ରାଜନୀତି

ଭୁବନେଶ୍ୱର, ମାର୍ଚ୍ଚ ୧ (ଲୋକାଲ ୱାୟାର) : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେଡି ନେତା ସଞ୍ଜୟ ଦାସବର୍ମାଙ୍କୁ ଯୋଜନା ବୋର୍ଡ ଉପାଧ୍ୟକ୍ଷ ଦାୟିତ୍ଵ ସହ କ୍ୟାବିନେଟ ପାହ୍ୟା ମାନ୍ୟତା ଦେଇଥିବା ରବିବାର ଜଣେ ଅଧିକାରୀ ସୂଚନା ଦେଇଛନ୍ତି ।

ଗତବର୍ଷ ନିର୍ବାଚନରେ ସେ ବ୍ରହ୍ମଗିରି ଆସନରୁ ନିର୍ବାଚନ ଲଢିଥିବା ବେଳେ ବିଜେପି ପ୍ରାର୍ଥୀ ଲଲାଟେନ୍ଦୁ ମହାପାତ୍ରଙ୍କ ଠାରୁ ପରାସ୍ତ ହୋଇଥିଲେ ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୭(ଲୋକାଲ ୱାୟାର): ଓଡ଼ିଶାର ୪ଟି ଆସନ ସମେତ ରାଜ୍ୟସଭାର ୫୫ଟି ଖାଲି ଆସନ ପାଇଁ ମାର୍ଚ୍ଚ ୨୬ରେ ନିର୍ବାଚନ ହେବ ।

ଏ ନେଇ ଭାରତୀୟ ନିର୍ବାଚନ କମିଶନଙ୍କ ଘୋଷଣା ପରେ ଶାସକ ବିଜେଡିର ରଣନୀତି କଣ ହେବ ତାକୁ ନେଇ ରାଜନୈତିକ ମହଲରେ କଳ୍ପନାଜଳ୍ପନା ଆରମ୍ଭ ହୋଇଛି ।

ବିଧାନସଭାରେ ବିଜେଡିର ୧୧୩ ବିଧାୟକ ଥିବାରୁ ଦଳ ତିନିଟି ଆସନ ଅନାୟାସରେ ଜିତିପାରିବ ।

ହେଲେ ଚତୁର୍ଥ ଆସନ ପାଇଁ ନିର୍ବାଚନ ରୋମାଞ୍ଚକର ହେବ ।

କାରଣ ମୁଖ୍ୟ ବିରୋଧୀ ଭାରତୀୟ ଜନତା ପାର୍ଟି (ବିଜେପି) ନିକଟରେ ମଧ୍ୟ ଏଥିପାଇଁ ଆବଶ୍ୟକ ସଂଖ୍ୟା ନାହିଁ ।

ବିଧାନସଭାରେ ବିଜେପିର ୨୩ ସଦସ୍ୟ ଅଛନ୍ତି । ସେପଟେ ବିଧାନସଭାରେ କଂଗ୍ରେସର ୯ ସଦସ୍ୟ ଥିବାରୁ ସେମାନେ ନିର୍ବାଚନରେ ପ୍ରାର୍ଥୀ ବି ଦେଇପାରିବେ ନାହିଁ ।

ତେବେ ବିଧାନସଭାର ଏକମାତ୍ର ସିପିଏମ ସଦସ୍ୟଙ୍କ ସମର୍ଥନ ନେଇ ଦଳ ପ୍ରାର୍ଥୀ ଦେଇପାରିବ ।

ଖାଲି ପଡୁଥିବା ଚାରିଟି ଆସନ ମଧ୍ୟରୁ ୩ଟି ବିଜେଡି ଓ ଗୋଟିଏ କଂଗ୍ରେସ ପାଖରେ ଥିଲା ।

୨୦୧୯ ସାଧାରଣ ନିର୍ବାଚନରେ ରାଜ୍ୟସଭା ସଦସ୍ୟ ଅନୁଭବ ମହାନ୍ତି କେନ୍ଦ୍ରାପଡ଼ାରୁ ବିଜେଡି ଟିକେଟରେ ଲୋକସଭାକୁ ନିର୍ବାଚିତ ହେବା ପରେ ପ୍ରଥମ ଆସନ ଖାଲି ପଡ଼ିଥିଲା ।

