ପରିବେଶ

ଭୁବନେଶ୍ୱର, ଜୁନ୍ ୨୮(ଲୋକାଲ ୱାୟାର): ରାଜ୍ୟ ବିଧାନସଭାରେ ଶୁକ୍ରବାର ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ୨୦୧୯-୨୦ ଆର୍ଥିକ ବର୍ଷ ପାଇଁ ଆଗତ କରିଥିବା ୧.୩୯ ଲକ୍ଷ କୋଟି ଟଙ୍କାର ପୂର୍ଣ୍ଣାଙ୍ଗ ବଜେଟରେ ଅଭିବୃଦ୍ଧି ଲକ୍ଷ୍ୟ ୮ରୁ ୮.୫% ଥିବା ଜଣାପଡ଼ିଛି ।

ବଜେଟ୍ ପ୍ରସ୍ତାବ ଅନୁସାରେ ଏ ବର୍ଷ ମୋଟ ରାଜସ୍ୱ ଆୟ ୧ ଲକ୍ଷ ୧୫ ହଜାର କୋଟି ଟଙ୍କା ହେବ ।

ଏଥିରେ ବ୍ୟୟ ବରାଦ ଅଛି ୧ ଲକ୍ଷ ୩୯ ହଜାର କୋଟି ଟଙ୍କା । ରାଜ୍ୟର ନିଜସ୍ୱ ଟିକସ ଆୟ ପ୍ରାୟ ୧୨.୦୨ % ହାରରେ ବୃଦ୍ଧି ହେବ ବୋଲି ଆଶା ରଖାଯାଇଛି ।

ମୋଟ ନିଜସ୍ୱ ଆୟ ୩୮,୮୫୦ରୁ ବଢ଼ି ୪୫,୫୦୦ ହଜାର କୋଟି ଟଙ୍କା ହେବ ।

ଅଣ ଟିକସ ଆୟ ୧୧ % ଅର୍ଥାତ୍ ୧୧ ହଜାର ୨୫୦ କୋଟିରୁ ବୃଦ୍ଧି ପାଇ ୧୨ ହଜାର ୫୦୦ କୋଟି ଟଙ୍କା ହେବ ।

ଯୋଜନା ବ୍ୟୟ ବରାଦ ପ୍ରାୟ ୧୩ % ଅର୍ଥାତ୍ ୬୨ ହଜାର କୋଟି ଟଙ୍କାରୁ ବଢ଼ି ୭୦ ହଜାର କୋଟି ଟଙ୍କା ହେବ ।

ଆୟ ୧୩ % ବୃଦ୍ଧି ଏବଂ ବ୍ୟୟ ୧୬ % ବୃଦ୍ଧି ହେବ । ସରକାର ୨୩ ହଜାର ୫୮୪ କୋଟି ଟଙ୍କା ଋଣ କରିବେ ।

ବର୍ଷ ଶେଷ ବେଳକୁ ମୋଟ ଋଣ ବୋଝ ୧ ଲକ୍ଷ ୬ ହଜାର କୋଟିକୁ ଟପିଯିବ ବୋଲି ହିସାବ କହୁଛି ।

ରାଜ୍ୟ ଯୋଜନା ପ୍ରାୟ ୩୧% ବୃଦ୍ଧି ହେବ । ଗତବର୍ଷ ୩୨ ହଜାର କୋଟି ଥିବା ବେଳେ ଏବର୍ଷ ୪୨ ହଜାର କୋଟି ଟଙ୍କାର ପ୍ରସ୍ତାବ ରହିଛି ।

ପ୍ରଶାସନିକ ଖର୍ଚ୍ଚ ଅଟକଳ ୫୦ ହଜାର ୭୬୧ କୋଟିରୁ ବଢ଼ି ୫୭ ହଜାର ୩୧୦ କୋଟି ଟଙ୍କା ଛୁଇଁବ ।

ଏଥିରୁ ଋଣ ପରିଶୋଧ ବାବଦରେ ଖର୍ଚ୍ଚ ହେବ ୬,୫୦୦ କୋଟି ଟଙ୍କା ।
ଲୋକାଲ ୱାୟାର

ଭୁବନେଶ୍ୱର, ଜୁନ୍ ୨୮(ଲୋକାଲ ୱାୟାର): ବିଧାନସଭାରେ ଶୁକ୍ରବାର ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ବଜେଟ ଆଗତ କରିଛନ୍ତି ।

ବଜେଟ ପ୍ରସ୍ତାବ ଅନୁଯାୟୀ ବିଭିନ୍ନ ବିଭାଗ ପାଇଁ ୨୦୧୯-୨୦ ଆର୍ଥିକ ବର୍ଷ ସକାଶେ ଥିବା ଅର୍ଥ ବ୍ୟବସ୍ଥାର ତାଲିକା:

