ପରିବେଶ

ଭୁବନେଶ୍ୱର, ଜୁନ ୧୯ (ଲୋକାଲ ୱାୟାର) ମୌସୁମୀ ପୂର୍ବରୁ ପ୍ରାକୃତିକ ବିପର୍ଯ୍ୟୟ ଯଥା ବନ୍ୟା ଓ ବାତ୍ୟା ମୁକାବଲା ପାଇଁ ରାଜ୍ୟ ସରକାରଙ୍କ ପକ୍ଷରୁ ବୁଧବାର ରାଜ୍ୟବ୍ୟାପୀ ପ୍ରସ୍ତୁତି ଅଭ୍ୟାସ ଆୟୋଜିତ କରାଯାଇଥିବା ଓଡ଼ିଶା ରାଜ୍ୟ ବିପର୍ଯ୍ୟୟ ସଂଚାଳନ ସଂସ୍ଥା (ଓଏସଡିଏମଏ)ର ଜଣେ ଅଧିକାରୀ କହିଛନ୍ତି ।

ରାଜ୍ୟର ୩୦ଟି ଜିଲ୍ଲାରେ ଜିଲ୍ଲା, ବ୍ଲକ ଓ ଆଶ୍ରୟସ୍ଥଳୀ ସ୍ତରୀୟ ବାତ୍ୟା, ବନ୍ୟା ଓ ଅନ୍ୟାନ୍ୟ ବିପର୍ଯ୍ୟୟର ମୁକାବିଲା ନିମନ୍ତେ ପ୍ରସ୍ତୁତି ଅଭ୍ୟାସ (ମକ୍ ଡ୍ରିଲ୍) ଅନୁଷ୍ଠିତ ହୋଇଛି ।

୨୫ଟି ଜିଲ୍ଲା ତଥା ବାଲେଶ୍ୱର, ଭଦ୍ରକ, ମୟୁରଭଞ୍ଜ, କେନ୍ଦ୍ରାପଡା, ଜଗତସିଂହପୁର, ଯାଜପୁର, କଟକ, ଢେଙ୍କାନାଳ, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ରାୟଗଡ଼ା, ନବରଙ୍ଗପୁର, ସୁବର୍ଣ୍ଣପୁର, ଗଜପତି, କୋରାପୁଟ, ନୂଆପଡ଼ା, ମାଲକାନଗିରି, କଳାହାଣ୍ଡି, ବୌଦ୍ଧ, ସମ୍ବଲପୁର, ବରଗଡ଼, ଝାରସୁଗୁଡ଼ା ଓ କେନ୍ଦୁଝରର ୮୭୯ ଗୋଟି ବହୁମୁଖୀ ବାତ୍ୟା ଓ ବନ୍ୟା ଆଶ୍ରୟସ୍ଥଳୀରେ ଗୋଷ୍ଠୀସ୍ତରୀୟ ସାମୁହିକ ବିପର୍ଯ୍ୟୟ ପ୍ରସ୍ତୁତି ଅଭ୍ୟାସ କରାଯାଇଛି ।

ସେହିପରି ବାକି ୫ଟି ଜିଲ୍ଲା ତଥା କନ୍ଧମାଳ, ବଲାଙ୍ଗିର, ଦେବଗଡ, ସୁନ୍ଦରଗଡ ଓ ଅନୁଗୁଳରେ ଜିଲ୍ଲାସ୍ତରୀୟ ବିପର୍ଯ୍ୟୟ ପ୍ରସ୍ତୁତି ଅଭ୍ୟାସ କରାଯାଇଛି ।

ରାଜ୍ୟର ସମସ୍ତ ବ୍ଲକରେ ଏହି କାର୍ଯ୍ୟକ୍ରମ କରାଯିବା ସହ ପ୍ରସ୍ତୁତିକୁ ନେଇ ଏକ ସଚେତନତା ରାଲି କରାଯାଇଥିଲା ।

