ଖେଳ

ଅନୁଗୁଳ, ଫେବ୍ରୁଆରୀ ୧୮ (ଲୋକାଲ ୱାୟାର): ଇଣ୍ଟରନ୍ୟାସନାଲ କିକ୍ ବକ୍ସିଂରେ ଭାରତ ପାଇଁ ସ୍ଵର୍ଣ୍ଣ ପଦକ ଆଣି ଫେରିଛନ୍ତି ଅନୁଗୁଳ ଜିଲ୍ଲା ଛେଣ୍ଡିପଦା ବ୍ଲକ ଅଂଚଳର ଦେଲିଶା ବିଶ୍ଵାଳ।

ଗତ ୯ରୁ ୧୩ ତାରିଖ ପର୍ଯ୍ୟନ୍ତ ନୂଆଦିଲ୍ଲୀର ତାଲକଟୋରା ଷ୍ଟାଡିୟମଠାରେ ଅନୁଷ୍ଠିତ ଏହି ଚାମ୍ପିୟୟାନସିପରେ ଦେଲିଶା ବିଶ୍ଵାଳ ୩୨ କେଜି ପଏଣ୍ଟ ଫାଇଟ୍ ବିଭାଗରେ ତାଙ୍କ ପ୍ରତିଦ୍ଵନ୍ଦ୍ବୀ ସୃଷ୍ଟି ମିଶ୍ରଙ୍କୁ ୧୭.୮ ପଏଣ୍ଟରେ ହରାଇ ସ୍ଵର୍ଣ୍ଣ ପଦକ ହାସଲ କରିଥିଲେ।

ଛେଣ୍ଡିପଦା ବ୍ଲକ୍ ବାରମଞ୍ଚା ଗାଁର ଦୀପକ ବିଶ୍ଵାଳ ଓ ଇନ୍ଦ୍ରାଣୀ ବିଶ୍ଵାଳଙ୍କ ଝିଅ ଦେଲିଶା ଏବେ ତାଙ୍କ ବାପାମାଙ୍କ ସହ ହରିଆନାର ଫରିଦାବାଦରେ ରହି ଚତୁର୍ଥ ଶ୍ରେଣୀରେ ପାଠ ପଢୁଛନ୍ତି ।

ତାଙ୍କର ଏହି ସଫଳତା ଲାଗି ସେ ଟ୍ରେନର୍ ଯୋଗେନ୍ଦ୍ର ସିଂ ଓ ବାପାମାଙ୍କୁ ଶ୍ରେୟ ଦେଇଛନ୍ତି ।

ଏହି ଚାମ୍ପିୟନସିପରେ ଭାରତ ସମେତ କାଜାକାସ୍ତାନ, ଜୋଡାନ, ୟୁକ୍ରେନ, ଇରାନ ଓ ନେପାଳର ହଜାରେରୁ ଅଧିକ ପ୍ରତିଯୋଗୀ ଭାଗ ନେଇଥିଲେ ।

ଲୋକାଲ୍ ଓ୍ବାୟାର୍

ଭୁବନେଶ୍ୱର, ଫେବ୍ରୁଆରୀ ୧୬(ଲୋକାଲ ୱାୟାର): ଭାରତୀୟ ମହିଳା ହକି ଟିମର ନ୍ୟାସନାଲ କ୍ୟାମ୍ପକୁ ଓଡ଼ିଶାର ୩ ଜଣ ଖେଳାଳି ଚୟନ ହୋଇଥିବା ହକି ଇଣ୍ଡିଆ ପକ୍ଷରୁ ଶନିବାର ସୂଚନା ଦିଆଯାଇଛି ।

ବେଙ୍ଗାଲୁରୁ ସ୍ପେର୍ଟ୍ସ ଅଥରିଟି ଅଫ ଇଣ୍ଡିଆ କ୍ୟାମ୍ପସ ପରିସରରେ ହେଉଥିବା ଟ୍ରେନିଂ କ୍ୟାମ୍ପ ପାଇଁ ୨୫ ଜଣିଆ ଏହି ଟିମରେ ସାମିଲ ହେବେ ଓଡ଼ିଶାର ଦୀପଗ୍ରେସ୍ ଏକ୍କା, ଲିଲିମା ମିଞ୍ଜ୍ ଏବଂ ନମିତା ଟପ୍ପୋ ।