କୃଷି ଓ କୃଷକ ସଶକ୍ତୀକରଣ ବିଭାଗ ପାଇଁ ୭,୮୬୩.୦୫ କୋଟି ଟଙ୍କା, ସାମାଜିକ ନିରାପତ୍ତା ଓ ଦିବ୍ୟାଙ୍ଗ ସଶକ୍ତୀକରଣ ବିଭାଗ ପାଇଁ ୩,୧୦୪.୪୫ କୋଟି, ବିପର୍ଯ୍ୟୟ ପରିଚାଳନା ପାଇଁ ୧୦୩.୬ କୋଟି, ସମବାୟ ବିଭାଗ ପାଇଁ ୧୨୭୩.୨୦ କୋଟି, ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପାଇଁ ୧୦୫୭.୮୯ କୋଟି, ଉଚ୍ଚଶିକ୍ଷା ବିଭାଗ ପାଇଁ ୧୦୬୨.୯୩ କୋଟି, ଗୃହ ନିର୍ମାଣ ଓ ସହରାଞ୍ଚଳ ବିକାଶ ବିଭାଗ ପାଇଁ ୩,୦୪୧.୯୭ କୋଟି, ଶିଳ୍ପ ବିଭାଗ ପାଇଁ ୨୩୨.୧୭ କୋଟି ଟଙ୍କା, ପଞ୍ଚାୟତିରାଜ ଓ ପାନୀୟ ଜଳ ବିଭାଗ ପାଇଁ ୧୩,୪୪୧.୧୭ କୋଟି, ଯୋଜନା ଓ ସମନ୍ୱୟ ବିଭାଗ ପାଇଁ ୧୦୪୨.୧୮ କୋଟି, ଗ୍ରାମୀଣ ବିକାଶ ବିଭାଗ ପାଇଁ ୪୨୬୦.୩୦ କୋଟି ଟଙ୍କା ରଖାଯାଇଛି ।

ସେହିପରି ବିଦ୍ୟାଳୟ ଓ ଗଣଶିକ୍ଷା ବିଭାଗ ପାଇଁ ୬୧୧୯.୧୭ କୋଟି ଟଙ୍କା ରଖାଯାଇଥିବା ବେଳେ ଜଳସମ୍ପଦ ବିଭାଗ ପାଇଁ ୮୪୪୬.୮୨ କୋଟି, ମହିଳା ଓ ଶିଶୁ ବିକାଶ ବିଭାଗ ପାଇଁ ୩୪୩୩.୬୬ କୋଟି, ଏସସି/ଏସଟି, ସଂଖ୍ୟାଲଘୁ ଓ ପଛୁଆ ବର୍ଗ ବିକାଶ ବିଭାଗ ପାଇଁ ୨୮୭୧.୧୮ କୋଟି, ପୂର୍ତ୍ତ ବିଭାଗ ପାଇଁ ୨୪୯୭.୩୦ କୋଟି, ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପାଇଁ ୪୩୮୭.୭୬ କୋଟି, ଶକ୍ତି ବିଭାଗ ପାଇଁ ୨୨୨୦.୪୧ କୋଟି, ଗୃହ ବିଭାଗ ପାଇଁ ୭୬୭.୬୪ କୋଟି, ଦକ୍ଷତା ବିକାଶ ଓ ତାଲିମ ବିଭାଗ ପାଇଁ ୩୯୪.୪୯ କୋଟି, ପରିବହନ ବିଭାଗ ପାଇଁ ୫୩୦.୩୭ କୋଟି, ଜଙ୍ଗଲ ଓ ପରିବେଶ ବିଭାଗ ପାଇଁ ୪୧୬.୫୭ କୋଟି, କ୍ରୀଡ଼ା ଓ ଯୁବସେବା ବିଭାଗ ପାଇଁ ୨୩୧ କୋଟି ଏବଂ ମତ୍ସ୍ୟ ଓ ପଶୁସମ୍ପଦ ବିକାଶ ବିଭାଗ ପାଇଁ ୪୫୧.୫୨ କୋଟି ଟଙ୍କାର ବ୍ୟବସ୍ଥା ରହିଥିବା ଜଣାପଡ଼ିଛି ।

ଲୋକାଲ ୱାୟାର

ନୂଆଦିଲ୍ଲୀ, ଜୁନ ୨୬(ଲୋକାଲ ୱାୟାର): କେନ୍ଦ୍ର ପେଟ୍ରୋଲିୟମ ଓ ଇସ୍ପାତ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ହସ୍ତକ୍ଷେପ ପରେ ସାଉଦି ଆରବରେ ଫସିରହିଥିବା ସମସ୍ତ ୧୦ ଜଣ ଓଡିଆ ଶ୍ରମିକ ବୈଦେଶିକ ମନ୍ତ୍ରାଳୟ ସହଯୋଗରେ ସୁରକ୍ଷିତ ଭାବେ ଉଦ୍ଧାର ହୋଇ ବୁଧବାର ଦିଲ୍ଲୀ ଫେରିଛନ୍ତି ।

