଲ ୱାୟାର): ଦୀର୍ଘ ଦିନ ପରେ ପୁଣିଥରେ ସଜେଇ ହେଉଛି ରାଜଧାନୀ । ଏଥର କିନ୍ତୁ କାନ୍ଥ ବାଡ଼ ନୁହେଁ ।

ରାଜଧାନୀ ରାସ୍ତାର ଦୁଇ ପାଖରେ ଥିବା ଗଛ ସବୁକୁ ସୁନ୍ଦର କଳାକୃତିରେ ସଜାଉଛନ୍ତି କିଛି ସ୍ଥାନୀୟ ଚିତ୍ରଶିଳ୍ପୀ । ଆଉ ରାଜଧାନୀରେ ଦେଖିବାକୁ ମିଳିଛି ପ୍ରଥମ ଟ୍ରି ପେଣ୍ଟିଂ ।

ଚନ୍ଦ୍ରଶେଖରପୁର ଅଞ୍ଚଳର ଫର୍ଚୁନ୍ ଟାୱାର ବିପରୀତ ଦିଗରେ ଥିବା ପୁଲିସ ଭବନ ଏଇ କିଛି ଦିନ ହେବ ନୂଆ ରୂପ ପାଇଛି ।

ଗୋଟିଏ ପଟେ କରୋନା ମହାମାରୀର ଯାତନାରେ ମନ ଉଦାସ ହୋଇଯାଉଥିବା ବେଳେ ପୁଲିସ ଭବନ ଆଗ ଦେଇ ଯାଉଥିବା ଦେଖଣାହାରୀ କିନ୍ତୁ ଏହାର ନୂଆ ରୂପ ଦେଖି ଆଚମ୍ବିତ ହେବା ନିଶ୍ଚିତ ।

ପୁଲିସ ଭବନର ଏହି ନୂତନ ଅବତାରରେ ଅନେକ କିଛି ବଦଳିଯାଇଛି । ରାସ୍ତାପାର୍ଶ୍ୱରେ ଥିବା ଗଛ ସବୁ ସୁନ୍ଦର ଉଜ୍ଜ୍ୱଳ ରଙ୍ଗରେ ସୁସଜ୍ଜିତ ହୋଇଛି ।

କେଉଁଠି ଓଡ଼ିଶାର ବ୍ଲକ୍ ପ୍ରିଣ୍ଟ ସ୍ଥାନ ପାଇଛି ତ ଆଉ କେଉଁଠି ଆଦିବାସୀ କଳାକୃତି ପୁଣି କେଉଁଠି ମଧୁବଣି ଓ ପଟ୍ଟଚିତ୍ର ଡିଜାଇନ୍ ସ୍ଥାନ ପାଇଛି ।

ଉଜ୍ଜ୍ୱଳ ରଙ୍ଗରେ ଗଛର ଡାଳ ଓ ଗଣ୍ଡି ସଜାଯାଇଥିବା ବେଳେ ଶରତର ଆଗମନରେ ନୂଆ ପତ୍ର ସବୁ ଏହାକୁ ଭିନ୍ନ ଏକ ରୂପ ପ୍ରଦାନ କରିଛି ।

ଗଛର ସୁନ୍ଦର କଳାକୃତି ବ୍ୟତୀତ ଏହା ଆଗରେ ଏକ ସୁଉଚ୍ଚ ବୁଦ୍ଧଙ୍କ ମୂର୍ତ୍ତି ସ୍ଥାନିତ ହୋଇଛି ଓ ଏକ ବିରାଟ ଗଛ ହାତୀ ଶୋଭା ପାଉଛି ।

ଏସବୁ କଳାକୃତିରେ ଶିଳ୍ପୀର ନିଖୁଣତା ଜଣେ ନ ଦେଖିଲେ ବିଶ୍ୱାସ କରି ପାରିବନି । ଦିନବେଳା ସବୁଜ ଘାସ ଗାଲିଚା ଓ ପରିବେଶରେ ଏସବୁ ଦର୍ଶକଙ୍କୁ ଆମୋଦିତ କରୁଥିବା ବେଳେ ରାତିର ଉଜ୍ୱଳ ଆଲୁଅରେ ଏସବୁ ଆହୁରି ମନୋରମ ଲାଗୁଛି ।

