The hyper local news platform
ଭୁବନେଶ୍ୱର, ନଭେମ୍ବର ୧୩ (ଲୋକାଲ ଓୟାର) ଭଦ୍ରକ ଜିଲ୍ଲାର ଧାମରା ଠାରେ ଆଦାନୀ ଶିଳ୍ପ ସମୂହ ସଂସ୍ଥା ପାଞ୍ଚଶହ କୋଟି ଟଙ୍କା ବ୍ୟୟରେ ଏକ ବିମାନ ବନ୍ଦର କରିବାପାଇଁ ରାଜ୍ୟ ସରକାରଙ୍କ ସହ ସୋମବାର ଏକ ବୁଝାମଣାପାତ୍ର ସ୍ଵାକ୍ଷର କରିଥିବା ଜଣେ ବିଭାଗୀୟ ସରକାରୀ ଅଧିକାରୀ ମଙ୍ଗଳବାର କହିଛନ୍ତି।
ଏହି ବିମାନ ବନ୍ଦର ପ୍ରତିଷ୍ଠିତ ହେଲେ କମ୍ପାନୀ ମାଲିକାନାରେ ପରିଚାଳିତ ଧାମରା ବନ୍ଦରକୁ ଯୋଗାଯୋଗ ଅଧିକ ସହଜ ହେବ ବୋଲି ସେ କହିଛନ୍ତି। ଧାମରା ବନ୍ଦର ପାଖରେ ଉପଲବ୍ଧ ଜମିରେ ଏହି ଏୟାରଷ୍ଟ୍ରିପ ପ୍ରତିଷ୍ଠା ପାଇଁ ରାଜ୍ଯ ସରକାର ଆବଶ୍ୟକ ରିପୋର୍ଟ ପ୍ରସ୍ତୁତ କରିବାକୁ ଧାମରା ପୋର୍ଟ କମ୍ପାନିକୁ କହିଥିଲେ।
ଲୋକାଲ ଓୟାର
ଭୁବନେଶ୍ୱର, ନଭେମ୍ବର ୧୩ (ଲୋକାଲ ଓୟାର).-ଭୁବନେଶ୍ୱର ଠାରେ ଆରମ୍ଭ ହୋଇଥିବା ପାଂଚଦିନିଆ ମେକ ଇନ ଓଡ଼ିଶା ସମ୍ମେଳନକୁ ସୋମବାର ଗୋଟିଏ ଦିନରେ ଦେଶ ବିଦେଶରୁ ବହୁ ଉଦ୍ୟୋଗପତି ସ୍ଵତନ୍ତ୍ର ବିମାନରେ ଆସିଥିବାରୁ ନିୟମିତ ଯାତାୟାତ କରୁଥିବା ବିମାନ ସହ ସେଗୁଡିକୁ ପରିଚାଳନା କରି ବିଜୁ ପଟ୍ଟନାୟକ ଆନ୍ତର୍ଜାତିକ ବିମାନ ବନ୍ଦର ତିଆରି କରିଛି ଆଉ ଏକ ରେକର୍ଡ ।
ବିମାନ ବନ୍ଦରର ଜଣେ ବରିଷ୍ଠ ଅଧିକାରୀଙ୍କ କହିବା ଅନୁଯାୟୀ ମୁକେଶ ଅମ୍ବାନୀ, କୁମାର ମଙ୍ଗଳମ୍ ବିର୍ଲା, ଅନିଲ ଅଗ୍ରୱାଲ, ସଜ୍ଜନ ଜିନ୍ଦଲ ଓ ନବୀନ ଜିନ୍ଦଲଙ୍କ ସମେତ ଦେଶର ବଡ଼ ବଡ଼ ଶିଳ୍ପଦ୍ୟୋଗୀ ପ୍ରାୟ ବାରଟି ସ୍ବତନ୍ତ୍ର ବିମାନ ଯୋଗେ ସୋମବର ଭୁବନେଶ୍ୱରରେ ଆସି ପହଞ୍ଚି ଥିଲେ।
୩୩ଟି ବିମାନ ନିୟମିତ ଭାବେ ପରିଚାଳନା କରୁଥିବା ବେଳେ ବିମାନ ବନ୍ଦର କର୍ମଚାରୀଙ୍କୁ ଏହି ସ୍ଵତନ୍ତ୍ର ବିମାନର ପରିଚାଳନା ମଧ୍ୟ କରିବାକୁ ପଡିଥିଲା। ବିମାନ ବନ୍ଦରରେ ନିୟମିତ ଚଳାଚଳ କରୁଥିବା ବିମାନ ବ୍ୟତୀତ ପ୍ରାୟ ୧୫ ଟି ବଡ ବିମାନ ଓ ଦଶଟି ଛୋଟ ବିମାନ ପରିଚାଳନା କରିବାର କ୍ଷମତା ରହିଥିବାରୁ ଏହି କାର୍ଯ୍ୟପାଇଁ ସେମାନଙ୍କୁ ଅସୁବିଧା ହୋଇନଥିବା ସେ ମଙ୍ଗଳବାର କହିଛନ୍ତି।
ଏଠାରେ ଉଲ୍ଲେଖଯୋଗ୍ୟ ଯେ ୧୯୬୨ରେ ଭୁବନେଶ୍ୱର ବିମାନ ବନ୍ଦର କାର୍ଯ୍ୟକ୍ଷମ ହୋଇଥିବାବେଳେ ଅଗଷ୍ଟ ୨୦୧୬ ଠାରୁ ଏହା ଦିବା ରାତ୍ରି କାର୍ଯ୍ୟ କରି ଆସୁଛି।