ନୂଆଦିଲ୍ଲୀ ସ୍ଥିତ ସରକାରୀ ବାସଭବନରେ ସମସ୍ତ ଓଡିଆ ଶ୍ରମିକଙ୍କୁ ଶ୍ରୀ ପ୍ରଧାନ ସ୍ୱାଗତ କରିବା ସହ ଉଦ୍ଧାର କାର୍ଯ୍ୟ ପାଇଁ କେନ୍ଦ୍ର ବୈଦେଶିକ ବ୍ୟପାର ମନ୍ତ୍ରୀ ଶୁଭ୍ରମଣ୍ୟମ ଜୟଶଙ୍କର ଏବଂ ଦୁବାଇ ସ୍ଥିତ ଭାରତୀୟ ଦୂତବାସକୁ ଧନ୍ୟବାଦ ଜଣାଇଛନ୍ତି ।

ଏ ସମ୍ପର୍କିତ ପ୍ରଶ୍ନରେ ଶ୍ରୀ ପ୍ରଧାନ ଗଣମାଧ୍ୟମକୁ କହିଛନ୍ତି ଯେ ଓଡ଼ିଶାର ଖୋର୍ଦ୍ଧା, ନୟାଗଡ଼ ଓ ଗଞ୍ଜାମ ଜିଲ୍ଲାର ୧୦ ଜଣ ଓଡ଼ିଆ ଶ୍ରମିକଙ୍କୁ ଦୁବାଇର ଶାରଜାହାଁରେ ରଡ ବାନ୍ଧିବା କାମରେ ଲଗାଯାଇଥିଲା ।

ଅଧିକ ରୋଜଗାର କରିବା ଆଶାରେ ସେମାନେ ଦୁବାଇକୁ ଯାଇଥିଲେ ସେମାନଙ୍କୁ ସେଠାରେ ନିର୍ଯାତନା ଦିଆଯାଉଥିବା ଗଣମାଧ୍ୟମରୁ ସୂଚନା ମିଳିବା ପରେ ଏ ସମ୍ପର୍କରେ ସେ ନବନିଯୁକ୍ତ ବୈଦେଶିକ ମନ୍ତ୍ରୀ ଏସ.ଜୟଶଙ୍କରଙ୍କୁ ପତ୍ର ଲେଖିଥିଲେ ।

ଶ୍ରୀ ଜୟଶଙ୍କର ଖୋଦ୍ ଏହାକୁ ତଦାରଖ କରୁଥିଲେ ବୋଲି ଶ୍ରୀ ପ୍ରଧାନ କହିଛନ୍ତି ।

ଶ୍ରୀ ପ୍ରଧାନ କହିଛନ୍ତି ଯେ ଭାରତୀୟମାନେ ବିଭିନ୍ନ ମଧ୍ୟସ୍ଥି ମାନଙ୍କ ନେତୃତ୍ୱରେ କିମ୍ବା ଦଲାଲ ମାନଙ୍କ ହାବୁଡ଼ରେ ପଡ଼ି ବିଦେଶରେ ଫସି ରହି ଅସୁବିଧାରେ ପଡୁଛନ୍ତି ।

ଭାରତୀୟ ଦୂତବାସ ଗୁଡ଼ିକ ବଡ଼ ସକ୍ରିୟତା ସହକାରେ ସେମାନଙ୍କୁ ଉଦ୍ଧାର କରୁଛନ୍ତି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ବିଗତ ୫ ବର୍ଷ ହେବ ଏକ ସମ୍ବେଦନଶୀଳ ସରକାର ଭାରତବର୍ଷରେ ଦାୟିତ୍ୱରେ ରହିଛି ।

ପୁର୍ନବାର ମୋଦି ସରକାରକୁ ଦାୟିତ୍ୱ ମିଳିଥିବାରୁ ଅନେକ ସମ୍ବେଦନଶୀଳ ପଦକ୍ଷେପ ମଧ୍ୟରୁ ଏହା ଅନ୍ୟତମ ବୋଲି କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ।

ଉଲ୍ଲେଖନୀୟ, ଗତ ୬ ତାରିଖରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦୁବାଇରେ ଫସି ରହିଥିବା ୧୦ ଓଡିଆ ଶ୍ରମିକଙ୍କ ଉଦ୍ଧାର ଲାଗି କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ଡାକ୍ତର ଶୁଭ୍ରମଣ୍ୟମ ଜୟଶଙ୍କରଙ୍କୁ ପତ୍ର ଲେଖି ଏହି ସମ୍ବେଦନଶୀଳ ଘଟଣାରେ ତାଙ୍କ ବ୍ୟକ୍ତିଗତ ଭାବେ ହସ୍ତକ୍ଷେପ କରି ଓଡିଆ ଯୁବକଙ୍କ ଉଦ୍ଧାର ପାଇଁ ଅନୁରୋଧ କରିଥିଲେ ।

କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନଙ୍କ ନୂଆଦିଲ୍ଲୀସ୍ଥ ସରକାରୀ ବାସଭବନରେ ଏହି ଓଡ଼ିଆ ଶ୍ରମିକ ମାନଙ୍କୁ ଅନ୍ୟମାନଙ୍କ ମଧ୍ୟରେ କେନ୍ଦ୍ର ରାଷ୍ଟମନ୍ତ୍ରୀ ପ୍ରତାପ ଷଡ଼ଙ୍ଗୀ, ଭୁବନେଶ୍ୱର ଲୋକସଭା ସାଂସଦ ଅପରାଜିତା ଷଡ଼ଙ୍ଗୀ ଏବଂ ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ମଧ୍ୟ ସ୍ୱାଗତ ଜଣାଇଥିଲେ ।

ଲୋକାଲ ୱାୟାର

କଟକ,ଜୁନ ୨୬ (ଲୋକାଲ ୱାୟାର): କଟକ ଜିଲ୍ଲାରେ ଭାଗବତ ଟୁଙ୍ଗୀ ଗୁଡିକୁ ଚଳିତ ଆର୍ଥିକ ବର୍ଷରେ ପୁଣି ଅନୁଦାନ ଯୋଗାଇଦିଆଯିବ ଏଥିଲାଗି ପ୍ରାୟ ଏକ କୋଟି ୧୫ଲକ୍ଷ ଟଙ୍କା ଅର୍ଥ ମଂଜୁର ହୋଇଥିବା ଜିଲ୍ଲା ସଂସ୍କୃତି କାର୍ଯ୍ୟାଳୟ ସୁତ୍ରରୁ ବୁଧବାର ଦିନ ଜଣାପଡିଛି।

କଟକ ଜିଲ୍ଲାର ୧୪ଟି ଯାକ ବ୍ଲକରେ ଭାଗବତ ଟୁଙ୍ଗୀ ବାବଦରେ ଅନୁଦାନ ପାଇଁ ପ୍ରାୟ ୬୫୫ଜଣ ଆବେଦନ କରିଛନ୍ତି ।

ବିଗତ ତିନୋଟି ଆର୍ଥିକ ବର୍ଷରେ ଭାଗବତ ଟୁଙ୍ଗୀ ଗୁଡିକୁ ଅନୁଦାନ ମିଳି ଆସୁଥିଲା ବେଳେ ଏବେ ପୁଣି ପ୍ରାୟ ୨୦୦ଟୁଙ୍ଗୀକୁ ଅନୁଦାନ ମିଳିବ ।

କଟକ ଜିଲ୍ଲାରେ ଭାଗବତ ଟୁଙ୍ଗୀ ସଂଖ୍ୟା ପ୍ରାୟ ୧୨୦୦ରୁ ଅଧିକ ହେବ ବୋଲି ଆକଳନ କରାଯାଉଛି ।

କଟକ ରାଜ୍ୟର ସାଂସ୍କୃତିକ ରାଜଧାନୀ ହୋଇଥିଲା ବେଳେ ଏହି ଜିଲ୍ଲାରେ ଗତ ଫନୀ ବାତ୍ୟାରେ ବହୁ ଟୁଙ୍ଗୀ ଭାଙ୍ଗିଥିଲା ।

୨୦୧୪-୧୫ ମସିହାରେ ଏହି ଯୋଜନାରେ କଟକ ଜିଲ୍ଲାରେ ପ୍ରାୟ ୮୦ଟି ଭାଗବତ ଟୁଙ୍ଗୀକୁ ପ୍ରଥମ ପର୍ଯ୍ୟାୟରେ ସାମିଲ କରାଯାଇ ଅର୍ଥରାଶି ପ୍ରଦାନ କରାଯାଇଥିଲା ।

ଅଦ୍ୟାବଧି ପ୍ରାୟ ମୋଟ ୩୭୮ ଭାଗବତ ଟୁଙ୍ଗୀକୁ ଏହି ଯୋଜନାରେ ସାମିଲ କରାଯାଇଛି ।

ପ୍ରଥମେ ଏହି ଯୋଜନାରେ ରାଜ୍ୟ ସରକାରଙ୍କ ସଂସ୍କୃତି ବିଭାଗ ପକ୍ଷରୁ ୨୫ହଜାର ଟଙ୍କା ଲେଖାଏଁ ଅନୁଦାନ ଯୋଗାଇ ଦିଆଯାଉଥିଲା ।