ପ୍ରସ୍ତୁତି ଅଭ୍ୟାସରେ ଆଶ୍ରୟସ୍ଥଳୀ ପରିଚାଳନା ଓ ରକ୍ଷଣାବେକ୍ଷଣ ଦାୟୀତ୍ୱରେ ଥିବା ସମିତି ସଭ୍ୟସଭ୍ୟା ତଥା ଅନ୍ୟାନ୍ୟ ସ୍ୱେଚ୍ଛାସେବୀ ମାନେ ସନ୍ଧାନ, ଉଦ୍ଧାର କୌଶଳ ଏବଂ ପ୍ରାଥମିକ ଚିକିତ୍ସା କୌଶଳ ପ୍ରମୁଖ ପ୍ରଦର୍ଶନ କରିଥିଲେ ।

ଏହା ସହିତ ଆଶ୍ରୟସ୍ଥଳୀମାନଙ୍କୁ ଯୋଗାଇ ଦିଆଯାଇଥିବା ବିଭିନ୍ନ ପ୍ରକାରର ଉପକରଣ ଯଥା, ଟାୱାର ଲାଇଟ୍, ଯନ୍ତ୍ରଚାଳିତ କରତ, ଜେନେରେଟର, ଷ୍ଟ୍ରେଚର, ମେଗାଫୋନ୍ ଇତ୍ୟାଦିର ବ୍ୟବହାର ସମ୍ବନ୍ଧୀୟ ଅଭ୍ୟାସ କରିଥିଲେ ।

ଏହାସହ ଏନଡିଆରଏଫ, ଓଡ୍ରାଫ ଏବଂ ଅଗ୍ନିଶମ ସେବା ବାହିନୀ ଏଥିରେ ଭାଗ ନେବା ସହିତ ସନ୍ଧାନ ଓ ଉଦ୍ଧାର କୌଶଳ ପ୍ରଦର୍ଶନ କରିଥିଲେ ।

ତେବେ ଜିଲ୍ଲା ପ୍ରଶାସନ ସମେତ ସ୍ଥାନୀୟ ସ୍ୱେଚ୍ଛାସେବୀ ଅନୁଷ୍ଠାନ, ସମ୍ପୃକ୍ତ ସରପଞ୍ଚ ଗ୍ରାମ ପଞ୍ଚାୟତ କର୍ମକର୍ତ୍ତା ଏବଂ ସାଧାରଣ ଲୋକମାନେ ଅଂଶଗ୍ରହଣ କରିଥିଲେ ।

ଉପରୋକ୍ତ ବିପର୍ଯ୍ୟୟ ପ୍ରସ୍ତୁତି ଅଭ୍ୟାସ ଗୁଡ଼ିକ ରାଜ୍ୟସ୍ତରରେ ଓଡ଼ିଶା ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଓଏସଡିଏମଏ) ଏବଂ ସ୍ୱତନ୍ତ୍ର ରିଲିଫ୍ କମିଶନର (ଏସଆରସି) ଓ ଜିଲ୍ଲା ସ୍ତରରେ ଜିଲ୍ଲାପାଳଙ୍କ ତତ୍ତ୍ୱାବଧାନରେ ଜିଲ୍ଲା ଜରୁରୀକାଳୀନ ବିଭାଗ ଦ୍ୱାରା ସଂଯୋଜନା କରାଯାଇଛି ।

ଲୋକାଲ ୱାୟାର

କଟକ, ଜୁନ ୧୬ (ଲୋକାଲ ୱାୟାର): କୋଲକାତାରେ ଜଣେ ରୋଗୀର ମୃତ୍ୟୁ ଘଟଣାକୁ କେନ୍ଦ୍ରକରି କେତେକ ଦୁର୍ବୁତ୍ତ ଡାକ୍ତରଙ୍କୁ ମାଡ ମାରିଥିବା ପ୍ରତିବାଦରେ ବାମପନ୍ଥୀ ବିଚାରଧାରାର ଏକ ଚତ୍ର ସଂଗଠନର ସଦସ୍ୟ ମାନେ କଟକରେ ବିକ୍ଷୋଭର ଆୟୋଜନ କରିଥିଲେ।

ଏଆଇଡିଏସଓ (ଅଲ୍ ଇଣ୍ଡିଆ ଡେମୋକ୍ରାଟିକ୍ ଷ୍ଟୁଡେଣ୍ଟସ ଅର୍ଗାନାଇଜେସନ) କଟକ ଜିଲ୍ଲା କମିଟି ପକ୍ଷରୁ କଲେଜଛକଠାରେ ଏହି ବିକ୍ଷୋଭ ଅନୁଷ୍ଠିତ ହୋଇଥିଲା।