ସବୁଠାରୁ ବଡ଼ କଥା ହକି ବିଶ୍ୱ କପ୍ ପରେ ଆଉ ରାଜଧାନୀରେ ସେପରି କୌଣସି ସୌନ୍ଦର୍ଯ୍ୟକରଣ କାମ ଦେଖିବାକୁ ମିଳିନଥିଲା ।

ଯାହାକି ପୁଲିସ ଭବନ ସାମ୍ନାରୁ ପୁଣିଥରେ ଆରମ୍ଭ ହୋଇଛି । ବର୍ତ୍ତମାନ ପୁଲିସ ଭବନ ଆଗରେ ଥିବା ୨୦ରୁ ଅଧିକ ଗଛକୁ ଏଭଳି ସୁନ୍ଦର କଳାକୃତିରେ ସଜାଯାଇଥିବା ବେଳେ ଆଗକୁ ଏହି ସଂଖ୍ୟା ଆହୁରି ବଢ଼ିବ ବୋଲି ଜଣାଯାଇଛି ।

ଭୁବନେଶ୍ୱର ମହାନଗର ନିଗମ ଓ ମିଶନ ଶକ୍ତିର ମିଳିତ ଉଦ୍ୟମରେ ଏବେ ରାଜଧାନୀକୁ ସୌନ୍ଦର୍ଯ୍ୟକରଣ କରିବାକୁ ଅଣ୍ଟା ଭିଡ଼ିଛନ୍ତି ବିଭିନ୍ନ ସ୍ୱୟଂସେବକ ସଙ୍ଗଠନ ।

ଏଥିପାଇଁ ରାଜ୍ୟର ବିଭିନ୍ନ ସଙ୍ଗଠନମାନଙ୍କୁ ପ୍ରାଥମିକ ପର୍ଯ୍ୟାୟରେ ଏକ ଲକ୍ଷ ଟଙ୍କା ପ୍ରଦାନ କରାଯାଇ ସେମାନଙ୍କୁ ସେମାନଙ୍କ ଆଖ ପାଖ ଅଞ୍ଚଳରେ ସୌନ୍ଦର୍ଯ୍ୟକରଣ କରିବାକୁ ଦାୟିତ୍ୱ ଦିଆଯାଇଛି ।

ଏହି ନିୟମ ଅନୁସାରେ ଏବେ ରାଜ୍ୟର ବିଭିନ୍ନ ସ୍ଥାନରେ ସ୍ୱୟଂ ସହାୟକ ଗୋଷ୍ଠୀମାନେ ସ୍ଥାନୀୟ ଚିତ୍ରଶିଳ୍ପୀଙ୍କ ସହାୟତାରେ ସୌନ୍ଦର୍ଯ୍ୟକରଣ କାମ ଆରମ୍ଭ କରୁଛନ୍ତି ।

ବିଶେଷ କରି କରୋନା ମହାମାରୀ ବେଳେ ପାରମ୍ପରିକ କଳାକୃତି ଉପରେ ନିର୍ଭର କରି ଜୀବିକା ନିର୍ଭର କରୁଥିବା କଳାକାର ଓ ଶିଳ୍ପୀମାନଙ୍କୁ ପୁଣିଥରେ ରୋଜଗାରକ୍ଷମ କରାଇବା ଉଦ୍ଦେଶ୍ଯରେ ଏଭଳି ପ୍ରୟାସ ଗ୍ରହଣ କରାଯାଇଛି ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୭(ଲୋକାଲ ୱାୟାର): ସବୁଜ ବନାନୀ ଘେରା କଳା ମଚ ମଚ ପିଚୁ ରାସ୍ତା ତୁମକୁ ଅପେକ୍ଷା କରି ରହିଛି!

ହାତ ଠାରି ଡାକୁଛି ପ୍ରକୃତି । ଆକର୍ଷିତ କରୁଛି ତା’ର ମନୋଲେଭା ଦୃଶ୍ୟ ।

ପ୍ରତି ମୁହୂର୍ତ୍ତରେ ପ୍ରତିଟି ପାଦରେ ତୁମ ପାଇଁ ରହିଛି ଅନାବୃତ୍ତ ରହସ୍ୟର ପେଡ଼ି । ତୁମେ ବି ଯାଇ ପାରିବ ଏଇ ରାସ୍ତାରେ । ତେବେ ତୁମକୁ କେବଳ ଏଥିପାଇଁ ନିଜ ମନକୁ ଓ ନିଜକୁ ପ୍ରସ୍ତୁତ କରିବାକୁ ହେବ ।