ପରବର୍ତ୍ତି ସମୟରେ ମୋଟ ଅନୁଦାନ ରାଶିକୁ ୫୦ ହଜାର ଟଙ୍କାକୁ ସରକାର ବୃଦ୍ଧି କରିଥିଲେ ।

୨୦୧୫-୧୬ରେ ୮୦ଟି, ୨୦୧୬-୧୭ ଓ ୨୦୧୭-୧୮ରେ ମୋଟ ୨୧୮ଟି ଟୁଙ୍ଗୀକୁ ଅନୁଦାନ ଆସିସାରିଥିଲା ବେଳେ ୨୦୧୯-୨୦ ବର୍ଷରେ କଟକ ଜିଲ୍ଲାରେ ଅନୁଦାନ ରାଶି ପାଇବାକୁ ଆବେଦନ କରିଥିବାର ଟୁଙ୍ଗୀ ଗୁଡିକୁ ୫୦ ହଜାର ଟଙ୍କା ଲେଖାଏଁ ପ୍ରାଦନ କରାଯିବ ବୋଲି ଜଣାପଡିଛି ।

ଲୋକାଲ ୱାୟାର

କେନ୍ଦ୍ରାପଡା, ଜୁନ ୨୬(ଲୋକାଲ ୱାୟାର): ଚଳିତ ବର୍ଷ ଅଣ୍ଡା ଦିଆ ଋତୁରେ ଭିତର କନିକା ଜାତୀୟ ଉଦ୍ୟାନରେ ରେକର୍ଡ ୧୦୩ଟି ଲୁଣି ପାଣି କୁମ୍ଭୀରଙ୍କ ବସା ଠାବ କରାଯାଇଛି ।

କେନ୍ଦ୍ରାପଡା ଜିଲ୍ଲାରେ ଥିବା ଭିତରକନିକା ଜାତୀୟ ଉଦ୍ୟାନରେ ରେକର୍ଡ ସଂଖ୍ୟକ ଲୁଣି ପାଣି କୁମ୍ଭୀରଙ୍କ ବସା ଚଳିତ ବର୍ଷ ଅଣ୍ଡା ଦିଆ ଋତୁରେ ଠାବହୋଇଛି ବୋଲି ବନ ବିଭାଗ କର୍ମଚାରୀଙ୍କ ଗଣନାରୁ ଜଣାପଡିଛି ।

“ଗତବର୍ଷ ଆମେ ୧୦୧ଟି କୁମ୍ଭୀର ବସା ଠାବ କରିଥିଲୁ । ଏ ବର୍ଷ ଏହି ସଂଖ୍ୟା ଅଳ୍ପ ହେଲେ ବି ବଢିଛି” ବୋଲି ଭିତରକନିକା ଜିଲ୍ଲା ବନ ଅଧିକାରୀ (ଡିଏଫଓ) ବିମଳ ପ୍ରସନ୍ନ ଆଚାର୍ଯ୍ୟ କହିଛନ୍ତି ।

ଏହି ବସାଗୁଡିକ ହେନ୍ତାଳ ଗଛର ଡାଳ, ପତ୍ର, ଉଚ୍ଚ ଜାଗାର କାଦୁଆ ଅଂଚଳରେ କରିଥାନ୍ତି । ଉଚ୍ଚ ସ୍ଥାନରେ ବସା ବାନ୍ଧିବା ଯୋଗୁଁ ବର୍ଷା ଋତୁରେ ଆସୁଥିବା ଉଚ୍ଚ ଜୁଆରରେ ଭାସି ନଥାଏ ଓ ପ୍ରତ୍ୟକ୍ଷ ସୂର୍ଯ୍ୟାଲୋକ ପାଇଥାଏ ବୋଲି କହିଛନ୍ତି ଆଚାର୍ଯ୍ୟ ।

ଗୋଟିଏ ମାଈ କୁମ୍ଭୀର ବସାରେ ୫୦ରୁ ୬୦ଟିଅଣ୍ଡା ଦେଇଥାଏ । ୫୦୦ ଅଣ୍ଡା ମଧ୍ୟରୁ ଗୋଟିଏ କୁମ୍ଭୀର ହିଁ ପ୍ରାପ୍ତବୟସ୍କ ହୋଇଥାଏ ।

ଜାନୁୟାରୀ ୨୦୧୯ରେ ହୋଇଥିବା କୁମ୍ଭୀର ଗଣନା ଅନୁଯାୟୀ, ଭିତର କନିକାର ଜଳାଶୟଗୁଡିକରେ ୧,୭୪୨ଟି ଲୁଣିପାଣି କୁମ୍ଭୀର ରହୁଛନ୍ତି ।

ମାଈ କୁମ୍ଭୀରମାନେ ଅଣ୍ଡାଗୁଡିକୁ ଜଗି ରହି ବିଲୁଆ, ବଣୁଆ କୁକୁର, ଓଧ, ଶାଗୁଣା, ଗୋଧୀ, ବାର୍ହା ତଥା ଅନ୍ୟ ଜୀବଜନ୍ତୁଙ୍କ ଲୋଭୀ ଓ କ୍ଷୁଧାର୍ତ ନଜରରୁ ରକ୍ଷା କରନ୍ତି ।