ଏଆଇଡିଏସଓ କଟକ ଜିଲ୍ଲା କମିଟି ଉପସଭାପତି ତରୁଣସେନ ନାୟକ, ସମ୍ପାଦକ ବିନୋଦ ସେଠୀ, ସମ୍ପାଦକମଣ୍ଡଳୀ ସଦସ୍ୟ ଶିବାନୀ ସାହୁ, ଶୁଭସ୍ମିତା ସାହୁ, ସଂଗଠକ ସରୋଜ ମାନସିଂ, ସିଦ୍ଧେଶ୍ୱର ଜେଠୀ ଏହି ବିକ୍ଷୋଭର ନେତୃତ୍ବ ନେଇଥିଲେ ।

ସୂଚନାଯୋଗ୍ୟ ଯେ, ଜୁନ୍ ୧୦ ତାରିଖ ମଧ୍ୟରାତ୍ରରେ ଜଣେ ୮୫ ବର୍ଷିୟ ରୋଗୀର ମୃତ୍ୟୁ ଘଟଣାକୁ କେନ୍ଦ୍ରକରି କୋଲକାତାରେ ଡାକ୍ତରଙ୍କୁ କେତେକ ଦୁର୍ବୁତ୍ତ ମାଡ ମାରିଥିଲେ।

ଏହି ଘଟଣାରେ ପଶ୍ଚିମବଙ୍ଗର ସମସ୍ତ ମେଡ଼ିକାଲ କଲେଜର ଡାକ୍ତର ଓ ଛାତ୍ରଛାତ୍ରୀମାନେ ଆନ୍ଦୋଳନକୁ ଓହ୍ଲାଇଛନ୍ତି ।

ସରକାର ଡାକ୍ତରଙ୍କ ଦାବି ଶୁଣିବା ପରିବର୍ତ୍ତେ ବିଭିନ୍ନ ଧମକ ଦେଇଥିବ ଅଭିଯୋଗ କରି ଡାକ୍ତର ମାନେ ଦେଶର ଅନ୍ୟ ରାଜ୍ୟ ମାନଙ୍କରେ ମଧ୍ୟ ଆନ୍ଦୋଳନ ଚଳାଇଛନ୍ତି।

ଲୋକାଲ ୱାୟାର

ଭୁବନେଶ୍ବର, ଜୁନ ୧୪ (ଲୋକାଲ ୱାୟାର) ମିଳିତ ଜାତିସଂଘର ଅର୍ଥନୈତିକ ଓ ସାମାଜିକ ପରିଷଦ (ଇସିଓଏସଓସି ) ଓଡିଶାର ଅଗ୍ରଣୀ ସ୍ଵଚ୍ଛାସେବୀ ସଂଗଠନ ପିପୁଲ୍ସ କଲ୍ଚରାଳ ସେଣ୍ଟର (ପିକକ୍)କୁ ବିଶେଷ ପରାମର୍ଶଯୋଗ୍ୟ ସଂଗଠନ ର ମାନ୍ୟତା ପ୍ରଦାନ କରିଥିବା ସଂଗଠନ ଶୁକ୍ରବାର କହିଛି ।

ଏହି ମାନ୍ୟତା ପ୍ରାପ୍ତ ସଂସ୍ଥା ମାନେ ECOSOC ଓ ଏହାର ସହାୟକ ସଂସ୍ଥା ସହିତ ସକ୍ରିୟ ଭାବରେ ସଂଲଗ୍ନ ହେବା ସହିତ ଜାତିସଂଘ ର ସଚିବାଳୟ, କାର୍ଯ୍ୟକ୍ରମ ଓ ସଂସ୍ଥା ମାନଙ୍କ ସହିତ ବହୁଳ ଭାବରେ କାର୍ଯ୍ୟ କରିପାରିବେ ।

ଏହି ମର୍ଯ୍ୟାଦା ପ୍ରାପ୍ତ ପ୍ରତିଷ୍ଠାନ ମାନଙ୍କ ଠାରୁ ଆବଶ୍ୟକ ସମୟରେ ଅର୍ଥନୈତିକ ଓ ସାମାଜିକ ପରିଷଦ ଓ ଏହାର ସହାୟକ ସଂସ୍ଥା ବିଶେଷ ପରାମର୍ଶ ଗ୍ରହଣ କରିପାରିବେ ।