ଏନେଇ ସେପ୍ଟେମ୍ବର ୨୭ ତାରିଖ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଆରମ୍ଭ ହୋଇଛି କ୍ୟାମ୍ପେନ୍ ‘ଓଡ଼ିଶା ବାଏ ରୋଡ’ ।

କରୋନା ପରବର୍ତ୍ତୀ ସମୟରେ ଗ୍ରାମାଞ୍ଚଳ ପର୍ଯ୍ୟଟନର ପ୍ରଚାର ପ୍ରସାର କରିବା ପାଇଁ ରାଜ୍ୟ ପର୍ଯ୍ୟଟନ ବିଭାଗ ଏଭଳି ଏକ ପରିକଳ୍ପନା କରିଛି ।

ପର୍ଯ୍ୟଟନ ବିଭାଗ ପକ୍ଷରୁ ଆରମ୍ଭ କରାଯାଇଥିବା ଏହି କ୍ୟାମ୍ପେନରେ ଏବେ ଅନେକ ଲୋକ ଯୋଡ଼ି ହେଲେଣି । ନିକଟରେ ବେଲଗଡ଼ିଆ ରାଜପ୍ରାସାଦ ଏହି କ୍ୟାମ୍ପେନରେ ନିଜକୁ ସାମିଲ କରିଛି ।

ଏ ବାବଦରେ ଅକସିତା ଏମ୍ ଭଞ୍ଜଦେଓ ଆଜି ଟ୍ୱିଟ୍ କରି କହିଛନ୍ତି କଲିକତା, ଭୁବନେଶ୍ୱର, ଜାମସେଦପୁର ଆଦି ଅଞ୍ଚଳରୁ ବେଲଗଡ଼ିଆ ରାଜପ୍ରାସାଦ ସଡ଼କ ପଥରେ ମାତ୍ର ୪ ଘଣ୍ଟାର ରାସ୍ତା ।

ଦେଶର ତିନୋଟି ରାଜ୍ୟର ପର୍ଯ୍ୟଟକଙ୍କ ପାଇଁ ଏହା ଏକ ପରଫେକ୍ଟ ରୋଡ ଟ୍ରିପ୍ । ତେଣୁ ପର୍ଯ୍ୟଟକ ଏହି ରୋମାଞ୍ଚକର ରୋଡ ଟ୍ରିପ୍ ର ମଜା ନେବା ସହ ବେଲଗଡ଼ଆ ରାଜପ୍ରାସାଦର ଐତିହ୍ୟକୁ ମନଭରି ଉପଭୋଗ କରିପାରିବେ ବୋଲି ସେ ଆହ୍ୱାନ ଦେଇଛନ୍ତି ।

ସେହିପରି ନିଦେ୍ର୍ଦଶକ ନୀଳମାଧବ ପଣ୍ଡା କହିଛନ୍ତି, ଓଡ଼ିଶାରେ ଏମିତି ଅନେକ ଲୁକ୍କାୟିତ ଦର୍ଶନୀୟ ସ୍ଥାନ ଅଛି ।

ଯାହା ଆଜି ବି ଲୋକଲୋଚନକୁ ଆସିପାରିନି । ତା ଛଡ଼ା କରୋନା ପରବର୍ତ୍ତୀ ସମୟ ପାଇଁ ପର୍ଯ୍ୟଟକଙ୍କୁ ଆମନ୍ତ୍ରିତ କରିବା ପାଇଁ ଆମ ଓଡ଼ିଶା ସବୁ ପ୍ରକାର ପ୍ରସ୍ତୁତ ହୋଇ ଅଛି ।

ରାଜ୍ୟର ଅନେକ ପରିବେଶ ପର୍ଯ୍ୟଟନ ସ୍ଥଳୀରେ କରୋନା ପ୍ରତିକାରର ବ୍ୟବସ୍ଥା କରାଯିବା ସହ ଦାୟିତ୍ୱରେ ଥିବା ଅଧିକାରୀ ଓ କର୍ମଚାରୀମାନଙ୍କୁ ସବୁ ପ୍ରକାର ତାଲିମ୍ ଦିଆଯାଇ ସାରିଛି । ଏବେ ଶରତ ଋତୁର ସମୟ ଥିବା ବେଳେ ଓଡ଼ିଶାକୁ ଭିନ୍ନ ଏକ ଲେନ୍ସରେ ଦେଖିବାର ସୁଯୋଗ ଅଛି ।