କୁମ୍ଭୀରମାନେ ପତ୍ର ସାହାଯ୍ୟରେ ଅଣ୍ଡାକୁ ଢାଙ୍କି ରଖି ବର୍ଷା ଋତୁରେ ପ୍ରବେଶ କରୁଥିବା ପାଣିରୁ ରକ୍ଷା କରନ୍ତି ବୋଲି ଆଚାର୍ଯ୍ୟ କହିଛନ୍ତି ।

 

ଜାନୁୟାରୀ ୨୦୧୯ରେ ହୋଇଥିବା କୁମ୍ଭୀର ଗଣନା ଅନୁଯାୟୀ, ଭିତରକନିକାର ବିଭିନ୍ନ ଜଳାଶୟରେ ୧୭୪୨ଟି ଲୁଣି ପାଣି କୁମ୍ଭୀର ରହନ୍ତି ।

ଅହିରାଜ ଓ ଅଜଗର ଭଳି ଅନେକ ସାପ ଉଦ୍ୟାନରେ ଥିବା ହେନ୍ତାଳ ବଣ ଓ ଜଙ୍ଗଲ ତଥା ଆଖପାଖରେ ଥିବା ଝାଟିମାଟି ଘରେ ଅଣ୍ଡା ଦେଇଥାନ୍ତି ।

ମାଈ ଅଜଗର ସାଧାରଣତଃ ୩୦ରୁ ୫୦ଟି ଅଣ୍ଡା ଦେଉଥାଏ । ଅଣ୍ଡା ଦେଇ ଛୁଆ ଫୁଟିବା ପର୍ଯ୍ୟନ୍ତ ମାଈ ଅଜଗର ଅଣ୍ଡା ପାଖରେ ହିଁ ରହିଥାଏ ।

ଅଣ୍ଡାରୁ ଛୁଆ ଫୁଟିବା ପାଇଁ ୬୦ରୁ ୮୫ ଦିନ ଲାଗିଥାଏ ।ଅନେକ ସାପ ଆଖପାଖ ଗାଁରେ ଅଣ୍ଡା ଦେଉଥିବାରୁ ଆମେ ଗ୍ରାମୀବାସୀଙ୍କୁ କୌଣସି ସାପ ନମାରିବାକୁ ତଥା ସାପ ଅଣ୍ଡା ନଷ୍ଟ ନକରିବାକୁ ବୁଝାଇଥାଉ ।

ଜଙ୍ଗଲରେ ସାପ ଓ କୁମ୍ଭୀରଙ୍କ ପ୍ରଜନନ ଋତୁ ଚାଲୁଥିବାରୁ ମେ ୧ରୁ ଜୁଲାଇ ୩୧ ପର୍ଯ୍ୟନ୍ତ ଜଙ୍ଗଲ ଭିତରେ ପ୍ରବେଶକୁ ନିଷିଦ୍ଧ କରାଯାଇଛି ।

୧୯୭୫ ମସିହାରେ ଜଙ୍ଗଲ ଓ ପରିବେଶ ମନ୍ତ୍ରାଳୟ ୟୁଏନଡିପି ସହଭାଗିତାରେ କୁମ୍ଭୀର ପ୍ରଜନନ ଓ ପାଳନ ପ୍ରକଳ୍ପ ଭିତର କନିଆର ଡାଙ୍ଗମାଳରେ ଆରମ୍ଭ ହୋଇଛି ।

ଏହା ଭିତରକନିଆ ଅଂଚଳରେ କୁମ୍ଭୀର ସଂଖ୍ୟା ବଢାଇବାରେ ସହାୟକ ହେଉଛି ।

 

ଲୋକାଲ ୱାୟାର

 

ଭୁବନେଶ୍ୱର, ଜୁନ୍ ୨୧(ଲୋକାଲ ୱାୟାର): ଆତ୍ମା ଓ ପରମାତ୍ମାର ମିଳନ ହେଉଛି ଯୋଗ । ମଣିଷର ସର୍ବାଙ୍ଗୀନ ଉନ୍ନତି ଲାଗି ଯୋଗର ଆବଶ୍ୟକତା ରହିଛି ।

ଜୀବନରେ ସମୃଦ୍ଧି ଓ ଆନନ୍ଦ ଆଣିବା ସହ ସୁସ୍ଥ ରହିବାକୁ ହେଲେ ଯୋଗ ନିହାତି ଜରୁରି ।

ଆମ ଜୀବନ ଲମ୍ବା ହେବା ସହ ସୁସ୍ଥ ରହିବା ମଧ୍ୟ ଆବଶ୍ୟକ । ସେଥିପାଇଁ ଆମକୁ ନିୟମିତ ଯୋଗାଭ୍ୟାସ କରିବାକୁ ପଡ଼ିବ ବୋଲି କହିଛନ୍ତି ଭାରତର ବିଶିଷ୍ଟ ସ୍ନାୟୁ ବିଶେଷଜ୍ଞ ତଥା ଶିକ୍ଷା ଓ ଅନୁସନ୍ଧାନ (ଡିମଡ ଟୁ ବି ୟୁନିଭର୍ସିଟି) ସ୍ୱାସ୍ଥ୍ୟ ନିର୍ଦ୍ଦେଶକ ପ୍ରଫେସର ଅଶୋକ କୁମାର ମହାପାତ୍ର ।