ଉଲ୍ଳେଖଯୋଗ୍ୟ, ମହିଳା ହକି ଟିମ୍ ଆସନ୍ତା ଜୁନ୍ ମାସରେ ଏସିଆନ ଚାମ୍ପିୟନ୍ସ ଟ୍ରଫି ଏବଂ ଜୁଲାଇ-ଅଗଷ୍ଟରେ ଅଲିମ୍ପିକ୍ସ ଖେଳିବାର କାର୍ଯ୍ୟକ୍ରମ ରହିଛି ।

ଲୋକାଲ ୱାୟାର

ଭୁବନେଶ୍ବର, ଫେବ୍ରୁଆରି ୧୩ (ଲୋକାଲ ୱାୟାର): ସାଉଥ୍-କୋ ଦଳକୁ ହରାଇ ଓଡ଼ିଶା ପାଓ୍ବାର୍ ଥର୍ମାଲ୍ କର୍ପୋରେସନ୍ ଲିମିଟେଡ୍ (ଓପିଟିସିଏଲ୍) ଗୁରୁବାର ପଞ୍ଚାଦଶ ପାଓ୍ବାର୍ କପ୍ କ୍ରିକେଟ୍ ଟୁର୍ଣ୍ଣାମେଣ୍ଟ ଚାମ୍ପିୟନ୍ ହୋଇଛି।

ଆଜି ଖେଳାଯାଇଥିବା ଫାଇନାଲ୍ ମ୍ୟାଚରେ ଓପିଟିସିଏଲ୍ ୨୫ ରନରେ ସାଉଥ୍-କୋକୁ ପରାସ୍ତ କରିଥିଲା।

ଶକ୍ତି ବିଭାଗ ପ୍ରମୁଖ ସଚିବ ବିଷ୍ଣୁପଦ ସେଠୀ ଏଥିରେ ସାମିଲ ହୋଇ ଓପିଟିସିଏଲକୁ ପୁରସ୍କୃତ କରିଛନ୍ତି ।

ପୁରସ୍କାର ବାବଦରେ ଚାମ୍ପିୟନ୍ ଦଳକୁ ୧୫୦୦୦ ଟଙ୍କାର ଅର୍ଥ ରାଶି ପ୍ରଦାନ କରାଯାଇଥିଲା।

କ୍ରିକେଟ ଟିମ ଭଳି ସମସ୍ତ ବୈଦ୍ୟୁତିକ ବିଭାଗ ଏକାଠି କାମ କରିବା ଆବଶ୍ୟକ ବୋଲି ଏହି ଅବସରରେ ସେ କହିଛନ୍ତି ।

ଲୋକାଲ ୱାୟାର୍

ଭୁବନେଶ୍ବର, ଫେବ୍ରୁଆରି ୬ (ଲୋକାଲ ୱାୟାର): ବିବିସି ହିନ୍ଦୀ ଇଣ୍ଡିଆନ ସ୍ପୋର୍ଟସ ୱିମେନ ଅଫ ଦି ୟିଅର ବାଛିବା ପାଇଁ ଏକ ଅନଲାଇନ ପୋଲିଂ ଆରମ୍ଭ କରିଥିବା ବେଳେ ଖେଳାଳି ମାନଙ୍କ ମଧ୍ୟରେ ଓଡିଆ ସ୍ପ୍ରିଣ୍ଟର ଦୂତି ଚାନ୍ଦ ସ୍ଥାନ ପାଇଛନ୍ତି ।

ଏଥିରେ ମନୋନୀତ ଖେଳାଳିମାନଙ୍କ ବିଷୟରେ ସମସ୍ତ ତଥ୍ୟ ରହିଥିବାବେଳେ ଭାଗନେଉଥିବା ପାଠକଙ୍କୁ ସେମାନଙ୍କ ସବୁଠାରୁ ବେଶି ଲୋକପ୍ରିୟ ଖେଳାଳିଙ୍କୁ ଭୋଟ ଦେବା ପାଇଁ ଅପିଲ କରାଯାଇଛି ।

ଲୋକଙ୍କ ବହୁଳ ଭୋଟ ଦ୍ଵାରା ବିଜୟୀ ଖେଳାଳିଙ୍କୁ ବିବିସି ପକ୍ଷରୁ ପୁରସ୍କୃତ କରାଯିବ ବୋଲି କୁହା ଯାଇଛି ।