ଅପରପକ୍ଷରେ ଏହି କ୍ୟାମ୍ପେନକୁ ଆଗକୁ ନେବା ପାଇଁ ପ୍ରାଥମିକ ପର୍ଯ୍ୟାୟରେ ୧୫ଟି ପର୍ଯ୍ୟଟନ ସ୍ଥଳକୁ ଚିହ୍ନଟ କରାଯାଇଛି ।

ସେଗୁଡ଼ିକ ଭିତରେ ପାହାଡ଼, ଆଦିବାସୀ ଗାଁ, ବେଳାଭୂମି, ପରିବେଶ ପର୍ଯ୍ୟଟନ ସ୍ଥଳୀ, ନେଚର କ୍ୟାମ୍ପଗୁଡ଼ିକୁ ସ୍ଥାନିତ କରାଯାଇଛି ।

ଏ ଭିତରେ ପର୍ଯ୍ୟଟକ କିପରି ସ୍ଥାନୀୟ ଖାଦ୍ୟ ଖାଇବେ, ଐତିହ୍ୟ ସ୍ଥଳୀ ସହ ରାଜବାଟୀ ବୁଲିବେ, ଦୁଃସାହସିକ ଓ ରୋମାଞ୍ଚକର ଯାତ୍ରାର ଅନୁଭୂତି ସାଉଁଟିବେ, ପାରମ୍ପରିକ ସମୃଦ୍ଧ ପରମ୍ପରା, କଳା, କାରିଗରୀ, ବନ୍ୟଜନ୍ତୁ, ପରିବେଶ ପର୍ଯ୍ୟଟନ ସ୍ଥଳୀର ମଜା ନେଇ ପାରିବେ ସେଥିପାଇଁ ବ୍ୟବସ୍ଥା କରାଯାଇଛି ।

କରୋନା ଯୋଗୁଁ ଏବେ ଲୋକେ ସାମାଜିକ ଦୂରତାକୁ ଗୁରୁତ୍ୱ ଦେଉଛନ୍ତି । ଏଭଳି ସମୟରେ ସେମାନେ ବିମାନଯାତ୍ରା ବା ଟ୍ରେନରେ ଯାତ୍ରା କରିବାରେ ଆଗ୍ରହ ଦେଖାଉନାହାନ୍ତି ।

ତେଣୁ ସଡ଼କ ପଥରେ ଯାତ୍ରା କରି ନୂଆ ନୂଆ ସ୍ଥାନକୁ ଆବିଷ୍କାର କରିବା ପାଇଁ ସରକାର ପ୍ରୋତ୍ସାହିତ କରୁଛନ୍ତି ।

ଏ ବାବଦରେ ପର୍ଯ୍ୟଟନ ବିଭାଗ ସଚିବ ବିଶାଲ କୁମାର ଦେବ କହିଛନ୍ତି, ବେଳାଭୂମି ରାସ୍ତା ଦେଇ ଯିବାକୁ ବେଶୀ ପର୍ଯ୍ୟଟକ ଆଗ୍ରହ ଦେଖାଇଥାନ୍ତି ।

ତେଣୁ ଆମେ କୋଷ୍ଟାଲ୍ ରିଜନରେ ଜାତୀୟ ରାଜପଥ ୧୬କୁ ପ୍ରମୋଟ କରିବାକୁ ଚିନ୍ତା କରିଛୁ ।

ଏହାଛଡ଼ା ଜାତୀୟ ରାଜପଥ ୫୫ ଦ୍ୱାରା ଜଣେ ହୀରାକୁଦ, ଦେବରିଗଡ, ସାତକୋଶିଆ, ମହାନଦୀ ଗଣ୍ଡ, ଦାରିଙ୍ଗବାଡ଼ି, ବେଲଘର ଓ ମଣ୍ଡାଶୂର ଆଦି ଅଞ୍ଚଳକୁ ସହଜରେ ଯାତ୍ରା କରିପାରିବ ।

ଏହାଛଡ଼ା ନାଗପୁର, ମହାରାଷ୍ଟ୍ର, ରାୟପୁର ଓ ଛତିଶଗଡ଼ର ଦୁର୍ଗ ଆଦି ଅଞ୍ଚଳକୁ ମଧ୍ୟ ସହଜରେ ଜାତୀୟ ରାଜପଥ ସହ ଯୋଗାଯୋଗ କରାଯାଇପାରିବ ।

