ବାଲେଶ୍ୱର, ଜୁନ ୧୪ (ଲୋକାଲ ୱାୟାର): କରୋନାର କରୁଣ କାହାଣୀ । ବାପା, ମାଙ୍କର କରୋନାରେ ମୃତ୍ୟୁ ପରେ ସାତ ବର୍ଷର ଝିଅ ଦେଢ ମାସର ଶିଶୁର ଯତ୍ନ ନେଉଛି । ଝିଅଟିର ନାଁ କ୍ରିଷନ କୁମାର ପଣ୍ଡା ।
କ୍ରିଷନଙ୍କ ବାପା କମଳେଶ ପଣ୍ଡା (୩୬ ବର୍ଷ) ପୂର୍ବତଟ ରେଳବାଇର ସୁରକ୍ଷା ବିଭାଗରେ ଭୁବନେଶ୍ୱରରେ କାର୍ଯ୍ୟରତ ଥିଲେ ।
ଆଉ ମା ସ୍ମିତା ପଣ୍ଡା (୨୮ ବର୍ଷ) ଆଚାର୍ଯ୍ୟ ହରିହର କର୍କଟ ପ୍ରତିଷ୍ଠାନ, କଟକରେ ଷ୍ଟାଫ ନର୍ସ ଭାବେ କାମ କରୁଥିଲେ ।
ଏପ୍ରିଲ ୯ରେ ସ୍ମିତା କୋଭିଡ ପଜିଟିଭ ଚିହ୍ନଟ ହେବା ପରେ ଏକ ବେସରକାରୀ ଡାକ୍ତରଖାନାରେ ତାଙ୍କର ଚିକିତ୍ସା ଚାଲିଥିଲା ।
ସେତେବେଳେ ସେ ଗର୍ଭବତୀ ଥିଲେ । ତାଙ୍କ ଅବସ୍ଥା ଦେଖି ଡାକ୍ତର ପ୍ରସବ କରାଇବାକୁ ପରାମର୍ଶ ଦେଇଥିଲେ ।
ପିଲାଟିକୁ ଜନ୍ମ ଦେବାର ସାତ ଦିନ ପରେ ସ୍ମିତାଙ୍କର ମୃତୁ୍ୟ ହୋଇଥିଲା । କମଳେଶ ନିଜ ଜନ୍ମ ସ୍ଥାନ ନିମତପୁର ଫେରି ଜଳେଶ୍ୱର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ କୋଭିଡ ପରୀକ୍ଷଣ କରାଇଥିଲେ । ତାଙ୍କର ରିପୋର୍ଟ ନେଗେଟିଭ ଆସିଥିଲା ।
ତଥାପି ସ୍ତ୍ରୀଙ୍କ ସଂସ୍ପର୍ଶରେ ଆସିିଥିବାରୁ କମଲେଶ ଗୃହ ସଙ୍ଗରୋଧରେ ରହିଥିଲେ । ପିଲାମାନଙ୍କୁ ଭାଇଭାଉଜଙ୍କ ପାଖରେ ଛାଡି କମଳେଶ ଏକା ଭୁବନେଶ୍ୱର ଫେରି ଯାଇଥିଲେ ।
ପୁଣି କମଳେଶଙ୍କ କୋଭିଡ ଲକ୍ଷଣ ଦେଖାଯିବାରୁ ସେ କୋଭିଡ ପରୀକ୍ଷା କରାଇଥିଲେ ।
ରିପୋର୍ଟ ପଜିଟିଭ ଆସିବାରୁ ସେ ରେଳବାଇ କୋଭିଡ ଡାକ୍ତରଖାନାରେ ଚିକିତ୍ସା ପାଇଁ ଭର୍ତି ହୋଇଥିଲେ ।
ତେବେ କମଳେଶଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଏକ ବେସରକାରୀ ଡାକ୍ତରଖାନାରେ ଭର୍ତି କରାଯାଇଥିଲା ।
ହେଲେ ସେଠାରେ ଆଇସିୟୁରେ ୧୫ ଦିନ ଚିକିତ୍ସିତ ହେବା ପରେ ତାଙ୍କର ମୃତ୍ୟୁ ହୋଇଥିଲା । ଏବେ ପିଲା ଦୁଇଟି ମୋ ପାଖରେ ଅଛନ୍ତି ।
ମୁଁ ନିଜ ପିଲାଙ୍କ ଭଳି ସେମାନଙ୍କ ଯତ୍ନ ନେଉଛି । ଯଦି ରାଜ୍ୟ ସରକାର ଅନାଥ ଶିଶୁମାନଙ୍କ ପାଇଁ କିଛି ସହାୟତା ଯୋଗାଇ ଦିଅନ୍ତେ ତେବେ ଭଲ ହୁଅନ୍ତା ବୋଲି କହିଛନ୍ତି ଦିନ ମଜୁରିଆ ଭାବେ କାମ କରୁଥିବା କମଲେଶଙ୍କ ବଡ ଭାଇ ଦେବାଶିଷ ।
ଲୋକାଲ ୱାୟାର