 

ସୋଆ ପକ୍ଷରୁ ଅନୁଷ୍ଠିତ ଅନ୍ତର୍ଜାତୀୟ ଯୋଗ ଦିବସ ଅବସରରେ ଏହି ମତ ରଖିଛନ୍ତି ପ୍ରଫେସର ମହାପାତ୍ର ।

ସୋଆ ଏନଏସଏସ୍ ଓ ଏନସିସିର ମିଳିତ ଆନୁକୂଲ୍ୟରେ ଇନଷ୍ଟିଚ୍ୟୁଟ୍ ଅଫ୍ ଟେକ୍ନିକାଲ୍ ଏଡୁକେସନ୍ ଆଣ୍ଡ ରିସର୍ଚ୍ଚ (ଆଇଟିଇଆର୍)ରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

କାର୍ଯ୍ୟକ୍ରମରେ ସୋଆ ଅନ୍ତର୍ଗତ ନର୍ସିଂ, ଫାର୍ମାସି, କୃଷି, ଇଞ୍ଜିନିୟରିଂ ଏବଂ ଲ’ ଫ୍ୟାକଲ୍ଟି ପକ୍ଷରୁ ଏନଏସଏସର ୨୫୦ ଜଣ ଛାତ୍ରଛାତ୍ରୀ ଏବଂ ଯାଜପୁର, ଖୋର୍ଦ୍ଧା ଓ କଟକରୁ ଆସିଥିବା ୪୫୦ ଏନସିସି କ୍ୟାଡେଟ୍ ଭାଗ ନେଇଥିଲେ । କ୍ୟାମ୍ପ କମାଣ୍ଡର କର୍ଣ୍ଣେଲ୍ ଏ.ବି. ପାଢ଼ିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ୧୦ ଜଣ ଏଏନଓ ଏବଂ ୧୦ ଜଣ ସ୍ଥାୟୀ ପ୍ରଶିକ୍ଷକ ମଧ୍ୟ ଭାଗ ନେଇଥିଲେ ।

ଏହି ଉପଲକ୍ଷେ ସୋଆର କୁଳପତି ପ୍ରଫେସର ଅମିତ ବାନାର୍ଜୀ ସୁସ୍ଥ ଜୀବନ ନିମନ୍ତେ ଯୋଗର ଆବଶ୍ୟକତା ସାରା ବିଶ୍ୱରେ ଆଦୃତ ହୋଇପାରିଛି ବୋଲି ମତ ଦେଇ ଏହା ଦେଶର ପ୍ରତ୍ୟେକ ପରିବାର ଅନୁଭବ କରି ଦୈନିକ ଜୀବନ ଯାତ୍ରାର ଏହାକୁ ଏକ ବିଶେଷ ଅଙ୍ଗ ଭାବେ ଗ୍ରହଣ କରିବା ଦରକାର ବୋଲି କହିଥିଲେ ।

ସୋଆର ଯୋଗ ଶିକ୍ଷକ ଅଖିଳ ଚନ୍ଦ୍ର ରଣା ଯୋଗ କାର୍ଯ୍ୟକ୍ରମକୁ ପରିଚାଳନା କରିଥିଲେ ।

ଶ୍ରୀ ରଣା ଯୋଗ କାର୍ଯ୍ୟକ୍ରମରେ ବିଭିନ୍ନ ପ୍ରକାର ଯୋଗାସନ ଯଥା, ତାଡାସନ, ଅର୍ଦ୍ଧକଟି ଚକ୍ରାସନ, ବଜ୍ରାସନ, ଉଷ୍ଟ୍ରାସନ, ମକରାସନ, ଭୃଜଙ୍ଗାସନ, ଶବାସନ, ଅଲୋମବିଲୋମ୍, କପାଳଭାତି ପ୍ରଭୃତି ବିଭିନ୍ନ ପ୍ରକାର ପ୍ରାଣାୟମ ଅଭ୍ୟାସ କରାଇଥିଲେ । ପ୍ରାତଃସକାଳରେ ଯୋଗାଭ୍ୟାସର ଦୃଶ୍ୟ ବେଶ ମନୋରମ ଥିଲା ।