ଏହି ମାନ୍ୟତା ଦ୍ଵାରା ପିକକ୍ ର ପ୍ରତିନିଧି ମିଳିତ ଜାତିସଂଘର ବିଭିନ୍ନ କାର୍ଯ୍ୟକ୍ରମ, ସମ୍ମିଳନୀ ମାନଙ୍କରେ ଭାଗ ନେଇପାରିବେ ।

ପିକକ୍ ର ପ୍ରତିନିଧି ଇସିଓଏସଓସି ଓ ଏହାର ସହାୟକ ସଂସ୍ଥା ମାନଙ୍କର ର ସାଧାରଣ ସଭା, ଅଧିବେଶନ ରେ ନିରୀକ୍ଷକ ରୂପେ ମଧ୍ୟ ଯୋଗଦେଇପାରିବେ ।

ପିପୁଲ୍ସ କଲ୍ଚରାଳ ସେଣ୍ଟର (ପିକକ୍) ର ଆରମ୍ଭ ଅଶି ଦଶକର ଶେଷ ଭାଗରେ କିଛି ସମାଜସେବୀ, ବିଭିନ୍ନ ପୃଷ୍ଠଭୂମି ର ବ୍ୟକ୍ତିବିଶେଷ, କଳାକାର, ଜାତୀୟ ସେବା ଯୋଜନାର ସ୍ଵେଚ୍ଛାସେବୀ ମାନଙ୍କ ଦ୍ଵାରା ଭୁବନେଶ୍ଵର ବସ୍ତି ର ଶିଶୁ ମାନଙ୍କୁ ସହାୟତା କରିବା ଉଦ୍ଦେଶ୍ୟରେ ଆରମ୍ଭ ହୋଇଥିଲା ।

୧୯୯୦ ମସିହାରେ ଏହା ଆଇନ୍ ସମ୍ମତ ଭାବେ ପଞ୍ଜୀକରଣ ହେବା ସହ ସମାଜର ଦୁର୍ବଳ ଶ୍ରେଣୀ ମାନଙ୍କ ନିମନ୍ତେ କାର୍ଯ୍ୟ କରିବା ଆରମ୍ଭ କରିଥିଲା ।

ପିକକ୍ ସମାଜର ଦୁର୍ବଳ ଶ୍ରେଣୀ ବିଶେଷ କରି ଶିଶୁ, ମହିଳା, ବୃଦ୍ଧ ଓ ଅନ୍ୟାନ ପ୍ରତିକୂଳ ପରିସ୍ଥିତିରେ ଥିବା ଲୋକ ମାନଙ୍କ ନିମନ୍ତେ କାର୍ଯ୍ୟ କରିବା ଓ ସେମାନଙ୍କୁ ମୁଖ୍ୟ ସ୍ରୋତରେ ସାମିଲ କରାଇବାରେ ରାଜ୍ୟରେ ପ୍ରମୁଖ ଭୂମିକା ଗ୍ରହଣ କରିଛି ।

ଶିଶୁ ଅଧିକାର ସୁନିଶ୍ଚିତ କରିବା କୁ ଅଗ୍ରାଧିକାର ଭିତ୍ତିରେ ପିକକ୍ କାର୍ଯ୍ୟ କରିବା ସହ ମହିଳା ମାନଙ୍କ ବିକାଶ କରିବା, ସ୍ୱାସ୍ଥ୍ୟ ଓ ପରିମଳ, ଜୀବିକା, ବରିଷ୍ଠ ନାଗରିକ ମାନଙ୍କର ସୁରକ୍ଷା, ବିପର୍ଯୟ ପରିଚାଳନା ଓ ପ୍ରସ୍ତୁତି ପାଇଁ ନିରବଚ୍ଛିନ୍ନ ଭାବରେ କାର୍ଯ୍ୟରତ। ଯୁବଗୋଷ୍ଠୀକୁ ବିକାଶର ପ୍ରକ୍ରିୟାରେ ସାମିଲ କରିବାପାଇଁ ମଧ୍ୟ ବହୁବିଧ ପଦକ୍ଷେପ ନେଇ ଆସୁଛି।

