ଭୁବନେଶ୍ୱର,ନଭେମ୍ବର ୧୨(ଲୋକାଲ ୱାୟର) ଓଡ଼ିଶାର ସଫଳ କାହାଣୀରେ ସାମିଲ ହେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୋମବାର ଭୁବନେଶ୍ୱରରେ ଅନୁଷ୍ଠିତ ମେକ୍ ଇନ ଓଡ଼ିଶା କନକ୍ଲେଭରେ ସମବେତ ଦେଶବିଦେଶର ଶିଳ୍ପପତିମାନଙ୍କୁ ଆହ୍ୱାନ ଦେଇଛନ୍ତି ।
କନକ୍ଲେଭର ପ୍ଲେନାରି ଅଧିବେଶନରେ ଉଦବୋଧନ ଦେଇ ମୁଖ୍ୟମନ୍ତ୍ରୀ ମେକ୍ ଇନ୍ ଓଡ଼ିଶା କନକ୍ଲେଭ-୨୦୧୮ରେ ଯୋଗ ଦେଇଥିବାରୁ ସମସ୍ତଙ୍କୁ ଧନ୍ୟବାଦ ଜଣାଇଥିଲେ । ରାଜ୍ୟର ବିକାଶ ପ୍ରକ୍ରିୟାରେ ସମସ୍ତେ ସାମିଲ ହେବେ ବୋଲି ସେ ଆଶା ପ୍ରକାଶ କରିଥିଲେ ।
ସେ କହିଥିଲେ, ଖଣିଜ ପଦାର୍ଥ ଉତ୍ପାଦନ ଏବଂ ପ୍ରକ୍ରିୟାକରଣରେ ଓଡ଼ିଶା ଏକ ଅଗ୍ରଣୀ ରାଜ୍ୟ । ଦେଶର ମୋଟ ଆଲୁମିନିୟମ୍ ଉତ୍ପାଦନରେ ରାଜ୍ୟର ଅବଦାନ ୫୦%ରୁ ଅଧିକ ।
ପ୍ରମୁଖ ଉତ୍ପାଦନ କ୍ଷେତ୍ରଗୁଡିକୁ ତ୍ୱରାନ୍ୱିତ କରିବା ‘ଓଡ଼ିଶା ଶିଳ୍ପ ବିକାଶ ଯୋଜନା:ଭିଜନ ୨୦୨୫’ ଆରମ୍ଭ ହୋଇଛି । ୨୦୨୫ ସୁଦ୍ଧା ୬ ଟି ପ୍ରମୁଖ କ୍ଷେତ୍ରରେ ୨ ଲକ୍ଷ ୫୦ ହଜାର କୋଟି ଟଙ୍କାର ନିବେଶ ଲକ୍ଷ୍ୟ ରହିଛି ।
ଭୁବନେଶ୍ୱରରେ ରାଜ୍ୟ ସରକାର ୧୮ ମହଲା ବିଶିଷ୍ଟ ଏକ ବିଶ୍ୱଶ୍ରେଣୀୟ ଦକ୍ଷତା ବିକାଶ କେନ୍ଦ୍ର ‘ୱାର୍ଲ୍ଡ ସ୍କିଲ୍ ସେଣ୍ଟର’ ନିର୍ମାଣ କରିଛନ୍ତି । ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ଦ୍ୱାରା ପରିଚାଳିତ ହେଉଥିବା ଏ କେନ୍ଦ୍ର ପାଇଁ ସିଙ୍ଗାପୁର ଆଇଟିଇଇଏସ୍ ବୈଷୟିକ ସହାୟତା ଯୋଗାଇବ ।
ସେ କହିଥିଲେ, ରାଜ୍ୟର ଷ୍ଟାର୍ଟଅପ୍ ନୀତି ମଧ୍ୟ ବେଶ୍ ପ୍ରଗତିଶୀଳ । ଗତ ୧୮ ମାସ ମଧ୍ୟରେ ୩୧୦ଟି ଷ୍ଟାର୍ଟଅପ୍ ପଞ୍ଜୀକୃତ ହୋଇଛି । ସେମାନଙ୍କ ମଧ୍ୟରୁ ୪୦ଟିକୁ ଆର୍ଥିକ ସହାୟତା ମଧ୍ୟ ଯୋଗାଇ ଦିଆଯାଇଛି । ୨୦୨୦ ସୁଦ୍ଧା ରାଜ୍ୟରେ ଅତିକମ୍ରେ ୧,୦୦୦ ଷ୍ଟାର୍ଟଅପ୍ ସୃଷ୍ଟି ପାଇଁ ଲକ୍ଷ୍ୟ ରଖାଯାଇଛି ବୋଲି ସେ କହିଥିଲେ ।
ଏହି ଅଧିବେଶନରେ ଅନ୍ୟମାନଙ୍କ ମଧ୍ୟରେ ଶିଳ୍ପ ମନ୍ତ୍ରୀ ଅନନ୍ତ ଦାସ, ମୁଖ୍ୟ ସଚିବ ଆଦିତ୍ୟ ପ୍ରସାଦ ପାଢ଼ୀ, ଶିଳ୍ପ ସଚିବ ସଞ୍ଜୀବ ଚୋପ୍ରାଙ୍କ ସମେତ ୪୦ରୁ ଅଧିକ ଶିଳ୍ପ ମୁଖ୍ୟ ଉପସ୍ଥିତ ଥିଲେ ।
ଲୋକାଲ ୱାୟର