କାର୍ଯ୍ୟକ୍ରମରେ ସୋଆ ଛାତ୍ରମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ, ଏନଏସଏସ୍ ପ୍ରୋଗ୍ରାମ ସଂଯୋଜକ ଡ. ନଚିକେତା ଶର୍ମା, ଏନସିସି ଅଫିସର ଡ. ସଚ୍ଚିଦାନନ୍ଦ ଦାସ, କୃଷି ଫ୍ୟାକଲ୍ଟି ଡିନ୍ ପ୍ରଫେସର ବିଜୟ କୁମାର ସାହୁ, ପ୍ରୋଗ୍ରାମ ଅଫିସର ଡ. କମଳ ଲୋଚନ ମହାନ୍ତ, ଡ. ପିଜିଆର ଆଚାରୀ, ଡ. ଶୋଭନ ପଟ୍ଟନାୟକ, ଡ. ଚକ୍ରଧର ପାତ୍ର, ସତ୍ୟ ନାରାୟଣ ଶତପଥୀ, ପ୍ରଫେସର ଭି. ରାମାରାଓ, ସ୍ୱରୂପା ବିଶ୍ୱାଳ ଓ କଳ୍ପନା ସି ପ୍ରମୁଖ ଯୋଗ ଦେଇଥିଲେ ।

ଲୋକାଲ ୱାୟାର

ଭୁବନେଶ୍ବର,ଜୁନ ୨୦ (ଲୋକାଲ ୱାୟାର) ଔଷଧୀୟ ବୃକ୍ଷ ରୋପଣ କରି ଭୁବନେଶ୍ବରସ୍ଥିତ ଡମଣାରେ ଓମ୍ କିନ୍ନର କୁଳଦେବୀ ବୋହୁଚୋର ମାତାଙ୍କୁ ପୂଜା କରିବା ସହ ଲୋକଙ୍କ ଭିତରେ ବୃକ୍ଷର ଆବଶ୍ୟକତା ସମ୍ପର୍କରେ ଗୁରୁବାର ସଚେତନତା ସୃଷ୍ଟିକରିଛନ୍ତି।

ବୋହୁଚୋରା ମାତାଙ୍କୁ ପୂଜା କଲେ କିନ୍ନରମାନେ ଯାହା ମାନସିକ କରିଥାନ୍ତି ତାହା ପୂରଣ ହେବା ସହ କିନ୍ନର ଜନ୍ମରୁ ମୁକ୍ତି ପାଇଥାନ୍ତି ବୋଲି ବିଶ୍ବାସ ରହିଛି।

 

ଏହି ଦିବସ କୁ ପାଳନ କରିବା ପାଇଁ ସକାଳୁ ମା’ଙ୍କୁ ହଳଦୀ ପାଣିରେ ଗାଧୋଇ ଦେବା ସହ ଧୂପ, ଦୀପ, ଫଳ, ଫୁଲ ଭୋଗ ଅର୍ପଣ କରି ଦିନସାରା କିନ୍ନର ମାନେ ଉପବାସ ରହିଥିବା ଜଣେ ଆୟୋଜକ କହିଛନ୍ତି।

 

କିନ୍ନରମାନଙ୍କ ଗୁରୁ ସୁଇଟି କିନ୍ନର, ଓଡ଼ିଶା କିନ୍ନର ଓ ତୃତୀୟଲିଙ୍ଗୀ ମହାସଂଘର ରାଜ୍ୟ ସଭାପତି ପ୍ରତାପ କୁମାର ସାହୁଙ୍କ ନେତୃତ୍ୱରେ ନିମ୍ବ, ଅଶୋକ, କଦମ୍ବ, ବଉଳ ଭଳି ବିଭିନ୍ନ ପ୍ରକାର ଔଷଧୀୟ ଚାରା ରୋପଣ କରାଯାଇଥିବା ସେ କହିଛନ୍ତି।

 

ଭୁବନେଶ୍ୱର, ବ୍ରହ୍ମପୁର ସମେତ ରାଜ୍ୟର ବହୁ ଖାଲି ଜାଗାଗୁଡ଼ିକରେ ବିଭିନ୍ନ ସମୟରେ କିନ୍ନରମାନଙ୍କ ଦ୍ୱାରା ଔଷଧୀୟ ଚାରା ରୋପଣ କରାଯିବା ସହ ବିନା ମୂଲ୍ୟରେ ଚାରା ବଣ୍ଟନ କରାଯିବାର ସେମାନେ ଯୋଜନା ରଖିଥିବା ସେ ସୂଚନା ଦେଇଛନ୍ତି।

ଏହି ବୃକ୍ଷ ରୋପଣ କାର୍ଯ୍ୟକ୍ରମରେ କିନ୍ନର ନେତ୍ରୀ ସୋନମ କିନ୍ନର, ମେନକା କିନ୍ନର, ରମା କିନ୍ନର, ଶ୍ରୀଦେବୀ, କମଳା, ଚନ୍ଦା, ତନିସା, ପ୍ରିୟା, ଜୁଲି, ଗୁଡ଼ୁଲି, ଖୁସି କିନ୍ନର ଓ ଅନୁଜ ପ୍ରଧାନ ପ୍ରମୁଖ ଯୋଗ ଦେଇଥିଲେ ।

ଲୋକାଲ ୱାୟାର