ତାଙ୍କ କାର୍ଯ୍ୟକାଳ ଆଉ ବର୍ଷକରୁ କମ୍ ଥିବାରୁ ସେହି ଆସନ ପାଇଁ ନିର୍ବାଚନ ହୋଇନଥିଲା ।

ଅନ୍ୟ ତିନି ସଦସ୍ୟ ନରେନ୍ଦ୍ର କୁମାର ସ୍ୱାଇଁ ଓ ସରୋଜିନୀ ହେମ୍ବ୍ରମ (ଉଭୟ ବିଜେଡି) ଓ ରଞ୍ଜିବ ବିଶ୍ୱାଳ (କଂଗ୍ରେସ) ଏପ୍ରିଲ ୨ରେ ଅବସର ନେବେ ।

ତିନିଟି ଆସନରେ ବିଜେଡି ଜିତିବା ପକ୍କା ଥିବାରୁ ଏବେ ଚତୁର୍ଥ ଆସନ ଉପରେ ସମସ୍ତଙ୍କ ନଜର ।

ଏଥିପାଇଁ ପ୍ରାର୍ଥୀ ଦେବାକୁ ବିଜେପି ଘୋଷଣା କରିବା ପରେ ରାଜନୀତି ଜୋର୍ ଧରିଛି ।

ଓଡ଼ିଶା ବିଧାନସଭାର ସଦସ୍ୟ ସଂଖ୍ୟା ୧୪୭ ଓ ଚାରିଟି ଆସନ ଜିତିବା ପାଇଁ ବିଜେଡିକୁ ୧୨୦ଟି ଭୋଟ ଦରକାର ପଡ଼ିବ ।

ଚତୁର୍ଥ ଆସନ ଜିତିବା ପାଇଁ ବିଜେଡିର ୭ଟି ଭୋଟ କମ୍ ପଡୁଥିବା ବେଳେ ୨୩ ବିଧାୟକ ଥିବା ବିଜେପିର ମଧ୍ୟ ଚତୁର୍ଥ ଆସନ ଜିତିବା ପାଇଁ ୭ଟି ଭୋଟ କମ ପଡୁଛି ।

ଚତୁର୍ଥ ଆସନ ପାଇଁ ବିଜେପିକୁ ବିଜେଡି ସମର୍ଥନ ଦେଇପାରେ ବୋଲି ଅନୁମାନ କରାଯାଉଛି ।

ପୂର୍ବରୁ ଆଞ୍ଚଳିକ ଦଳ ଉପହାର ସ୍ୱରୂପ ଗୋଟିଏ ଆସନ ନିଜ ପୂର୍ବତନ ସହଯୋଗୀ ଦଳକୁ ଦେଇସାରିଛି ।

ପୂର୍ବତନ ଆଇଏଏସ ଅଫିସର ଅଶ୍ୱିନୀ ବୈଷ୍ଣବଙ୍କ ପ୍ରାର୍ଥୀତ୍ୱକୁ ନବୀନ ପଟ୍ଟନାୟକ ନେତୃତ୍ୱାଧୀନ ବିଜେଡି ସମର୍ଥନ କରିବା ଏହି କଳ୍ପନାଜଳ୍ପନାକୁ ବଢ଼ାଉଛି ।

କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଫେବ୍ରୁଆରୀ ୨୮ରୁ ଇଷ୍ଟ ଜୋନ କାଉନସିଲ ବୈଠକରେ ଯୋଗ ଦେବାକୁ ଦୁଇ ଦିନିଆ ଓଡ଼ିଶା ଗସ୍ତରେ ଆସିବା ଓ ବିଭିନ୍ନ ଜାତୀୟ ପ୍ରସଙ୍ଗରେ ଦୁଇ ଦଳଙ୍କ ସମାନ ଆଭିମୁଖ୍ୟ ଏସବୁ ଆଲୋଚନାକୁ ଖୋରାକ ଯୋଗାଉଛି ।

ତେବେ ମଙ୍ଗଳବାର ବିଜେଡି ପକ୍ଷରୁ କୁହାଯାଇଛି ଆସନ ଭାଗବଣ୍ଟା ନେଇ ଦଳ କୌଣସି ଚାପରେ ନାହିଁ ।

ଆମେ ଆଗାମୀ ନିର୍ବାଚନରେ ଆସନ ଭାଗବଣ୍ଟାକୁ ନେଇ ଚାପରେ ନାହୁଁ ।
ଦଳର ହିତକୁ ଦୃଷ୍ଟିରେ ରଖି ହାଇକମାଣ୍ଡ ଏ ସମ୍ପର୍କରେ ନିଷ୍ପତି ନେବେ ବୋଲି ସରକାରୀ ମୁଖ୍ୟ ସଚେତକ ପ୍ରମିଳା ମଲ୍ଲିକ ସମ୍ବାଦଦାତାଙ୍କୁ କହିଛନ୍ତି ।