ପିକକ୍ ର ଉଦ୍ୟମରେ ପ୍ରାୟ ୩୦୨୬୯ ଶିଶୁ ଶ୍ରମିକଙ୍କୁ ଉଦ୍ଧାର କରାଯାଇ ମୁଖ୍ୟ ସ୍ରୋତରେ ସାମିଲ କରାଯାଇ ପାରିଛି।

ପିକକ୍ ବିଭିନ୍ନ ସରକାରୀ ଓ ବେସରକାରୀ ସଂଗଠନ ମାନଙ୍କ ଠାରୁ ବହୁ ପୁରସ୍କାର ଓ ସମ୍ମାନରେ ସମ୍ମାନିତ। ପିକକ୍ ମଧ୍ୟ ନିକଟରେ ଗ୍ଲୋବାଲ ପାର୍ଟନରସିପ୍ ଟୁ ଏଣ୍ଡ ଭାୟୋଲେନ୍ସ ଏଗେଂଷ୍ଟ ଚିଲ୍ଡ୍ରେନ (Global
partnership to end violence against children) ର ଏକ ସଦସ୍ୟ ରୂପେ ସୀକୃତି ପ୍ରାପ୍ତ ।

ଲୋକାଲ ୱାୟାର

ଭୁବନେଶ୍ୱର, ଜୁନ୍ ୧୩ (ଲୋକାଲ ୱାୟାର): ରାଜ୍ୟ ଶ୍ରମ ଓ କର୍ମଚାରୀ ବୀମା ଏବଂ କମ୍ୟୁନିଟି ରେଡିଓ ଆସୋସିଏସନ୍ ଅଫ୍ ଓଡ଼ିଶା (ସିଆରଏଓ)ର ମିଳିତ ଆନୁକୂଲ୍ୟରେ ବିଶ୍ୱ ଶିଶୁ ଶ୍ରମ ନିରୋଧ ଦିବସ ଉପଲକ୍ଷେ ଜୁନ୍ ୧୧ ଓ ୧୨ ଦୁଇ ଦିନ ଧରି ଏଠାରେ ସଚେତନତା ଯାତ୍ରା ଅନୁଷ୍ଠିତ ହୋଇଯାଇଛି ।

ଏହି ଅବସରରେ ‘ଶିଶୁ ଶ୍ରମମୁକ୍ତ ଓଡ଼ିଶା-ଆମର ସଂକଳ୍ପ’ ବାର୍ତ୍ତାର ପ୍ରଚାର ନିମନ୍ତେ ଜୁନ୍ ୧୧ ତାରିଖ ଦିନ ଏକ ରେଡିଓ ରଥ ଭୁବନେଶ୍ୱରର ବିଭିନ୍ନ ବସ୍ତି ଏବଂ ପୋଲିସ ଫାଣ୍ଡି ବୁଲି ଥିଲା ।

ବସ୍ତିବାସିନ୍ଦାଙ୍କ ମଧ୍ୟରେ ପିଲାଙ୍କୁ ଶିକ୍ଷିତ କରିବାର ଆବଶ୍ୟକତା ବୁଝାଇବା ସହ ପୁଲିସ ବିଭାଗର ସହଯୋଗ ମଧ୍ୟ କାମନା କରାଯାଇଥିଲା ।

ଏହି ରେଡିଓ ରଥ (ରେଡିଓ ଅନ୍ ହ୍ୱିଲ୍ସ)କୁ ଶ୍ରମ ବିଭାଗର ପ୍ରମୁଖ ସଚିବ ଅନୁ ଗର୍ଗ ଉଦଘାଟନ କରିଥିଲେ ।

ଏହି ସ୍ୱତନ୍ତ୍ର କାର୍ଯ୍ୟକ୍ରମରେ ଶିକ୍ଷା ଓ ଅନୁସନ୍ଧାନ (ଡିମଡ ଟୁ ବି ୟୁନିଭର୍ସିଟି) ଅନ୍ତର୍ଗତ କମ୍ୟୁନିଟି ରେଡିଓ ଭଏସ୍ ଅଫ୍ ସୋଆ ୯୦.୪ ମଧ୍ୟ ସାମିଲ ହୋଇଥିଲା ।