ଏହି ଖେଳାଳିଙ୍କ ତାଲିକାରେ ଅନ୍ୟମାନଙ୍କ ମଧ୍ୟରେ ବକ୍ସର ମ୍ୟାରିକମ, ରେସଲର ବିନେଶ ଫୋଗଟ, ବ୍ୟାଟମିଣ୍ଟନ ଖେଳାଳି ମାନସି ଯୋଶୀ ଓ ପିଭି ସିନ୍ଧୁଙ୍କ ନାଁ ରହିଛି ।

ଆସନ୍ତା ୧୭ ତାରିଖରୁ ଭୋଟିଂ ଆରମ୍ଭ ହେଉଥିବାବେଳେ ଲୋକଙ୍କ ଦ୍ଵାରା ମନୋନୀତ ଖେଳାଳିଙ୍କୁ ମାର୍ଚ୍ଚ ୮ ତାରିଖ ଦିନ ପୁରସ୍କୃତ କରାଯିବ ।

ଯାଜପୁର ଜିଲ୍ଲା ଚକଗୋପାଳପୁରର ଦୂତି ଚାନ୍ଦ ବହୁ ଜାତୀୟ ଏବଂ ଅନ୍ତର୍ଜାତୀୟ କ୍ରୀଡ଼ାରେ ସଫଳ ହୋଇ ଓଡ଼ିଶାର ଗୌରବ ବଢ଼ାଇଛନ୍ତି ।

ବର୍ତ୍ତମାନ ସେ ଆଗାମୀ ଟୋକିଓ ଅଲିମ୍ପିକ୍ ପାଇଁ ଜୋରଦାର ପ୍ରସ୍ତୁତି ଚଲାଇଥିବା ଜଣାପଡିଛି ।

ଉଲ୍ଲେଖଯୋଗ୍ୟ, ଗତ ନଭେମ୍ବରରେ ଆମେରିକାରୁ ପ୍ରକାଶ ପାଉଥିବା ଟାଇମ୍ ନେକ୍ସଟ୍-୧୦୦ (ଆଗାମୀ ୧୦୦) ପ୍ରଭାବଶାଳୀ ବ୍ୟକ୍ତିଙ୍କ ତାଲିକାରେ, ଅର୍ଥାତ୍ ବିଭିନ୍ନ କ୍ଷେତ୍ରରେ ବିଶ୍ବର ଶହେ ଜଣ ଉଦୀୟମାନ ତାରକାଙ୍କ ତାଲିକାରେ ସେ ସ୍ଥାନ ପାଇଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୪(ଲୋକାଲ ୱାୟାର): ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଆସନ୍ତା ୮ ଓ ୯ ତାରିଖରେ ହେବାକୁ ଥିବା ବେଲଜିୟମ ବିପକ୍ଷ ହକି ମୁକାବିଲା ପାଇଁ ଭାରତୀୟ ଟିମରେ ଓଡ଼ିଶାର ବୀରେନ୍ଦ୍ର ଲାକ୍ରା ଓ ଅମିତ ରୋହିଦାସ ସ୍ଥାନ ପାଇଥିବା ହକି ଇଣ୍ଡିଆ ପକ୍ଷରୁ ସୂଚନା ଦିଆଯାଇଛି ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ୱିଟର ଜରିଆରେ ଉଭୟ ଖେଳାଳିଙ୍କୁ ଅଭିନନ୍ଦନ ଜଣାଇଛନ୍ତି ।

ଏଫଆଇଏଚ୍ ପ୍ରୋ ଲିଗ୍ ଦ୍ୱିତୀୟ ସଂସ୍କରଣରେ ହେବାକୁ ଥିବା ଏହି ମ୍ୟାଚ ପାଇଁ ୨୪ ଜଣିଆ ଭାରତୀୟ ଦଳ ଘୋଷଣା କରାଯାଇଛି ।

ଉଲ୍ଲେଖଯୋଗ୍ୟ, ପୂର୍ବରୁ ନେଦରଲାଣ୍ଡସ ବିପକ୍ଷରେ ଭାରତ ଏହି ଷ୍ଟାଡିୟମରେ ୨ଟି ଯାକ ମ୍ୟାଚ୍ ଜିତି ସାରିଛି ।

ବେଲଜିୟମ ଖେଳାଳି ଆସନ୍ତା ୫ ତାରିଖରେ ଭୁବନେଶ୍ୱରରେ ପହଞ୍ଚିବେ ବୋଲି ହକି ଇଣ୍ଡିଆ ପକ୍ଷରୁ ସୂଚନା ଦିଆଯାଇଛି ।

ଲୋକାଲ ୱାୟାର