ବିଜେଡି ମୁଖପାତ୍ର ସମୀର ରଞ୍ଜନ ଦାସ ମଧ୍ୟ କହିଛନ୍ତି ମୁଖ୍ୟମନ୍ତ୍ରୀ ଓ ଦଳର ସଭାପତି ନବୀନ ପଟ୍ଟନାୟକ ପ୍ରାର୍ଥୀ ଚୟନ କରିବେ ।

ଅନ୍ୟ ପକ୍ଷରେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି ପ୍ରାର୍ଥୀ ଦେବା ପାଇଁ ତାଙ୍କ ଦଳ ନିକଟରେ ଆବଶ୍ୟକ ସଂଖ୍ୟା ନାହିଁ ।

କିନ୍ତୁ ବାମ ଦଳର ସମର୍ଥନ ନେଇ କଂଗ୍ରେସ ପ୍ରାର୍ଥୀ ଦେଇପାରିବ । ପାର୍ଟି ସୁପ୍ରିମୋ ଏ ସମ୍ପର୍କରେ ନିଷ୍ପତ୍ତି ନେବେ ।

ବିଜେପିର ପ୍ରାର୍ôଥତ୍ୱକୁ ନେଇ ମିଶ୍ର କହିଛନ୍ତି ବିଜେଡି ଉପରେ ଚାପ ପ୍ରୟୋଗ କରି ବିଜେପି ଯେତେ ଇଚ୍ଛା ସେତେ ଆସନ ପାଇପାରିବ ।

ବିରୋଧୀ ଦଳ ନେତା ଓ ବରିଷ୍ଠ ବିଜେପି ନେତା ପ୍ରଦୀପ୍ତ ନାୟକ କହିଛନ୍ତି ବିଜେପି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ଓ କେନ୍ଦ୍ରୀୟ ନେତୃତ୍ୱ ପ୍ରାର୍ଥୀ ଚୟନ କରିବେ ।

ଭାରତୀୟ ନିର୍ବାଚନ କମିଶନଙ୍କ ଘୋଷିତ ସୂଚୀ ଅନୁଯାୟୀ ମାର୍ଚ୍ଚ ୬ରେ ନିର୍ବାଚନ ପାଇଁ ବିଜ୍ଞପ୍ତି ଜାରି, ମାର୍ଚ୍ଚ ୧୩ ନୋମିନେସନ ଫାଇଲ କରିବାର ଶେଷ ତାରିଖ ଓ ମାର୍ଚ୍ଚ ୨୬, ପୂର୍ବାହ୍ନ ୯ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ଭୋଟିଂ ଚାଲିବ ।

ସେହିଦିନ ଅପରାହ୍ନ ୫ଟାରେ ଭୋଟ ଗଣତି ହେବ ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୬(ଲୋକାଲ ୱାୟାର): ଆଗାମୀ ପେବ୍ରୁଆରୀ ୨୮ ତାରିଖରେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା ଦିନିକିଆ ଓଡ଼ିଶା ଗସ୍ତରେ ଆସୁଥିବା ବେଳେ ଏହା ପୂର୍ବରୁ ଦାଗରିକତା ସଂଶୋଧନ ଆଇନ ସମ୍ପର୍କରେ ସଚେତନତା ସକାଶେ ବିଜେପି ପକ୍ଷରୁ ଏକ ପ୍ରଚାର ଗାଡ଼ିକୁ ବୁଧବାର ଦଳର ରାଜ୍ୟ ସଭାପତି ସମୀର ମହାନ୍ତି ପତାକା ଦେଖାଇ ଶୁଭାରମ୍ଭ କରିଛନ୍ତି ।

ଶ୍ରୀ ଶାହା ଭୁବନେଶ୍ୱର ସ୍ଥିତ ଜନତା ମଇଦାନ ଠାରେ ନାଗରିକତା ସଂଶୋଧନ ଆଇନ ସଂପର୍କରେ ଏକ ବିଶାଳ ଜନ ସମାବେଶକୁ ସମ୍ଭୋଧିତ କରିବାର କାର୍ଯ୍ୟକ୍ରମ ରହିଛି ।