ସେହିପରି ଜୁନ୍ ୧୨ ବିଶ୍ୱ ଶିଶୁ ଶ୍ରମିକ ନିରୋଧ ଦିବସ ଉପଲକ୍ଷେ ଏକ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

କାର୍ଯ୍ୟକ୍ରମରେ ଶ୍ରମମନ୍ତ୍ରୀ ସୁଶାନ୍ତ ସିଂ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ।

ଅନ୍ୟମାନଙ୍କ ମଧ୍ୟରେ ଶ୍ରମ ବିଭାଗର ପ୍ରମୁଖ ସଚିବ ଅନୁ ଗର୍ଗ, ୟୁନିସେଫ୍ , ସିୱାଇଏସଡି, ପ୍ଲାନ୍ ଇଣ୍ଡିଆ, ସିଏସିଏଲ୍, ପିକକ୍, ବିବିଏ, ଏବଂ କମ୍ୟୁନିଟି ରେଡିଓ ଆସୋସିଏସନ୍ ଓଡ଼ିଶାର ସଦସ୍ୟ କାର୍ଯ୍ୟକ୍ରମରେ ଅତିଥି ଭାବେ ଯୋଗ ଦେଇଥିଲେ ।

କାର୍ଯ୍ୟକ୍ରମର ମୁଖ୍ୟ ଆକର୍ଷଣ ଥିଲେ କେନ୍ଦୁଝର ଓ ମୟୂରଭଞ୍ଜର କିଛି ଶ୍ରମମୁକ୍ତ ଶିଶୁ ଯେଉଁମାନେ ଶ୍ରମକୁ ପ୍ରତ୍ୟାଖ୍ୟାନ କରି ଶିକ୍ଷାର ସ୍ରୋତରେ ସାମିଲ ହୋଇଛନ୍ତି ।

ସେମାନେ ଆଗାମୀ ଭବିଷ୍ୟତ ପାଇଁ ଲକ୍ଷ୍ୟ ଧାର୍ଯ୍ୟ କରି ଆଗେଇ ଚାଲିବା ସହ ଶିଶୁ ଶ୍ରମମୁକ୍ତ ସମାଜ ଗଠନ ପାଇଁ ଅନ୍ୟମାନଙ୍କୁ ନିରନ୍ତର ଭାବେ ପ୍ରୋତ୍ସାହନ ଦେଇ ଚାଲିଛନ୍ତି ।

ଯଦି ସମସ୍ତେ ମିଳିତ ଭାବରେ ସହଯୋଗ କରିବେ ତେବେ ନିଶ୍ଚିତ ଭାବେ ୨୦୨୫ ସୁଦ୍ଧା ଓଡ଼ିଶା ଶିଶୁ ଶ୍ରମମୁକ୍ତ ଓଡ଼ିଶାରେ ପରିଣତ ହେବ ବୋଲି ଏହି କାର୍ଯ୍ୟକ୍ରମରେ ମତ ପ୍ରକାଶ ପାଇଥିଲା ।

ଭଏସ୍ ଅଫ୍ ସୋଆ ୯୦.୪ ପକ୍ଷରୁ ଶ୍ରୀମତି ଶବନମ୍ ଶିରିନ୍ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ । ମୋଟ ୧୭ଟି କମ୍ୟୁନିଟି ରେଡିଓ ଏଥିରେ ଅଂଶ ଗ୍ରହଣ କରିଥିଲେ ।

ଲୋକାଲ ୱାୟାର

ଭୁବନେଶ୍ୱର, ଜୁନ ୧୩ (ଲୋକାଲ ୱାୟାର) ବିଶ୍ୱ ଶିଶୁ ଶ୍ରମ ନିରୋଧ ଦିବସ ଅବସରରେ ସିସିଡବ୍ଲୁଡି ଓ ଆକ୍ସନ ଏଡର ମିଳିତ ଆନୁକୁଲ୍ୟରେ ଶିଶୁର ଅଧିକାରକୁ ସୁରକ୍ଷିତ ରଖିବା ପ୍ରତ୍ୟେକ ଜନସାଧାରଣଙ୍କ ଦାୟିତ୍ୱ ବୋଲି ଆହ୍ଵାନ ଦିଆଯାଇଥିବା ଗୁରୁବାର ଆୟୋଜକ ସଂସ୍ଥାର ଜଣେ ଅଧିକାରୀ କହିଛନ୍ତି ।