ଏ ବାବଦରେ ପର୍ଯ୍ୟଟନ ବିଭାଗ ନିଦେ୍ର୍ଦଶକ ସଚିନ୍ ରାମଚନ୍ଦ୍ର ଯାଦବ କହିଛନ୍ତି, ଅବିଭକ୍ତ କୋରାପୁଟ ଜିଲ୍ଲାର ପ୍ରାକୃତିକ ଶୋଭାରାଜି ସବୁବେଳେ ପର୍ଯ୍ୟଟକଙ୍କୁ ଆକୃଷ୍ଟ କରିଥାଏ ।

ଅରକୁ ଉପତ୍ୟକା ଦେଇ ଜଣେ ବିଶାଖାପାଟଣା ବାଟରେ କୋରାପୁଟରେ ପ୍ରବେଶ କରିପାରିବ । ଗଞ୍ଜାମ ବାଟ ଦେଇ ସଡ଼କ ପଥରେ କୋରାପୁଟ ଯିବାର ସୁବିଧା ବି ରହିଛି ।

ନୟାଗଡ଼ରୁ ବୌଦ୍ଧ ଓ କେନ୍ଦୁଝରରୁ ଭାୟା ଖିଚିଂ ଦେଇ ମୟୂରଭଞ୍ଜ ପର୍ଯ୍ୟନ୍ତ ରାସ୍ତା ବି ଖୁବ୍ ଆକର୍ଷଣୀୟ । ଓଡ଼ିଶା ପ୍ରାକୃତିକ ଶୋଭାରାଜିରେ ଭରପୂର ଥିବା ବେଳେ ଓଡ଼ିଶା ବାଏ ରୋଡ ଅଭିଯାନ ସାଧାରଣରେ ଗ୍ରହଣୀୟ ହେବ ବୋଲି ଆଶା ।

ବିଭାଗୀୟ ନିଦେ୍ର୍ଦଶକ ଶ୍ରୀ ଯାଦବ ଆହୁରି କହିଛନ୍ତି ଯେ, ଏନେଇ ଆମେ ଏକ ରେଜିଷ୍ଟ୍ରେସନ୍ ପୋର୍ଟାଲ୍ ଖୋଲିଛୁ । ଯାହାଦ୍ୱାରା ଜଣେ ପର୍ଯ୍ୟଟକ ନିଜର ନାମ ପଂଜିକରଣ କରି ଓଡ଼ିଶା ଆସିପାରିବ ।

ଏହାଦ୍ୱାରା ଆମେ ଜଣକୁ କେଉଁରାସ୍ତାରେ ବୁଲିପାରିବ, କେଉଁଠି ରହିବ, କେଉଁଠି ଖାଇବ ଓ ଓଡ଼ିଶାରୁ କ’ଣ କିଣିପାରିବ ସବୁ ବ୍ୟବସ୍ଥା କରିଦେବୁ ।

ଏଥିପାଇଁ ବିଭିନ୍ନ ହୋଟେଲ୍ ଚେନ୍, ହସ୍ତତନ୍ତ ଓ ହସ୍ତଶିଳ୍ପ ଷ୍ଟୋର ଆଦି ସହ ଯୋଗାଯୋଗ କରିଛୁ । ଜଣେ ରେଜିଷ୍ଟର ଥିବା ପର୍ଯ୍ୟଟକ ଏହା ସହାୟତାରେ ଓଡ଼ିଶା ପର୍ଯ୍ୟଟନ ବିଭାଗ ଦ୍ୱାରା ଦିଆଯାଉଥିବା ସମସ୍ତ ରିହାତି ପାଇ ପାରିବ ।

ଅକ୍ଟୋବର ୧ରୁ ଓଡ଼ିଶାର ୧୦ଟି ପରିବେଶ ପର୍ଯ୍ୟଟନ ସ୍ଥଳ ପର୍ଯ୍ୟଟକଙ୍କ ପାଇଁ ଖୋଲା ସରିଛି ।

ସେଗୁଡ଼ିକ ମଧ୍ୟରେ ବାହାମୁଣ୍ଡା, ଚଟକେଇ, ଡଙ୍ଗାମାଳ, ଦାରିଙ୍ଗବାଡ଼ି, ଦେବ୍ରିଗଡ଼, ଡେରାସ, ମଣ୍ଡାଶୂର, ମଙ୍ଗଳାଯୋଡ଼ି, ତରଭା ଓ ସାତକୋଶିଆ ସ୍ୟାଣ୍ଡ ରିସୋର୍ଟ ଆଦି ରହିଛି ।

ଲୋକାଲ ୱାୟାର