ପ୍ରଚାର ଗାଡି ଏବଂ ଡାକବାଜି ଯନ୍ତ୍ର ମାଧ୍ୟମରେ ଭୁବନେଶ୍ୱର ବାସିନ୍ଦାଙ୍କ ପାଖରେ ଏହି ସନ୍ଦେଶ ପହଂଚାଇବା ପାଇଁ ବ୍ୟବସ୍ଥା କରାଯାଇଛି ।

ଏହି ଗାଡି ଗୁଡିକ ରାଜଧାନୀର ବିଭିନ୍ନ ୱାର୍ଡ ଗୁଡିକରେ ବୁଲି ପ୍ରଚାର କରିବେ ।

ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଶାହା ସିଏଏ ସଂପର୍କରେ ଲକ୍ଷ ଲକ୍ଷ ଜନସାଧାରଣଙ୍କୁ ସମ୍ଭୋଧିତ କରିବେ ।

ଏହି ଜନସାମବେଶରେ ବିପୁଳ ଭାବେ ସାଧାରଣ ଜନତା ଯୋଗ ଦେଇ ରାଷ୍ଟ୍ର ହିତରେ ନିଜକୁ ସାମିଲ କରିବା ପାଇଁ ରାଜ୍ୟ ବିଜେପି ଗଣମାଧ୍ୟମ ବିଭାଗ ମୁଖ୍ୟ ଓ ରାଜ୍ୟ ମୁଖପାତ୍ର ଗୋଲକ ମହାପାତ୍ର ଆହ୍ୱାନ ଦେଇଛନ୍ତି ।

ପ୍ରଚାର ଗାଡ଼ି ଶୁଭାରମ୍ଭ ଅବସରରେ ବିଧାୟକ ଜୟନ୍ତ ଷଡ଼ଙ୍ଗୀ ଓ ଲଲିତେନ୍ଦୁ ମହାପାତ୍ର, ରାଜ୍ୟ ସଂପାଦିକା ଡ. ଲେଖାଶ୍ରୀ ସାମନ୍ତସିଂହାର, ରାଜ୍ୟ ମୁଖପାତ୍ର ଦିଲୀପ ମହାନ୍ତି, ବାବୁ ସିଂ, ଇରାଶୀଷ ଆଚାର୍ଯ୍ୟ, ଯୁବମୋର୍ଚ୍ଚା ରାଷ୍ଟ୍ରୀୟ ଉପସଭାପତି ଠାକୁର ରଂଜିତ ଦାସ, ଜୟନ୍ତ ଜେନାଙ୍କ ପ୍ରମୁଖ ଉପସ୍ଥିତ ଥିଲେ ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୩(ଲୋକାଲ ୱାୟାର): ଶାସକ ବିଜୁ ଜନତା ଦଳର ସଭାପତି ପଦବୀ ପାଇଁ ଦଳ ଅଧ୍ୟକ୍ଷ ନବୀନ ପଟ୍ଟନାୟକ ରବିବାର ନିଜ ନାମାଙ୍କନ ପତ୍ର ଦାଖଲ କରିଛନ୍ତି ।

ଦଳର ବର୍ତ୍ତମାନ ସଭାପତି ରହିଥିବା ନବୀନ ବିଜେଡି କାର୍ଯ୍ୟାଳୟରେ ପହଞ୍ଚି ପୁଣିଥରେ ଏହି ପଦ ଲାଗି ପ୍ରାର୍ଥୀ ପତ୍ର ଦାଖଲ କରିଛନ୍ତି ।

୧୯୯୭ ରେ ଆଞ୍ଚଳିକ ଦଳ ଭାବେ ସ୍ଥାପିତ ହୋଇଥିବା ବିଜେଡିର ସାଙ୍ଗଠନିକ ନିର୍ବାଚନ ପ୍ରତି ତିନି ବର୍ଷରେ ହୋଇ ଥାଏ ।

ତାଙ୍କ ବିରୋଧରେ କେହି ପ୍ରତିଦ୍ୱନ୍ଦିତା କରୁ ନ ଥିବାରୁ ଶ୍ରୀ ପଟନାୟକ ପୁଣି ଥରେ ଏହି ପଦରେ ରହିବା ନିଶ୍ଚିତ ହୋଇଯାଇଛି ।

ଲୋକାଲ ୱାୟାର