ଭୁବନେଶ୍ବର ଅରବିନ୍ଦ ନଗର ବସ୍ତିଠାରେ ଶିଶୁମାନଙ୍କର ସୁରକ୍ଷିତ ଭବିଷ୍ୟତ ପାଇଁ ଆବଶ୍ୟକୀୟ ପଦକ୍ଷେପ ନେବା ସହ ଶିଶୁଶ୍ରମକୁ ପ୍ରତ୍ୟେକ ବ୍ୟକ୍ତି ବିରୋଧ କରିବା ଦରକାର ବୋଲି ସିସିଡବ୍ଲୁଡିର ସମ୍ପାଦକ ସଦାଶିବ ସ୍ୱାଇଁ କହିଛନ୍ତି ।

ଏହି ଅବସରରେ ବସ୍ତିର ଜନସାଧାରଣ, ଭୁବନେଶ୍ୱର ୟଙ୍ଗ ଅର୍ବାନ ୱିମେନ ଫୋରମ, ଶିଶୁ କ୍ଲବର ସଦସ୍ୟ ସଦସ୍ୟା, ମହିଳା ମଣ୍ଡଳ ଯୋଗଦାନ କରିବା ସହ ନିରୂପମା ସାମଲ, ଜଲିବାବା ସାହୁ, ସନ୍ଧ୍ୟାରାଣୀ ପ୍ରଧାନ, ମୋନାଲିସା ପାଣିଗ୍ରାହୀ ପ୍ରମୁଖ ଉପସ୍ଥିତ ରହିଥିଲେ ।

ଇପ୍ସିତା ଅଗ୍ରୱାଲ ସ୍ଵାଗତ ଭାଷଣ ଦେଇଥିବା ବେଳେ କଲ୍ୟାଣୀ ରାଉତ ଉପସ୍ଥିତ ସଦସ୍ୟଙ୍କୁ ଧନ୍ୟବାଦ ଅର୍ପଣ କରିଥିଲେ ।

ଲୋକାଲ ୱାୟାର

ଭୁବନେଶ୍ୱର,ଜୁନ ୦୫ (ଲୋକାଲ ୱାୟାର): ଭୁବନେଶ୍ବରସ୍ଥିତ ଏକାମ୍ର ବନରେ ଶିଳ୍ପିକା ଅନୁଷ୍ଠାନ ପକ୍ଷରୁ ବିଶ୍ୱ ପରିବେଶ ଦିବସରେ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଥିବା ସଂସ୍ଥାର ଆୟୋଜକ ବୁଧବାର କହିଛନ୍ତି ।

ଏହି ଦିବସ ଉପଲକ୍ଷେ ‘ପରିବେଶ ସୁସ୍ଥ ରହିଲେ ମଣିଷ ସୁସ୍ଥ ରହିବ’ ବାର୍ତ୍ତା ପ୍ରଦାନ କରାଯାଇଛି ।

ପାର୍ବତୀ ବାରିକଙ୍କ ପରିଚାଳନାରେ ପିଲାମାନଙ୍କ ମଧ୍ୟରେ ଚିତ୍ରାଙ୍କନ ପ୍ରତିଯୋଗିତା ମଧ୍ୟ ଅନୁଷ୍ଠିତ ହୋଇଥିବା ସେ କହିଛନ୍ତି।

ଅନୁଷ୍ଠାନର ସମ୍ପାଦକ ବାସୁଦେବ ନାଥଙ୍କ ସଂଯୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସମାଜସେବୀ ଲିଙ୍ଗରାଜ ସାହୁ ଯୋଗ ଦେଇ ଔଷଧୀୟ ଚାରା ବଣ୍ଟନ କରିଥିଲେ ।

ଏଥିରେ ସମ୍ମାନୀୟ ଅତିଥି ଭାବେ ପଟ୍ଟଚିତ୍ରଶିଳ୍ପୀ ରବିନ୍ଦ୍ର କୁମାର ମହାରଣା ଓ ଚିତ୍ରଶିଳ୍ପୀ ଜଗନ୍ନାଥ ଦାସ ଯୋଗ ଦେଇଥିଲେ ।

ଲୋକାଲ ୱାୟାର