ଭାରତୀୟ ଜନତା ପାର୍ଟିର ନାତିୟ କାର୍ଯ୍ୟକାରିଣୀ ବୈଠକରେ ଗତ ବର୍ଷ ଏହି ବିମାନ ବନ୍ଦରକୁ ନିୟମିତ ଯାତାୟାତ କରୁଥିବା ବିମାନ ବ୍ଯତୀତ ନଅଟି ସ୍ଵତନ୍ତ୍ରବିମାନର ପରିଚାଳନା କରିବାକୁ ପଡିଥିଲା।
ଲୋକାଲ ଓୟାର
ପୁରୀ, ନଭେମ୍ବର ୧୩ (ଲୋକାଲ ୱାୟର) ଭୁବନେଶ୍ୱରରେ ଅନୁଷ୍ଠିତ ମେକ୍ ଇନ କନକ୍ଲେଭରେ ଯୋଗ ଦେବାକୁ ଓଡ଼ିଶା ଆସିଥିବା ରିଲାଏନ୍ସ ଇଣ୍ଡଷ୍ଟ୍ରିଜ୍ ମୁଖ୍ୟ ମୁକେଶ ଅମ୍ବାନି ସୋମବାର ପୁରୀ ଯାଇ ଶ୍ରୀମନ୍ଦିରରେ ପ୍ରଭୁଙ୍କୁ ଦର୍ଶନ କରିବା ସହ ଝିଅ ବାହାଘର ନିମନ୍ତେ ଶ୍ରୀଜଗନ୍ନାଥଙ୍କୁ ନିମନ୍ତ୍ରଣ ପତ୍ର ଦେଇଛନ୍ତି ।
ମୁକେଶଙ୍କ କନ୍ୟା ଈଶା ଅମ୍ବାନି ଶିଳ୍ପପତି ଆନନ୍ଦ ପିରାମଲଙ୍କୁ ବିବାହ କରୁଛନ୍ତି ।
ଗୁଜରାଟୀ ପରମ୍ପରା ଅନୁଯାୟୀ ବିବାହ ପୂର୍ବରୁ ଠାକୁରଙ୍କୁ ନିମନ୍ତ୍ରଣ ଦିଆଯିବା ସହ ଆଶୀର୍ବାଦ ଲୋଡ଼ା ଯାଇଥାଏ । ତେଣୁ ମୁକେଶ ସୋମବାର ଅପରାହ୍ଣରେ ଶ୍ରୀମନ୍ଦିର ଯାଇ ନିମନ୍ତ୍ରଣ ପତ୍ର ଦେଇଥିଲେ ।
ସେବକ ଏହାକୁ ଠାକୁରଙ୍କ ସିଂହାସନରେ ଛୁଆଁଇ ରଖିଥିଲେ । ପ୍ରତିବଦଳରେ ମହାପ୍ରଭୁଙ୍କ ଆଜ୍ଞା ଭାବେ ମୁକେଶଙ୍କୁ ଗୁଆ, ମହାପ୍ରସାଦ, ଫୁଲତୁଳସୀ ଦିଆଯାଇଥିବା କହିଛନ୍ତି ତାଙ୍କ ପଣ୍ଡା ରଘୁନାଥ ଗୋଚ୍ଛିକାର ।
ମୁକେଶ ଅମ୍ବାନି ସୋମବାର ଅପରାହ୍ଣରେ ହେଲିକପ୍ଟର ଯୋଗେ ଯାଇ ପୁରୀ ତାଳବଣିଆରେ ଓହ୍ଲାଇଥିଲେ ।
ସେଠାରୁ ଜେଡ୍ କାଟାଗୋରୀ ସୁରକ୍ଷାରେ ଯାଇ ଶ୍ରୀମନ୍ଦିର ନିକଟରେ ପହଞ୍ଚିଥିଲେ । ସିଂହଦ୍ୱାର ବାଟେ ବାଇଶିପାହାଚ, ଘଣ୍ଟିଦ୍ୱାର ବାଟେ ନାଟମଣ୍ଡପକୁ ପ୍ରବେଶ କରିଥିଲେ ।
ଭିତରକାଠ ପାଖକୁ ଯାଇ ଜଗନ୍ନାଥଙ୍କୁ ଦର୍ଶନ କରିଥିଲେ । ପରେ ଲକ୍ଷ୍ମୀଙ୍କ ମନ୍ଦିରେ ମହାଲକ୍ଷ୍ମୀଙ୍କ ଦର୍ଶନ କରିଥିଲେ । ଫେରିବା ବେଳେ ବାଇଶ ପାହାଚରେ ଛିଡ଼ା ହୋଇ ପ୍ରଭୁଙ୍କୁ ପ୍ରଣାମ କରିବାକୁ ଭୁଲି ନଥିଲେ ।
ମୁକେଶ ଶ୍ରୀମନ୍ଦିରରୁ ବାହାରିବା ପୂର୍ବରୁ ତାଙ୍କ ପଣ୍ଡାଙ୍କୁ ଏକ ଲଫାପାରେ ଦକ୍ଷିଣା ଦେଇଥିଲେ । ଝିଅ ବାହାଘର ପାଇଁ ତାଙ୍କୁ ମଧ୍ୟ ମୁକେଶ ନିମନ୍ତ୍ରଣ କରିଥିବା ରଘୁନାଥ କହିଛନ୍ତି ।
ଲୋକାଲ ୱାୟର